Hujii Ergamittootaa 5
5
Anaaniya'aa Fi Sappiiraa
1Anaaniyaa ka jedhamu naminni tokko haadha worraa isaa Sappiiraa woliin ta'ee lafa ni gurgure, 2haati worraa isaa'llee uduma beekitu gurgurttaa lafaa irraa wolakkaa hanbiseeti, wolakkaa fidee ergamittootatti ni kenne, 3Phexiros garuu akkana ni jedheen, «Yaa Anaaniyaas! Hafuura Qulqulluu akka sobdduu fi gurgurttaa lafaa irraa'llee wolakkaa akka hanbifattuuf Sheexanni si taasise, maali'iitiif gara onnee keetii aseene? 4Uduu hin gurguriniin duranatti laftti keetuma hin turree? Eegaa gurgurtteen duubatti'llee qarshiin keetuma hin turre ree? eegaa, waan kana maali'iif onnee keetitti yaadde? ka sobdde Waaqa malee namaa miti.» 5Anaaniyaan dubbii kana yeroo dhagayetti kufee ni du'e, waan kana namoonni dhagayan marrinuu haalaan ni sodaatan. 6Gaayeeyyiin'llee ka'anii reeffa isaa kafananiiti, fidaanii ni awwaalaniin.
7Saa'aatii sadiin duubatti haati worraa Anaaniyaasii waan abbaa worraa isi'ii irra gayee uduu hin beekin ni dhuftte. 8Phexiros'llee, «Mee natti himi lafa keessan ka gurgurttan qarshima haganaa titti moo?» ni jedheen. Isiin'llee, «Ee! Qarshima haganaa titti gurgurre» jette.
9Yeroo kana Phexiros, «Hafuura Waaqaa qormaatu'uuf attamitti wolii galttan? Kunoo! Abbaa worraa kee awwaalanii namoonni deebi'an balbala ni jiran, si'llee fidanii haa awaalan» jedheen. 10Isiin'llee dimmaa miila isaa jalatti kuftteeti ni duute, gayeeyyiin'llee yoo galan duutee argataniiniiti, fidanii abbaa worraa isi'ii biratti ni awwaalaniin. 11Mana Waaqeffanna'aa maraa fi namoota waan kana dhagayan mara irrattuu, sodaan ol aanaan ni ta'e.
Ergamittoota Harkatti Wonittoota Baasaa Fi Maalalee Taasifaman
12Baasonni baayi'e'ee fi wonittoonni baasaa ummata jiddu'utti harka ergamittootaa titti ni raawwataman ture, marrinuu onnee tokkoon ta'anii xurree keessa dedeebi'iinssa Solomoonii titti, wol ni gayan turan. 13Namoota isaaniin ala ta'an keessaa tokkochumaan'llee isa woliin ta'uuf, ka uggu hin turre, haa ta'u malee ummanni isaan ni kabaja ture. 14Goofta'atti worri amanan dhiiraa fi dubbarttoonni'llee lakkofssi isaanii haalaan baayi'ata'aa ni deema ture. 15Namoonni'llee dhukkubsattoota baayi'ee gara karaa baasa'aa, sire'ee fi wosaasaa irra'llee isaan ni ciibissan ture. 16Namoonni maagaalota naannoo Yerusaalemii jiranii irraa dhukkubsatoota isaaniitii fi worra hafuura battiiwwaniin makkaraaran ni fidan turan, marrinuu ni fayyan ture.
Ergamittoota Irratti Ari'ataminni Ka'uu Isaa
17Itti gaafatamaan qeesotaatii fi isa woliin'llee worri turan, Saduuqoonni marrinuu hinaaffa'aan guutamanii isa irratti ni ka'an, 18ergamittoota qabaniiti gara mana hidhaa ummataa isaan ni galichan. 19Maleyikkan Waaqaa garuu halkaniin balbala mana hidha'aa banee, isaan ni baase, 20«Deemaa! Mana Waaqeffanna'aa keessa dhaabadhaatii, dubbii jireennaa kana maraa ummatatti himaa!» isaaniin jedhe. 21Ergamittoonni'llee ajaja isaa fudhatanii ganama obboro'oon gara Mana Waaqeffanna'aa aseenaniiti, barsiisuu jala ni qaban. Yeroo sanitti itti Gaafatamaan qeesotaatii fi worri isa woliin turan dhufanii miseensota yaa'iitii fi jaarsotii Yihudotaa mara, bakka tokko wolitti ni qaban, ergamittoota'llee akka isaan fidaniif namoota gara mana hidhaa ni ergan. 22Itti gaafatamoonni wordiyyootaa garuu gara mana hidhaa dhaqanii, ergamittoota achitti isaan hin arganne, deebi'anii dhufaniiti, 23«Balbaltti mana hidhaa haalaan cufamee, eegiddonni'llee balbala durana dhaabatanii isaan arganne, balbala mana hidha'aa yeroo bannetti garuu, keessatti eennuun'llee hin arganne» jedhanii ni dubbatan. 24Ajajaan wordiyyaa Mana Waaqeffanna'aatii fi itti gaafatamoonni qeesotaa kana yeroo dhagayanitti, «Wonitti kun maal ta'inna?» jechuun, dubbiin isaanii isaanitti bitaa ni ta'e. 25Yeroo kanatti naminni tokko dhufeeti, «Isaan mana hidha'aa titti galichitan kunoo! Mana Waaqeffanna'aa keessa dhaabatanii ummata ni barsiisan» jedhee isaantti hime. 26Bakkumatti itti gaafatamaan wordiyyoota Mana Waaqeffanna'aatii fi tajaajilttoonni isaa'llee dhaqanii isaan ni fidan, ka isaan fidan'llee huminnaan uduu hin ta'in, wolii galu'uun ture, kana'llee ka raawwatan ummanni dhaga'aan akka isaan hin woqarreef sodaachu'uun ture.
27Fidaniinii'llee yaa'ii durana ni dhaabachiisan, itti gaafatamaan qeesotaa'llee akkana jechuun isaan ni gaafate, 28#Mat 27:25.«Maqaa Yesusii waamu'uun akka hin barsiifnneef ciminnaan isin ajajinee turre, garuu kunoo, Yerusaalemiin barsiisa keessaniin guuttaniinii jirttan, isin du'a nama saniitiif itti gaafatamoota nu taasisu'uuf barbaaddan.»
29Phexirosii fi ergamittoonni bira'aa garuu akkana jechu'uun ni deebisan, «Namaa ajajamuu irra Waaqaaf ajajamu'utu nuuf mala, 30Waaqa abbootii keennaa isin muka irratti fannifttanii ka ajjeefttan, Yesusiin du'aa ni kaaseen, 31Waaqinni ummata Israa'eeliitiif gara Waaqaa titti deebi'uu fi dhiifama cubbu'uu akka kennuuf, Yesusiin durssa'aa fi Fayyisaa taasisee, mirga isaatiin ulfinnaan akka taa'u isa taasisee jira, 32waan kanaaf nu ragootaa, Hafuurri Qulqulluun Waaqinni worra ajajamu maraaf kenne'llee, raga'a.»
33Miseensonni yaa'ii kana yeroo dhagayanitti haalaan dallananii, ergamittoota ajjeesuuf ni barbaadan. 34Garuu ummata biratti ka kabajamee fi barsiisaa seera ka ta'e, Gamaalyaa ka jedhame Fariisichi miseensa yaa'ii tokko ka'eeti, yeroo muraasaaf ergamittoota akka dabal isaan taasisan ni ajaje. 35Kanaan duubatti miseensota yaa'ii'iitiin akkana ni jedheen, «Yaa namoota Israa'eelii! Namoota kanniin irratti waan raawwattaniif ufi eeggadhaa. 36Kanaan durana Toyidaas naminni jedhamu, ‹ani nama gudda'a› jedhee ka'ee ture, namoonni dhibba afurii ta'an'llee isaan woliin hirmmaatanii turan. Garuu inni ni ajjeefame, horddofttoonni isaa ni bittinaayan, kaayyoon isaa'llee akka waan hin turree ni ta'e. 37Saniin duubatti'llee lakkoofssi ummataa bara taasfametti Yihudichi nama biyya Galiila'aa ka'ee, namoonni baayi'een akka isa horddofan taasisee ture, inni'llee ni ajjeefame, worri isa horddofan marri'llee ni bittinaayan. 38Kanaaf amma'llee ani ka isiniin jedhu, namoota kanniin irraa akka ufi eeggatanii fi akka isaan dhiifttaniif, yaadinni kun yookiin hujiin kun nama biraa ka dhufe yoo ta'e ni bada. 39Waaqa biraa ka dhufe yoo ta'e garuu isaan balleessu'uuf hin danddeettan, gonkumaa Waaqa woliin wol dhabuu isinitti ta'a.» Isaan'llee gorssa Gamaalya'aa ni fudhatan.
40Kanaan duubatti ergamittoota gara isaanii waamanii isaan ni dhaansisan, maqaa Yesusii'llee waama'uun akka hin dubbanneef ajajaniiti, isaan gad ni dhiisan. 41Ergamittoonni garuu waayee maqaa Yesusiitiif salphinna fudhachuuf ka malan ta'uu isaaniitiin, gammada'aa bakka yaa'ii isaaniitii bayanii ni deeman, 42guyyama guyya'aan'llee Mana Waaqeffanna'aatii fi mana maratti'llee waayee Masihichaa waayee Yesusii, barsiisu'uu fi gammachuu isaa'llee dubbachuu, addaan hin kunne turan.
Currently Selected:
Hujii Ergamittootaa 5: ArsiDNT
Highlight
Share
Copy
Want to have your highlights saved across all your devices? Sign up or sign in
