ግብረ ሐዋርያት 1

ምዕራፍ 1

በእንተ አስተጋብኦ ዜና ሐዋርያት

1ቀዳሚ ጸሐፍኩ ለከ መጽሐፈ ኦ! ታኦፊላ በኵሉ ግብር ዘአኀዘ እግዚእነ ኢየሱስ ክርስቶስ ይግበር ወይምሀር። 2እስከ ዕለት እንተ ባቲ ዐርገ አዚዞ ለሐዋርያቲሁ ለእለ ኀረዮሙ በመንፈስ ቅዱስ። 3#ሉቃ. 17፥20-21፤ ማቴ. 27፥50-55። እሉ እሙንቱ እለ አርአዮሙ ወከሠተ ሎሙ ርእሶ ሕያወ እምድኅረ ሞተ በተኣምር ብዙኅ በአርብዓ ዕለት እንዘ ያስተርእዮሙ ወይዜንዎሙ ወይነግሮሙ በእንተ መንግሥተ እግዚአብሔር።

በእንተ ጥምቀት በመንፈስ ቅዱስ

4 # ዮሐ. 14፥16፤ 21፥11-15፤ 11፥16፤ 13፥24፤ ማቴ. 3፥11። ወእንዘ ይመስሕ#ቦ ዘይቤ «ሀሎ» ምስሌሆሙ አዘዞሙ ኢይፃኡ እምኢየሩሳሌም አላ ይጽንሑ ተስፋሁ ለአብ። 5ወይቤሎሙ ዮሐንስ አጥመቀ በማይ አንትሙሰ ታጠምቁ በመንፈስ ቅዱስ እስከ መዋዕል ዘኢኮነ ርኁቀ።

ተስእሎ በእንተ መንግሥተ እስራኤል

6 # ሉቃ. 24፥21። ወእንዘ ጉቡኣን እሙንቱ ተስእልዎ ወይቤልዎ እግዚኦ በዝኑ መዋዕል ታገብእ መንግሥተ ለደቂቀ እስራኤል። 7ወአውሥኦሙ ወይቤሎሙ ኢኮነ ለክሙ ታእምሩ መዋዕለ ወአዝማነ ዘሠርዐ አብ በምኵናኑ ባሕቲቱ። 8አላ ሶበ ይወርድ ላዕሌክሙ መንፈስ ቅዱስ ትነሥኡ ኀይለ ወትከውኑኒ ሰማዕትየ በኢየሩሳሌም ወበኵሉ ይሁዳ ወሰማርያ ወእስከ አጽናፈ ምድር።

በእንተ ዕርገት

9 # ማር. 16፥19፤ ሉቃ. 24፥51። ወዘንተ እንዘ ይብሎሙ ተለዐለ ወነሥአቶ ደመና ወዐርገ ሰማየ እንዘ እሙንቱ ይኔጽሩ ኀቤሁ ወተሰወረ እምአዕይንቲሆሙ። 10#ሉቃ. 24፥4። ወአስተርአይዎሙ ክልኤቱ ዕደው ወቆሙ ኀቤሆሙ ወይለብሱ ጸዐዳ። 11#ሉቃ. 21፥27። ወይቤልዎሙ አንትሙ ሰብአ ገሊላ ምንትኑ ቆምክሙ ትርአዩ ሰማየ ዝ ውእቱ ኢየሱስ ዘዐርገ እምኀቤክሙ ውስተ ሰማይ ወከማሁ ካዕበ ይመጽእ በከመ ርኢክምዎ የዐርግ ሰማየ። 12ወእምዝ ተሠውጡ ኢየሩሳሌም እምደብረ ዘይት ዘእቱት እምኢየሩሳሌም መጠነ ምርዋጸ ብእሲ እንተ ይእቲ መንገደ ቀዳም።

በእንተ ጸሎተ ማኅበር

13 # ማቴ. 10፥2፤ ሉቃ. 6፥13-15። ወበጺሖሙ ማኅደሮሙ ኀበ ይነብሩ ጽርሐ ዐርጉ ጴጥሮስ ወዮሐንስ ወያዕቆብ ወእንድርያስ ወፊልጶስ ወቶማስ ወማቴዎስ ወበርተሎሜዎስ ወያዕቆብ ወልደ እልፍዮስ ወስምዖን ቀናኢ ወይሁዳ ወልደ ዮሴፍ። 14እሉ ኵሎሙ ይፀመዱ ጸሎተ ኅቡረ ምስለ አንስት ወማርያም እሙ ለኢየሱስ ወአኀዊሁኒ።

በእንተ ኅርየት ሐዋርያዊት

15ወውእተ አሚረ ተንሥአ ጴጥሮስ ወቆመ ማእከለ አኀዊሁ ወይቤሎሙ እንዘ ሀለዉ ህየ ሰብእ ወየአክሉ ምእተ ወዕሥራ። 16#መዝ. 40፥9፤ ዮሐ. 18፥3። ስምዑ ኦ አኀዊነ አማን ሀለዎ ይብጻሕ ቃለ መጽሐፍ ዘይቤ መንፈስ ቅዱስ በአፈ ዳዊት በእንተ ይሁዳ ዘውእቱ ኮኖሙ መርሐ ለእለ አኀዝዎ ለእግዚእ ኢየሱስ። 17እንዘ ኊሉቍ ውእቱ ምስሌነ ወከፈሎ ዘንተ መልእክተ። 18#ማቴ. 27፥3-10። ወእምዝ ተሣየጠ ዐጸደ በዐስበ ዐመፃሁ ወተነጽሐ ላዕለ ምድር በገጹ ወተሠጥቀ ገቦሁ ወተክዕወ ኵሉ አማዑቲሁ። 19ወተሰምዐ ነገሩ በኀበ ኵሎሙ እለ ይነብሩ በኢየሩሳሌም ወተሰምየ ዐጸዱ ዘተሣየጠ በዐስቡ ሰመይዎ በነገሮሙ አኬልዳማ ገራህተ ደም#ቦ ዘይቤ «ሐቅለ ጽማኅ» ብሂል። 20#መዝ. 68፥25፤ 16፥8። በከመ ይቤ መጽሐፈ መዝሙር «ለትኩን ሀገሩ በድወ ወአልቦ ዘይነብር ውስቴታ ወሢመቶሂ ይንሣእ ባዕድ።» 21#ዮሐ. 15፥27። ወይደሉ ለአሐዱ እምእሉ ዕደው እለ ነበሩ ምስሌነ ዘንተ ኵሎ መዋዕለ በዘቦአ ወወፅአ በኀቤነ እግዚእነ ኢየሱስ ክርስቶስ። 22እኂዞ እምጥምቀተ ዮሐንስ እስከ አመ ዐርገ እምኀቤነ ከመ ይኩን ውእቱ ምስሌነ ስምዐ ተንሥኦቱ። 23ወአቀሙ ክልኤተ ዮሴፍሃ ዘተሰምየ በርናባስ ዘይብልዎ ኢዮስጦስ ወማትያስሃ። 24#መዝ. 7፥10። ወጸለዩ ወይቤሉ አንተ እግዚኦ ማእምረ ኵሉ ልብ አርኢ አሐደ እምእሉ ክልኤቱ ዘኀረይከ። 25ዘይነሥኣ ለመልእክተ ዛቲ ሢመተ ሐዋርያት ዘኀደጋ ይሁዳ ይሑር ብሔሮ። 26#ምሳ. 16፥27። ወአስተዓፀውዎሙ ወበጽሐ ዕፃ ዲበ ማትያስ ወተኈለቈ ምስለ ዐሠርቱ ወአሐዱ ሐዋርያት።

Currently Selected:

ግብረ ሐዋርያት 1: ሐኪግ

Highlight

Copy