ግብረ ሐዋርያት 8

ምዕራፍ 8

በእንተ ምንዳቤ ዘበጽሐ ላዕለ ቤተ ክርስቲያን

1 # 11፥9። ወውእተ አሚረ ኮነ ዐቢይ ምንዳቤ ወሁከት በቤተ ክርስቲያን ዘኢየሩሳሌም ወተዘርዉ ኵሎሙ ውስተ ኵሉ በሐውርተ ይሁዳ ወሰማርያ ወገሊላ ዘእንበለ ሐዋርያት ባሕቲቶሙ ዘነበሩ በኢየሩሳሌም።#ቦ ዘኢይጽሕፍ «ባሕቲቶሙ ዘነበሩ በኢየሩሳሌም» 2#ማቴ. 14፥12። ወለእስጢፋኖስሰ ነሥእዎ ዕደው ጻድቃን ወቀበርዎ ወላሐውዎ ዐቢየ ላሐ። 3#9፥1፤ 22፥4። ወሳውልሰ ዓዲሁ ይትቄየም አብያተ ክርስቲያናት ወይደቢ አብያተ ሰብእ ወይስሕብ ዕደወ ወአንስተ ወይሞቅሕ። 4#6፥5። ወእለሰ ተዘርዉ አንሶሰዉ ወመሀሩ ወሰበኩ ቃለ እግዚአብሔር።

በእንተ ፊልጶስ

5ወወረደ ፊልጶስ ሀገረ ሰማርያ ወሰበከ ሎሙ በእንተ ክርስቶስ። 6ወአጽምዕዎ ሕዝብ ዘይነግሮሙ ፊልጶስ ወሰምዕዎ ኅቡረ ወያነክሩ ወይሬእዩ ተኣምረ ወመንክረ ዘይገብር። 7#ማቴ. 17፥18። ወብዙኃን አጋንንት እኩያን ይኬልሑ በዐቢይ ቃል ወይወፅኡ ወብዙኃን ፅዉሳን ወሐንካሳን የሐይዉ። 8ወኮነ ዐቢይ ፍሥሓ በይእቲ ሀገር።

በእንተ ሲሞን መሠርይ

9ወሀሎ አሐዱ ብእሲ በይእቲ ሀገር ዘስሙ ሲሞን ወያስሕቶሙ ለሕዝበ ሰማርያ ዘሥራይ ብእሲሁ ወይሬሲ ርእሶ ዐቢየ። 10ወይትአመንዎ ንኡሶሙ ወዐቢዮሙ ወይብሉ ዝ ውእቱ ኀይለ እግዚአብሔር ዐቢይ። 11ወያጸምዕዎ እስመ ጕንዱይ መዋዕል እምዘአስሐቶሙ በሥራዩ። 12#ማቴ. 28፥19። ወሶበ አምንዎ ለፊልጶስ ዘሰበከ ሎሙ በእንተ መንግሥተ እግዚአብሔር ወበስመ ኢየሱስ ክርስቶስ ዕድ ወአንስት ተጠምቁ። 13ወሲሞንሂ አምነ ወተጠምቀ ወነበረ ይፀመዶ ለፊልጶስ እስመ ይሬኢ ተኣምረ ወመንክረ ዘይከውን በእደዊሁ ወያነክር ወይዴመም።

በእንተ ተፈንወተ ጴጥሮስ ወዮሐንስ ሰማርያ

14ወሶበ ሰምዑ ሐዋርያት እለ ሀለዉ ኢየሩሳሌም ከመ ተወክፉ ሰብአ ሰማርያ ቃለ እግዚአብሔር ፈነዉ ኀቤሆሙ ጴጥሮስሃ ወዮሐንስሃ። 15ወወረዱ ወጸለዩ ላዕሌሆሙ ከመ ይንሥኡ መንፈሰ ቅዱሰ። 16እስመ ዓዲሁ ኢወረደ መንፈስ ቅዱስ ወኢ ዲበ አሐዱሂ እምውስቴቶሙ ዳእሙ ተጠምቁ በስሙ ለእግዚእነ ኢየሱስ ክርስቶስ። 17ወእምዝ ወደዩ ሐዋርያት እደዊሆሙ ላዕሌሆሙ ወነሥኡ መንፈሰ ቅዱሰ።

በእንተ ድቀተ ሲሞን መሠርይ

18ወሶበ ርእየ ሲሞን ከመ ኀበ ወደዩ እደዊሆሙ ሐዋርያት ይወርድ መንፈስ ቅዱስ አምጽአ ሎሙ ንዋየ። 19ወይቤሎሙ አብሑኒ ሊተኒ ወሀቡኒ ከመ ኀበ ወደይኩ እዴየ ይረድ መንፈስ ቅዱስ። 20ወይቤሎ ጴጥሮስ ወርቅከሰ ወብሩርከ ምስሌከ ለይኩንከ ለሕርትምና ይመስለከኑ ዘበወርቅ ትሣየጦ ለጸጋ እግዚአብሔር። 21አልብከ መክፈልት ወርስት ውስተ ዝ ነገር እስመ ኢኮነ ርቱዐ ልብከ በቅድመ እግዚአብሔር። 22ነስሕ ይእዜኒ እምእከይከ ወተጋነይ ለእግዚአብሔር ለእመ የኀድግ ለከ እከየ ልብከ። 23እስመ እሬእየከ ዘትነብር በሕምዝ መሪር ወውስተ ማእሰረ ዐመፃ ሀሎከ። 24ወተሰጥዎሙ ሲሞን ወይቤሎሙ ሰአሉ ሊተ አንትሙ ኀበ እግዚአብሔር ከመ ኢይብጽሐኒ ወኢምንተኒ እምዘትቤሉኒ። 25ወእሙንቱሰ ሶበ ነገሩ ወአስምዑ ቃለ እግዚአብሔር ተሠውጡ ኢየሩሳሌም ወመሀሩ ቃለ እግዚአብሔር ውስተ ብዙኃት አህጉረ ሰማርያ።

በእንተ ፊልጶስ ወብእሲ ኢትዮጵያዊ

26ወነበቦ መልአከ እግዚአብሔር ለፊልጶስ ወይቤሎ ተንሥእ ወሑር ጊዜ ቀትር ፍኖተ በድው ዘያወርድ እምኢየሩሳሌም ለጋዛ። 27ወተንሥአ ወሖረ ወረከበ ብእሴ እምሰብአ ኢትዮጵያ ኅጽዋ ለህንደኬ ንግሥተ ኢትዮጵያ ወመጋቢሃ ውእቱ ላዕለ ኵሉ መዛግብቲሃ ወሖረ ኢየሩሳሌም ይስግድ። 28ወእንዘ ይገብእ ነበረ ዲበ ሠረገላሁ ወያነብብ መጽሐፈ ኢሳይያስ ነቢይ። 29ወይቤሎ መንፈስ ቅዱስ ለፊልጶስ ሑር ትልዎ ለዝ ሠረገላ። 30ወሮጸ ፊልጶስ ወበጽሐ ወሰምዖ ያነብብ መጽሐፈ ኢሳይያስ ነቢይ ወይቤሎ ፊልጶስ ተአምርኑ እንከ ዘታነብብ። 31ወይቤሎ ኅጽው በአይቴ አአምር ለእመ አልቦ ዘመሀረኒ ወአስተብቍዖ ለፊልጶስ ከመ ይዕርግ ወይንበር ኅቡረ ምስሌሁ። 32#ኢሳ. 53፥7-8። ወነገረ መጽሐፍሰ ኀበ ያነብብ ከመዝ ይብል «መጽአ ከመ በግዕ ይጠባሕ ወከመ በግዕ ዘኢይነብብ በቅድመ ዘይቀርፆ ከማሁ ኢከሠተ አፉሁ በሕማሙ። 33ወተንሥአ እምኵነኔ ወእምነ ሞቅሕ ወመኑ ይነግር ልደቶ እስመ ተአተተ እምድር ሕይወቱ።» 34ወተመይጠ ኀበ ፊልጶስ ውእቱ ኅጽው ወይቤሎ ብቍዐኒ ወንግረኒ በእንተ መኑ ይብል ነቢይ ከመዝ በእንተ ርእሱኑ ወሚመ በእንተ ካልእ። 35ወከሠተ አፉሁ ፊልጶስ ወአኀዘ ይምሀሮ በእንተ ኢየሱስ ክርስቶስ ወይፈክር ሎቱ በውእቱ መጽሐፍ። 36ወእንዘ የሐውሩ በጽሑ ኀበ ማይ ወይቤሎ ውእቱ ኅጽው ነዋ ማይ ወመኑ ይከልአኒ ተጠምቆ። 37#ማቴ. 16፥16፤ ማር. 16፥16። ወይቤሎ ፊልጶስ ይደልወከ ከመ ትእመን በኵሉ ልቡናከ ወአውሥአ ውእቱ ኅጽው ወይቤ አነ አአምን ከመ ኢየሱስ ክርስቶስ ውእቱ ወልዱ ለእግዚአብሔር። 38ወአዘዘ ያቅሙ ሠረገላሁ ወአቀሙ ወወረዱ ኅቡረ ኀበ ማይ ፊልጶስ ወውእቱ ኅጽው ወአጥመቆ። 39#1ነገ. 18፥12። ወወፂኦሙ እማይ መንፈሰ እግዚአብሔር መሠጦ ለፊልጶስ ወኢርእዮ እንከ ውእቱ ኅጽው። ወአተወ ብሔሮ እንዘ ይትፌሣሕ። 40#21፥8-9። ወበጽሐ ፊልጶስ ሀገረ አዛጦን ወአንሶሰወ ወመሀረ በኵሉ አህጉር እስከ በጽሐ ቂሳርያ።

Currently Selected:

ግብረ ሐዋርያት 8: ሐኪግ

Highlight

Copy