ወንጌል ዘዮሐንስ 8

ምዕራፍ 8

1 ወእግዚእ ኢየሱስኒ ሖረ ውስተ ደብረ ዘይት። 2ወአንግሀ በጽባሕ ወቦአ ካዕበ ምኵራበ ወተጋብኡ ኵሉ ሕዝብ ኀቤሁ ወነበረ ወአኀዘ ይምሀሮሙ።

በእንተ ኵነኔ ብእሲት ዘማዊት

3 # ዘፀ. 20፥14። ወአምጽኡ ኀቤሁ ጸሐፍት ወፈሪሳውያን ብእሲተ እስርተ እንተ ተረክበት በዝሙት ወአብእዋ ውስጠ ወአቀምዋ ቅድመ እግዚእ ኢየሱስ። 4ወይቤልዎ ኦ ሊቅ ረከብናሃ ለዛቲ ብእሲት እንዘ ትኤብስ በዝሙት። 5#ዘሌ. 20፥10፤ ዘዳ. 22፥22-24፤ ሕዝ. 16፥38-40። ወበሕግነሰ ሠርዐ ሙሴ ከመ ትትወገር በእብን ወአንተሰ እንከ ምንተ ትብል በእንቲኣሃ።#ቦ ዘይዌስክ «እስመ ናሁ ተረክበት በዝሙት» 6ወዘንተ ይቤሉ እንዘ ያሜክርዎ ከመ ይርከቡ ምክንያተ ላዕሌሁ በዘያስተዋድይዎ ወአትሐተ እግዚእ ኢየሱስ አዕይንቲሁ ውስተ ምድር ወጸሐፈ በአጽባዕቱ። 7ወሶበ ቆሙ ብዙኀ ወአጐንደዩ ተስእሎቶ አንሥአ አዕይንቲሁ ወነጸረ ኀቤሆሙ ወይቤሎሙ ዘአልቦ ኀጢአት እምኔክሙ ቀዲሙ ለይገራ በእብን። 8ወካዕበ ደነነ ኀበ ምድር ወጸሐፈ በአጽባዕቱ። 9#ሮሜ 2፥1-22። ወሰሚዖሙ እሙንቱ ዘንተ ዘለፋ በለብዎ አኀዙ ይሑሩ በበአሐዱ እስከ ወፅኡ ሊቃውንቲሆሙ እምቀዳሚ እስከ ደኃሪ ወተርፈ እግዚእ ኢየሱስ ባሕቲቶ ወይእቲኒ ብእሲት ትቀውም ማእከለ። 10ወአንሥአ እግዚእ ኢየሱስ አዕይንቲሁ ወነጸረ ኀቤሃ ወይቤላ ኦ ብእሲቶ አይቴ ሀለዉ እለ ይኴንኑኪ። 11#5፥14። ወአውሥአት ወትቤሎ አልቦ ዘእሬኢ እግዚእየ ወይቤላ እግዚእ ኢየሱስ አነሂ አልቦ ዘእኴንነኪ ሑሪ እትዊ በሰላም ወእምዝ ዳግመ ኢተአብሲ።

ዘከመ ይቤ እግዚእ አነ ውእቱ ብርሃኑ ለዓለም

12 # 1፥5-9፤ 9፥5፤ ማቴ. 5፥14፤ ኢሳ. 49፥6። ወካዕበ ነበቦሙ እግዚእ ኢየሱስ ወይቤ አነ ውእቱ ብርሃኑ ለዓለም ዘተለወኒ ኢየሐውር ውስተ ጽልመት አላ ይረክብ ብርሃነ ሕይወት። 13#5፥31። ወይቤልዎ ፈሪሳውያን ለሊከኑ ትንእድ ርእሰከ ኢኮነ ጽድቀ ስምዕከ። 14ወአውሥአ እግዚእ ኢየሱስ ወይቤሎሙ እመኒ ለልየ ስምዐ ኮንኩ ለርእስየ ጽድቅ ውእቱ ስምዕየ እስመ አአምር እምኀበ መጻእኩ ወኀበሂ አሐውር ወአንትሙሰ ኢተምሩ እምኀበ መጻእኩ ወኀበሂ አሐውር። 15አንትሙሰ ሕገ ዘሥጋ ትኴንኑ ወአንሰ ኢይኴንኑ ወኢመነሂ። 16ወእመሂ ኰነንኩ አነ ጽድቀ እኴንን እስመ ኢኮንኩ አነ ባሕቲትየ አላ አነ ወአብ ዘፈነወኒ። 17#ዘዳ. 16፥16፤ 19፥15። አኮኑ ጽሑፍ ውስተ ኦሪትክሙ «ስምዐ ክልኤቱ ሰብእ እሙን ውእቱ።» 18ወአነሂ ሰማዕት ለርእስየ ወአብ ዘፈነወኒ ሰማዕትየ። 19#14፥7። ወይቤልዎ አይቴ ውእቱ አቡከ ወአውሥአ እግዚእ ኢየሱስ ወይቤሎሙ ኢኪያየ ተአምሩ ወኢአቡየ ሶበሰ ኪያየ አእመርክሙ እምአእመርክምዎ ለአቡየኒ። 20#7፥30፤ ሉቃ. 22፥53። ወዘንተ ነገረ ተናገሮሙ እግዚእ ኢየሱስ በኀበ ሙዳየ ምጽዋት እንዘ ይሜህሮሙ በምኵራብ ወኢአኀዝዎ እስመ ዓዲ ኢበጽሐ ጊዜሁ። 21#7፥34፤ 13፥33። ወካዕበ ይቤሎሙ እግዚእ ኢየሱስ አንሰ አሐውር ተኀሥሡኒ ወኢትረክቡኒ ወትመውቱ በኀጢአትክሙ ወኀበ አነ አሐውር አንትሙ ኢትክሉ መጺአ። 22#7፥35። ወይቤሉ አይሁድ ይቀትልኑ እንጋ ርእሶ ለሊሁ ዘይብለነ ኀበ አነ አሐውር አንትሙ ኢትክሉ መጺአ። 23ወይቤሎሙ አንትሙሰ እምታሕቱ አንትሙ ወአንሰ እምላዕሉ አነ አንትሙሰ እምዝንቱ ዓለም አንትሙ ወአንሰ ኢኮንኩ እምዝንቱ ዓለም። 24ወናሁ እቤለክሙ ከመ ትመውቱ በኀጢአትክሙ ለእመ ኢአመንክሙ ከመ አነ ውእቱ ትመውቱ በኀጢአትክሙ። 25ወይቤልዎ አንተ መኑ አንተ ወይቤሎሙ እግዚእ ኢየሱስ ቀዳሚኒ ነገርኩክሙ። 26ወብዙኅ ብየ ዘእብል በእንቲኣክሙ ወእኴንን ቦቱ ወባሕቱ ዘፈነወኒ ጻድቅ ውእቱ ወአንሰ ዘሰማዕኩ በኀቤሁ እነግር ለዓለም። 27ወኢያእመሩ ከመ በእንተ አብ ይቤሎሙ። 28#3፥14፤ 12፥32። ወይቤሎሙ እግዚእ ኢየሱስ አመ ተለዐለ#ቦ ዘይቤ «አመ አልዐልክምዎ» ወልደ ዕጓለ እመሕያው ይእተ አሚረ ተአምሩ ከመ አነ ውእቱ ወአኮ ዘእምኀቤየ ዘእነግር አላ በከመ መሀረኒ አቡየ ከማሁ እነግር። 29ወዘፈነወኒ ሀሎ ምስሌየ ወኢየኀድገኒ አብ ባሕቲትየ እስመ አነ ሥምረቶ እገብር ዘልፈ። 30#7፥31። ወዘንተ ብሂሎ ብዙኃን እለ አምኑ ቦቱ። 31#15፥14። ወይቤሎሙ እግዚእ ኢየሱስ ለእለ አምኑ ቦቱ አይሁድ አንትሙሂ ለእመ ነበርክሙ በቃልየ አማን አርዳእየ አንትሙ። 32ወተአምርዋ ለጽድቅ ወጽድቅኒ ታግዕዘክሙ።

ዘከመ ገሠጾሙ እግዚእ ኢየሱስ ለአይሁድ

33 # ማቴ. 3፥9፤ ሉቃ. 3፥9። ወአውሥኡ ወይቤልዎ ዘርዐ አብርሃም ንሕነ ወእምአመ ኮነ ግሙራ ኢተቀይነ ወኢለመኑሂ እፎ እንከ ትብለነ ግዑዛነ ትከውኑ። 34#ሮሜ 6፥16-20፤ ዮሐ. 3፥8። ወአውሥአ እግዚእ ኢየሱስ ወይቤሎሙ አማን አማን እብለክሙ ኵሉ ዘይገብራ ለኀጢአት ገብራ ውእቱ ለኀጢአት። 35ወገብርሰ ኢይነብር ውስተ ቤት ለዝሉፉ ወወልድሰ ይነብር ለዓለም። 36ወእምከመሰ ወልድ አግዐዘክሙ አማን ግዑዛን አንትሙ። 37ወአአምር ከመ ዘርዐ አብርሃም አንትሙ ወባሕቱ ተኀሥሡ ትቅትሉኒ እስመ ኢይነብር ቃልየ ኀቤክሙ። 38ወአንሰ ዘርኢኩ በኀበ አቡየ እነግር ወአንትሙሂ ዘርኢክሙ በኀበ አቡክሙ ትገብሩ። 39ወአውሥኡ ወይቤልዎ ለነሰ አብርሃም አቡነ ወይቤሎሙ እግዚእ ኢየሱስ ሶበሰ ውሉደ አብርሃም አንትሙ ግብረ አብርሃም እምገበርክሙ። 40#17፥17። ወይእዜሰ ተኀሥሡ ትቅትሉኒ ብእሴ ጻድቀ ዘጽድቀ እነግረክሙ ዘሰማዕኩ በኀበ እግዚአብሔር ወአብርሃምሰ ኢገብረ ከመዝ። 41#ኤር. 3፥4። አንትሙሰ ትገብሩ ግብረ አቡክሙ ወይቤልዎ ንሕነሰ ኢተወለድነ እምዝሙት አላ አሐዱ አብ ብነ ወውእቱ እግዚአብሔር። 42ወይቤሎሙ እግዚእ ኢየሱስ ሶበሰ እግዚአብሔር አቡክሙ እምአፍቀርክሙኒ ኪያየ ወቃልየኒ እምዐቀብክሙ እስመ አነ እምኀበ እግዚአብሔር ወፃእኩ ወመጻእኩ ወአኮ ለልየ ዘመጻእኩ አላ ውእቱ ፈነወኒ። 43እፎ እንከ ኢተአምኑ ቃልየ እስመ ኢትክሉ ሰሚዐ ነገረ ዚኣየ። 44#ዘፍ. 3፥4፤ 1ዮሐ. 3፥8-10፤ 2ጴጥ. 2፥4። አንትሙሰ እምአቡክሙ ሰይጣን አንትሙ ወፍትወቶ ለአቡክሙ ትፈቅዱ ትግበሩ ወውእቱሰ ቀታሌ ነፍሰ ሰብእ ውእቱ እምትካት ወኢይቀውም በጽድቅ እስመ አልቦ ጽድቅ በኀቤሁ ወሶበሂ ይነብብ ሐሰተ እምዚኣሁ ይነብብ እስመ ሐሳዊ ውእቱ ወአቡሃ ለሐሰት። 45ወአንሰ እስመ ጽድቀ እነግር ኢተአምኑኒ። 46#2ቆሮ. 5፥21፤ 1ጴጥ. 2፥22። መኑ እምኔክሙ ዘይዛለፈኒ በእንተ ኀጢአት ወእመሰ አነ ጽድቀ እነግር ለምንት ኢተአምኑኒ። 47#18፥37፤ 1ዮሐ. 4፥6። ዘሰ እምእግዚአብሔር ውእቱ ቃለ እግዚአብሔር ይሰምዕ ወበእንተ ዝንቱ አንትሙሰ ኢትሰምዑኒ እስመ ኢኮንክሙ እምእግዚአብሔር። 48#7፥20። ወተሰጥውዎ አይሁድ ወይቤልዎ አኮኑ ሠናየ ንቤለከ ከመ ሳምራዊ አንተ ወጋኔንከ ብከ። 49ወአውሥአ እግዚእ ኢየሱስ ወይቤሎሙ አንሰ ጋኔን አልብየ ወባሕቱ አከብር አባየ ወአንትሙሰ ታስተሐቅሩኒ። 50#5፥23-47። አንሰ ኢየኀሥሥ ተድላ ለርእስየ ሀሎ ዘየኀሥሥ ወዘሂ ይኴንን። 51#6፥40-47። አማን አማን እብለክሙ ዘዐቀበ ቃልየ ኢይጥዕሞ ለሞት ለዓለም። 52#ዘፍ. 25፥8፤ ዘካ. 1፥5። ወይቤልዎ አይሁድ ይእዜኬ አእመርናከ ከመ ጋኔን ብከ አብርሃም ጥቀ ሞተ ወነቢያትኒ ሞቱ ወአንተሰ ትብል ዘዐቀበ ቃልየ ኢይጥዕሞ ለሞት ለዓለም። 53አንተኑ ተዐቢ እምአብርሃም አቡነ ዘሞተ ወእምነቢያትኒ እለ ሞቱ መነ ትሬሲ ርእሰከ። 54ወአውሥአ እግዚእ ኢየሱስ ወይቤሎሙ እመሰ ለልየ ሰባሕኩ ርእስየ ኢይበቍዐኒ ስብሐትየ ወኢምንተኒ አላ ሀሎ አቡየ ዘይሴብሐኒ ዘአንትሙ ትብልዎ አምላክነ ውእቱ ወኢተአምርዎ። 55#7፥28። ወአንሰ አአምሮ ወእመሰ እቤ ኢየአምሮ እከውን ከማክሙ ሐሳዌ ወአንሰ አአምሮ ወቃሎሂ አዐቅብ። 56#ዘፍ. 18፥10፤ ሮሜ 9፥9፤ ዕብ. 11፥13። አብርሃም አቡክሙ ተመነየ ከመ ይርአይ ዕለትየ ወርእየሂ ወተፈሥሐ። 57#ሉቃ. 3፥23። ወይቤልዎ አይሁድ ኀምሳ ዓመት አልብከ ወአብርሃምሃ ርኢከ። 58#ኢሳ. 43፥13። ወይቤሎሙ እግዚእ ኢየሱስ አማን አማን እብለክሙ እምቅድመ ይትወለድ አብርሃም ሀሎኩ አነ። 59ወነሥኡ እብነ ከመ ይውግርዎ ወተኀብኦሙ እግዚእ ኢየሱስ ወወፅአ እምኵራብ ወኀለፈ እንተ ማእከሎሙ ወሖረ።

Currently Selected:

ወንጌል ዘዮሐንስ 8: ሐኪግ

Highlight

Copy