ወንጌል ዘሉቃስ 5

ምዕራፍ 5

በእንተ ተጸውዖተ ስምዖን ወደቂቀ ዘብዴዎስ

1 # ማቴ. 4፥18-22፤ 13፥1-2፤ ማር. 1፥16-20፤ 3፥9-10፤ 4፥1። ወሀለዉ ኀቤሁ ሰብእ ብዙኃን ወያጸምዑ ቃለ እግዚአብሔር ወውእቱሰ ይቀውም መንገለ ሐይቀ ባሕረ ጌንሴሬጥ። 2ወርእየ ክልኤተ አሕማረ ኀበ ውእቱ ሐይቅ ወወረዱ እምኔሆን መሠግራን ይኅፅቡ መሣግሪሆሙ። 3ወዐርገ ውስተ አሐቲ ሐመር እምኔሆን ወይእቲ ሐመር እንተ ስምዖን ወይቤሎ ከመ ያርኅቃ ሕቀ እምነ ምድር ወነበረ ውስተ ሐመር ወመሀሮሙ ለሕዝብ። 4#ዮሐ. 21፥6። ወሶበ አርመመ ይቤሎ ለስምዖን ያእትቱ መንገለ ዕመቀ ባሕር ወያውርዱ መሣግሪሆሙ ወያሥግሩ። 5#መዝ. 127፥1-2፤ ዮሐ. 21፥3። ወአውሥአ ስምዖን ወይቤሎ ሊቅ ሰራሕነ ኵላ ሌሊተ እንዘ ናወርድ መሣግሪነ ወአልቦ ዘአኀዝነ ወባሕቱ እስመ አዘዝከነ ናወርድ መሣግሪነ። 6#ዮሐ. 21፥6። ወገቢሮሙ ከማሁ ተእኅዙ ብዙኃን ዓሣት ፈድፋደ እስከ ይትበተክ መሣግሪሆሙ። 7ወጸውዕዎሙ ለቢጾሙ እለ ውስተ ካልእ ሐመር ከመ ይምጽኡ ወይርድእዎሙ ወመጽኡ ወመልኡ ክልኤሆን አሕማረ እስከ ይሰጠማ። 8ወርእዮ ስምዖን ጴጥሮስ አስተብረከ ወሰገደ ታሕተ እገሪሁ ለእግዚእ ኢየሱስ ወይቤሎ ኅድገኒ እግዚኦ ወሑር እምኔየ እስመ ብእሲ ኃጥእ አነ። 9እስመ አኀዞ ድንጋፄ ወኵሎሙ እለ ምስሌሁ ደንገፁ በእንተ ዓሣት ዘተሠግሩ። 10#ኤር. 16፥16፤ ማቴ. 13፥47። ወከማሁ ያዕቆብኒ ወዮሐንስ ደቂቀ ዘብዴዎስ አዕርክቲሁ ለስምዖን ወይቤሎ እግዚእ ኢየሱስ ለስምዖን ኢትፍራህ እምይእዜሰ ሰብአ ታሤግር። 11#ማቴ. 19፥27-29። ወአውፅኡ አሕማሪሆሙ ውስተ ምድር ወኀደጉ ኵሎ ወተለውዎ።

ዘከመ አሕየዎ እግዚእ ኢየሱስ ለዘለምጽ

12 # ማቴ. 8፥14፤ ማር. 1፥40-45። ወእንዘ ሀሎ ውስተ አሐቲ ሀገር መጽአ ብእሲ ዘለምጽ ኵለንታሁ ወሶበ ርእዮ ለእግዚእ ኢየሱስ ሰገደ ሎቱ በገጹ ወአስተብቍዖ ወይቤሎ እግዚኦ እመሰ ፈቀድከ ትክል አንጽሖትየ። 13ወሰፍሐ እዴሁ ወገሠሦ ወይቤሎ እፈቅድ ንጻሕ ወኀደጎ ለምጹ ሶቤሃ። 14#ዘሌ. 14፥1-32። ወከልኦ ኢይንግር ወኢለመኑሂ ወይቤሎ ሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ። 15ወተሰምዐ ነገሩ ፈድፋደ ወይመጽኡ ብዙኃን ሰብእ ኀቤሁ ይስምዕዎ ወይትፌወሱ እምደዌሆሙ። 16#ማር. 1፥35፤ ማቴ. 14፥23። ወውእቱሰ ይወፅእ ገዳመ ወይጼሊ በህየ። 17#ማቴ. 9፥1-8፤ ማር. 2፥1-12፤ 6፥19። ወእምዝ ኮነ በአሐቲ ዕለት እመዋዕል እንዘ ሀሎ ይሜህሮሙ ወይነብሩ ፈሪሳውያን ወሊቃናተ ኦሪት እለ መጽኡ እምገሊላ ወእምኵሉ አህጉረ ይሁዳ ወእምኢየሩሳሌም ወኀይለ እግዚአብሔር ውእቱ በዘይፌውስ።

ዘከመ አሕየዎ ለመፃጕዕ

18ወአምጽኡ ኀቤሁ ብእሴ መፃጕዐ እንዘ ይጸውርዎ አርባዕቱ ዕደው በዐራት ወፈቀዱ ያብእዎ ኀቤሁ ይፈውሶ። 19ወኀጥኡ እንተ ኀበ ያበውእዎ እስመ ጽፉቅ ሰብእ ወዐርጉ ናሕሰ ወነሠቱ ጠፈረ ወአውረድዎ ምስለ ዐራቱ ውስተ ቤት ቅድሜሁ ለእግዚእ ኢየሱስ። 20#7፥48፤ ማቴ. 9፥1-8፤ ማር. 2፥1-12። ወርእዮ ሃይማኖቶሙ ይቤሎ ለውእቱ ብእሲ ተኀድገ ለከ ኀጢአትከ። 21#ኢሳ. 43፥25። ወአኀዙ የኀልዩ ጸሐፍት ወፈሪሳውያን ወይበሉ ምንትኑ ውእቱ ዝንቱ ዘይነብብ ፅርፈተ መኑ ይክል ኀዲገ ኀጢአት ዘእንበለ እግዚአብሔር ባሕቲቱ። 22ወአእመሮሙ እግዚእ ኢየሱስ ዘይኄልዩ ወይቤሎሙ ምንተኑ ትኄልዩ በልብክሙ። 23ምንት ይቀልል እምብሂለ ተኀድገ ለከ ኀጢአትከ ወእምብሂለ ተንሥእ ወጹር ዐራተከ ወሑር። 24ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር ወይቤሎ ለውእቱ ድዉይ ለከ እብለከ ተንሥእ ወንሣእ ዐራተከ ወእቱ ቤተከ። 25ወተንሥአ ሶቤሃ ወነሥአ ዐራቶ ዘዲቤሁ ይሰክብ በቅድሜሆሙ ወአተወ ቤቶ እንዘ ይሴብሖ ለእግዚአብሔር። 26ወደንገፁ ኵሎሙ ወአእኰትዎ ለእግዚአብሔር ወፈርሁ ብዙኀ ወይቤሉ ርኢነ መንክረ ዮም።

በእንተ ተኀርዮቱ ለሌዊ መጸብሓዊ

27 # ማቴ. 9፥9-13፤ ማር. 2፥14-17። ወእምዝ ወፂኦ እምህየ ርእየ ብእሴ መጸብሐዌ ዘስሙ ሌዊ እንዘ ይነብር ኀበ ምጽባሕ ወይቤሎ ትልወኒ። 28ወኀደገ ኵሎ ወተንሥአ ወተለዎ። 29#15፥1። ወገብረ ሎቱ ሌዊ ዐቢየ ምሳሐ በቤቱ ወብዙኃን ሰብእ ምስሌሁ መጸብሓን ወኃጥኣን እለ ረፈቁ ምስሌሆሙ ወባዕዳንሂ ብዙኃን። 30ወአንጐርጐሩ ጸሐፍት ወፈሪሳውያን#5፥30 ቦ ዘይቤ«ላዕሌሁ» ላዕለ አርዳኢሁ ወይቤልዎሙ ለምንት ትበልዑ ወትሰትዩ ምስለ መጸብሓን ወኃጥኣን። 31ወአውሥአ እግዚእ ኢየሱስ ወይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን። 32#15፥7-10። ኢመጻእኩ እጸውዕ ጻድቃነ አላ ኃጥኣነ ለንስሓ። 33#ማቴ. 9፥14-17፤ ማር. 2፥18-22። ወይቤልዎ ለምንት አርዳኢሁ ለዮሐንስ ጽፉቀ ይጸውሙ ወጸሎተ ይገብሩ ወከማሁ እለሂ ፈሪሳውያን ወአርዳኢከሰ እሊኣከ ይበልዑ ወይሰትዩ። 34ወይቤሎሙ እግዚእ ኢየሱስ ኢይክሉ ደቂቁ ለመርዓዊ ጸዊመ እንዘ ሀሎ መርዓዊ ምስሌሆሙ። 35ወባሕቱ ይመጽእ መዋዕል አመ ይነሥእዎ ለመርዓዊ እምኔሆሙ ወይእተ አሚረ ይጸውሙ። 36ወይቤሎሙ በምሳሌ አልቦ ዘይጠቅብ ግምደ ደርግሐ ልብስ ውስተ ሥጠተ ልብስ ብሉይ ወእመአኮሰ ይሠጥጦ ሐዲስ ለብሉይ ወምስለ ብሉይ ኢይዔሪ ሐዲስ። 37ወአልቦ ዘይወዲ ወይነ ሐዲሰ ውስተ ዝቅ ብሉይ ወእመአኮሰ ያነቅዖ ወወይኑሂ ይትከዐው ወዝቁሂ ይትኀጐል። 38ወለወይንሰ ሐዲስ ውስተ ዝቅ ሐዲስ ይወድይዎ ወይትዓቀቡ በበይናቲሆሙ። 39ወአልቦ ዘይሰቲ ጻዕፈ እንዘ ይፈቅድ ከራሜ እስመ ይኄይስ ከራሚ እምሐዲስ።

Currently Selected:

ወንጌል ዘሉቃስ 5: ሐኪግ

Highlight

Copy