ወንጌል ዘማቴዎስ 17

ምዕራፍ 17

ዘከመ አርአየ ስብሐቲሁ በደብረ ታቦር

1 # ማር. 9፥2-13፤ ሉቃ. 9፥28-36። ወእምድኅረ ስሱ መዋዕል ነሥኦሙ እግዚእ ኢየሱስ ለጴጥሮስ ወለያዕቆብ ወለዮሐንስ እኁሁ ወአዕረጎሙ ደብረ ነዋኀ እንተ ባሕቲቶሙ። 2#2ጴጥ. 1፥16-17። ወተወለጠ ራእዩ በቅድሜሆሙ ወአብርሀ ገጹ ከመ ፀሐይ ወአልባሲሁኒ ኮነ ጸዐዳ ከመ በረድ።#ቦ ዘይቤ «... ከመ ብርሃን» 3#ሚል. 4፥4-5። ወናሁ አስተርአይዎሙ ሙሴ ወኤልያስ እንዘ ይትናገሩ ምስሌሁ። 4ወአውሥአ ጴጥሮስ ወይቤሎ ለእግዚእ ኢየሱስ እግዚኦ ሠናይ ውእቱ ለነ ሀልዎ ዝየ ወእመሰ ትፈቅድ ንግበር በዝየ ሠለስተ ማኅደረ#ቦ ዘይቤ «... ሠለስተ ሰቃልወ ...» አሐደ ለከ ወአሐደ ለሙሴ ወአሐደ ለኤልያስ። 5#ዘዳ. 18፥15-19፤ 3፥17። ወእንዘ ዘንተ ይትናገሩ ናሁ ደመና ብሩህ ጸለሎሙ ወናሁ መጽአ ቃል እምውስተ ደመና ዘይብል ዝንቱ ውእቱ ወልድየ ዘአፈቅር ዘቦቱ ሠመርኩ ወሎቱ ስምዕዎ። 6ወሰሚዖሙ አርዳኢሁ ደንገፁ ወፈርሁ ጥቀ ወወድቁ በገጾሙ ዲበ ምድር። 7#ዳን. 8፥18። ወቀርበ እግዚእ ኢየሱስ ወለከፎሙ ወይቤሎሙ ተንሥኡ ወኢትፍርሁ። 8ወአንሥኡ አዕይንቲሆሙ ወአልቦ ዘርእዩ ወኢመነሂ ዘእንበለ እግዚእ ኢየሱስ ባሕቲቱ። 9#16፥20። ወእንዘ ይወርዱ እምደብር አዘዞሙ እግዚእ ኢየሱስ እንዘ ይብል ኢትንግሩ ወኢለመኑሂ ዘርኢክሙ#ቦ ዘይዌስክ «... ወዘሰማዕክሙ ...» እስከ አመ ወልደ ዕጓለ እመሕያው እሙታን ይትነሣእ። 10#11፥14፤ ሚል. 4፥5። ወተስእልዎ አርዳኢሁ እንዘ ይብሉ እፎ ይብሉ ጸሐፍት ኤልያስ ሀለዎ ይምጻእ ቅድመ። 11ወአውሥአ እግዚእ ኢየሱስ ወይቤሎሙ እወ ኤልያስ ይቀድም መጺአ ወያስተራትዕ ኵሎ። 12#14፥3-12። ወባሕቱ እብለክሙ ከመ ኤልያስ ወድአ መጽአ ወኢያእመርዎ ወባሕቱ ገብሩ ላዕሌሁ ኵሎ ዘከመ ፈቀዱ ወከማሁ ለወልደ ዕጓለ እመሕያውኒ ሀለዎ ይሕምም እምኔሆሙ። 13#ሉቃ. 1፥17። ወእምዝ አእመሩ አርዳኢሁ ከመ በእንተ ዮሐንስ መጥምቅ ይቤሎሙ።

በእንተ ዘነገርጋር

14 # ማር. 9፥14-19፤ ሉቃ. 9፥37-42። ወበጺሖ ኀበ ሕዝብ ቀርበ ኀቤሁ ብእሲ ወሰገደ ሎቱ እንዘ ይትመሐለል ወይብል፤ 15እግዚኦ ተሣሀል ሊተ ወልድየ እስመ እኩይ ጋኔን አኀዞ ወያንገረግሮ ወበአርእስተ አውራኀ ይሣቅዮ#ቦ ዘኢይጽሕፍ «... ወበአርእስተ አውራኅ ይሣቅዮ» ወመብዝኅቶሰ ያወድቆ ውስተ እሳት ወቦ አመ ያወድቆ ውስተ ማይ። 16ወአምጻእክዎ ኀበ አርዳኢከ ወስእኑ ፈውሶቶ። 17#21፥21-22፤ ዘካ. 4፥7፤ ሉቃ. 17፥6። ወእምዝ አውሥአ እግዚእ ኢየሱስ ወይቤ ኦ ትውልድ ኢአማኒት ወዕሉት እስከ ማእዜኑ እሄሉ ምስሌክሙ ወእስከ ማእዜኑ እትዔገሠክሙ አምጽእዎ ሊተ ዝየ። 18ወገሠጾ እግዚእ ኢየሱስ ወወፅአ ጋኔኑ እምላዕሌሁ ወሐይወ ወልዱ በይእቲ ሰዓት። 19ወእምዝ ቀሪቦሙ አርዳኢሁ እንተ ባሕቲቶሙ ይቤልዎ ለእግዚእ ኢየሱስ በእንተ ምንት ንሕነ ስእነ አውፅኦቶ። 20ወይቤሎሙ እግዚእ ኢየሱስ በእንተ ሕጸጸ ሃይማኖትክሙ አማን እብለክሙ እመ ብክሙ ሃይማኖት መጠነ ኅጠተ ሰናፔ ወትብልዎ ለዝ ደብር ፍልስ እምዝየ ኀበ ከሃ ወይፈልስ ወአልቦ ዘይሰአነክሙ። 21#ማር. 9፥29፤ ሉቃ. 9፥43-45። ወዝንቱ ዘመድ ኢይወፅእ ዘእንበለ በጾም ወበጸሎት። 22#16፥21፤ ማር. 9፥30-32። ወእንዘ ያንሶስዉ ውስተ ገሊላ ይቤሎሙ እግዚእ ኢየሱስ ሀለዎ ለወልደ ዕጓለ እመሕያው ያግብእዎ ውስተ እደ ሰብእ። 23ወይቀትልዎ ወአመ ሣልስት ዕለት ይትነሣእ ወተከዙ ጥቀ አርዳኢሁ ሰሚዖሙ ዘንተ።

በእንተ ውሂበ ጸባሕት

24 # ዘፀ. 30፥13። ወበጺሖ ቅፍርናሆም መጽኡ እለ ጸባሕተ ዲናር ይነሥኡ ኀበ ጴጥሮስ ወይቤልዎ ሊቅክሙሰ ኢይሁብኑ ጸባሐተ። 25ወይቤ እወ ወበዊኦ ውስተ ቤት አቅደመ እግዚእ ኢየሱስ ብሂሎቶ ምንተ ትብል ስምዖን ነገሥተ ምድር እምኀበ መኑ ይነሥኡ ጸባሐተ ወጋዳ እምኀበ ውሉዶሙኑ ወሚመ እምኀበ ነኪር። 26ወይቤ እምኀበ ነኪር ወይቤሎ እግዚእ ኢየሱስ እንጋ ውሉዶሙሰኬ አግዓዝያንኑ እሙንቱ። 27#ሮሜ 13፥7። ወባሕቱ ከመ ኢያንጐርጕሩ ሑር ውስተ ባሕር ወደይ መቃጥነ ወዘቀዳሚ አሥገርከ ዓሣ ንሣእ ወክሥት አፉሁ ወትረክብ ዲናረ ስጢጥራስ ዘውእቱ አርባዕቱ ድርህም ኪያሁ ንሣእ ወሀቦሙ ህየንቴየ ወህየንቴከ።

Currently Selected:

ወንጌል ዘማቴዎስ 17: ሐኪግ

Highlight

Copy