ወንጌል ዘማቴዎስ 9
9
ምዕራፍ 9
በእንተ መፃጕዕ
1 #
ማር. 2፥1-11፤ ሉቃ. 5፥17-26። ወዐሪጎ ውስተ ሐመር ዐደወ ወበጽሐ ሀገሮ። 2#ግብረ ሐዋ. 9፥33። ወአምጽኡ ኀቤሁ ድዉየ መፃጕዐ እንዘ ይጸውርዎ በዐራት ወርእዮ እግዚእ ኢየሱስ ሃይማኖቶሙ ይቤሎ ለውእቱ መፃጕዕ ተአመን ወልድየ ተኀድገ ለከ ኀጢአትከ። 3#ማር. 2፥7። ወሰሚዖሙ ጸሐፍት ወፈሪሳውያን ይቤሉ በበይናቲሆሙ ዝንቱሰ ይፀርፍ። 4#ዮሐ. 2፥25። ወአእሚሮ እግዚእ ኢየሱስ ኅሊናሆሙ ይቤሎሙ ለምንት ትኄልዩ እኩየ በአልባቢክሙ። 5ምንት ይቀልል እምብሂለ ተኀድገ ለከ ኀጢአትከ ወእምብሂለ ተንሥእ ወንሣእ ዐራተከ ወሑር ቤተከ። 6ከመ ታእምሩ ከመ ብዉሕ ሎቱ ለወልደ ዕጓለ እመሕያው ይኅድግ ኀጢአተ በዲበ ምድር ወእምዝ ይቤሎ ለውእቱ መፃጕዕ ተንሥእ ወንሣእ ዐራተከ ወእቱ ቤተከ። 7ወተንሢኦ ነሥአ ዐራቶ ወሖረ ቤቶ። 8ወርእዮሙ ሕዝብ አንከሩ ወአእኰትዎ ለእግዚአብሔር ዘወሀበ ዘከመዝ ሥልጣነ ለሰብእ።
ዘከመ ተጸውዐ ማቴዎስ
9 #
ማር. 2፥14-17፤ ሉቃ. 5፥27-32። ወኀሊፎ እግዚእ ኢየሱስ እምህየ ረከበ ብእሴ ዘስሙ ማቴዎስ እንዘ ይነብር ውስተ ምጽባሕ ወይቤሎ ትልወኒ ወተንሢኦ ተለዎ። 10ወእንዘ ይረፍቅ ውስተ ቤት ናሁ መጽኡ ብዙኃን መጸብሓን ወኃጥኣን ወረፈቁ ምስለ እግዚእ ኢየሱስ ወአርዳኢሁ። 11#ሉቃ. 15፥2። ወርእዮሙ ፈሪሳውያን ይቤልዎሙ ለአርዳኢሁ ለምንት ይበልዕ ሊቅክሙ ምስለ መጸብሓን ወኃጥኣን። 12ወሰሚዖ እግዚእ ኢየሱስ ይቤሎሙ ሕሙማን ይፈቅድዎ ለዐቃቤ ሥራይ ወአኮ ጥዑያን። 13#ሆሴ. 6፥6፤ ማቴ. 18፥21። ሑሩ ወአእምሩ ምንት ውእቱ ዘይቤ «ምጽዋተ አበድር እመሥዋዕት»#ቦ ዘይቤ «ምሕረተ እፈቅድ ወአኮ መሥዋዕተ» እስመ ኢመጻእኩ እጸውዕ ጻድቃነ አላ ኃጥኣነ ለንስሓ።
በእንተ ጾም
14 #
ማር. 2፥18-22፤ ሉቃ. 5፥33-38፤ 18፥12። ወእምዝ መጽኡ ኀቤሁ አርዳኢሁ ለዮሐንስ ወይቤልዎ ንሕነ ወፈሪሳውያን ንጸውም ብዙኀ ወአርዳኢከሰ በእፎ ኢይጸውሙ። 15#ዮሐ. 3፥29። ወይቤሎሙ እግዚእ ኢየሱስ ኢይክሉ ደቂቁ ለመርዓዊ ጸዊመ ወላሕዎ አምጣነ ሀሎ መርዓዊ ምስሌሆሙ ወባሕቱ ይመጽእ መዋዕል አመ ይነሥእዎ ለመርዓዊ እምኔሆሙ አሜሃ ይጸውሙ። 16#ማር. 2፥21፤ ሉቃ. 5፥36። ወአልቦ ዘይጠቅብ ግምደ ድርግሐ ልብስ ውስተ ስጠተ ልብስ ብሉይ እስመ ይትማላእ ሕያዎ ለልብስ፥ ወያዐብዮ ለስጠቱ።#ቦ ዘይዌስክ «ወፈድፋደ ይከውን ስጠቱ ዐቢየ» 17ወኢይወድዩ ወይነ ሐዲሰ ውስተ ዝቅ ብሉይ ወእመአኮሰ ዝቁሂ ይነቅዕ ወወይኑሂ ይትከዐው ወዝቁሂ ይትኀጐል ወባሕቱ ለወይንሰ ሐዲስ ውስተ ዝቅ ሐዲስ ይወድይዎ ወይትዓቀቡ ክልኤሆሙ በበይናቲሆሙ።
በእንተ ወለተ መጋቤ ምኵራብ
18 #
ማር. 5፥23-33፤ ሉቃ. 8፥41-56። ወእንዘ ዘንተ ይነግሮሙ ናሁ መጽአ አሐዱ መኰንን ወሰገደ ሎቱ እንዘ ይብል ወለትየ ይእዜ ሞተት ወባሕቱ ነዓ አንብር እዴከ ላዕሌሃ ወተሐዩ። 19ወተንሥአ እግዚእ ኢየሱስ ወተለዎ ወአርዳኢሁኒ።
በእንተ እንተ ደም ይውኅዛ
20ወናሁ ብእሲት እንተ ደም ይውኅዛ እም ዐሠርቱ ወክልኤቱ ክረምት መጽአት ወቆመት እንተ ድኅሬሁ ወገሠሠት ጽንፈ ልብሱ። 21#14፥36። እንዘ ትብል በልባ እምከመ ገሠሥኩ ጽንፈ ልብሱ አሐዩ። 22ወተመይጠ እግዚእ ኢየሱስ ወርእያ ወይቤላ ተአመኒ ወለትየ ሃይማኖትኪ አሕየወተኪ ወሐይወት ይእቲ ብእሲት በይእቲ ሰዓት። 23ወበዊኦ እግዚእ ኢየሱስ ቤቶ ለውእቱ መኰንን ርእየ መብክያነ ወሰብአ እንዘ ይትሀወኩ ወያስቈቅዉ። 24#ዮሐ. 11፥11። ወይቤሎሙ ተገኀሡ እስመ አኮ ዘሞተት ሕፃን አላ ትነውም ወሰሐቅዎ። 25ወእምዘወፅኡ ሰብእ ቦአ ወአኀዛ እዴሃ ወተንሥአት ሕፃን። 26ወወፅአ ስሙዓተ ነገሩ ውስተ ኵላ ምድር።
በእንተ ክልኤቱ ዕዉራን
27ወኀሊፎ እግዚእ ኢየሱስ እምህየ ተለውዎ ክልኤቱ ዕዉራን እንዘ ይጸርሑ ወይብሉ ተሣሀለነ ወልደ ዳዊት። 28ወበዊኦ ቤተ መጽኡ ኀቤሁ እሙንቱ ዕዉራን ወይቤሎሙ እግዚእ ኢየሱስ ተአምኑሁ ከመ እክል ዘንተ ገቢረ ወይቤልዎ እወ እግዚኦ። 29ወገሠሦሙ አዕይንቲሆሙ እንዘ ይብል በከመ ሃይማኖትክሙ ይኩንክሙ። 30#8፥4። ወሶቤሃ ተከሥታ አዕይንቲሆሙ ወገሠጾሙ እግዚእ ኢየሱስ ወይቤሎሙ ዑቁ ኢትንግሩ ወኢ ለመኑሂ። 31ወወፂኦሙ ነገሩ ለኵሉ በሓውርት።
በእንተ ዘጋኔን ጽሙም
32ወእምዘወፅኡ እሙንቱ አምጽኡ ኀቤሁ ብእሴ ዘጋኔን ጽሙመ ወበሃመ። 33ወወፂኦ ጋኔኑ ነበበ ውእቱ በሃም ወሰምዐ ውእቱ ጽሙም ወአንከሩ ሰብእ እንዘ ይብሉ ግሙራ ኢያስተርአየ ዘከመ ዝ በውስተ እስራኤል። 34#12፥24። ወፈሪሳውያንሰ ይቤሉ በመልአኮሙ ለአጋንንት ያወፅኦሙ ለአጋንንት።
ዘከመ አንሶሰወ ውስተ ገሊላ
35 #
4፥23፤ ማር. 6፥6። ወአንሶሰወ እግዚእ ኢየሱስ ውስተ ኵሉ አህጉር ወበሓውርት እንዘ ይሜህር በምኵራባቲሆሙ ወይሰብክ ወንጌለ መንግሥት ወይፌውስ ኵሎ ድዉያነ ወኵሎ ሕሙማነ ዘውስተ ሕዝብ። 36#14፥14፤ ማር. 6፥34፤ ሕዝ. 34፥5። ወርእዮ ብዙኃነ ሰብአ አምሐርዎ ወተሣሀሎሙ እስመ ስሩሓን እሙንቱ ወግዱፋን ከመ አባግዕ ዘአልቦ ኖላዊ። 37#ሉቃ. 10፥2፤ ዮሐ. 4፥35-37። ወይቤሎሙ ለአርዳኢሁ ማእረሩሰ ብዙኅ ወገባሩ ኅዳጥ። 38ሰአልዎ እንከ ለበዓለ ማእረር ከመ ይወስክ ገባረ ለማእረሩ።
Currently Selected:
ወንጌል ዘማቴዎስ 9: ሐኪግ
Highlight
Share
Copy
Want to have your highlights saved across all your devices? Sign up or sign in
