ወንጌል ዘማርቆስ 16

ምዕራፍ 16

በእንተ ትንሣኤሁ ለእግዚእ ኢየሱስ

1 # ማቴ. 28፤ ሉቃ. 24፤ ዮሐ. 20፤ 1ቆሮ. 15። ወሶበ ኀለፈት ሰንበት ማርያም መግደላዊት ወማርያም እንተ ያዕቆብ#ቦ ዘይቤ «ወማርያም እሙ ለያዕቆብ» ወሰሎሜ ተሣየጣ አፈወ ከመ ይምጽኣ ወይቅብዓ ሥጋሁ። 2#ራእ. 1፥10፤ 1ቆሮ. 16፥2። ወሖራ ወአንግሃ ጥቀ ሐዊረ ኀበ መቃብር በእሑድ ሰንበት ሶበ ሠረቀ ፀሓይ። 3ወይቤላ በበይናቲሆን መኑ ይከሥታ ለነ ለእብን እምኆኅተ መቃብር። 4ወረዊጾን ርእያሃ ለእብን ኀበ አንኰርኰረት ወዐባይ ይእቲ ጥቀ። 5ወበዊኦን ውስተ መቃብር ረከባ አሐደ ወሬዛ እንዘ ይነብር መንገለ የማን ወይለብስ አልባሰ ንጹሐ ወደንገፃ። 6ወይቤሎን መልአክ ኢትደንግፃ ኢየሱስሃኑ ናዝራዌ ዘተሰቅለ ተኀሥሣ ተንሥአ ወኢሀሎ ዝየሰ ወናሁ መካኑ ኀበ ተቀብረ። 7ወባሕቱ ሑራ ወንግራሆሙ ለአርዳኢሁ ወለጴጥሮስ ከመ ይቀድሞሙ ገሊላ ወበህየ ይሬእይዎ በከመ ይቤሎሙ። 8ወወፅኣ እምነ መቃብር ወጐያ እስመ አኀዞን ረዓድ ወድንጋፄ ወኢነገራ ወኢለመኑሂ እስመ ፈርሃ ወኵሎ ዘአዘዞን ለጴጥሮስ ወለእሊኣሁ ፈጺሞን ነጊረ አስተርአዮሙ እግዚእነ እምድኅረ ተንሥአ እምዉታን። ወፈነዎሙ ይስብኩ እምሥራቀ ፀሓይ እስከ ዐረብ ለኵሉ ፍጥረት በወንጌል ቅዱስ ዘኢይማስን ለሕይወት ዘለዓለም።#ቦ ዘኢይጽሕፍ «ወኵሎ ዘአዘዞን ለጴጥሮስ ወለእሊኣሁ ፈጺሞን ነጊረ አስተርእዮሙ እምድኅረ ተንሥአ እምዉታን ወፈነዎሙ ይስብኩ እምሥራቀ ፀሐይ እስከ ዐረብ ለኵሉ ፍጥረት በወንጌል ቅዱስ ዘኢይማስን ለሕይወት ዘለዓለም»

ዘከመ አስተርአየ እግዚእ ኢየሱስ ለብዙኃን

9ወተንሢኦ በጽባሕ በእሑድ ሰንበት አስተርአያ ቅድመ ለማርያም መግደላዊት እንተ እምኔሃ አውፅአ ሰብዐተ አጋንንተ። 10ወይእቲ ሐዊራ ዜነወቶሙ ለእለ ምስሌሁ ሀለዉ ቀዲሙ እንዘ ሀለዉ ይላሕዉ ወይበክዩ። 11ወእሙንቱሂ ሶበ ሰምዑ ከመ አስተርአያ ወሕያው ውእቱ ኢአምንዋ። 12#ሉቃ. 24፥13-32። ወእምዝ አስተርአዮሙ ለክልኤቱ እምኔሆሙ በካልእ ራእይ እንዘ የሐውሩ ሐቅለ። 13ወሖሩ እሙንቱሂ ወዜነዉ ለቢጾሙ ወሎሙኒ ኢአምንዎሙ። 14ወእምድኅረዝ ካዕበ እንዘ ይረፍቁ ዐሠርቱ ወአሐዱ አስተርአዮሙ ወገሠጾሙ በእንተ ኅጸተ አሚኖቶሙ ወግእዘ ጽንዐ ልቦሙ እስመ ለእለ ርእይዎ ከመ ተንሥአ ኢአምንዎሙ። 15#ማቴ. 28፥18-19። ወይቤሎሙ ሑሩ ውስተ ኵሉ ዓለም ወስብኩ ወንጌለ ለኵሉ ፍጥረት። 16#ግብረ ሐዋ. 2፥38። ዘአምነ ወዘተጠምቀ ይድኅን ወዘሰ ኢአምነ ይደየን። 17#ግብረ ሐዋ. 2፥4-11፤ 10፥46፤ 17፥18፤ ዕብ. 2፥4። ወዛቲ ተአምር ለእለ አምኑ በስምየ ትተልዎሙ በስመ ዚኣየ አጋንንተ ያወፅኡ ወበካልእ ልሳን ይትናገሩ ሐዲሳተ። 18#ሉቃ. 10፥19፤ ግብረ ሐዋ. 28፥3-9፤ ያዕ. 5፥14-15። ወአራዊተ ምድር ይእኅዙ በእደዊሆሙ ወአልቦ ዘያሐሥሞሙ ወዘሂ ይቀትል ሕምዘ ለእመ ሰትዩ#ቦ ዘይቤ «ለእመ በልዑ ወሰትዩ» አልቦ ዘይነክዮሙ ወዲበ ድዉያን እደዊሆሙ ያነብሩ ወይሜጥኑ ወእሙንቱሂ ይትፌወሱ።

በእንተ ዕርገቱ ለእግዚእ ኢየሱስ ውስተ ሰማይ

19 # ግብረ ሐዋ. 1፥1-14። ወእግዚእነሰ ኢየሱስ እምድኅረ ተናገሮሙ ዐርገ ውስተ ሰማይ ወነበረ በየማነ እግዚአብሔር አቡሁ። 20#ዕብ. 2፥4። ወወፂኦሙ እሙንቱ ሰበኩ በኵለሄ እንዘ እግዚእ ይረድእ ወቃሎ ያጸንዕ በተአምር ዘይተሉ።

መልአ ጽሕፈተ ብሥራቱ ለማርቆስ ወንጌላዊ አሐዱ እምሰብዓ ወክልኤቱ አርድእት ወኮነ ዘጸሐፎ በሀገረ ሮም በልሳነ አፍርንጊ እምድኅረ ዕርገቱ ለእግዚእነ በሥጋ ውስተ ሰማይ በዐሠርቱ ወአሐዱ ዓመት ወበአርባዕቱ ዓመተ መንግሥቱ ለቀላውዴዎስ ቄሳር።

ወስብሐት ለእግዚአብሔር አሜን።

Currently Selected:

ወንጌል ዘማርቆስ 16: ሐኪግ

Highlight

Copy