Yohanise 13

Yesuusay be erusichoshiti toke shotosa

1Garo Massalay uddhi e yecha. Yesuusay ha saha garafa dhaddi afaase adeko be hange woggay ellosa erdi be yecho gisha ha saha gara yechashita beese maaddhasita eehiya e yecha, aallicira makkoni uso e eeto. 2Yesuusaara e erusichoshitaaray qamete miya u yecha. Asqorotaxe maaqe Simoone na'i Yuuda muxhurowa garsi Yesuusa e ingoronike Humbayey maxo gelsi e yecha. 3Yesuusani afaase adey esuse uddi basi gara adeto indonikiyara Wontoy esa ansine be yoodinikiyara yeydiwo esuko be hangenikiyara e ericha. 4Hinne qamete muuchine dendi be maa'o e gaddo. Dunga etti be elfaa e xhaaxho. 5Ye e geede sanqiya waaxe gussi be erusichoshiti toke shohe e gello. Be elfaa xhaaxhuttecha dungana u toke e ucco.

6Yesuusani Simoone sunge Phexhrose buro e yoone <<Haha'e, Laaxo! Nembaa ta toke shohesa?>> hidi e hido. 7Yesuusani <<Aba hantiya ta yesesa hatte neni eruwannako, buro garama erako ne ere>> hidi e hido.

8Phexhroseni <<Neni fetto ta toke shohuwannako>> hidi hido.

Yesuusani <<Tani ne toke shohe dheeba'ayko taara wolko bidzeto keenguwannako>> hidi e hido.

9Yenniyani Phexhrosey <<Laaxo! Tokewo e maaddho baane yebo ta kucheni ta qinoni shohuwa!>> hidi e hido.

10Yesuusani <<Shohuttese axi e garay uddina geeshe e maaqe gisha toke baaka feda shohe worgusuwasso. Uddi maaqe dheeddakoni hinuni geeshuko>> yeydi e hido. 11Yesuusay bemba garsi ingesi oone maaqenike be ericho gisha <<Uddi maaqe dheeddakoni hinuni geeshuko>> hidi e hido.

12U toke be shoto geede be maa'o maadhi sekke be godowa e utto. Usoni <<Aba hinuse ta hantosa erdoytuwa? 13Hinuni <Eruseyo! Nu Laaxo!> hidiko hiine. Tamba yeydi hi xheygesi aadeko. Tani aade hinumba erusesako, aade hi Laaxuko. 14Yebo, tani hinumba erusesaara hi Laaxaara maaqichine hi toke ta shoto geede hinunini woli toke shoheko e worguse. 15Tani hinuse matonike yeydiwo hinunini woluse mahoronike hinumba ta hantana beysiko ta yese. 16Hinuse ta ohesi fetto aadeko. Maalay laaxume garuwasso, woosuttesi wooseesume garuwasso. 17Ha esa erdi etti hanta gara hi feysshako suuzutteseesitako hi maaqe.

18Ha zeere ta zeeresi hi uddi gisha maaquwasso. Oone ta xhardonike erako ta ere. Tani xharreese baaka Hayla Fissharowaka <Ta boora muudasuko ta gara iilli denda> yeydi e hidechoshi aaleko e worguse. 19E aallo geede oone ta maaqenike erdi taa hi aadexoronikeko ha esi maaqeesume e buro hinuse ta ohe. 20Hinuse ta ohesi aadeko. Ta ansosa <Aadeko> hidi ekkesi tambako e ekke, tamba <Aadeko> hidi ekkesi tamba ansaseni efako e ekke>> yeydi e hido.

Yesuusay Yuuda gisha zeerdosa

Mat 26:20-25; Mrq 14:17-21; Luq 22:21-23

21Yesuusay yeydi be zeerdo geede be gawwaana iitana hooddi <<Hinuse ta ohesi aadeko. Hinukafa bidziko tamba garsi ingesa>> hidi addussi e oto. 22E erusichoshiti beekafa oonese e zeerdonike ere dheeddi woli aafiya u beedo. 23Yesuusay eehicho bidzi e erusichoshitaafay Yesuusa da'aaka uttiya e yechoyne 24Simoone sunge Phexhrosey ye esa oonese e zeerdonike e oycorosa qan'i e oto.

25Hinne be nuuna Yesuusa washeko shiishi <<Laaxo, oonena?>> hidi ye axi oycco. 26Yesuusani <<Ha uttaaka boora caddi esa ta baaruxe axuko>> yeydi e hido. Ye e geede boora uttaa caddi Asqorotaxe maaqe Simoone na'i Yuuda e baarusso. 27Yuudani baardo geede Humbayey esuka e gello. Yesuusani Yuudako <<Hantese ne massesesa ukke hantuwa!>> hidi e hido. 28Yesuusay abase zeerdonike yaha tatowa uttecha fedeesituse gello baasso. 29Bidzi bidzi e erusichoshiti Yuuday miijhe aykesa maaqicho gisha <<Ha massalase worguse abako woonguwa!>> oo'oyne <<Jhi'ituse miijhe inguwa!>> yeydi e hidosako uso e bishecha. 30Yuuday ye boora be baardonikewo kessi dhaddi hando. Sahani qama maaqicha.

31Yuuday yaafa kessi hando geede Yesuusay <<Hatte axi yele hidi hiyuttasi kuxuttiko e yese. Ye axi yele badena Wontoy kuxuttiko yese. 32Wontoy e badena kuxutto'ayko beese esa kuxako e kuxe. E kuxesini decuwassho. 33Ta naysho! Hinunaara wolko laga decuwassho. Tamba worgoko hi worge, Ayhuda afana maagituse <Tani hange godo hinuni hamese danda'uwaytako> yeydi ta zeerdonikeko hatteni hinuse yeydiwo ta zeere. 34<Wola eehuwayte> hidiko hinuse kille woosso ta ohe. Tani hinumba eetonike hinunini wola eehuwayte. 35Wola hi eeha'aykoko ta oge hangeesita hi maaqenikeko axi uddi ere>> yeydi e hido.

Yesuusay Phexhrose gisha zeerdosa

Mat 26:31-35; Mrq 14:27-31; Luq 22:31-34

36Ye e geede Simoone sunge Phexhrosey Yesuusa <<Laaxo, ay ne hange?>> hidi e oycco.

Yesuusani <<Ta hange godo hatte taara hamese danda'uwannako, hanninamma ta geede yootako ne yoone>> hidi e hido.

37Phexhroseni <<Laaxo, ame hatte neera hamese ta danda'uwaane? Fetto neeme hidi hissine tamba garsi ingako ta inge>> hidi e hido.

38Yesuusani <<Neni taame hissine nemba garsi ingaa ne inge? Neese ta ohesi fetto aadeko, lukkoy ollo baanneko haydzi wogga taa <Tani esa eruwasso> hidi ne hine>> hidi e hido.

Currently Selected:

Yohanise 13: KilleC

Highlight

Copy