Luqaase 16

Fayanka hantaxe

1Assi Yesuusay be erusichoshituko <<Bidzi ade wodumay be oomona zawa ahesa e keengicha. Axiti esuko <Ha hantaxi ne miijheko buddi bayse> hidi u oto. 2Ye zawaadeni esa beeko xheydi <Ha ne gisha ta siine odoy abana? Yoonase ta miijhena ne hantosa e bidzi bidzina oowa! Hanzowafa sekke ta zawa ahese danda'uwannako> hidi e hido.

3Ye zawa ahesini be muxhurowanna <Hay, ta laaxini ta hantaafa taa goodesuko hine. Waa ta hiyye? Woota wootese osa keenguwasso, shidhi miyeni fetto taa borsusako e borsuse. 4Yebo, ta hanta garafa taa e ooxeteni axiti be zawaa taa mokkoronike ta mahesa erako ta ere> hidi e hido.

5Hinne esi ye be laaxi geley u gara yecho axita u bidzi bidzina beeko xheydi buronase <Ta laaxi geley aanxhuna ne gara e yese?> hidi e oycco. 6<Xhiixi ota zayteko ta gara yesa> hidi e mato. Hinne ye adeni <Ukke utti <<Ichichi tamme>> hidi shati diizuwa!> hidi e hido. 7Feda assi <Nenichi? Ne gara aanxhuna yesa?> hidi e oycco. <Xhiixi dado#16:7 dado hidi haya diizuttasi Qawetena <<Kuntaale>> hidi hiyuttichashuko. gossako ta gara yesa> hidi e mato. <Hii'e, <<hazzuppi tammi dado>> hissine shati diizuwa> hidi e hido.

8E laaxini e hantay dooma maaqe ye zawa ahichashi beese be qinose e mato fayankete beedi e nassho. Ha saha axiti Wonto axitukofa ha saha gara be yese yesona fayanka u maaqenikeko e beyse>> hidi e hido.

Oddhiyafa orjiya elle gisha

9Sekkeni Yesuusay <<Hinuse ohoko ta ohe, ha saha gara bente miijhena hinuse lagge aykuwayte. Yeysi mahesa hi maaqo'ayko ye hi miijhey itto geedeko koolo makkina yese zawaa hinumba u mokke. 10Laaqi abakose muxhuraxe maaddhasi yeydiwo orje abakoseni muxhuraxuko e maaqe. Oddhe abakose muxhuraxe maaqe dheeddasi orje abakoseni muxhuraxe maaquwasso. 11Hinne ha saha gara bente miijheshe muxhuraxe maaqe hi dheeddako ooni hinuse aadena wodunte ingesa? 12Axi miijhe aykena muxhuraxe maaqe hi dheeddo geede hinuse maaqesa ooni ingesa?

13Bidzi maraxi lam'i laaxuse woosuttese danda'uwasso. Ha esa e inxha'e, se esa e eehe. Ha esuseni uddhi e woosutte, se esa e haasse. Miijhe hi wontokeysi hi mato geede Wontose woosuttese danda'uwaytako>> yeydi e hido.

14Miijhe eehicha Farasaxiti Yesuusay zeerdosa uddi siidi u qozoozzo. 15Sekkeni ususe <<Hinuse hinumbako axi buro gizo hi mahe. Wontomay hi muxhuro erako e ere. Axi buro kuxuttesi Wonto buro darrisesako>> yeydi e hido.

Efunxuseni gelunxuseni

Mat 11:12-13; 5:31-32; Mrq 10:11-12

16Yesuusani sekke <<Muse wogani maaqqe kaayaxiti fissharoy xhamaqicha Yohanisey yoone aalloko hantisine e yecha. Xhamaqicha Yohanisey yoodo woggaafa hanke Wonto kaatetose modhe odoko ohuttisine yesa. Axiti be bidzi bidzina ye kaatetowa gelesuko iitanawo u kardutte. 17Muse wogaafa fetto bidzi laaqi fooxhuttesesini baaneesume afaara sahaaray baadakoko e shawuke. 18Be macho datti fede macho ekkesi uddi laggetako e laggete. Yeydiwo be adesofa kessi yoodanniyo ekkesi laggetako e laggete>> yeydi e hido.

Bidzi wodumaara jhi'o Aalazariyara

19Sekkeni Yesuusay <<Bidzi ade wodumay e yecha. E maa'oni e woomay keddaydesesa luxhuxhu hidese zo'o maa'o e maaqicha. Wontana wontana esuse e bisshine okketti e yecha. 20Feday assi iitana jhi'oy e garay uddina madawo maaddhesesi Aalazare sungesi ye wodumaso suma e woy'icha. 21Ye jhi'oni ye woduma tato googe medhi guttase maxxhi miyese e col'icha. Kaniti beese yoodi e mada laa'icha.

22Hinne ye jhi'oy haydhine Wonto woosaxiti yoodi Abrahaame da'aa etti u aando. Assi ye wodumani haydhi e moogutto. 23Si'oole hobolowa maddhumiya yesine wokke beechine Abrahaame zara e beedo. Abrahaame da'aa Aalazarey yecha. 24Ye wodumani be kato keddaysi <Nuwadde Abrahaame, tamba maaruwa! Ha tama looxhenako maddhumiya ta yese. Aalazare taase anxuwa, be gil'a bira waassaaka gelsi ta urxhume laagusseese> hidi e shidho.

25Abrahaameni <Ta yele, neni saha gara ne yechoniyaka neese maaqe modhe abako degessi ne yechosha naddhi gaxhuwa! Yenniyaka Aalazarey maddhaakako e yecha. Hatte haya e aafunxi ucuttine maggiya esi yesuneko ha neni iitana maddhungesi. 26Ye esawoni e maaddho baane fetto neeseni nuuseni nu feeqa orje gaagako yesa. Ha e gisha nuukofa hinuko fotese worgesi yesa'ayko fetto fotese danda'uttuwasso. Hinukofa nuuko fotese danda'uttuwasso> yeydi e hido. 27Ye wodumani <Hinne odde, nuwadde, ye Aalazare nuwadeso anxuwa! 28Yaha ichichi nuundo na'axheko taase yesa. Usini ha ta beedo maddha yoodi assi beewanike usuko ohheese> hidi e hido.

29Abrahaameni <Ususe ohesi Musesaara kaayaxiti fissharowaray yedena yesako yese. Ye ususe siyuttuwaye> hidi e hido. 30Ye wodumani <Nuwadde, Abrahaame, ye esimay eluwasso! Haybowafa dendi bidzi handakowoko be cubbo dhaddi u maaqe> hidi e hido. 31<Musesaara kaayaxiti fissharowaray otosa siwwasa be maaddho geedema bidzi axi fetto haybowafa dendi handakoni aadekoydi u hiyorosa mahese danda'uttuwasso> hidiko Abrahaamey hido>> hidi Yesuusay hido.

Currently Selected:

Luqaase 16: KilleC

Highlight

Copy