Luqaase 23

Yesuusay kaati Philaxhose buro

Mat 27:1-2,11-14; Mrq 15:1-5; Yoh 18:28-38

1Ayhuda gate aheesiti be uddina dendi Philaxhose buro Yesuusa u aando. 2Esani e gara luufe u gello. <<Ha axi nu axita haluxe oge e erususuneko nu ayto. Esini <Rooma kaatuse#23:2 Rooma kaate yeydi birchuttasi Grike nuunana <<Qesaare>> hidi hiyoko. gaalo gaallofita!> hidini e hine. Assi <Tani Mesiheko> yeydi hiyoni <Kaatuko> hidi e hicha>> hidi u hido.

3Philaxhoseni Yesuusa <<Neni Ayhuda kaatuwa?>> hidi e oycco.

Yesuusani <<Hidiko ne yese>> hidi hido.

4Philaxhoseni kahinituse afana maagitusaara axitusaara <<Ha axi gara bidzi baysoni degesso baasso>> hidi e hido.

5Usini sekke e gara minsi <<Ha axi Galila wudefa densi fetto ha e aallo Yuuda wude uddi axiti gidda erusisineko e koysuxe>> hidi u hido.

Yesuusay kaati Herodise buro

6Philaxhoseni yeydi u hisune be siido geede uso <<Ha axi Galilaxuwa?>> hidi e oycco. 7Philaxhoseni Yesuusa Herodisey ahicho wudefa e maaqenike erdi Herodiseko e anso. Herodiseni yenniya Yerusaleemeko e yecha.

8Herodisey Yesuusa gisha siidi esa beyese laga wogga orje col'a e keengicha. Micushe abako e hantusune be aafena beyese be worgicho gisha esa beedi orjena e maddo. 9Hinne Herodisey Yesuusa laga oyche e oycco. Esini e utta bidzoni mahe e dheeddo. 10Kahinituse afana maagitaara Muse woga eruseesitaaray yaha eedhi iitanawo u luukicha.

11Herodiseni be tooraxitaara wolko esa haassi e gara qozoozzi waare maa'o maysi sekke Philaxhoseko e anso. 12Herodiseni Philaxhoseni ye wontewo wola eehesa u maaddho. Buroma wola inxha'ichashuko u maaqicha.

Yesuusay hay'oronike e gara e yaa'utto

Mat 27:15-26; Mrq 15:6-15; Yoh 18:39; 19:1-16

13Philaxhoseni kahinituse afana maagitaara gatese afana maagitaara axitaaraysiwo bidzina e xheydo. 14<<Ha axi <Axiti giddaako koyse e denxe> hidi hissineko taako hi oodo. Tani hay hi uqusso luufona hi buro e bidzi bidzina oycci tayne e gara bidzi baysoni dheeddo. 15Yeydiwo Herodiseni bidzi baysoni e gara degexe be dheeddo geede hanke nuuko e anso. Hinuni beewayte, ha axi bemba haybose ellusesa e hantosi bidzini baasso. 16Ha e gisha esa durusiko ta dakke>> hidi e hido.

[ 17Philaxhosey Garo Massalaanna uddi bera aallo bidzi tufaxe e birchoronike attuwasa e maaqicha.] 18Hinne axiti be uddina <<Ha axe ooxuwa! Barbaane nuuse birchuwa!>> hidi u koysso. 19Barbaaney ye katamaaka toora e denso gishaara axi haydho gishaara tufe zawaa gellechashuko e maaqicha. 20Philaxhoseni Yesuusa birshi dafese wordi sekke axituse e zeerdo 21Axitini <<Esa suxhuwa! Suxhuwa!>> hidi uwwiya u yecha.

22Philaxhoseni haysso <<Ha axi fetto am e baysese? Tani e gara esa haybose elluse abako e hantesesa ta beedoy baasso. Ha e gisha esa durusiko ta dakke>> hidi e hido.

23Usini <<Esa suxhuwa! Suxhuwa!>> hidi dhabe dheeddi inxhadhi keddaydese katona uwwiya u yecha. U uwway miindo. 24Ye e gisha Philaxhosey <<Hi wordonike maaquwaye>> hidi e hido. 25Ye u shidhecho Barbaane toora e denso gishaara axi haydho gishaara tufuttechashe tufe zawafa e birsho. Yesuusa u wordonikewo garsi e indo.

Yesuusay suxhuttosa

Mat 27:32-44; Mrq 15:21-32; Yoh 19:17-27

26Ye e geede Yesuusa etti u aando. Bidzi Qarana wude axi Simoone sunge adey arefa katamaa e yoochoyne esaara muti osana ayti suxi mixe esa iddussi Yesuusa geede e hamoronike u mato. 27Laga axiti e geede aadho. Iitana <<Wiy wiy>> hidi biya shatti muussine yeekisine indowaxhitini usaara hangicha. 28-29Yesuusani usuko maaddhi beedi <<Ha Yerusaleeme indowaxhito, ame taase hi yeeke? <Menxe maaqicha indowaxhitini yello baa shubhashaara dhamutto baa dhanxitaaray abakeydi suuzutteseesitana> yeydi hiyoro wontay yoone gisha hinusaara hi nayshushaara yeekuwayte! 30Yenniyaka axiti bakkituko <Nu gara wodduwayte! Denito numba aachuwayte!> yeydiko hiye u ayke. 31Yebo, yeenxhi uddina mixi tima gara e maaddho geede mela mixi waani eye?>> yeydi e hido.

32Yeydiwo Yesuusaara suxhese fede lam'i fuulita ayti etti u aando. 33Qeraniyo sunge godo aandi be ello geede yaha Yesuusa u suxxho. Fuulitani bidzo oshishaa bidzo hadursaysi u suxxho.

34Yesuusani <<Nuwadde, ha usiti hantiya be yesesa eruttuwasso, ususe <Attuwaye> hidi hiwwa!>> hidi e hido. E maa'o shati hixha u ollo.

35Laga axiti eedhi u beecha. Ayhuda afana maagitini <<Fedachi e maarichoshi, hine esi Wontoy xhardese Mesihe maaqo'ayko, mee, bemba maaruwaye!>> yeydi esa u dhaaddicha. 36Yeydiwo tooraxitini u dhaaddicha. Esuko uddhini dhooqo ushe oodi 37<<Mee, Ayhuda kaate maako nemba maaruwa!>> yeydi u hicha.

38Yesuusa qinose afana <<Ha esi Ayhuda kaatuko>> yeydi diizuttesesi e yecha.

Yesuusaara suxhutta lam'i fuulitaara

Mat 27:38-44; Mrq 15:27-32

39Yesuusaara suxhutta lam'i fuulitaafa bidzi <<Neni Mesihe maaquwaye? Mee, nembani numbani ha essaafa maaruwa>> hidi e cassho. 40Lakkoni esa gaylisine <<Fetto neni ha e bisha yaa'a giddaaka yesine Wonto jhashe eruwanuwa? 41Ninimay ni hanto iitetena yaa'a ni gara efeko nii e worguse, niisi aade yaa'ako. Ha aximay e hanto baysoy bidzini baasso>> yeydi e hido.

42Ye e geedeni <<Yesuusa, ne kaatoroniya tamba bottofuna!>> hidi e hido. 43Yesuusani <<Aadewoko neese ta ohe, hanzowoko taara wolko gannatiya ne bente>> hidi e hido.

Yesuusay haydhosa

Mat 27:45-56; Mrq 15:33-41; Yoh 19:28-30

44Wontaafa izzuppi saate e maaddho. Yenniyafa ayti odduppi saate makko qoossi fo'ey fashuttine sahay kumena e ceendo. 45Wonto Hayla Zawa giddaa hade gilbakeysi fasshichashi feedhutti lam'e e kesso. 46Yesuusani be kato keddaysi <<Nuwadde, ta lubbo ne kuchiyako ta gade>> hidi e hido. Yeydi be hido geede kaxe e kesso.

47Yaha yecha xhiixi gara afana maagay maaddha abako uddina beedi <<Ha axi aadewo gizo axuko e maaqicha>> hidi Wonto kedda kedda e hisso.

48Ye esa beyese yaha bhikkiluttecha axiti uddi ye maaddha abako be beedo geede higilli be qino lam'una ayti yeekisine dhaddi be zawa u maaddho. 49Yesuusa modhussi ericha uddi axitaara Galilaafa ayti esaara hangicha indowaxhitaaray beese zara eedhi haanxho uddi u beecha.

Yesuusay mooguttosa

Mat 27:57-61; Mrq 15:42-47; Yoh 19:38-42

50-51Bidzi adey Yoosefe sungesi Ayhuda katamaafa maaqe Armataxi Wonto kaatete gobbena kakke gizowara modhe axaara maaqisine Ayhuda gate aheesitaafa e maaqicha. Ayhudaxiti Yesuusa gara kundo kumiyakaara hantakaara gele e inxhadhecha. 52Esini Philaxhoseko handi Yesuusa aha e ingorosa e shidho. 53Ahani hossi talbaafa meddhuttese maa'ona e acco. Ooneni essaa moogutti eruwa godo wocci bootti naddhecho bookuttese shusshaa gelsi aha e woyso. 54Yeysi e matosi sanbatay gelese hine ye wontey naquttuso wontako e maaqicho gishako.

55Galilaafa Yesuusaara yoodecha indowaxhiti Yoosefiyara handi ye boossaaka ahay waa waysi woysonike u beedo. 56Ye indowaxhitini hanke maaddhi yoodi sawwesaara tisheshaara u naddho. Muse wogay ohenike sanbata wonte kaxe etti u feyssho.

Currently Selected:

Luqaase 23: KilleC

Highlight

Copy