Luqaase 3

Xhamaqicha Yohanisey erussosa

Mat 3:1-12; Mrq 1:1-8; Yoh 1:19-28

1Rooma kaati#3:1 Rooma kaate yeydi birchuttasi Grike nuunana <<Qesaare>> hidi hiyoko. Xhibariyosey kaatto tamma ichicho beraa Phenxhenaxi Philaxhosey Yuuda wude ahesa, Herodisey Galila wude ahesa, yeydiwo Herodiseyndo na'i Filphoosey Ituriyasiyara Tirakonidosiyara ahesa, Liisanooseni Abilaanise ahesa u maaqicha. 2Haannaara Qayaafaaray kahinituse afana adita u maaqicha. Yenniyani Zakaraase na'i Yohanisey saha melaa yesune Wonto katoy esuko yoodo. 3Hinne Yohanisey Yordanose waaxi semfa hamfa uddi godo hanti <<Hi cubbo dhaddi maaddhi xhamaquttuwayte. Yeydi hi maaqete Wontoy hi cubbo <Attuwaye> hidiko e hine>> hidi ohiya e yecha. 4Yeydini e maaddhosi kaayaxi Isayasey Yohanisese diizecho kaayoy itorosako. Ye esini

<<Saha melaa uwwara axi katoy <Laaxi oge naquwayte, modhussi gizusuwayte.

5Shoorey kundi shanka e maaqe, bakkaara dentaaray be uddina yekke ulla hiwaye. Oge doomay gizuwaye, qun'i dhige ogeni modhuwaye.

6Axi be uddina Wontoy loolusesa beewaye> yeydiko e hine>>

yeydi hinesako e maaqicha.

7Hinne Yohanisey xhamaquttese beeko yooda axita <<Hinuno gappasshi nayshito! Qaaruseesito! <Wontokofa yoone huulaafa kesoko nu kese> hidi waydi hi maxe? 8Hi cubbo dhaddi hi maaddhosi esuna erutte hanta hantuwayte baaka <Nuni Abrahaame nayshuko> hidi cee'uttofita! Hinuse ohoko ta ohe. Wontoy ha shushaafa etti Abrahaamese nayshe mahesuko e danda'e. 9Fetto hatte mixita e xhabhowafa bursi dafese gandey naquttiko e yese. Yoonase modhe aafe kaxhuwa mixiti uddina burdiko tamaa u dafutte>> hidi e hido.

10Hinne axitini Yohanise <<Hine waani nu hiyye?>> hidi u oycco. 11Esini <<Lam'i maa'o keengesi lakko axuse inguwaye. Kaxa keengesini fedaara wolko shahuwaye>> hidi e hido. 12Assi qaraxha qaraxhichashitini xhamaquttese esuko yoodi <<Laaxo, nuni hinne waa nu hiye?>> hidi u oycco. 13Esini <<Shamusheshe e worguseesume garsi axe shamushofita>> hidi e hido. 14Kaati tooraxitini yoodi <<Am nuni hanto?>> hidi u oycco. Esini <<Osana axi miijhe ettofita, zaadena axe luuttofita. Hinuse hi hanta gisha hi ekkesi ellako elle>> hidi e hido.

15Yenniyaka axiti uddina bidzi abako kakkisine Yohanise gisha be bidzi bidzina be muxhurowanna <<Ha esi Mesihiyani?>> hidi u maxicha. 16Yohaniseni <<Tanimay hinumba waaxunako xhamaqe. Taame garesi ye esi yootako e yoone. Tani fetto e kobha tufe bircheshe bishuwa axuko. Esi hinumba Ayaana Geeshunaara tamanaarako e xhamaqe. 17Aydaa yese kaxa esuna falaafa shahese haxhooleko be kuchiya e aytese. Be geessho geede modhe kaxa li'iyako e gelse. Fala bayese danda'uwa tamanako e megge>> hidi e hido. 18Yeydiwo Yohanisey axe laga ogena narisine modhe odo e ohicha. 19Galila wude ahicha Herodisey beyndo na'i macho Herodiyada ettosunaara fede iita laga abako e hantosunaara Yohanisey esa murdo. 20Hatteni Herodisey Yohanise aykussi tufe zawa gelsusena iita gara iita fetto e kosso.

Yesuusay xhamaqutto

Mat 3:13-17; Mrq 1:9-11

21Axi uddina xhamaquttoniya Yesuusani xhamaqutto. Xhamaqutti Wonto shi'iya e yesune afay do'uttine 22Ayaana Geeshini e garay hade woyya bissheshesha maaddhi e bakkaa hoddho. Yenniyakani <<Ta eehe ta yeley nembako. Neenna maggako ta magge>> yeydi hine katoy afaafa sinto.

Yesuusa yella gerita

Mat 1:1-17

23Yesuusay e beray haydzi tamme ellesa maaddhesune eruse e ayto. Esini axuse bishichoshi Yoosefey yellosako. Ye esini Yoosefe yellasi Eele, 24Eele yellasi Maate, Maate yellasi Lewe, Lewe yellasi Milke, Milke yellasi Yoona, Yoona yellasi Yoosefe, 25Yoosefe yellasi Maatatiyo, Maatatiyo yellasi Aamooxhe, Aamooxhe yellasi Nahome, Nahome yellasi Esliime, Esliime yellasi Naage, 26Naage yellasi Me'aate, Me'aate yellasi Maatatiyo, Maatatiyo yellasi Seyme, Seyme yellasi Yoosefe, Yoosefe yellasi Yooda, 27Yooda yellasi Yoona, Yoona yellasi Reese, Reese yellasi Zerubabule, Zerubabule yellasi Selatiya, Selatiya yellasi Neere, 28Neere yellasi Milke, Milke yellasi Haade, Haade yellasi Qosaame, Qosaame yellasi Almodaame, Almodaame yellasi Eere, 29Eere yellasi Yose'e, Yose'e yellasi Al'ezere, Al'ezere yellasi Yorame, Yorame yellasi Maate, Maate yellasi Lewe, 30Lewe yellasi Simoone, Simoone yellasi Yuuda, Yuuda yellasi Yoosefe, Yoosefe yellasi Yonaane, Yonaane yellasi Eliyaqime, 31Eliyaqime yellasi Meliya, Meliya yellasi Maynane, Maynane yellasi Mataate, Mataate yellasi Naataane, Naataane yellasi Dawite, 32Dawite yellasi Isseye, Isseye yellasi Yoobeede, Yoobeede yellasi Bo'aaze, Bo'aaze yellasi Salmoone, Salmoone yellasi Na'asone, 33Ne'asone yellasi Aminaadabe, Aminaadabe yellasi Raame, Raame yellasi Arine, Arine yellasi Hexhrone, Hexhrone yellasi Farese, Farese yellasi Yuuda, Yuuda yellasi Yayqoobe, 34Yayqoobe yellasi Yissaaqe, Yissaaqe yellasi Abrahaame, Abrahaame yellasi Taara, Taara yellasi Naakore, Naakore yellasi Saruge, 35Saruge yellasi Re'u, Re'u yellasi Felege, Felege yellasi Abere, Abere yellasi Saala, 36Saala yellasi Qaynane, Qaynane yellasi Arfasade, Arfasade yellasi Seeme, Seeme yellasi Nohe, Nohe yellasi Laamihe, 37Lamihe yellasi Matusala, Matusala yellasi Henooke, Henooke yellasi Yaarede, Yaarede yellasi Mehalaale, Mehalaale yellasi Qenane, 38Qenane yellasi Henose, Henose yellasi Seete, Seete yellasi Addaame, Addaame meddhasi Wontoko hidiko e maaqicha.

Currently Selected:

Luqaase 3: KilleC

Highlight

Copy