Matoose 11

Xhamaqicha Yohanisey Yesuusako anso woosso

Luq 7:18-35

1Yesuusay be erusicho tamma lam'ituse woosso oti be also geede be yecho godofa beese ukke maaqe katamittaa Wonto kato ohesaara erusesaara e hando. 2-3Xhamaqicha Yohanisey tufe zawaa yesine Yesuusi Kristosay hantosa siidi be erusichoshitaafa Yesuusako ansi << <Yootako e yoone> hidi hiyuttecha Mesihey nembani fedaara nu kafe?>> hidi hissine u oycorosa e anso.

4Yesuusani ye woosaxituko <<Sekke handi Yohanisese beya hi yesesaara siya hi yesesaara uddi ohuwayte. 5Bal'itini beya u yese, doomitini gizzi hamiya u yese, kom'e hargaxitini loolli geejhiya u yese, dhagitini siya u yese, haydhechashitini dendiya u yese, jhi'ituse modhe odoy ohuttiya e yese. 6Tamba etti dhumuttuwasi suuzuttesesako>> yeydi e hido.

Xhamaqicha Yohanise gisha e zeerdosa

7Yohanisey ansecho e erusichoshiti handine Yesuusay Yohanise gisha yaha yecha axituko zeerisine <<Am beya saha melaa hi yoodo? Agexi en'use shanka gale beyesuwani? 8Hinne am beyese hi kesso? Bentuwa modhe maa'o maadhese axe beyesuwa hi kesso? Yeenke yese maa'o maadheseesiti kaataxhe zawaako u bente.

9Mee, hine am beyese hi kesso? Kaayaxe beyesuwani? Eewwa, kaayaxume garesako hi beedo. 10Hayla Fissharowa

<Ne buro ne buroydi handi oge naqara ta woosaxuko ne buro ta anxe> yeydi diizuttechashi esusuko.

11Aadewoko hinuse ta ohe, ha saha bakka yeluttasaafa Xhamaqicha Yohanise garesi ooneni baasso. Maaqe baaka afa kaatetiya uddime eero maaqesi Yohanise garoko gare.

12Afa kaatetey Xhamaqicha Yohanisiyafa ayti hanzo aallo iitana ur'uttiyako e yese. Osaxitini esa aykesuko u worge. 13Uddi kaayaxitaara Muse wogaaray#11:13 kaayaxitaara Muse wogaara yeydi hiinesi buro Ayhudaxiti kuchiya yecha Hayla Fissharoko. Hanzo <<Buro Caaqo>> yeydi hiyuttesako. Xhamaqicha Yohanisey yoodo aalloko buro gara maaqesa zeerisine u yecha. 14Kaayaxiti otechosha efese worgesa hi maaqo'ayko <Elaaseko yoonesa> hidi hiyuttechashi ha Yohaniseko. 15Yoonase washe keengesi naddhi siwwaye.

16Ha bera axe abaydini tayye? Usini geeshaaka utte nayshuko u bishe. Ye nayshini be jhaalita xheydi 17<Hinumba magguse ose nu siisinne dhollo baytako, yeefo tosshe nu tosshinne yeetto baytako> yeydi uynenikeko. 18Xhamaqicha Yohanisey yoodi kaxa muudo badiyara weyne daana ussho badiyara e deccine <Xhoozuko e gara yesa> yeydi u hido. 19Tani axi yeley yoodi miyakaara ushiyakaara ta yesune <Ha esi miyara ushiyara eehe gawwaxuko, qaraxhichashitusaara cubbaxitusaara u laggeko> yeydi u hido. Wonto eray gizo maaqesi be hantanako e erutte>> yeydi e hido.

Be cubbo dhaddo baa katamiti gisha

Luq 10:13-15

20Yesuusay fede katamitume micushe laga hanta u feeqa e hantecho katama axiti be cubbo dhaddi maaqe u dheeddine uso gaylisine 21<<Niya baduffu, Korazine! Niya baduffu Beetesayda! Hinukaa ta hantecho micushesha Xhirose katamakaara Siidoona katamakaara ta hantesesako ye katama axiti yeefo maa'o maadhi be qinowa muqo ucci hanno olowoko be cubbo dhaddi u maaqaane.

22Hinuse ohoko ta ohe. Yaa'a wonte hinume Xhirose axiti garaara Siidoona axiti garaara yaa'utte yaa'ako shawukesa. 23Neno Qifirnahoome! Wokke afaa aalliya ne qinoy kedda kedda e hine? Si'oole hobolowako yekke ne dafutte. Ne feeqa ta hanto micushe hanta Sodome katamaa ta hantesesako ye katamay hanzo aallo baadobadiko e yesaane. 24Aadewoko hinuse ta ohe, yaa'a wonte neeme Sodome axiti gara yaa'utte yaa'ako shawukesa>> yeydi e hido.

Iddaafa kaxe efe gisha

Luq 10:21-22

25Ye wogga Yesuusani <<Nuwadde, afaseni sahaseni Laaxe maaqeyo! Haanke yesesa gaxaxitumiyara eraxitumiyara aasshi xhahituse ne beyso gisha niya galatako ta galate. 26Eewwa nuwadde, ha esa hantese modhe ne maxo maaddhiko e yese. 27Uddi zeerey nuwadekofa taase inguttiko e yese. Adewo baaka yele eresi ooneni baasso. Yeydiwo yeliyara yeley e eroronike matosaara baaka ade eresi ooneni baasso.

28Hinuno gafaxito, idday deexheseesito uddi! Taako yoowayte, kaxuko hinuse ta inge. 29Tani gawwo aakowara tamba ullaysesaara ta maaqe gisha hi keliya ta qanbara idduwayte, taakofani eruwayte, hi lubbose kaxuko hi ekke. 30Ta qanbaray shooluwasako, ta iddani shawukako>> yeydi e hido.

Currently Selected:

Matoose 11: KilleC

Highlight

Copy