Matoose 18

Bemba ullaysesi kedda e hinesa

Mrq 9:33-37; Luq 9:46-48

1Ye woggawo e erusichoshiti Yesuusako yoodi <<Afa kaatetiya uddiyade garesi oonewa?>> hidi u oycco. 2Bidzi yele oddhe u gidda xheydi essi 3<<Aadewoko hinuse ta ohe, hinumba arsi yele oddhe bisha hi maaddho baasa afa kaatetiya fetto geluwaytako.

4Afa kaatetiya angusse maaqesi ha yele oddhekeysi bemba ullaysesako. 5Ta sunxuna haanke yese yele oddhe mokkesi taani mokkako e mokke. 6Taa aadexe ha baraxhitaafa bidzo dhumuse axi deexho woxha be ontaa tutti bagade oomo undi yaha e baadakoko esuse e bishe>> yeydi e hido.

Feda dhumekofa biya kafe gisha

Mrq 9:42-48; Luq 17:1-2

7Sekke Yesuusani <<Dhumo oowese danda'e basituna kundi u yese gisha ha saha gara yese axita baduffu! Dhumusesi yoodo badi dhagguwasso. Dhumoy esuna yoone axe esa fetto baduffu!

8Ne kuchey oo'oyne ne tokey niya dhumusese hitta'ayko sena ne garafa bursi dakkuwa. Lam'i kuche keengisine Gaanname hiyutte koolo makkina yese tamaa ne dafutteesume bidzi kuche keengisine yesuwa geleko neese bishesha.

9Bidzi ne aafey niya dhumusese hitta'ayko ne garafa kessi wora dakkuwa! Lam'i aafe keengisine Gaanname hiyutte bayese danda'uwa tamaa ne dafutteesume bidzi aafe keengisine yesuwa geleko neese bishesha.

10Ha baraxhitaafa bidzoni hi haassuwannike hinumba kakkuwayte. Hinuse ohoko ta ohe. Ususe afaa yese Wonto woosaxiti uddi woggako nuwade buro u ee'e. 11[Axi yeleydi hiyuttasi yoodosi baadechashe loolusesuko.]>> yeydi e hido.

Baadechine benta dore

Luq 15:3-7

12Assi Yesuusay <<Mee, ohuwayte! Xhiixi dorita keenge bidzi adey usaafa bidzi baadako waani e hine? Ye be yeengichosha odduppi tamma odduppe bakka gara dhaddi baadase worgiya hanguwaye? 13Aadewoko hinuse ta ohe, be degessoyna baadobaa odduppi tamma odduppe garsi baadechine benta bidzusuko e magge. 14Yeydiwo afaa yese hinadey ha baraxhitaafa bidzi bayoronike worguwasso>> yeydi e hido.

Biya miidhasuse aba hante e worgusesa

15Sekkeni Yesuusay <<Neyndo na'i niya miidhako esaara neerawoy wolla yesune niya e miidhosa ohuwa. Ne otosa e siita'aykoni sekke neyndo na'e maaddhiko e yese. 16Neese inxhadhi siye e dheeba'ayko zeerey lam'unaara haydzunaara ato maaddhi e miinge gisha lam'e oo'oyne haydzi axe e gara etti hanguwa. 17Ye ususeni e inxha'ayko Wonto zawa axituse zeeruwa. Ye Wonto zawa axituse e inxha'ayko Wonto bade maaquwasukiyara higilli hanke maaquwa cubbachukiyara esa mati taakuwa.

18Aadewoko hinuse ta ohe, sahaa hi tuttosi afaa tufuttesesako e maaqe. Sahaa hi birshoshini afaa birchuttesesako e maaqe.

19Assi hinuse ohoko ta ohe, hinukaafa lam'i ha sahaaka abani e maaqo'ayketese <Ha esuse Wonto nu shi''eese> hissine wolla hi kundako afaa yese nuwadey ususe mahoko e mahe. 20Esume taynesini ta sunxuna lam'eni haydzeni maaddhi bhikkiluttuso godowa u giddaako ta bente>> yeydi e hido.

Biya miidhase be muxhurowafa kessi maare

21Phexhrosey Yesuusako uddhi <<Ta Laaxo! Nuundo na'i taa miidhako aanxhi woggani <Attuwaye> hidi ta hiyaane? Laappi woggaakani?>> hidi e oycco. 22Yesuusani <<Laappi woggawo maaquwasso, laappi tammi wogga laappi aallo attuwaydi hiwwa.

23Afa kaatetey bidzi kaati be miijhena be maaliti hantosa beyese e wordosako e bisshe. 24Be miijhe kaati taabe e aytine fettona taabutti ituwa geley e gara yese bidzi e maala esuko u gelso. 25Ye gele shamey esa iisshine Laaxini <E machi, e nayshi, e keengesi uddiwo zal'utti ta geley shamuttuwaye> yeydi e hido.

26Ye e maalay be laaxi toke gara undi <Ta laaxo! Odde, oddhe wogga taase inguwa. Uddina ne gele shamako ta shange!> yeydi iitana e shidho. 27Ye kaatini fettonawo higilli ye e gara yecha geleni <Attuwaye> hidi dhaddi esani e datto.

28Ye maalay yahafa kessi hangichine xhiixi birre esuse be tal'echo beera hanticha ye kaati maala beedi esa gitti ayti <Neese ta tal'echo miijhe taase mahuwa!> yeydi e hido. 29Ye esaara hantichashi e toke gara undi <Odde, oddhe wogga taase inguwa! Shamako ta shange> yeydi esa e shidho. 30Esini inxhadhiwo be gele e shamoro aallo fetto tufe zawa e gelsusso.

31Fediti esaara e hantichoshitini ye maala gara e hantosa beedi fettonawo u higillo. Be kaatukoni handi e gara e mato base uddi u oto. 32Ye kaatini ye be maala xheygussi <Doo, ha iita axo! Taa ne shidho gisha ne gara yecha yeenxhi ta gele uddina <<Attuwaye>> hidi dhaddo baamba? 33Hinne tani ta gele dhaddonike neera wolla hantichashushe ne gele dhabe niya worgusuwadiya e yecha?> yeydi hidi 34ye kaati e bakka huulli ye be gele e shamoro aallo esa tufe zawaa waayye beysarasituse garsi e indo.

35Yoonase hinuni hinindo na'axhese hi muxhurowafa <Attuwaye> hiye hi dheeddako afaa yese nuwadey hi bidzi bidzina yeenkewoko e mahe>> yeydi e hido.

Currently Selected:

Matoose 18: KilleC

Highlight

Copy