Matoose 23

Muse baliya yesine durkeesiti iitete

Mrq 12:38-39; Luq 11:43-46; 20:45-46

1Ye e geede laga axitusaara be erusichoshitusaara Yesuusay 2<<Muse woga eruseesitaara Farasaxitaaray erusese Muse godoko u uttese. 3Ha e gisha u oheesita uddina hantuwayte, kakkuwayte. Maaqe baaka u hantesa hantofita! Ye esini be erusenike beese hantiya u baa gishako. 4Maddhunxesaara deexho iddaarako tutti axe u idduse beese be gil'a birana dole worguttuwasso.

5<Hagaa, axiti taa beyye!> hidiko u hante, Hayla Fissharowafa efutti diizuttesesa be gara be tukke abako u aakuse, be maa'o wuucarani oyddi godowa fettonawo u galalse.#23:5 Ha esita uddi yeysi u matosi axume garsi Wonto u eehesa mati axi uso nashorosa wordiko. 6Massalaakani kuxa godo, Ayhuda Bhikkilo Zawaakani burona yese godowo ayti utte u worge. 7Gadhesaakani axi ususe kuxa sawo sawusorosaara <Laaxo!> hidi xheygorosaarako u worge.

8Hinunimay uddinawo wolindo na'axhita hi maaqe gishaara hinumba erusesi bidziwo maaqe gishaara <Laaxo!> hidi xheyguttofita! 9Yeydiwo bidzi adewoy afaa yesesi hinuse yese gisha ooneni ha saha bakkaa <Abbayo!> hidi xheydofita! 10Erana durke laaxi Mesihewo e maaqe gisha <Laaxo!> hidi xheyguttofita.

11Hinukaafa uddime afana maaqesi hi maraxe maaqesako. 12Biya keddaysesi ullako e hine, biya ullaysesi kedda keddako e hine>> yeydi e hido.

Muse woga eruseesitusaara Farasaxitusaara u iitete

Luq 11:39-42,44,52; 20:47

13Sekke Yesuusay <<Muse woga eruseesito, Farasaxito, hinuno awshachito! Afa kaatetiya axi gele suma hi tuce gisha hinumba baduffu! Hinuseni geluwayta, gelese worgeesitani hi tuce. 14[Muse woga eruseesito Farasaxito, hinuno awshachito! Hinumba baduffu! U adey baadese indowaxhe hi bonqe, ye esa fasheme hissine galalsi hi shi'e. Yeydi hi hante gisha hi gara gardese yaa'ako ellesa!]

15Muse woga eruseesito, Farasaxito, hinuno awshachito, hinumba baduffu! Bidzi axi hi aadexesa e aadexorosa mahese bagade garanani saha garanani seya haya hi hante. Hinuka hi mato geede hinume garsi lam'i dakke Gaanname tamase naquttesesa e maaqoronike hi mahe.

16Hinuno bal'a maaqe durkeesito, hinumba baduffu! Bidzi axi <Ha Wonto Hayla Zawiffa!> hidi e caadhako <Waako hiwasso> hidi hiine, Wonto Hayla Zawaa yese worqena e caadhako <E caaqoko esa aykesa> yeydiko hiine. 17Muyitaara bal'itaara maaqeesito! Worqemiyara worqe haylonxe Wonto Hayla Zawamiyara a'esana garesa? 18Yeydiwo kaasha e gara kaashushooshuna axi caadhako <Waako hiwasso> hidi hiine. Kaashuttese uddha abakona e caadhako <Ye caaqoy esa aykesako> yeydi hiine.

19Hinuno bal'ito! Kaashamiyaara kaasha hayla mahe kaashay e gara kaashuttesumiyara a'esana garesa? 20E gara e kaashuttesuna caaqesi e gara e kaashuttesunaara ingutte kaashanaarako e caaqe. 21Wonto Hayla Zawana caaqesi Wonto Hayla Zawanaara essaaka yese Wontonaarako e caaqe. 22<Wo afiffa!> hidi caaqesini Wontoy ahese e gara uttesunaara e gara utte Wontonaarako e caaqe.

23Muse woga eruseesito, Farasaxito, hinuno awshachito! Xhatallafaara afusutafaara uuyyowafaara ye usita bishe qimamitaafa wontose tanxo hi inge. Inguwayte baaka Wonto wogaaka yese orje orje base hi dhagge. Ye usini gizo yaa'a yaa'e, maaro mahe, fetto maaddhi Wonto aadexe ha malla zeere hantisine ye uso maheko hinumba e worgusicha. 24Hinuno bal'a maaqe durkeesito! Huzahuzoke yesesa hi ushe usshaafa hi ooxe, gaaloke yese malla hi oodhe.

25Muse woga eruseesito Farasaxito, hinuno awshachito, hinumba baduffu! Burcuqowara sanqiyara wudena shoti hi geeshe, gawwanamay bonqiyara <Uddi base taase taase!> hidi hiyowarako hinuka kundesa. 26Neno bal'a maaqe Farasaxo! Burcuqo gawwanaara sanqe gawwanaara burona shoti geeshuwa. Yenniyako wudenani e geejhe.

27Muse woga eruseesito, Farasaxito, hinuno awshachito! Booqana tishuttese boossa keela hi bishe gisha hinumba baduffu! Wudena moddhi tishuttese boossa keelay be oomona haydhese axi meqetiyara fede fede sandese abakowaray beekaako laga e aytese. 28Yeydiwo hinuni wudena axituse gizo axuko hi bishe, hi gawwaaka awshaara iitetiyarako kundesa.

29Muse woga eruseesito, Farasaxito, hinuno awshachito, hinumba baduffu! Kaayaxiti boossa keela modhussi hi keele, gizo axiti boossa keela bishushi hi naqe. 30<Olo nuwadiyaxhiti yecho bera yesesako usaara wolla kaayaxita wodhese kunguwadiko nu yecha> hidiko hiine. 31Ye esuna kaayaxita woddha axiti nayshe hi maaqenikeko hi gara hi ateyne. 32Hinne hinuni hinadiyaxhi ayti yecho hanta alsuwayte. 33Hinuno shooshito, gappasshi nayshito! Gaanname tama yaa'aafa waanidini tulxhese hi danda'e?

34Hinne tani kaayaxitako, eraxitako, eruseesitako hinukaa ta anxe. Usaafa bidzi bidzita hi wodhe, feditani hi suxhe, feditani hi Bhikkilo Zawaakani hi dure, feditani ha katamaafa se katamaafa hi goode. 35Ha e gisha gizo maaqichine wodhutta Aabeele suussaafa ayti Wonto Hayla Zawaseni kaashay e gara kaashuttesuseni e gidda hi woddho Beraakiyo yele Zakaraase suuxi aallo saha gara hi gusso gizo axiti suuxuse uddi hi gara yaa'ako ellesa. 36Aadewoko hinuse ta ohe, ha bera yese axiti garako haanxhi yaa'ay uddi e elle>> yeydi e hido.

Yerusaleemey kasshuttosa

Luq 13:34-35

37Sekkeni Yesuusay <<Yerusaleeme, Yerusaleeme! Kaayaxita wodheyo! Neeka anxuttechaashitani shuchuna iceyo! Lukkali be fange oomo be nayshita bhikkilenike aanxhi woggani ne axita bhikkilese ta wordo. Hinunimay <Eehuwanxhiko> yeydi hiido. 38Yoonase ha hi zaway kayako e atte. 39Hinuse ohoko ta ohe, <Laaxi sunxuna yoonesi suuzuttesesako> hidi hiyoro aallo hattiyafa ayti sekke taa beewaytako>> yeydi e hido.

Currently Selected:

Matoose 23: KilleC

Highlight

Copy