Marqoose 9

1Assi Yesuusay <<Aadewoko hinuse ta ohe. Hatte haya yeseesitaafa bidzi bidziti orje osana yoone Wonto kaatete beedo badi hay'uwasitako yesa>> yeydi e hido.

Yesuusa bishay artosa

Mat 17:1-13; Luq 9:28-36

2Izzunxo wonte geede Yesuusay Phexhrose, Yayqoobe, Yohanise hissi beera etti usaarawo deceshe bakka orje gara e kesso. Wolko u yesune e bishay arto. 3E maa'oni orjena laci lacidi faddho. Ooneni ha saha gara maa'o shoti e makko geesheshe danda'uwa aallo fettona booxe e maaddho. 4Yenniyani Elaasiyara Musiyaray addeydi Yesuusaara zeerusune u beedo. 5Phexhroseni Yesuusa <<Laaxo! Haya ni yesesi niise waydese modhena. Ha e gisha bidzo neese bidzo Musese bidzo Elaasese hissi haydzi ashita nu keexxheere!>> yeydi e hido. 6E erusicho haydzi geriti orjena leemo kessi u yecho gisha Phexhrosey aba be zeeresa erya badiko e yecha. 7Dhumay yoodi u qinowa fassho. Ye dhumaannani <<Ta eehe ta yeley ha esako. Esuse siwwayte!>> yeydi hine kato u siido. 8Be googe arti u beesuneni usaara Yesuusa gooshewo baaka feday e dheeddo.

9Bakkaafa yekke u hodhusune Yesuusay <<Axi yele hidi hiyuttasi haybowafa ta dendoro aallo ha hi beedosa oonekoni zeerdofita>> hidi e oto. 10E zeereni siidi u etto. Maaqe baa <<Haybowafa dendeydi hiyoy abaydi hiyona?>> hidi hissine sekke hanke wolko u zeerdo. 11Usini <<Muse woga eruseesiti <Burona Elaasey yooworosako e worguse> hidi uynesi abasuwa?>> yeydi esa u oycco. 12Esini <<Aadeko Elaasemay burussiko e yoone. Uddi baseni sekke e naqe. Hine axi yele hidi hiyuttasi gisha abaydina e diizuttese? Laga maddhay e gara yoonenikiyara e haassuttenikiyara maaquwaye? 13Tanimay yeydiko tayne. Elaasey yoodiko e yese. Buro e diizuttechonike axiti be eetonike uddina e gara hantiko u yese>> hidi e hido.

Bidzi yele garafa xhoozi gooddutto

Mat 17:14-21; Luq 9:37-43

14Yesuusaara e erusichoshitaaray atta e erusichoshituko yekke maaddhi u yoosune laga axiti u googe bhikkiluttesune u beedo. Muse woga eruseesitini e erusichoshitaara wolko bersiya u yecha. 15Axitini be uddina Yesuusa be beedo woggaaka u du'eydo. Esuko woxxhi yoodi u sawusso. 16Yesuusay <<Usaara hi bersesi aba garana?>> yeydi be erusichoshita e oycco.

17Ye axiti giddaafa bidzi <<Ta Laaxo! Ta yele xhoozi aytineko zeere e dheeddine neeko ta oodo. 18E gara e dende woggani esa iitana e olle, goffunto e iiche, be gaggoni e qiice, e garani melli ahake maaqe. Ne erusichoshita xhooze e garafa u gooddorosa ta oycine danda'utto baasso>> yeydi e hido.

19Yesuusani <<Hinuno Wonto aadexuwa ha bera axito! An aallona hinunaara ta yeseteni hinuse e gelle? An aallow hinumba ta danda'e? Haaya mee, yele taako oowayte>> yeydi e hido. 20Ye yeleni esuko u oodo. Xhoozini Yesuusa be beedoniyaka yenniyawo ye yele olli e fardunso. Ye yeleni sahaani andarsine asshaanna goffunte e ayto. 21Yesuusani ye yeliyade <<Aydena e ayto? Dooddiya e yese?>> yeydi e oycco.

Ye yeliyadeni <<Oddhe e yesuneko e ayto. 22Wodheseni wordi laga wogga tamaakani waassaani e dakkicha. Danda'a'ayko, odde, nuuse higiluwa! Nuu maruwa!>> yeydi e hido. 23Yesuusani <<Danda'a'ayko hidiya neyne? Wonto aadexeesuse danda'uttuwasi bidzini baasso>> yeydi e hido. 24Yenniyawo ye yeliyadey <<Wonto aadexako ta aadexe. Aadexe ta dheeddosa ta aadexoronike taa maruwa!>> yeydi e uydo. 25Yesuusani axiti beeko koysisine woxhesa beedi xhoozeni kashishine <<Neno muumowara dhagaara maaqe xhoozo! Nembako ta ohe. Ha yele dakkuwa! Hanke maaddhi esa aytofuna>> yeydi e hido. 26Xhoozini kato orjena e uydo. Ye yeleni orjena fardunsi, ye e geedeni esa datti e hando. Ye yeleni <<Haydhosso>> hidi u hiyoro aallo haydhesesa uso e bissho. 27Yesuusay ye yele kuche ayti e denso. Ye yeleni dendi eedho.

28Ye e geede Yesuusay hanke zawa gello wogga e erusichoshiti be goshe u yesune <<Ha xhooze nuni goodde dheeddosi abasuna?>> hidi hissine u oycco. 29Esini <<Haanke yesesi Wonto shi'enaara [xhoomenaara] baaka abanani gooduttese danda'uttuwasso>> yeydi ususe e zeerdo.

Yesuusay be gara elle maddhase lakkunxo wogga e zeerdo

Mat 17:22-23; Luq 9:43-45

30Yesuusaara e erusichoshitaaray ye wude datti Galila badena u hando. Be yese godoni ooneni erorosa wordo baasso. 31Esumeni e wordo baasi Yesuusay be erusichoshituse <<Axi yele hidi hiyuttasi axiti kuchiya gardi e ingutte. Usini u wodhe. U woddhosi geede haysso wonte e dende>> yeydi hissine be erusicho gishako. 32Maaqe baa e erusichoshituseni e zeerdosi gele dheeddinne oyceni u jhassho.

Uddiyadese maraxe maaqe gisha

Mat 18:1-5; Luq 9:46-48

33Yesuusaara e erusichoshitaaray Qifirnahoome u yoodo. Zawa u yesune Yesuusay be erusichoshita <<Ogiya yesine hi bersicho zeerey am e maaqicha?>> yeydi uso e oycco. 34Ogiya yesine <<Nuukaafa garesi oonena?>> hidi hissine bersiya be yecho gisha usini mikki u hido. 35Ye e geede esini utti be erusicho tamma lam'ita beeko gadhi <<Uddi axume gare angusse maaqese worgesi uddi axume barsaara uddiyade maraxaara maaqeko esa e worguse>> yeydi e hido. 36Bidzi yele oddhe oodi u buro e esso. Udundini ususe 37<<Ha esuke yese yele oddhe bidzo ta sunxuna mokkesi taa mokkako e mokke. Taani mokkesi uddina ta goshewo e maaddho baane taa ansaseni mokkako e mokke>> yeydi e hido.

Yesuusa sunxuna hante gisha

Luq 9:49-50

38Yohaniseni Yesuusa <<Laaxo, bidzi adey ne sunxuna xhooze goodusune beedi nuukaafa e maaquwa gisha nu oosso>> yeydi e hido. 39Yesuusani <<Ta sunxuna micushesha hanti ukke ta gara iita zeeresi e baa gisha dhagguwayte, oossofita! 40Esume taynesini numba inxha'uwasi uddina nuura wolkoko u yese. 41Aadewoko hinuse ta ohe. Kristosase hi maaqe gisha hi sazase oddhe waaxe hinuse ingesi fetto be wooma dheegguwasso>> yeydi e hido.

Cubbo iiche gisha

Mat 18:6-9; Luq 17:1-2

42Esini assi <<Taa aadexe ha giddhitaafa bidzoni dhumuse axi woxha shuchi deexho be ontaa tutti waassaa e dafuttakoko esuse e bishe. 43Yeydiwo ne kuchey niya dhumusa'ayko ne garafa bursuwa. Lam'i kuche keengisine Gaanname hiyutte bayese danda'uwa tamaa koolona yaa'a hobolowa ne dafutteesume bidzi kuche dheeddi yesowa geleko neese bishesha.

44[Gaannamiyaka uso muune guxhunxi hay'uwasso, tamani bayese danda'uwasso.]

45Ne tokey niya dhumusa'ayko ne garafa bursuwa! Lam'i toke keengisine Gaannamiya ne dafutteesume bidzi toke dheeddi yesowa geleko neese bishesha.

46[Gaannamiyaka uso muune guxhunxi hay'uwasso, tamani bayese danda'uwasso.]

47Ne aafey niya dhumusa'ayko ne garafa kesuwa! Lam'i aafe keengisine Gaannamiya ne dafutteesume bidzi aafe dheeddi Wonto kaatetiya geleko neese bishesha.

48Gaannamiyaka uso muune guxhunxi hay'uwasso, tamani bayese danda'uwasso.

49Kaxaa sogoy ungete modhe e maaqenike axi be uddina tamaa gelliko geeshe e maaqe. 50Sogoy modheko, maaqe baa sogoy loo'e dheeddako fetto sekke sogo mahese danda'uttuwasso. Hinukaa sogo bishay yesuwaye. Hi bidzi bidzina wolla kundi modhetena yesuwayte!>> hidi e hido.

Currently Selected:

Marqoose 9: KilleC

Highlight

Copy