Markoos 10
10
Ki Gayɛ A Ŋɔŋɔɗi Iɗit A Jarti Nɛɛkiŋ
(Maa. 19:1-12; Luk. 16:18)
1Ŋaarɓa Yeese saadi nɛ kɛɛ ɗooka Yuudaak a ɗɛɛgasɔ Yordanoosuk. Nɛɓa tolɗiitar joop a ɓɔɔkaaŋ son lak sɛɛnik kɛkar, nɛ rɔɔriy sɛɛg oko sinɛkan goorɛk.
2Wideetarɓa ɛɛk joop Paarisik son lak sɛɛnik, nɛɓa ɗɛyɛr paariita nɛ kɔɔniyar kɛ, "Pɛgɛdɛɛɓa higii kɛnɔ pakakati iɗit a jarti nɛɛkiŋ?"
3Nɛɓa Yeese tonu sɛɛga kɛ, "Tonuɓa kɔna Muuse agut any sini ɛk?"
4Nɛɓa sɛɛk tonurgeeɗ kɛ, "Pɛgɛdɛɓa Muuse kɛnɔ gaɓɛɛ wargatɛ pakakatoŋk nɔ pakakatiikɛŋ."
5Nɛɓa Yeese jumur sɛɛga kɛ, "Dɛnɛɓa Muuse ɓaŋkawuka ɓayɛtun goŋkuk nɔɓa pɛgɛdɛɛɗ sikiyɛ sigik." 6Mayakana riiɓeɓa Waakoyot tuki nɛɛkɛ mooy a peet.' 7'Agut sini ŋɔrku iɗit ɛpɛn a ɛmɛs, nɛ lotɛr ɛɛk a jarti nɛɛk, 8sɛɛg ɛɛk omoŋ a getu pɛɛy.' Sɛɛg ɛɛk omoŋ seedi son, ma moko pɛɛy. 9Agut sini kat pakati iɗit any sinɔkan lotɛ Waakoyotuk."
10Saaɓa weerikiɗ waak, nɛɓa nomtaana gɛɛnɛ kɔɔniyar Yeesee kɛkar agut any sini. 11Nɛɓa sɛŋk jumur sɛɛga kɛ, "Iɗit sinɔ pakakati a jarti nɛɛk, nɛ boŋu jarti omk ibiɗikɔ jartii nɛɛkɛ raŋk. 12Maɓɔrɛ jarti sinɔ pakakati a baabuy nɛɛk, nɛ waawu baabuya omaltaak nɛkɔ ibiɗiiŋ."
Geeti Yeese Tɔɔmɔk
(Maa. 19:13-15; Luk. 18:15-17)
13Ɗɔkarkiɓa joop tɔɔmɔk son lak Yeeseek kɛnɔ riiɓe sɛɛge ari raŋk, nɛɓa nomtaanak gɛɛnɛ goopar joop sigɛ ɗɔkarki tɔɔmɔkkuŋ. 14Yakanaɓa Yeese dɛnɛ sini, nɛ goop nomtaanak gɛɛŋk, nɛ tonu sɛɛga kɛ, "In kurak tɔɔmɔk son lak eetik. Kat ɓaarɗɛ sɛɛg, agut sinɔ ege Burɛ Waakoyotoŋk joop sigɔ rikiter ɛɛk oko sinikik. 15Eekeer tona kɔnaaŋ, iɗit sinɔ ki boŋiɗ Burɛ Waakoyotoŋk okokɔ toomoŋk kikoy guugunyɔn saana adaktan." 16Nɛɓa gaamku tɔɔmɔk gɛɛŋk kokoma nɛ riiɓe sɛɛge ari nɛɛk raŋk nɛ geeti sɛɛgiŋ.
Iɗit Sinɔ Lak Worik
(Maa. 19:16-30; Luk. 18:18-30)
17Saaɓa Yeese tukeeɗ ŋaarink, nɛɓa reerki iɗit om son lak sɛɛnik, nɛ ɛtɛ korontunɛ sɛɛne taamɛkɛ, nɛ kɔɔniy sɛɛn kɛ, "Iin rɔɔriytan sinɛ mentank, ɗɛyɛta a ijaaga jikon nɔkoy laŋiiɗa wɛɛŋa sigɛkoy nokoy nɔkoyk?"
18Nɛɓa Yeese tongeeɗ kɛ, "Kɔɔniyinte any sinɔ mentanŋɔŋk agut jikon? Mentan Waakoyo sinɛ omoŋɔŋk dakɛɗa. 19Yakana jumurakɔɔna kɔɔniyɔn nookkuŋ. Ɗegerin sekiyɛ gɛɛŋkiŋ. Sɛɛg 'Kat ɓokotɗiikin, kat ibiɗiikin, kat agalɗikin, kat waasin nyon, kat raamɗiikin, eemɛy ɓaaɓa a ŋaaŋa."'
20Nɛɓa iɗit sinɛ tongeeɗ kɛ, "Rɔɔriytaano, Kooraɓa sekiyɛ sigi baŋɛ a tukiɗi tɔɔnikent naakɛk."
21Nɛɓa mermen Yeese nɛ poruŋ nɛ tongeeɗ kɛ, "Ŋayɗiikanne any a omoŋ. Mak nɔ kɛɛɗin ɓalɗiikin ant sinaanɛ lakink baŋɛ nɔ gaɓun wori nɛɛk sankaanaka. Laŋinkoy wori sinɔɓa tolɛɛŋɔŋk dari. Nɛ saadi baŋiya kusunte nomkun." 22Saaɓa iɗit sinɛ tiyɛɗ any sinik, nɛɓa sanɗi jɛt, nɛɓa ŋaar, ma ŋadiŋ agut sinɔɓa lakiɗ wori a obiiŋɔŋk.
23Nɛɓa Yeese kolɛɛnyɛ nɛ mermena nɛ tonu nomtaanaka gɛɛna kɛ, "Morɛ ɓaŋkawu guugunyɔn Burɛya Waakoyotoŋk joopa sigɔɔga latu worikiŋ."
24Nɛɓa nomtaanak gɛɛnɛ reemɗi ɓayɛtun gɛŋk agut toni sini. Nɛɓa Yeese jumur sɛɛga kɛ, "Iinak tɔɔmɔk, morɛ ɓaŋkawu guugunyɔn Burɛya Waakoyotoŋkuŋ. 25Ɔɔtɛ sɔgun guugunyɗu iɗit sinɔ lak worik Burɛya Waakoyotoŋkuk, bala sinɔ guugunyɗu taga sinɔɔnɛ tool marpeyoŋkuk."
26Nɛɓa nomtaanak gɛɛnɛ reemɗi ɓayɛtun gɛŋk jɛt nɛ tonur ɛkanɛɛkɛ gɛŋk kɛ, "Anɛ oolɛ akoy bɔdɛ wooɗ?"
27Mermenaɓa Yeese son lak sɛɛgik nɛ tonu sɛɛga kɛ, "Ki gayɛ sini sooy lak iɗitik eekeerɛ, mayakana gayɛ any baŋɛ sooy lak Waakoyok. Gayɛ Waakoyota any baŋɛ."
28Nɛɓa Petros tongeeɗ kɛ, "Ŋɔrkiikɔ any baŋɛ kɛnɔ nomii iine."
29Nɛɓa Yeese jumur kɛ, "Eekeer tona kɔnaaŋ, iɗit sinɔ ŋɔrku gode maŋk manyaakak maŋk manyaakak sigɛ peetakik maŋk ɛmɛs maŋk ɛpɛn maŋk tɔɔmɔk maŋk taawa nɛɛk, agut eet a Pɛɛni sinɔ Ɓɛlkɛɛstank, 30eme sineene a epapay agut omoŋ godeyik, a manyaak, a manyaakak sigɛ peetakik a sigɛ moojakik, a ɛmɛsaakak, a tɔɔmɔk, a taawa nɛɛk laŋ sisɔ a suɗaktaanak ɗibɛ. Maɓɔrɛ ɗook sinaanɛkoy mɛlkik laŋkoy wɛɛŋa sigɛkoy nokoy nɔkoyk. 31Mayakana joop a ɓɔɔkaaŋ sigɛ ɔɗɔweerk baŋiyeerkoy, ma joop sigɛ baŋiyeerk ɔɗɔweer koy."
Tonu Yeese Rer Nɛɛk Kɛkar
(Maa. 20:17-19; Luk. 18:31-34)
32Saaɓa atukuɗ gopɛ sinɔɔnɛ kɛɛɗɛɛ Yorsaleemak, nɛɓa Yeese ŋawite sɛɛge ɔɗɔɔkɛ. Nɛɓa nomtaanak gɛɛnɛ reemɗi ɓayɛtun gɛŋkiŋ ɓuriiɓa joop sigɛɓa nomɛrɗi baŋikiŋ. Nɛɓa widiki nomtaanak gɛɛŋk sigɛ aarin a pɛɛyk son lak sɛɛnik, nɛ sɛɛga yaaŋɛ kɛkar any sinɛkɔɔ laŋki Yorsaleemek. 33Tonuɓa sɛɛga kɛ, "Ŋaarii sisɔ Yorsaleema. Gaɓɛɛkɔɔ Tɔɔn Etoŋk ɔɗɔweera tapa ŋaadiyɛɛkoŋk a rɔɔriytaanaka higi Muuseek. Nɛkɔɔ sɛɛk pɛrɛdɛrɗi rer, gaɓɛɛkɔɔ ɓɔrɛ joopa sigaaga moko Ayuuduk. 34Nɛkɔɔ sɛɛk rɛɛsɛrgeeɗiŋ, topɛpɛyargeeɗkɔɔŋ, ɗiŋerkɔɔ mermeɗ, ɓokoturkɔɔŋ, mayakana ŋaarkikɔɔ ɗoŋikɛ sigɔɔgɛ jiitik ret walasa.
Rɔɔriyaaɗ Yeese Ɔɔtɛ Tɔkɔny Joop Ɔgɔɔk
(Maa. 20:20-28)
35Tɔɔmɔk Jɛbdiyoosuk Yaykoob a Yowanis wideetarɓa ɛɛk son lak Yeeseek nɛ tonurgeeɗ kɛ, "Rɔɔriytaano, ɗɛyii a tina arin any sinɛne kalɛyiik."
36Nɛɓa sɛŋk tonu sɛɛga kɛ, "Ɗɛyɛɛr a kɔna ara jikon?"
37Nɛɓa sɛɛk tonurgeeɗ kɛ, "Pɛgɛdi tina kɛnɔ beeɗ iɗit omaay ɗiɗikakɛ goonɛk, ma iɗit om kantunakɛ goonɛk Burɛɛ nookɛ eemɛyɔɔnoŋk."
38Nɛɓa tonu sɛɛga Yeese kɛ, "Kiir ɗegerɔɔn any sinɛ kalɛyiirik. Oolɛɛr a uteer tuu rakatɛyoŋk sinɛkɔɔ utaakiŋ? Oolɛɛr a kɔnu aadɛɛ aadiit sinaanɛkɔɔtu aadiiɗɛkiŋ?"
39Nɛɓa sɛɛk tonur kɛ, "Ii, ooliiŋ."
Nɛɓa Yeese tonu sɛɛga kɛ, "Eekeerɛ uteerkɔɔ tuu sinɛkɔɔ utaakiŋ, ɛkɔɔ kɔnu aadɛɛ aadiit sinaanɛ kɔɔtu aadiiɗɛkiŋ, 40mayakana moko pɛgɛdiɗiika eet beeɗit ɗiɗikakɛ gaanɛk a kantunakɛ gaanɛkik. Gaɓigiɗɛɛkoy sini joop sigɛɓa ragadɗiigiɗɛɛk dakɛɗa."
41Saaɓa nomtaanak sigɛ aarink tiyɛrɗi sinik, nɛɓa ŋadir Yaykooba a Yowanisaŋ. 42Nɛɓa Yeese riyiri sɛɛg baŋɛ son lak sɛɛnik nɛ tonu sɛɛga kɛ, "Ɗegerari kɛ suumiyɛ joop sigɛ ɓɔɔkaak moko Ayuuduk ɗook raŋk latu ɓaŋkawuka ɔɗɔweer gɛŋkiŋ, latu ɓaŋkawuka baŋɛ joope sigaagɛ ɓɔɔkaak raŋk. 43Mayakana kat ɓɛɛlɛ iinakɛ kɔɔr oko sinik. Iɗit sinɔ ɗɛyɛ a obi iinakɛ kɔɔrk, dɔɔs a sɛɛn ijaagen noŋk. 44Maɓɔrɛ iɗit sinɔ kɔne ɗɛyɛ a sɛɛn ɔɗɔwenk, in kɔna dakɛ a ijaagen sinɔ ar ɗookuk. 45Kusɓa aasi Tɔn Etoŋk kɛnɔ kɔnyɗi, ɛ gaɓɛ wɛɛŋa gɛɛŋk a guma agut joop sigɔ ɓɔɔkaaŋɔŋk, ma mokoɓa kɛnɔ kɔnyɛɛ sɛɛn."
Ebɔdɛ Yeese Taamɛ Mot Sinɔ Kɛ Bɛrtimewosuk
(Maa. 20:29-34; Luk. 18:35-43)
46Saadi baŋiya mɛlɛrkiɓa katamɛya Iyaarikook. Saaɓa Yeese a nomtaanak gɛɛŋk a joop sigɔ ɓɔɔkaaŋɔŋk ɔgɔ ŋaararɗi katamɛɛ Iyaarikook, nɛɓa tɔn Timewoosuk mot sinɔ kɛ Bɛrtimewoosuk beeberɓa gopɛ kɛntɛɛ. Sɛɛnɓa kalɛytan. 47Nɛ saaɓa tiyɛɛɗi a ɗoyu Yeesee Naajreetik, nɛɓa ooyɛ kɛ, "Iin Tɔɔn Daawitik, maariytik!"
48Nɛɓa joop a ɓɔɔkaaŋ koykoyɛr kɛ, "Dak kɛ many." Yakanaɓa sɛŋk ooyɛ a kaalɛŋ kɛ, "Iin Tɔɔn Daawitik, maariytik!"
49Nɛɓa Yeese ɛtɛ nɛ tonu kɛ, "In riyirɛ nɛ kusuɗ."
Nɛɓa sɛɛk riyitar iɗit sinɛ motuk. Nɛ tonurgeeɗ kɛ, "Inna yaa. Ŋaari raŋana riyni Yeesee."
50Nɛɓa sɛŋk oru abii nɛɛk, nɛ utaalɛ raŋana, nɛ kus son lak Yeeseek.
51Nɛɓa Yeese kɔɔniy kɛ, "Ɗɛyin ana ara jikon?" Nɛɓa iɗit sinɛ motuk tongeeɗ kɛ, "Rɔɔriytaano, ɗɛyare dɛnɛ."
52Nɛɓa Yeese tongeeɗ kɛ, "Ŋaarik. Ebɔdɛrkɔnu ŋaadiyɛ goonɛŋ." Nɛɓa iɗit sinɛ dɛnɗi sisa, nɛ nomɛ Yeesee gopɛ nɛɛkɛk.
Currently Selected:
Markoos 10: KSTM
Highlight
Share
Copy
Want to have your highlights saved across all your devices? Sign up or sign in
