ማቲወስት ወንጌል 26
26
ፈወነ 26
ኣይዅዳንድ እየሱስት ቁጥጘ ማኽርሽጘጘ
(ማር. 14፡1-2፤ ሉቃ. 22፡1-2፤ ይዃ. 11፡45-53)
1እየሱስም እንዛትቅ ዊግት ኻተት ግረ ጝክንደጥድዛት፦ 2«ሊጘ ግርቅዝ ግረ ፈዝየ በል ኣቐጘ ኣርቕርነኵ፤ እጅር ዅርም ሲቅልሻንስ ዲቍሽት ይውሽትጡ» ዩ።#ዘፀ. 12፡1-27።
3ኣይንድ ካኽነጣነ ኻልቅጢዝመ ኽዝቪዝ ሽመቅሊዝ፣ ቀያፈ የነው ካኽነጣነ ኻልቀይዝ ኻፅሪል ኣኽቭሽ። 4እየሱስትም ተኰልዝ ፃይስጥጘ፣ ቁጥጘም ማኽርኽርሽ። 5ዊገድ ግን፦ «ኽዝቪዝ ማኽሊል ኹክት ጒሻይየጘ ኣምርበሊዝ ኣቒነ» ይ።
ላይ እውነ እየሱስት ሽቱ ቓስረጘ
(ማር. 14፡3-9፤ ይዃ. 12፡1-8)
6እየሱስም ቢታንየስ ለምፃም ስሙን የነው እጅሪዝ ጝኒል ፅባ፣ 7ላይ እውነ ጝወየድ ጭቕጘ ኪብረው ሽቱ ፃየው ኣልቫስጥረውስ ብልቃጥ ፃይር ጝጐ ተርች፤ ጘጝም መድል ጐይ ፅባ ሽቱድየንት ጝኣውሪል ቅብስች።#ሉቃ. 7፡37-38። 8ጝክንደጥድዛይም እኒንት ቓልጛንድ ኻልክሽጝ፦ «እንቝጠ ቢክንዘነው ወረጘ የጝፈ? 9እኒን ሽቱድ ቅይሽ ጝወየድ ድኺዝ ኣጠ ዊኑ ኣየውቀ!» ይ። 10እየሱስም ጛይ ይጘውድየንት ኣርቕ እንት ዩ፦ «እኝቸን እውነየንት ውር ቃጥ ችግዝርና? ጚ ይጭስ ቀሰው ሰቭ ፃቭርኵች። 11ድኽድ ዊትርቅ ክታጅቅ ጛይ፤ ያን ግን ዊትርቅ ክታጅቅ ፅበቅም።#ዘዳ. 15፡11። 12ሽቱድየንት ይዲጊል ቅብሰነውዝ ይዲቭኒዝ ኣስልተ የጝ። 13እማንዝ የኵን፤ እኒን ወንጌልድ ሲቭክሸው ኣውማው ስፍረይልቅ ጚ ፃቭረውድ ጝርት ኻልየነ ኣቓንስ ማጥን ድቍሽትጡ» ዩ።
ይዅዳ እየሱስት ዲቍስ ይውጠ ቲስመመጘ
14ኣይንድ ፅጭ ሊጘ ኻወርየታኒስ ላውድ ኣስቈረትቱ ይዅዳ ይሽተው እጅርድ ካኽነጣነ ኻልቅጢል ፊር፦ 15«እየሱስት ዲቍስ ነቃን ወረጘ ነይትርንቅ?» ዩ። ጛይም ሰውርጝን ቍርሻን ይው። 16ይዅዳም ኣይንቲስ ኪርም እየሱስት ዲቍስ ይውጠ ሚቸው ግርየ ደምዛ ዊኑ።
ፈዝየት ድረይዝመ ቅዱስ ቍርቫንዙ ስረትዝ
(ማር. 14፡12-21፤ ሉቃ. 22፡7-13፤ ይዃ. 13፡21-30)
17ቅጣ ዀነው በሊዙ በወትረ ግርየይዝ ጝክንደጥድ እየሱስ ትጐ ኣልትጝ፦ «ፈዝየ በሊዙ ድረይድየንት ዅራንስ ማጥን ኣውል ኣስልነ በንራ» ይጝ ዋቕር። 18ጘጝም፦ «ኻትመይል ጥውርናንድ ችጝርነው እጅሪዝ ጝኒል ፊትርን፦ ‹ክንሰተድ፦ <ይግርየድ ችጛንስቅ ይክንደጢጅቅ ፈዝየ በሊዙ ድረይድየንት ዀውድ ክጝን የጝ> የኵ› ይጥን» ዩ። 19ጝክንደጥድም እየሱስ ኣዘጘ ፃቭ፤ ፈዝየ በሊዙ ድረይድየንትም ጝግል ኣስል። 20እየሱስም ኵናንድ ጝክንደጢጅቅ መድል ጐዩ። 21ዅጛ ሲጝቀም፦ «እማንዝ የኵን፤ ክታጊስ ላውድ ይት ዲቍስ ይውጡ» ዩ። 22ጝክንደጥድም እንዝ ጭቕጘ ኻዝንጝ ቲረ ቲረዝ፦ «ኣደረወ! ያንመ ኣጭር ኣጢ? ያንመ ኣጭር ኣጢ?» ይጛ እየሱስት ዋቕርጥጘ ኪርም። 23እየሱስም፦ «ይት ዲቍስ ይውጡድ ጝናንድየንት ይጅቅ ዝቭዲል በርሰውድ የጝ።#መዝ. 41፡9። 24እጅር ዅርስ ጝማጥን ፃፍሸጘ ክርጡ፤ ዊገድ ግን እጅር ዅርት ዲቍስ ይወው እድ እጅሪዝ ወየው። እድ እጅርድ እዅርሺጝቀ እዳቕ ዊናን ቺዝጠ ዊኑ» ዩ። 25ጝት ዲቍስ ይውጡድ ይዅዳም፦ «ክንሰተወ! ያንመ ኣጭር ኣጢ?» ዩ፤ እየሱስም፦ «ክት ይረጘ የጝ» ዩ።
26ዅጛ ሲጝቀም እየሱስ ሚድ ጒ በርኩ፤ ኪልም ጝክንደጢዝ፦ «ኣስጥን ዅጥን፤ እኒን ይስየድ የጝ» የው ይዉ። 27ፅወድየንትም ጒ እደረት ሚዝየንዙ፤ ጝክንደጢዝም፦ «ክታእጝቅቅ እኒስ ዚጥን። 28ንቕፀቊዙ ኽጥያትዝ ይቅርተዝ ማጥን ቅብረቍ ኣይር ኪዳንዝቍ ይብርድ እንዛይ ጛይ።#ዘፀ. 24፡8፤ የር. 31፡31-34። 29ይርት ምጝግስቲዝ ክታጅቅ ኣይር ወይኒዙ ፍረይስ ዝቅጪስቅ ነስየ እኒን ወይኒዙ ፍረይስ ሊጘት ዝቀቅም የኵን» የው ይዉ። 30መዝሙርም ዚምርጘት ግረ ደቭረ ዘይት ኣበይል ፍ።
ቢጥሮስ ኻዲጠጘድ እየሱስ በውርስ ዊግተጘ
(ማር. 14፡27-31፤ ሉቃ. 22፡31-34፤ ይዃ. 13፡36-38)
31እየሱስም ጝክንደጢዝ፦ «ክታእቅቅ እኝቸን ኻርሸንስ ፅጋርትርንቅ፤ ምላሰንድም
‹ምቓድየንት ጣዝጭር፤
ጝመጝገድም ቢትንሽጡ›
ይሽት ፃፍሽኩ።#ዘካ. 13፡7። 32ዊገድ ግን ያን ክርጘይስ ጐት ግረ ክታት ቀድም ገሊለ ፊጭር» ዩ።#ማቲ. 28፡16።
33ኣይንድ ቢጥሮስ፦ «ላጥድ እጝቅ ፅጋርጝሽ እኳ ያን ግን ስሪስቅ ፅጋጠቅም!» ዩ። 34እየሱስም፦ «እማንዝ የኵን፤ እኝቸን ኻርሸንስ ጅርወ ዋቒጝቀ ይት ሸውን ኻዲትር» ዩ። 35ቢጥሮስ ግን፦ «ክጅቅ ክረነው ኣቕሽ እኳ ክጭርጚ ኻድየቅም!» ዩ። ላጥ ክንደጥድም እጝቅቅ እት ይ።
እየሱስ ጀተሰማኒስ ፃልየው ፀለውትድ
(ማር. 14፡32-42፤ ሉቃ. 22፡39-46)
36እንዝ ግረ እየሱስ ጝክንደጢጅቅ ጀተሰማኒ የነው ስፍረል ፊሩ፤ ጝክንደጥድዛትም፦ «ያን እድጐ ፊጥ ፃልይጪስ እንል ጐይጥን» ዩ። 37ጝጅቅም ቢጥሮስስመ ሊጘ ዘቭዲወስት ቝሪዝ ቲክንዝ ፊሩ፤ ጘጝም ቲክዝጠ ጨጝቅሽጠም ኪርሙ። 38ጛትም፦ «ይኒቭስሸን ክርጘል ኣሽ ጭቕጘ ኻዝንድርኵች፤ እንል ኣቕርን ይጅቅ ቲጊጥን» ዩ። 39ጛጊስም ዊቱ ዲቍ የው ጝግምባሪዝ ዝቨይል ደፋሽ፦ «ኣየወ! ቸልሸው ኣቕሽ እኒን ሚከረዙ ፅወድ ይጊስ ዲቍነ፤ ዊገድ ግን ያን ዊደውድ ኣዪጝቀ ክት ዊድረውድ ኣነ» ዩ።
40ጝጊስም ዋጥር ሻቘ ክንደጢል ተራንድ፣ ኽርይጝ ዊን፤ ቢጥሮስትም፦ «እፈ ላይ ሰትትኳመ ይጅቅ ቲግየነ ብርኑ? 41ፊተነል ጥዋይርነጘ ቲግይርን ፃልይጥን፤ መንፈስ ኣስልሸው የጝ፤ ስየ ግን ዝላቐረ የጝ» ዩ።
42እንደ ገነም ሊጘት ፊር፦ «ኣየወ! እኒን ሚከረዙ ፅወድ ያን ዝቂጝቀ ዲቋው ኣቕሽ ክፍቃድድ ኣነ» ዩ። 43ቈሽም ጝክንደጢል ዋጥር ተራንድ ጝታእልጣንድ ዝምወዝ ፅጐውሽጝ ዊንጛንስቅ ኽርይጝ ዊን። 44እንደ ገነም ጛት በር ፊር ጘጝ በውረ ፀለውትድየንት ፃልዩ። 45እንዝ ግረ ጝክንደጢል ተር፦ «ነንምመ ገነ ፈውርን ኽሪርንኵርኑ? እንወ ሰትድ ችጝኩ፤ እጅር ዅርም ኽጥያትኝጥዝ ናኒል ዲቍሽት ይውሽትጡ። 46ጕጥን ፊርነ፤ ይት ዲቍስ ይወውድ ተራ የጝ» ዩ።
እየሱስ ፃይሸጘ
(ማር. 14፡43-50፤ ሉቃ. 22፡47-53፤ ይዃ. 18፡3-12)
47እየሱስም ገነ ዊግታ ሲጝቀ እንወ ፅጭ ሊጘይስ ላውድ ይዅዳ ተሩ፤ ካኽነጣነ ኻልቅጢስመ ኽዝቪዝ ሽመቅሊስ እፃሸቍ ንቕፀቍ እቅም ሰይፍዝመ ዱለዝ ፃይጝ ጝጅቅ ተር። 48ይዅዳም እቂዝ፦ «ክትን ደምዝርነው እጅርድ ያን እምቘውድ የጝ፤ ጝት ፃይጥን» የው ምልክት ይው ዊኑ። 49ጘጝም ጭቅተ እየሱስትል ፊር፦ «ክንሰተወ! ዳኽነመ?» የው እምቑ። 50እየሱስም፦ «ይወደጅወ! ክተትረው ውላድየንት ፋፅም» ዩ፤ ኣይንድም እቅድ እየሱስትል ኣልትጝ ፃይጝ እፅቍ።
51እየሱስ ጅቅ ዊነቊስም ላውድ ጝሰይፍድየንት ምዝ ካኽነጣነ ኻልቀይዝ ኣገልጋይድየንት ጣዝ ጝቀርዝድየንት ቅዝ ማሉ። 52እየሱስ ግን፦ «ፈር ክሰይፍድየንት ጝስፍረይል ዊሽ፤ ሰይፍ ጕየቍድቅ ሰይፍዝ ድዝጥቍ። 53በንዘውዝየ ያን ይርት ዋቕራን ፅጭ ሊጘ ክፍለ ጠውሪስ ንቕፀቍ መላካን በርሳውመ ይርኵሩ? 54እነየው ኣቐውዝየስ ቈሽ ቅዱሳን መፃፋንዝ ሚከረ ለምርጠጘ ፃፍሸውድ ኣወይ ፋፅምሽጠ የጝ?» ዩ።
55ኣይንድም እየሱስ ኽዝቭድየንት፦ «ወምበዲ ፃየቊዝጘመ ይት ፃይትርነ ሰይፍዝመ ዱለዝ ፃይርን ተትርኑ? ግሪ ጨቨቅ መቅደሲስ ክንሳ ክታጅቅ ዊናንድ ፃዪርነቅም።#ሉቃ. 19፡47፤ 21፡37። 56ዊገድ ግን እንቅ ኣቐውድ ነቭያታኒዝቍ መፃፋኒዝ ዊግሸውድ ፋፅምሻንስ የጝ» ዩ። ኣይንድ ጝክንደጥድ እጝቅቅ ጝት ማልጝ ሰይ።
እየሱስ ኣይዅዳነ ፍርድ ሸጐዊል ኣልተጘ
(ማር. 14፡53-65፤ ሉቃ. 22፡54-55፤ ይዃ. 18፡13-14፤19-24)
57እየሱስት ፃየቍ እቅድም ወሪትት ኽግ ክንሰጢዝመ ኽዝቪዝ ሽመቅሊዝ ኣኽቭሽጝ ዊንጘው ካኽነጣነ ኻልቀ ቀያፈት ኻፅሪል ፊስ። 58ቢጥሮስ ግን እክልድ የው ካኽነጣነ ኻልቀይዝ ኻፅሪል ኣሽ እየሱስት ቲክና ዊኑ፤ ኣቒ ጥውም ዊገይዙ ኻትሸነድየንት ቓልጠ ዘቨኝጢጅቅ ጐዩ። 59ካኽነጣነ ኻልቅጢዝመ ኣይዅዳኒዝ ሸጐዊዝ ኣቫላንድም እጝቅቅ እየሱስት ቍውስጥጘ ኻሽትዙ ሚዝር ደምዝጛ ዊን። 60ንቕፀቍ ኻሽትዝቍ ሚዝረጫን ኣልትጝሽም፣ ክርጘ ፊርድሰው ማስረጀ ችጚየቍም፤ እግረ ግን ሊጘ እቅ ኣልትጝ፦ 61«እን እጅርድ፦ ‹እደረት መቅደስ ጝንድ ፋዝ ሻቘ ግርቅዝ ተስጨ ቸለኵን› የውኩ» ይ።#ይዃ. 2፡19።
62ኣይንድም ካኽነጣነ ኻልቀድ ጕ፦ «እንዛይ እቅድ ክግል ሚዝርድጘዊዝቅ ውረ ዊሰ ይዋር?» ዩ። 63እየሱስ ግን ዝም ዩ። ካኽነጣነ ኻልቀድም፦ «ዘላልም ፅበው እደረስ ፃይስኩን፤ ክት ክርስቶስ እደረት ዅር ኣርሽ ድቍ» ዩ። 64እየሱስም፦ «ክት ይረጘ የጝ፤ ዊገድ ግን ክታእጝቅዝቅ ድቈኵን፤ ነንስ ኪርም እጅር ዅር ኻይሉ እደረት ለዊል ጐያንድ፣ ድምነዝ ኣቕ ሲመይስ ተራንድም ቓልትርንቅ» ዩ።#ዳን. 7፡13። 65ኣይንድ ካኽነጣነ ኻልቀድ ኻልክሽ ጝቕምት ኣልቨድየንት ቀድ፦ «እንወ! እደረት ዛሽትኩ፤ እንዝለ ውርት ሚዝር በንዝጣ? እደረት ዛሻንድ ክታቕም ወሽርንኵርኑ። 66ነስየ ወረጘ ይርና?» ዩ፤ ጛይም፦ «ክርጠ ጥውሸኵ!» ይ።#ዘሊ. 24፡16።
67ኣይንድ ጝታብፅቕንድ ጝግል ትፍ ይጛ ጝታናኒዝ ጣዝ፤ ላጥድ ቈሽ ጥፊዝ ጣዝጛ፦ 68«ክርስቶስወ! ክት ጣዘውድ ኣው የጝ? እስቲ ትንቪት ዊግጨ» ይጛ ዊን።
ቢጥሮስ እየሱስት ኻድየጘ
(ማር. 14፡66-72፤ ሉቃ. 22፡56-62፤ ይዃ. 18፡15-18፤25-27)
69ቢጥሮስም ካኽነጣነ ኻልቀይዝ ኻፅር ኣቒል ጐይ ፅባ ላይ ጊርድ ጝጐ ኣልትር፦ «ክትም ገሊለቱ እየሱስ ጅቅ ዊንዱ» ይች። 70ጘጝ ግን፦ «ያን ክት ይረውድየንት ኣርቐቅም» የው ጝታእጝቅዝቅ በዊል ኻድዩ። 71ቢጥሮስም ሚረይዝጐ ፋንድ ላየ ጊርድ ቓልችነ፣ ጝግል ዊነቍ እቂዝ፦ «እን እጅርድ ናዝሪትቱ እየሱስ ጅቅ ዊኑ» ይች። 72ጘጝም ፃራ፦ «ጘጝ እጅርድየንት ኣርቐቅም» የው ሊጘት ኻድዩ። 73ዊቱ ዊን የው ቈሽ ጝግል ዊነቍ እቅድ ቢጥሮስትል ኣልት ይጝ፦ «ክዊገድ ኣረሰኵ፤ ክትም ጛጊስ ላውድ የጝ» ይ። 74ኣይንድ ቢጥሮስ፦ «እኒን እጅርድየንት ኣርቐቅም» ያ ጝቕምት እፅፃ ፃርጠ ኪርሙ። ኣይንድም ጅርወ ዋቑ።
75ቢጥሮስም፦ «ጅርወ ዋቒጝቀ ይት ሸውን ኻዲትር» የው እየሱስ ዊግተው ዊገድ ኣጁ። ቢዘይልም ፍ ኽርር የው ሊዙ።
Currently Selected:
ማቲወስት ወንጌል 26: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
ማቲወስት ወንጌል 26
26
ፈወነ 26
ኣይዅዳንድ እየሱስት ቁጥጘ ማኽርሽጘጘ
(ማር. 14፡1-2፤ ሉቃ. 22፡1-2፤ ይዃ. 11፡45-53)
1እየሱስም እንዛትቅ ዊግት ኻተት ግረ ጝክንደጥድዛት፦ 2«ሊጘ ግርቅዝ ግረ ፈዝየ በል ኣቐጘ ኣርቕርነኵ፤ እጅር ዅርም ሲቅልሻንስ ዲቍሽት ይውሽትጡ» ዩ።#ዘፀ. 12፡1-27።
3ኣይንድ ካኽነጣነ ኻልቅጢዝመ ኽዝቪዝ ሽመቅሊዝ፣ ቀያፈ የነው ካኽነጣነ ኻልቀይዝ ኻፅሪል ኣኽቭሽ። 4እየሱስትም ተኰልዝ ፃይስጥጘ፣ ቁጥጘም ማኽርኽርሽ። 5ዊገድ ግን፦ «ኽዝቪዝ ማኽሊል ኹክት ጒሻይየጘ ኣምርበሊዝ ኣቒነ» ይ።
ላይ እውነ እየሱስት ሽቱ ቓስረጘ
(ማር. 14፡3-9፤ ይዃ. 12፡1-8)
6እየሱስም ቢታንየስ ለምፃም ስሙን የነው እጅሪዝ ጝኒል ፅባ፣ 7ላይ እውነ ጝወየድ ጭቕጘ ኪብረው ሽቱ ፃየው ኣልቫስጥረውስ ብልቃጥ ፃይር ጝጐ ተርች፤ ጘጝም መድል ጐይ ፅባ ሽቱድየንት ጝኣውሪል ቅብስች።#ሉቃ. 7፡37-38። 8ጝክንደጥድዛይም እኒንት ቓልጛንድ ኻልክሽጝ፦ «እንቝጠ ቢክንዘነው ወረጘ የጝፈ? 9እኒን ሽቱድ ቅይሽ ጝወየድ ድኺዝ ኣጠ ዊኑ ኣየውቀ!» ይ። 10እየሱስም ጛይ ይጘውድየንት ኣርቕ እንት ዩ፦ «እኝቸን እውነየንት ውር ቃጥ ችግዝርና? ጚ ይጭስ ቀሰው ሰቭ ፃቭርኵች። 11ድኽድ ዊትርቅ ክታጅቅ ጛይ፤ ያን ግን ዊትርቅ ክታጅቅ ፅበቅም።#ዘዳ. 15፡11። 12ሽቱድየንት ይዲጊል ቅብሰነውዝ ይዲቭኒዝ ኣስልተ የጝ። 13እማንዝ የኵን፤ እኒን ወንጌልድ ሲቭክሸው ኣውማው ስፍረይልቅ ጚ ፃቭረውድ ጝርት ኻልየነ ኣቓንስ ማጥን ድቍሽትጡ» ዩ።
ይዅዳ እየሱስት ዲቍስ ይውጠ ቲስመመጘ
14ኣይንድ ፅጭ ሊጘ ኻወርየታኒስ ላውድ ኣስቈረትቱ ይዅዳ ይሽተው እጅርድ ካኽነጣነ ኻልቅጢል ፊር፦ 15«እየሱስት ዲቍስ ነቃን ወረጘ ነይትርንቅ?» ዩ። ጛይም ሰውርጝን ቍርሻን ይው። 16ይዅዳም ኣይንቲስ ኪርም እየሱስት ዲቍስ ይውጠ ሚቸው ግርየ ደምዛ ዊኑ።
ፈዝየት ድረይዝመ ቅዱስ ቍርቫንዙ ስረትዝ
(ማር. 14፡12-21፤ ሉቃ. 22፡7-13፤ ይዃ. 13፡21-30)
17ቅጣ ዀነው በሊዙ በወትረ ግርየይዝ ጝክንደጥድ እየሱስ ትጐ ኣልትጝ፦ «ፈዝየ በሊዙ ድረይድየንት ዅራንስ ማጥን ኣውል ኣስልነ በንራ» ይጝ ዋቕር። 18ጘጝም፦ «ኻትመይል ጥውርናንድ ችጝርነው እጅሪዝ ጝኒል ፊትርን፦ ‹ክንሰተድ፦ <ይግርየድ ችጛንስቅ ይክንደጢጅቅ ፈዝየ በሊዙ ድረይድየንት ዀውድ ክጝን የጝ> የኵ› ይጥን» ዩ። 19ጝክንደጥድም እየሱስ ኣዘጘ ፃቭ፤ ፈዝየ በሊዙ ድረይድየንትም ጝግል ኣስል። 20እየሱስም ኵናንድ ጝክንደጢጅቅ መድል ጐዩ። 21ዅጛ ሲጝቀም፦ «እማንዝ የኵን፤ ክታጊስ ላውድ ይት ዲቍስ ይውጡ» ዩ። 22ጝክንደጥድም እንዝ ጭቕጘ ኻዝንጝ ቲረ ቲረዝ፦ «ኣደረወ! ያንመ ኣጭር ኣጢ? ያንመ ኣጭር ኣጢ?» ይጛ እየሱስት ዋቕርጥጘ ኪርም። 23እየሱስም፦ «ይት ዲቍስ ይውጡድ ጝናንድየንት ይጅቅ ዝቭዲል በርሰውድ የጝ።#መዝ. 41፡9። 24እጅር ዅርስ ጝማጥን ፃፍሸጘ ክርጡ፤ ዊገድ ግን እጅር ዅርት ዲቍስ ይወው እድ እጅሪዝ ወየው። እድ እጅርድ እዅርሺጝቀ እዳቕ ዊናን ቺዝጠ ዊኑ» ዩ። 25ጝት ዲቍስ ይውጡድ ይዅዳም፦ «ክንሰተወ! ያንመ ኣጭር ኣጢ?» ዩ፤ እየሱስም፦ «ክት ይረጘ የጝ» ዩ።
26ዅጛ ሲጝቀም እየሱስ ሚድ ጒ በርኩ፤ ኪልም ጝክንደጢዝ፦ «ኣስጥን ዅጥን፤ እኒን ይስየድ የጝ» የው ይዉ። 27ፅወድየንትም ጒ እደረት ሚዝየንዙ፤ ጝክንደጢዝም፦ «ክታእጝቅቅ እኒስ ዚጥን። 28ንቕፀቊዙ ኽጥያትዝ ይቅርተዝ ማጥን ቅብረቍ ኣይር ኪዳንዝቍ ይብርድ እንዛይ ጛይ።#ዘፀ. 24፡8፤ የር. 31፡31-34። 29ይርት ምጝግስቲዝ ክታጅቅ ኣይር ወይኒዙ ፍረይስ ዝቅጪስቅ ነስየ እኒን ወይኒዙ ፍረይስ ሊጘት ዝቀቅም የኵን» የው ይዉ። 30መዝሙርም ዚምርጘት ግረ ደቭረ ዘይት ኣበይል ፍ።
ቢጥሮስ ኻዲጠጘድ እየሱስ በውርስ ዊግተጘ
(ማር. 14፡27-31፤ ሉቃ. 22፡31-34፤ ይዃ. 13፡36-38)
31እየሱስም ጝክንደጢዝ፦ «ክታእቅቅ እኝቸን ኻርሸንስ ፅጋርትርንቅ፤ ምላሰንድም
‹ምቓድየንት ጣዝጭር፤
ጝመጝገድም ቢትንሽጡ›
ይሽት ፃፍሽኩ።#ዘካ. 13፡7። 32ዊገድ ግን ያን ክርጘይስ ጐት ግረ ክታት ቀድም ገሊለ ፊጭር» ዩ።#ማቲ. 28፡16።
33ኣይንድ ቢጥሮስ፦ «ላጥድ እጝቅ ፅጋርጝሽ እኳ ያን ግን ስሪስቅ ፅጋጠቅም!» ዩ። 34እየሱስም፦ «እማንዝ የኵን፤ እኝቸን ኻርሸንስ ጅርወ ዋቒጝቀ ይት ሸውን ኻዲትር» ዩ። 35ቢጥሮስ ግን፦ «ክጅቅ ክረነው ኣቕሽ እኳ ክጭርጚ ኻድየቅም!» ዩ። ላጥ ክንደጥድም እጝቅቅ እት ይ።
እየሱስ ጀተሰማኒስ ፃልየው ፀለውትድ
(ማር. 14፡32-42፤ ሉቃ. 22፡39-46)
36እንዝ ግረ እየሱስ ጝክንደጢጅቅ ጀተሰማኒ የነው ስፍረል ፊሩ፤ ጝክንደጥድዛትም፦ «ያን እድጐ ፊጥ ፃልይጪስ እንል ጐይጥን» ዩ። 37ጝጅቅም ቢጥሮስስመ ሊጘ ዘቭዲወስት ቝሪዝ ቲክንዝ ፊሩ፤ ጘጝም ቲክዝጠ ጨጝቅሽጠም ኪርሙ። 38ጛትም፦ «ይኒቭስሸን ክርጘል ኣሽ ጭቕጘ ኻዝንድርኵች፤ እንል ኣቕርን ይጅቅ ቲጊጥን» ዩ። 39ጛጊስም ዊቱ ዲቍ የው ጝግምባሪዝ ዝቨይል ደፋሽ፦ «ኣየወ! ቸልሸው ኣቕሽ እኒን ሚከረዙ ፅወድ ይጊስ ዲቍነ፤ ዊገድ ግን ያን ዊደውድ ኣዪጝቀ ክት ዊድረውድ ኣነ» ዩ።
40ጝጊስም ዋጥር ሻቘ ክንደጢል ተራንድ፣ ኽርይጝ ዊን፤ ቢጥሮስትም፦ «እፈ ላይ ሰትትኳመ ይጅቅ ቲግየነ ብርኑ? 41ፊተነል ጥዋይርነጘ ቲግይርን ፃልይጥን፤ መንፈስ ኣስልሸው የጝ፤ ስየ ግን ዝላቐረ የጝ» ዩ።
42እንደ ገነም ሊጘት ፊር፦ «ኣየወ! እኒን ሚከረዙ ፅወድ ያን ዝቂጝቀ ዲቋው ኣቕሽ ክፍቃድድ ኣነ» ዩ። 43ቈሽም ጝክንደጢል ዋጥር ተራንድ ጝታእልጣንድ ዝምወዝ ፅጐውሽጝ ዊንጛንስቅ ኽርይጝ ዊን። 44እንደ ገነም ጛት በር ፊር ጘጝ በውረ ፀለውትድየንት ፃልዩ። 45እንዝ ግረ ጝክንደጢል ተር፦ «ነንምመ ገነ ፈውርን ኽሪርንኵርኑ? እንወ ሰትድ ችጝኩ፤ እጅር ዅርም ኽጥያትኝጥዝ ናኒል ዲቍሽት ይውሽትጡ። 46ጕጥን ፊርነ፤ ይት ዲቍስ ይወውድ ተራ የጝ» ዩ።
እየሱስ ፃይሸጘ
(ማር. 14፡43-50፤ ሉቃ. 22፡47-53፤ ይዃ. 18፡3-12)
47እየሱስም ገነ ዊግታ ሲጝቀ እንወ ፅጭ ሊጘይስ ላውድ ይዅዳ ተሩ፤ ካኽነጣነ ኻልቅጢስመ ኽዝቪዝ ሽመቅሊስ እፃሸቍ ንቕፀቍ እቅም ሰይፍዝመ ዱለዝ ፃይጝ ጝጅቅ ተር። 48ይዅዳም እቂዝ፦ «ክትን ደምዝርነው እጅርድ ያን እምቘውድ የጝ፤ ጝት ፃይጥን» የው ምልክት ይው ዊኑ። 49ጘጝም ጭቅተ እየሱስትል ፊር፦ «ክንሰተወ! ዳኽነመ?» የው እምቑ። 50እየሱስም፦ «ይወደጅወ! ክተትረው ውላድየንት ፋፅም» ዩ፤ ኣይንድም እቅድ እየሱስትል ኣልትጝ ፃይጝ እፅቍ።
51እየሱስ ጅቅ ዊነቊስም ላውድ ጝሰይፍድየንት ምዝ ካኽነጣነ ኻልቀይዝ ኣገልጋይድየንት ጣዝ ጝቀርዝድየንት ቅዝ ማሉ። 52እየሱስ ግን፦ «ፈር ክሰይፍድየንት ጝስፍረይል ዊሽ፤ ሰይፍ ጕየቍድቅ ሰይፍዝ ድዝጥቍ። 53በንዘውዝየ ያን ይርት ዋቕራን ፅጭ ሊጘ ክፍለ ጠውሪስ ንቕፀቍ መላካን በርሳውመ ይርኵሩ? 54እነየው ኣቐውዝየስ ቈሽ ቅዱሳን መፃፋንዝ ሚከረ ለምርጠጘ ፃፍሸውድ ኣወይ ፋፅምሽጠ የጝ?» ዩ።
55ኣይንድም እየሱስ ኽዝቭድየንት፦ «ወምበዲ ፃየቊዝጘመ ይት ፃይትርነ ሰይፍዝመ ዱለዝ ፃይርን ተትርኑ? ግሪ ጨቨቅ መቅደሲስ ክንሳ ክታጅቅ ዊናንድ ፃዪርነቅም።#ሉቃ. 19፡47፤ 21፡37። 56ዊገድ ግን እንቅ ኣቐውድ ነቭያታኒዝቍ መፃፋኒዝ ዊግሸውድ ፋፅምሻንስ የጝ» ዩ። ኣይንድ ጝክንደጥድ እጝቅቅ ጝት ማልጝ ሰይ።
እየሱስ ኣይዅዳነ ፍርድ ሸጐዊል ኣልተጘ
(ማር. 14፡53-65፤ ሉቃ. 22፡54-55፤ ይዃ. 18፡13-14፤19-24)
57እየሱስት ፃየቍ እቅድም ወሪትት ኽግ ክንሰጢዝመ ኽዝቪዝ ሽመቅሊዝ ኣኽቭሽጝ ዊንጘው ካኽነጣነ ኻልቀ ቀያፈት ኻፅሪል ፊስ። 58ቢጥሮስ ግን እክልድ የው ካኽነጣነ ኻልቀይዝ ኻፅሪል ኣሽ እየሱስት ቲክና ዊኑ፤ ኣቒ ጥውም ዊገይዙ ኻትሸነድየንት ቓልጠ ዘቨኝጢጅቅ ጐዩ። 59ካኽነጣነ ኻልቅጢዝመ ኣይዅዳኒዝ ሸጐዊዝ ኣቫላንድም እጝቅቅ እየሱስት ቍውስጥጘ ኻሽትዙ ሚዝር ደምዝጛ ዊን። 60ንቕፀቍ ኻሽትዝቍ ሚዝረጫን ኣልትጝሽም፣ ክርጘ ፊርድሰው ማስረጀ ችጚየቍም፤ እግረ ግን ሊጘ እቅ ኣልትጝ፦ 61«እን እጅርድ፦ ‹እደረት መቅደስ ጝንድ ፋዝ ሻቘ ግርቅዝ ተስጨ ቸለኵን› የውኩ» ይ።#ይዃ. 2፡19።
62ኣይንድም ካኽነጣነ ኻልቀድ ጕ፦ «እንዛይ እቅድ ክግል ሚዝርድጘዊዝቅ ውረ ዊሰ ይዋር?» ዩ። 63እየሱስ ግን ዝም ዩ። ካኽነጣነ ኻልቀድም፦ «ዘላልም ፅበው እደረስ ፃይስኩን፤ ክት ክርስቶስ እደረት ዅር ኣርሽ ድቍ» ዩ። 64እየሱስም፦ «ክት ይረጘ የጝ፤ ዊገድ ግን ክታእጝቅዝቅ ድቈኵን፤ ነንስ ኪርም እጅር ዅር ኻይሉ እደረት ለዊል ጐያንድ፣ ድምነዝ ኣቕ ሲመይስ ተራንድም ቓልትርንቅ» ዩ።#ዳን. 7፡13። 65ኣይንድ ካኽነጣነ ኻልቀድ ኻልክሽ ጝቕምት ኣልቨድየንት ቀድ፦ «እንወ! እደረት ዛሽትኩ፤ እንዝለ ውርት ሚዝር በንዝጣ? እደረት ዛሻንድ ክታቕም ወሽርንኵርኑ። 66ነስየ ወረጘ ይርና?» ዩ፤ ጛይም፦ «ክርጠ ጥውሸኵ!» ይ።#ዘሊ. 24፡16።
67ኣይንድ ጝታብፅቕንድ ጝግል ትፍ ይጛ ጝታናኒዝ ጣዝ፤ ላጥድ ቈሽ ጥፊዝ ጣዝጛ፦ 68«ክርስቶስወ! ክት ጣዘውድ ኣው የጝ? እስቲ ትንቪት ዊግጨ» ይጛ ዊን።
ቢጥሮስ እየሱስት ኻድየጘ
(ማር. 14፡66-72፤ ሉቃ. 22፡56-62፤ ይዃ. 18፡15-18፤25-27)
69ቢጥሮስም ካኽነጣነ ኻልቀይዝ ኻፅር ኣቒል ጐይ ፅባ ላይ ጊርድ ጝጐ ኣልትር፦ «ክትም ገሊለቱ እየሱስ ጅቅ ዊንዱ» ይች። 70ጘጝ ግን፦ «ያን ክት ይረውድየንት ኣርቐቅም» የው ጝታእጝቅዝቅ በዊል ኻድዩ። 71ቢጥሮስም ሚረይዝጐ ፋንድ ላየ ጊርድ ቓልችነ፣ ጝግል ዊነቍ እቂዝ፦ «እን እጅርድ ናዝሪትቱ እየሱስ ጅቅ ዊኑ» ይች። 72ጘጝም ፃራ፦ «ጘጝ እጅርድየንት ኣርቐቅም» የው ሊጘት ኻድዩ። 73ዊቱ ዊን የው ቈሽ ጝግል ዊነቍ እቅድ ቢጥሮስትል ኣልት ይጝ፦ «ክዊገድ ኣረሰኵ፤ ክትም ጛጊስ ላውድ የጝ» ይ። 74ኣይንድ ቢጥሮስ፦ «እኒን እጅርድየንት ኣርቐቅም» ያ ጝቕምት እፅፃ ፃርጠ ኪርሙ። ኣይንድም ጅርወ ዋቑ።
75ቢጥሮስም፦ «ጅርወ ዋቒጝቀ ይት ሸውን ኻዲትር» የው እየሱስ ዊግተው ዊገድ ኣጁ። ቢዘይልም ፍ ኽርር የው ሊዙ።
Currently Selected:
:
Highlight
Share
Copy
Want to have your highlights saved across all your devices? Sign up or sign in