MATIUS 14

Ar Yohanes akuni ima wukbaga lagage mende enogo wakuga wene

(Mrk. 6:14-29; Luk. 9:7-9)

1Ar Herodes, o Galilea paga etoma ebe inewe mendek werekma, Ar Yesus eka lagage mende etoma aruk kolalkige. 2Ar Herodes nen wene aworomi yoraga dogolir, “Yi ap Yohanes ima wurinaka laga enogo, ar obok iluk agama o! Eti paga nen, Ar obarne erukbuk mende erir taga o.”

3 # Luk. 3:19-20 Nenaluk wene edoma nggwe eta, ar kwe Herodias eti, ar Herodes ogar endaga Filipus eti agwe paga, ar Herodes nen ar Yohanes pagago inggi kede magago, kede warek bartagama onggol birige paga ma o. 4#Im. 18:16, 20:21Nenaluk, ar Yohanes nen, ar Herodes wene yegerogon yorige paga, “Kar kwe Herodias eti waganurak dek o!” yiluk wenemuk yorige paga o. 5Wene ebe eta paga, ar Herodes nen ar Yohanes warik nen yiluk andarigerek ogwe, ir akuni pakalok etoma nen, ar Yohanes eti ap nabi mende arar o, yiluk andagwi paga, ar obade welagage o.

6O ambi paga, ar Herodes endak tagage paga adeknggen eteganem, akuni yonggo barige mende inilka paga, ar kwe Herodias eti ak kodak taridik, ap inika paga ndai wari unggirige o. Ar ndai uwakda wagangga dogolir ekige mende eti, ar Herodes adeknggen mondok arar oba birige o. 7Akla adeknggen oba bega lagagerek, ane amburu men yorige, kar nen an nena-nena nggino yoknirigin mende eti, an nen wokirigin arar o, yiluk yorige.

8Eti paga ma, ar kodak enogo agwiya nen aruk warogo birigemo, kodak enogo nen yoga dogolir, “An yogondakne ya paga ar, ar Yohanes Pembaptis eti aluwak mbalek, o loyang akla yagadogo wokniru nggino, yokigi o, yiluk yorige!”

9Nggino yirige aruk koldiluk, Herodes arar iliti buru yirige o. Ogwe ar akuni yonggo barige yemenogo inika paga, kar nena nggino yigin eti wokirigin o, yiluk ane kumbuk mbalkerek ma, aworomi yoraga dogolir, kodak nggino yege eti ndak-ndak arar erni o, yiluk yorarige o. 10Etegerogon yorarigemo, ir aworomi akuni kede warek bartagama arar lagugwarik, ar Yohanes enogo anggodobak mbalkugwa o. 11Tuguluk ar Yohanes alubak mbalek enogo o baki akla enarogo wolok kodak enogo wogorugwa, nen ar kodak enogo nen wolok ar agwiya oba wolok lagage. 12Etegerogon ekugwama, ar Yohanes aworomi yemenogo wagugwarik, ar ebe warek enogo kubur eri lagugwa. Tuguluk ir ekugwa mende yemenogo, Ar Yesus mbililogo yori lagugwa.

Ar Yesus nen akuni lima ribu paga erom wogorarige wene

(Mrk. 6:30-44; Luk. 9:10-17; Yoh. 6:1-14)

13Ar Yesus wene eti aruk kolal biluk, Ar o etoma dambe kalok adigar perahu akla dagaluk, o akuni inagaga mondok dekma nggwe etoma arar lagage. Ogwe akuni wene eti etagage obok inaruk kolal biluk, ir akuni yemenogo o kota yemenogo dambe kalok, ir abuk taga nggwe tu, Ar Yesus arar mutek lagugwa o. 14Ar Yesus to perahu paga wulka dogolir, Ar il lakdarige mende, akuni pakalok yemenogo Ar il darige o. Il dalok, Ar nen ir inakba pakalok akla andarige. Nen ir akuni ambetak u warek mende inoba dek erogo baga ekige o.

15O arar keyanggwi agagemo, Ar Yesus aworomi nen yogu dogolir, “O yoma o waganekma arar ma, akuni yoma naungge mende, o desa-desa etoma onggo mbalar lowak nen, Kar kane yoran o,” yiluk yorugwa.

16Yorugwama, Ar Yesus nen yega dogolir, “Ir lakbaurak dek o, ogwe kir nen ar erom magarani o,” yiluk yorarige.

17Yoragagemo ir nen yugu dogolir, “Nir ya nininggim werek eti, roti lima, nen ikan dua, ebe eta paga mban werek o,” yiluk yorugwa!

18Yorugwama Ar Yesus nen, “Kalok ebe eta ar Noba wolok watni o.” 19Yiluk yoralok, Ar nen akuni pakalok yemenogo, ir inebe irikngga paga etoma kotarir lowak nen yiluk, yorarige o. Yoraga lagagerek, tuguluk Ar nen, roti lima inom nen ikan dua inom, yanogo inggimu wokbiluk, Ar Elokte arar mbogor paga ilik tatuk, Nombae Allah wa, yiluk, keyagi wakige o. Etegerogon eka lagagerek, roti enogo inggi paga ugur-ugur erogo bega lagagerek, Ar Awurumi nen, ir akuni pakalok yemenogo inake tumburirawak nen yiluk, wogoragage o. 20Tumburogo arar wogorarugwama, ir akuni yemenogo inelabur togon ar narugwa o. Nen ir inelabur agagemo ndinogo birugwa mende eti, Ar Yesus awurumi nen roti ndin agage mende yemono mburim tu yago nggedek-nggedek, dua belas paga arar yagakugwa o. 21Akuni inebe dago narugwa mende dambulik, lima ribu paga o. Nen kumi inom, elegedak, inom, inebe wenarinakik dek o.

Ar Yesus iyok i agum paga bir wagage wene

(Mrk. 6:45-52; Yoh. 6:16-21)

22Etegerogo eku lagugwarik, ir akuni yemenogo inuma lowak nen yiluk, ane yoraga dogolir, ir Ar mutok lagwi mende yemenogo perahu paga yagartatur, inalep to warogo undagu dogowak nen yiluk yorarige. 23Akuni pakalok yemenogo arar inuma lagugwama, Ar Yesus Tamban erik nen yiluk, adigar kur taga dagarige. O kukbaga, Ar Yesus adigar etoma tamban eka welagage. 24Ar Yesus Aworomi to perahu akla yagartatuk wulkugwa enogo, i danau ima odo kirogon, lok etoma arar ari lakarugwa. Perahu enogo, o wiya elokte mbalir negen lagunem ma, i tarin nen perahu enogo elokte likbigik-wukbigik arar ekige. 25Etegerogon ekanem, o mbiyalka kigik jam tiga amor-amor eta, Ar Yesus i agum paga iyok bir inoba etoma arar lagage. 26Laga kalok, ir inagur mondok pakalok lagagemo, “Eiya, monggar endi a!” yiluk inane lambedagi wakugwa. 27Ogwe Ar Yesus Ane onggo lok-lok ar yoraga dogolir, “An Yesus o. Kinagurakma! Kir kinobade arugup o, nen kinebe kinabodok dek arno o!”

28Yiluk yirigemo, ar Petrus nen, “Kar Yesus ar kalok, an Kar Koba i agum pagaru warik nen, eme yornirin nda,” yiluk yorige.

29Yorigemo Ar Yesus nen yoga dogolir, “Kalok kar emenda,” yiluk yorigemo ar Petrus enogo to perahu akla nen wulka lagagerek, i agum pagaru Ar Yesus oba arar lagage. 30Laganem ar, o wiya nggok mende waga kalok, ar Petrus obade atuk, nen ima arar yobok togo wurkige o. Wurki nanggige ar nen, “Eya, Tuhan a, yiluk ane naik yirige o.” 31Yigi nanggige, Ar Yesus inggi mbo ar Petrus enogo, inggi nggerok togo pakbiluk, nen yoga dogolir, “We Petrus ambodak a? Kar kiliti ebebar andagikdek keyagi o. Kar An noba kiliti duk mbere etoma nenaluk?”

32Yiluk yoga lagagerek, tuguluk ir imbirak to perahu akla arar unggugwi dagik, wiya enogo arar dek agage o. 33Dek agigemo, ir Ar Aworomi yemenogo nen, Ar Yesus wogok dugu dogolir, “Ar Tuhan yi, Ar Allah Akbur arar o!” yiluk yorugwa o.

Ar Yesus nen akuni o Genesaret mende u palinakige wene

(Mrk. 6:53-56)

34Ir i danau aik alibagan nggwe lakbi undalok wulkugwa mende, ir o Genesaret arar unda lagugwama. 35Nen ir akuni etoma Ar Yesus waga inil kalok, ir nen wene akuni o kuri etoma paga obogar yorar lagugwa. Yorarurgwama, ir akuni u warek mende yemenogo obogar, Ar Yesus oba woginarek wagugwa o. 36Wagu lagugwarik, Ar Yesus iyom irep bugudak ar ininggi paktau nggino yorugwa. Nen ir akuni ininggi paktarugwa mende yemenogo, obogar u inoba dek agage o.

Currently Selected:

MATIUS 14: WLW

Highlight

Copy