MATIUS 15
15
Inumbu inomba nen eku dogorak yirugwa mende inom nen Ar Allah nen eku dogorak yirige mende inom wene
(Mrk. 7:1-13)
1Ap Farisi mende inom, nen guru agama mende ambetak inom, o Yerusalem nen Ar Yesus oba wagugwa. Ir nen Ar kinok yogu dogolir, 2“Kar Kaworomi nir ninumbu ninomba nen eku dogorak yirugwa mende nenaluk tagalka? Ir nen dago nuwok nen yiluk, ir wene mbalek ndak-ndak ininggi tobalkikdek dogolir nengga o!”
3Ar Yesus nen wene onggo yoraga dogolir, “Kir kinumbu kinomba inawene mbalek mutok lau ake paga, kir ogwe Ar Allah wene mbalek nenaluk tagalir tagwi? 4#Kel. 20:12, 21:17; Im. 20:9; Ul. 5:16Wene edo ebe, Ar Allah nen yega dogolir, ‘Kagwiya kombae pipak inalon palka dogon o, ta nen agwiya ombae yiduk maduk yoraga kalok, ar ebe mondok min arar warurak o,’ yiluk yirige. 5Ogwe kir nen wene emeriragu dogolir: ta nen agwiya ombae wene yoraga dogolir, ‘Nena-nena nagwiya nombae kimbirak kinake wokirau bigi mende eti, an nen Ar Allah ake obok bigi o,’ yiluk yoraga kalok, 6ir akuni eti nen inagwiya inombae inalon palinaku dogu dambe kalok dogu ndak ar o, yiluk yoratagwi o. Ma wene mbalek inanggok eku lagugwa mende ake paga, kir nen Ar Allah Awene mbalek lemelogo birtagwi. 7Kir kinebe akuni eko yuak ekwa inenggal nggirik kir arar o! Ar Yesaya nen, kir kinake wene elalogo birige mende, yi ndak-ndak:
8 #
Yes. 29:13
‘Ar Allah nen yegerogon yege:
Ir akuni eti nen, we ir inane paga mban An wogor banunggwi,
Ogwe ir iniliti An noba nggwe kunik dek o.
9An wogor bani tagwi etoma, we yega tegap o,
Nenaluk, ir akuni inawene mbalek mende ake paga, akuni yoragu dogolir,
eti An nane mbalek ndak-ndak erogo biluk yoragwi o.’ ”
Akuni maduk erogo bartaga mende wene
(Mrk. 7:14-23)
10Ar Yesus nen akuni obogar wai yoraga lagagerek, men yoragage, “Kinaruk kolal biluk, pik pak kinakla andani o! 11Ninandema nggweru nertagwi paga maduk erninaka dek o; ogwe ninandema nggwe tu wundi warir taga eti paga perak, nir maduk erninabi taga mende o,” yiluk yorarige.
12Nen Ar Yesus aworomi wagugwarik men yorugwa, “Ninombae Kar kilu a men a, ir akuni Farisi mende yemenogo nen, wene Kar yegen eti paga, ir Koba uwa bega o?”
13Ar Yesus nen onggo yoraga dogolir, “Aingge An Nombae mbogor paga mende nen yatukdek mende etoma, An nen obogar al kenigin o. 14#Luk. 6:39Ir akuni Farisi mende endi nok-nok damber dani. Ir ap nggok ndak inil mbuk mende arar o; etegerogonma, ir akuni inil mbuk mende nen, ir inil mbuk mende ar ininggi yidi logo wogorek lamu, ir inom ar wen inggala nggar wuragun o.”
15Ar Petrus nen yega dogolir, “Ambo, Kar wene oba lirogo yegen eti, ae Ninombae, nir mbililogo yoneran nde lak!” yiluk yorige.
16Ar Yesus nen onggo yoga dogolir, “Kir ogwe wene kinakla nenaluk dikbegekdek werek? 17Kir kininggukdek a, inandema onggol begertekma, nen inelabuda bi wuka lagatek, nen lok-lok wundi lektaga o. 18#Mat. 12:34Ogwe inandema nen wundi waritaga eti, edo inilitimu nen o; nen ebe eti nen ar, akuni maduk erogo bartaga mende o. 19Inilitimu nen wene maduk mende ebekbiluk, ebeketek enogo paga akuni inakwi, kumi ap inakburi mende inilmudu erinakwi, lungga wadi bir nugwi, inilmudu waganggwi, wene inane inenggal yoragwi, inane nggodokba yugwi, etoma obogar wundi wari taga. 20Wene inilitimu nen eber biluk wundi waritaga eti nen akuni maduk erinabitaga o. Iningi kokikdek kigik nunggwi eti paga maduk mondok erinabi tagodek o.”
Kwe Kanaan mende iliti ebebar andarige wene
(Mrk. 7:24-30)
21Ar Yesus o etoma dambe kalok, o kota Tirus o, nen kota Sidon o, ineragalu we korok negen ar etoma arar lagage. 22Kwe ambi o kuri etoma mende, Ar Yesus yamar neyan o, yiluk, ane yir oba waga dogolir, “Aee, Daud Akbur, nakba kan nde, lak! An nak kodak kugi obabur maduk mende ambi ilitimu unggegere werek ma, ar oba ndak dek mondok ar werek o, yiluk yorir lagige.” 23Ar Yesus nen, kwe enogo wene onggo ambi mondok yorukdek. Nen ir Ar Yesus aworomi Ar oba nggino yori wagugwarik, men yorugwa, “Ninombae! Kwe eti ninamborna ane kagalir wari taga ma, uma lawak nen yorin o, yiluk yorugwa!”
24Ar Yesus nen yoraga dogolir, “An eti ir akuni Israel mende, inebe nuk agugwa mende inake mban, lakbani wagage o.”
25Kwe enogo Yesus uwagam tebe yi wagagerek, men yorige, “An yamar neyan o, Nombae,” yiluk yorige.
26Yorigemo Ar Yesus nen onggo yoga dogolir, “Elegedak inarom pugurik mende waganogo nen, yangge inoba mbo lakbu eti mondok maduk o.”
27Yiluk yorigemo, ar kwe enogo nen wene onggo yoga dogolir, “Ebebar o, Nombae. Ogwe ir yangge enogo, inombae agarom nengga dogolir, abukpul meja abukla wukbegetek mende nertagwi ar o,” yiluk yorige.
28Yorigemo, Ar Yesus nen onggo yoga dogolir, “Kwe kar kiliti ebebar andagen eti, nggok mondok arar o! Ma, kar kakla nen ekbagu wadok andagen mende eti, etaruak arar o,” yiluk yanogo yoga kigik, ar kwe enogo ak, o eta paga arar, u nogo oba arar dek agage o.
Ar Yesus nen akuni u warek dek eginakige wene
29Ar Yesus o etoma arar dambe kalok, tuguluk i Danau aik paga etoma yedok nggodok arar lagage. Laga lagagarek, Ar ado bugudak ambi paga, etoma arar dagi lalok korek welagage o. 30Korek werekma, ir akuni pakalok nen, akuni amberak inuwak tagalek mende inom, inil mbuk mende inom, iniyok maduk tuan lakbuk mende inom, inane unggukdek mende inom, nen akuni ye u nde u warek mende obogar wogonarek, Ar Yesus ilka paga ba wagwi kalok, Ar nen ir enogo u palinaka lagage o. 31Ir akuni pakalok etoma welagugwa yemenogo, ir akuni inane unggukdek mende inane yugwi, akuni inuwak tagalek mende pano agwi, nen iniyok warek tuan lakbuk mende tuan lagwi, nen inil mbuk mende inil kugwi, obogar etegerogo erogo barigemo, ir akuni pakalok inil welagugwa mende yemenogo nen, wi au, yiluk, Ar Allah ir Israel mende Inombae enogo, wa, yiluk, wogok birugwa o.
Ar Yesus nen akuni inebe empat ribu paga erom wogoragage wene
(Mrk. 8:1-10)
32Ar Yesus nen Aworomi wai yoralok, men yoragage, “An ir akuni pakalok yoma inakba kertaga o. Ir ininggi mbere ambi paga ar, An ninom welagiya, Nen yogondak, ir inarom naurak mondok dek arar o. Ir erom inelabuda dek kigik, ir inuma lakbamo, tuan paga inilpudu bir laurak ma, ir inuma lowak nen yiluk, dambek bau An na'ir o.”
33Yigi nanggige, ir Ar Yesus Aworomi nen kinok yogu dogolir, “We, akuni pakalok yi inake paga, o waganekma yoma nonggwa mende ngga ma wagani lau nda?”
34Yugu nanggugwa Ar Yesus nen, “Kir roti mende negen pago werek?” yiluk ir kinok yoragige. Yirigemo ir nen onggo yogu dogolir,
“tujuh paga o, nen ikan agwidak ndak, we mende negen inom werek o,” yiluk yorugwa.
35Yorugwama, Ar Yesus nen akuni pakalok yemenogo agar paga yoma kortarni o, yiluk yoragage. 36Nen Ar roti tujuh yanogo inom, nen ikan yanogo inom wagangga lagagerek, Ar Allah wa, yiluk tamban ekige. Ekbiluk roti inom, nen ikan yanogo inom, Ar inggi paga ugur-ugur erogo nen, Ar Aworomi yemenogo nen, ir akuni pakalok yemenogo ibar tumburogo wogorani o, yiluk wogoragage. 37Nen ir akuni pakalok yemenogo, inelabur kerok togon arar narugwa. Narugwarik nen, Ar Aworomi yemenogo nen, roti inelabur nen ndinogo birugwa mende nandodogo, keranjang tujuh paga akla yagarkugwa. 38Akuni roti narugwa mende inebe ap mban empat ribu paga o. Ir kumi o, nen elegedak o, inom wenarinabukdek o.
39Tuguluk Ar Yesus nen akuni pakalok yemenogo arar kinuma lani o, yiluk yorarige. Lakbaga lagagerek, Ar adigar to perahu akla dagaluk, o Magadan etoma arar lagage.
Currently Selected:
MATIUS 15: WLW
Highlight
Share
Copy
Want to have your highlights saved across all your devices? Sign up or sign in
