അപ്പൊസലല 19
19
പവുലോസ് എപ്പെസോസിലി
12അപ്പല്ലോസ് കൊരിന്ത്യാലി താനെ ഇര്‌ക്കാട്ടി പവുലോസ് എപ്പെസോസ്‌ക്ക് പോര എ്ഡെഗ മേലെഗെ പോയി എപ്പെസോസ്‌ക്ക് എജ്ജി അദിലി ഏസുദ് സൊല്ലുപഡി ണഡാക്ക ലേസ ആള്‌ഗണ പവുലോസ് കണ്ടാ്. 2<<ണിമ്മ ഏസു ണമ്പിക്കേക്ക് ബന്ത പ്‌റ ണിമാക്ക് സാമിണിഗാല് കെ്ഡേത്ത്‌ദ?>> എന്ത് അയാള് അവാര്‌ണ കേ്ട്ടാ്.
അക്കുളെ അവാര് സൊന്നാര്: <<സാമിണിഗാല് ഇര്‌ക്ക്‌ദ് എന്ത് താനെ എമ്മ കേ്ക്കാലെ.>>
3അയാള് അവാര്‌ണ കേ്ട്ടാ്: <<പിന്നെ ണിമ്മ എച്ച്‌ള ദിന്‌സ് മുളുഗ മുളുഗിനേര്?>>
<<ഓഗന്നാ് സൊന്ന തണ്ണി മുളുഗ പാസെത്തെ എമ്മാമ് തണ്ണി മുളുഗിനാദ്>> എന്ത് അവാര് സൊന്നാര്.
4അക്കുളെ പവുലോസ് സൊന്നാ്: <<പാവാത്തിലിര്‌ന്ത് പിന്ന്‌മെ്ട്ടിണേരെന്ത് തെര്യാത്തെ ഓഗന്നാ് തണ്ണിക്ക് മുളുഗിസിനാദ്. തന്ന് പിന്ന്‌ക്ക് ബര ഏസുണ താനെ ണമ്പുഡൊ എന്ത് ആള്‌ഗാക്കെ അയാള് സൊല്ലാമ് സെയ്‌ദാ്.>> 5ഇദ്‌ണ കേ്ട്ട പ്‌റ അവാര് ഏസു ആണ്ടവാന്‌ദ് പേരിലി തണ്ണിക്ക് മുളുഗാമ് സെയ്‌ദാര്. 6പവുലോസ് അവാര്‌ക്ക് കയ്യി ബെത്താദ്‌മ് സാമിണിഗാല് അവാര്‌ക്ക് ഏ്റിത്ത്. അക്കുളെ അവാര് ബേ്റെബേ്റെ ണായാത്തിലിഗ പേസി കൊണ്ട്‌മ് സാമിക്ക് സൊല്ല്യ ഇര്‌ക്ക കാര്യഗണ പറ്റിമ് സൊന്നാര്. 7അവാര് പന്നന്റ്‌ക്ക് പക്ക ആണ്‌മക്കഗ താനെ ഇര്‌ന്താര്.
8പവുലോസ് മൂണ് മാസ എഗുദാര് പരേസ്‌റ കൂരേക്ക് പോയി ണല്ല ദയ്യിരത്തോഡെ ആള്‌ഗാക്കെ, സാമി ആള്‌റാദ്‌ണ പറ്റി അവാര്‌ക്ക് ണെപ്പ്‌കെ്ഡേസ്‌റമാട്ട് തറ്‌ക്കി കൊണ്ട് സൊല്ലികൊഡുത്താ്. 9ആന ലേസ ആള്‌ഗ അയാള് സൊന്നാദ്‌ണ കാദ്‌ക്ക് ഇക്കാലെ അവാര് അദ്‌ണ ണമ്പാമില്ലെ. എല്ല ആള്‌ഗ മുന്തുക്ക് അവാര് ആണ്ടവാ് കാട്ടി തന്ത ബയ്യിന പറ്റി കെ്ട്ട ണായഗ സൊല്ലികൊണ്ടിര്‌ന്താര്. അദ്‌ക്ക് പവുലോസ് ഏസുക്കാറാര്‌ണ ഒളേത്തെ്ഡ്‌ത്ത് കൊണ്ട് തുറന്നോസ് പഡ്‌സ്‌റ പട്ട്‌ക്ക് കൂട്ടി പോനാ്. അദിലി ദിനാമ് തമാക്ക് തമാക്ക് ഇദ്‌ണ പറ്റി ണായ പേസി കൊണ്ടിര്‌ന്താര്. 10ഇച്ചെ റണ്ട് ബര്‌സ മാട്ട് സെയ്‌ദ് കൊണ്ടിര്‌ന്താദ്‌ണാലെ ആസ്യ ണാഡിലിര്‌ക്ക എല്ല എഗുദാര്‌മ്, എഗുദാര് അല്ലാത്ത ജാദിഗാമ് ആണ്ടവാന്‌ദ് സൊല്ലുസുലാക്കണ കേ്ട്ടാര്.
ഇസ്‌ക്കേവെ എങ്കവാന്‌ദ് മഗനാര്
11സാമി പവുലോസോഡിര്‌ന്ത് ബെല്ല്യ ബെല്ല്യ അദിസ്യഗ സെയ്‌സിനാ്. 12പവുലോസ്‌ദ് സീലെ മ്‌ണ്ട്‌ണാമ് സിവാല്‌ക്ക് ഏ്റ്‌സി ണഡാക്ക സീലെനാമ് എ്ഡ്‌ത്ത് ബന്ത് ണോയിക്കാറാര്‌ക്ക് ഉദ്ദാക്ക് അലേത്താര്. അക്കുളെ ണോയിക്കാറാര് തെ്ളിന്താര്, തട്ടിര്‌ന്ത കെ്ട്ടജാദി അവാരോഡെ ഇര്‌ന്ത് പോഗാമ് സെയ്‌ദ്‌ദ്.
13ആന ണാഡ്‌ണാഡ പോയി കെ്ട്ടജാദിന ഒയിപ്പിസ്‌റ ലേസ എഗുദല ഇര്‌ന്താര്. അവാര് ഏസു ആണ്ടവാന്‌ദ് പേരിലി കെ്ട്ടജാദിഗണ ഒയിപ്പിസ്യ ണോഡിനാര്. <<പവുലോസ് ആര്‌ണ പറ്റി സൊല്ലുറാനൊ അയ്യി ഏസുദ് പേരിലി ബെ്ള്യെ കഡായിരി എന്ത് ണാന് ണിമാക്കെ സൊല്ലുറെ>> എന്ത് അവാര് കെ്ട്ടജാദിഗാക്കെ സൊന്നാര്. 14സ്‌കേവ എങ്ക എഗുദ ബെല്ല്യ പൂസാരിദ് ഏ്ള് മഗനാര്‌ത്തെ അച്ചെ സെയ്‌ദാദ്. 15ആന കെ്ട്ടജാദി അവാര്‌ക്ക് സൊല്ലിത്ത്: <<ഏസുണാമ് എനാക്ക് തെര്യു, പവുലോസ്‌ണാമ് തെര്യു, ആന ണിമ്മ ആര്?>> 16എ്ന്തദ്‌മ് കെ്ട്ടജാദി തട്ടിര്‌ന്തവാ് അവാര്‌ക്കുദ്ദാക്ക് പറാന്ത് ബ്‌ന്ത് അവാര്‌ണ അഡിത്ത് ബീ്ത്തി അവാര്‌ദ് ഉഡുപ്പുഗണെല്ല കീ്റി എക്കാമ് സെയ്‌ദ്‌ദ്. അയ്യി എഗുദാര് ഈ്ഡ് കെ്ഡേസി ബെ്റ്‌ദെകറ്യോഡെ അയാള്‌ദ് കൂരേലി ഇര്‌ന്ത് ഓഡി പോനാര്.
17എപ്പെസോസിലി ഇര്‌ക്ക എല്ല എഗുദാര്‌മ്, എഗുദാര് അല്ലാത്ത ജാദിഗാമ് ഇച്ചെ ണഡാന്ത സേദിന കേ്ട്ട് റമ്പ കോവെപട്ടാര്, ഏസു ആണ്ടവാന്‌ദ് പേര്‌ണ എല്ലാര്‌മ് റമ്പ പെര്‌മെപട്ടാര്. 18അച്ചെ ഏസു ണമ്പിക്കേക്ക് എത്തിന്യൊ ആള്‌ഗ ബന്ത് തമ്മ സെയ്‌ദ പാവഗെല്ല മുച്ചുഡ ആള്‌ഗാക്ക് തപ്പ്‌ത്തെ എന്ത് സൊല്ലികൊഡുത്താര്. 19മന്ത്‌റമായ സെയ്‌ദിര്‌ന്ത എത്തിന്യൊ ആള്‌ഗ തമ്മ്‌ദ് മന്ത്‌റ ബുക്ക്‌ണ എ്ഡ്‌ത്ത് ബന്ത് എല്ലാര്‌മ് ണോഡിര്‌ക്കാട്ടി സുട്ടെക്കിനാര്. ഈ ബുക്ക്‌ദ് ബെലെ അമ്പദായിര ബെ്ള്ളി പണ#19:19ബെ്ള്ളി പണ ഒരു ബെ്ള്ളി പണ എങ്കാദ് ഒരു ആള്‌ക്ക് കെ്ഡേക്ക ഒരു ണാള്‌ദ് ബേലെ കൂലിത്തെ. ആയിര്‌ന്ത്‌ദ്. 20ഇച്ചെ ആണ്ടവാന്‌ദ് സൊല്ലുസുലാക്ക എത്തിന്യൊ ആള്‌ഗ കേ്ക്കാമ് സെയ്‌ദാര് എത്തിന്യൊ ആള്‌ഗ ണമ്പാമ് സെയ്‌ദാര്.
എപ്പെസോസിലി കലമ്പാല് ണഡാക്ക്‌ദ്
21ഇച്ചെ ണഡാന്ത് തീന്ത പ്‌റ പവുലോസ് എര്‌സലേമ്‌ക്ക് പോയ ബേ്ണ്ടി സാമിണിഗാല് സൊന്ന പാസെ#19:21സാമിണിഗാല് സൊന്ന പാസെസാമിണിഗാല് സൊന്ന പാസെ മുഡിവെ്ഡ്‌ത്താ് അല്ലാട്ടി പോന പവുലോസ് തന്ന് മനേസ്സിലിതാനെ മുഡിവെ്ഡ്‌ത്താ്. മക്കദോനിക്കേമ്, അക്കായി മേലെ പോഡൊ എന്ത് മുഡിവു എ്ഡ്‌ത്താ്. <<അദ്‌ക്കെ പോന പ്‌റ റോമ പട്ടണാക്ക് പോവെ>> എന്ത് പവുലോസ് ണെനേത്താ്. 22തനാക്ക് തൊണെ ണിന്റ തിമത്തോസ്‌ണാമ്, എര്‌തോസ്‌ണാമ് മക്കദോനിക്ക് അന്‌പ്പിന പ്‌റ പവുലോസ് ആസ്യ ണാഡിലി ലേസ കാല തങ്കിനാ്.
23അയ്യി ഗള്യേലി ആണ്ടവാ് പഡിസിന കാര്യഗണ സൊല്ലി എപ്പെസോസ് പട്ടണാത്തിലി റമ്പ കലമ്പാല് ണഡാന്ത്‌ദ്. 24അദിലി ബെ്ള്ളിലിതാനെ ഒരൊരു ജാദിഗ ഉണ്ടാക്ക്‌റ ദെമ്‌ത്ത്‌റോസ് എങ്ക ഒരുത്താ് ഇര്‌ന്താ്. ഇയാള് അറ്‌ത്തെമിസ് അമ്മെ സാമി കോയാല്‌ണ പാസെ ഇര്‌ക്ക ഉരുപ്പഗ ബെ്ള്ളിലി ഉണ്ടാക്കി ഇര്‌ന്താ്. അച്ചെ ഈ ബേലെ സെയ്‌ര തന്ന് ബേലെക്കാറാര് ണല്ല പണ സമ്പാരിത്ത് ഇര്‌ന്താര്. 25അയാള് തന്ന് ബേലെക്കാറാര്‌ണാമ് ഈ ബേലെ സെയ്‌ര ബേ്റെ ആള്‌ഗണാമ് ഒളേത്ത് ബര്‌സി സൊന്നാ്: <<അയ്യലാഗെ ഈ ബേലെ സെയ്‌രാദ്‌ണാലെത്തെ ണമാക്ക് പണ കെ്ഡേക്ക്‌ദ് എന്ത് ണിമാക്ക് തെര്യുമല്ല. 26ആന മന്‌സാര് ഉണ്ടാക്കിന സാമിഗണെല്ല സാമിഗ അല്ല എന്ത് പവുലോസ് എങ്ക ഒരുത്താ് സൊല്ലുറാ് അദ് ണിമാക്ക് കാണ്യാമ് കേ്ക്ക്യാമ് മുഡ്യു. എപ്പെസോസ് പട്ടണ താനേമല്ല, ആസ്യ ണാഡ്‌ക്ക്‌റാഗാമ് ഇര്‌ക്ക എത്തിന്യൊ ആള്‌ഗാക്ക് ഇദ്‌ണ സൊല്ലി ഇദ് സെരി എന്ത് ണമ്പിസിര്‌ക്കാ്. 27ഇച്ചെ സെയ്‌രാദ്‌ണാലെ ണമ്മ്‌ദ് ബേലേക്ക് പേര് ഇല്ലാദായെക്കു അദ് ണമാക്ക് അവങ്കേ്ഡായി ബരു. അദ്‌താനെമല്ല ബെല്ല്യവാളാന അറ്‌ത്തെമിസ് അമ്മെ സാമി കോയാല്‌ക്ക് ഒരു ബെലേമ് ഇല്ലാദായെക്കു. അച്ചെ ആസ്യ ണാഡിലി ഇര്‌ക്ക ആള്‌ഗ മുച്ചുഡാമല്ല ഉലഗാത്തിലിര്‌ക്ക മുച്ചുഡ ആള്‌ഗാമ് കുമ്മുഡി ബര അറ്‌ത്തെമിസ് അമ്മേദ് പേര്‌മ് പെര്‌മേമ് ഇല്ലാദായെക്കു.>>
28ഇദ്‌ണ കേ്ട്ടാദ്‌മ് ആള്‌ഗ മൊനേക്ക് തെ്ട്ടിസികൊണ്ട്, <<എപ്പെസോസ് ണാഡ്‌ക്കാറാര്‌ദ് അറ്‌ത്തെമിസ് അമ്മെ ബെല്ല്യവ!>> എന്ത് ആലാത്ത് സൊല്ലി ക്‌ളാമ്പിനാര്. 29അച്ചെ അയ്യി പട്ടണ മുച്ചുഡ കലമ്പാല് ആറ്റ്. ഇവാര് ഒട്ടുക്ക് ഒന്റായി എജേന്ത് പവുലോസ്‌ദ് ഒപ്പ ണഡാന്തിര്‌ന്ത ഗായോസ്, അരിത്ത്‌റെഗോസ് എങ്ക മക്കദോനിക്കാറാര്‌ണ പ്‌ഡിത്ത് ഉന്തി എ്ഡ്‌ത്ത്‌കൊണ്ട് ആള്‌ഗ കൂട്ട കൂഡ്‌റ എ്ഡേക്ക് എജ്ജിസിനാര്. 30അക്കുളെ പവുലോസ് ആള്‌കൂട്ടാക്കെ പോയ ണോഡിനാ്. ആന ഏസുക്കാറാര് അയാള്‌ണ പോയ ബ്‌ഡാലെ. 31ആസ്യ ണാഡ്‌ക്കാറാര്‌ദ് അദിഗാരിഗാളിലി ലേസ ആള്‌ഗ പവുലോസ്‌ദ് എ്ണേവുക്കാറാരായിര്‌ന്താര്. അവാര് അയാള്‌ണ പോഗ ബേ്ഡ എന്ത് സൊല്ല്യ അയാള്‌ക്കെ സേദി ബ്‌ട്ടാര്.
32ആള്‌ഗ മുച്ചുഡ റമ്പ ഗിജ്‌റ് ബെ്ട്ടികൊണ്ട് ഇര്‌ന്താര്. അദിലി എത്തിന്യൊ ആള്‌ഗ ബന്തിര്‌ന്താര്. ആന അവാര്‌ക്ക് തമ്മ എന്ത്‌ക്ക് ബന്തിര്‌ക്കാദ് എന്ത്‌താനെ തെര്യ. പഗ്‌ദി ആള്‌ഗ ഒരു കാര്യഗ സൊല്ലികൊണ്ട്‌മ് ബേ്റെ പഗ്‌ദി ആള്‌ഗ ബേ്റൊരു കാര്യഗ സൊല്ലികൊണ്ട്‌മ് ഗിജ്‌റ് ബെ്ട്ടിനാര്. 33അക്കുളെ അലക്ക്‌സന്താറ്‌ണ ലേസ എഗുദ തലെവല ഉന്തി കൊണ്ട് മുന്തുക്ക് എ്ഡ്‌ത്ത് ബന്ത് ണില്ലിസിനാര്. തനാക്ക് സൊല്ല്യ ഇര്‌ക്കാദ്‌ണ ആള്‌ഗാക്കെ സൊല്ല്യ അവാര് അലക്ക്‌സന്താറ്‌ണ സൊന്നാര്. അക്കുളെ അദിലി ഇര്‌ക്ക ആള്‌ഗണ പേസാദെ ഇര്‌ക്ക്യ അലക്ക്‌സന്താറ് കയ്യിലി താനെ ജാഡെ കാട്ടിനാ്. പ്‌റ അയാള് ഇദിലി ണഡാന്ത കാര്യഗണെല്ല ആള്‌ഗാക്കെ സൊല്ല്യ ണോഡിനാ്. 34ആന അയാള്‌മ് ഒരു എഗുദാ് എന്ത് ആള്‌ഗാക്ക് തെരിന്താദ്‌മ്, <<എപ്പെസോസ്‌ക്കാറാര്‌ദ് അറ്‌ത്തെമിസ് അമ്മെ ബെല്ല്യവ!>> എന്ത് അവാര് ഒരേപാസെ ആലാത്ത് ക്‌ളാമ്പിനാര്. ഈ ഗിജ്‌റ് റണ്ട് മണികൂറ്‌മാട്ട് ഇര്‌ന്ത്‌ദ്.
35കഡേസിലി എപ്പെസോസ് പട്ടണാത്തില്യ തലെവാ് ആള്‌ഗണ ഒട്ടുക്ക് മ്‌ണ്ടാദാക്കിന പ്‌റ സൊന്നാ്: <<എപ്പെസോസ്‌ക്കാറാരെ, ഈ പട്ടണാത്തിലിര്‌ക്ക ബെല്ല്യ അറ്‌ത്തെമിസ് അമ്മേദ് കോയാല്‌ണാമ്, മേലോഗാത്തിലിര്‌ന്ത് ബ്‌ന്ത സുത്താപ്പിര്‌ക്ക കല്ല്‌ണാമ്, സൊക്കാന ബെത്തിര്‌ക്കാദ് എപ്പെസോസ്‌ക്കാറാര് ആന ണമ്മാത്തെ എന്ത് ആര്‌ക്ക് തെര്യാത്താദ്? 36ഇദ്‌ഗണെല്ല തള്ളി എക്ക്യ മുഡ്യാത്ത കാര്യാത്തെ. അക്കുളെ മ്‌ണ്ടാദെ ഇരിരി, ണെപ്പ്‌ണേര് ഇല്ലാദെ ഒന്റുമ് സെയ്യ ബേ്ഡ. 37ഇവാര് റണ്ട് ആള്‌മ് കോയാലിലിര്‌ന്ത് എന്താറ്റ്‌ണ ത്‌റ്‌ഡിനവാരൊ, ണമ്മ്‌ദ് അറ്‌ത്തെമിസ് അമ്മെ സാമിന പറ്റി കെ്ട്ട ണായ സൊല്ലുറവാരൊ അല്ല. എന്ത്‌ട്ട്‌മ് ണിമ്മ ഇവാര്‌ണ ഇദ്‌ക്കെ പ്‌ഡിത്ത് ബന്തിര്‌ക്കേരല്ല, 38ആന ദെമ്‌ത്ത്‌റോസ്‌ക്ക്‌മ്, അയാള്‌ദ് ബേലെക്കാറാര്‌ക്ക്‌മ് ആരാറ്റ് പേരിലി സാഡി സൊല്ല്യ ഇര്‌ന്താക്കി അദ് കേ്ക്ക്യ ണമാക്ക് അദിഗാരിഗാമ് ഗോഡ്‌ദിലി ഇന്ന ണാള്‌മ് ഇര്‌ക്ക്‌ദ്. അയ്യി ണാള് അവാര് അദ്‌ക്കെ ബന്ത് അവാര്‌ക്കുള്ള സാഡിന സൊല്ലുഡൊ. 39അദല്ലാദെ ബേ്റെ എന്താറ്റ് കാര്യഗണ പറ്റി ണിമാക്ക് സൊല്ല്യ ഇര്‌ന്താക്കി പട്ടണക്കാറാര്‌ക്ക് ബേ്ണ്ടി പട്ടണാത്തില്യ അദിഗാരിഗ ഒളേത്ത് കൂട്ട്‌റ കൂട്ടാത്തിലി ബെത്ത് പേസി തീക്കുഡോ. 40ഇന്റ് ഇദിലി ഈ കാര്യഗണെല്ല ണഡാന്താദ്‌ണാലെ ഒരു കലമ്പാല് ണഡാത്തിനെരെന്ത് കുറ്റ ണമ്മ് തലേക്ക് ബരു. ഇപ്പ് ഗിജ്‌റ് ബെ്ട്ടിനാദ് എന്ത്‌ക്ക് എന്ത് കേ്ട്ടാക്കി ണമാക്ക് ഒന്റുമ് സൊല്ല്യ ഇല്ലെ.>> 41ഇച്ചെ സൊന്ന പ്‌റ അയാള് കൂട്ടണ പിരിത്ത് ബ്‌ട്ടാ്.
Currently Selected:
അപ്പൊസലല 19: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
