അപ്പൊസലല 3
3
മൊണ്ടികാലാനാന പിച്ചെക്കാറാന സവ്വ്യാക്ക്‌റാ്
1ഒരു ണാള് ഉച്ചി തിരിന്ത് മൂണ് മണി ഗള്യേലി പത്ത്‌റോസ്‌മ്, ഓഗന്നാന്‌മ് സാമികൂരേക്ക് പോനാര്. അക്കുളെ അദിലി പരേസ്‌റ ഗള്യെ ആയിര്‌ന്ത്‌ദ്. 2അയ്യി സാമികൂരേലി അലങ്കാര എന്ത് സൊല്ലുറ ബാസാത്തിലി പ്‌റാപ്പിലിതാനെ മൊണ്ടി ആന ഒരുത്താ് ഇര്‌ന്താ്. സാമികൂരേക്ക് പോരവാര്‌ണ പിച്ചെ കേ്ക്ക്യ ബേ്ണ്ടി പഗ്‌ദി ആള്‌ഗ അവാന എപ്പ്‌മ് സുമാന്ത് അദ്‌ക്ക് എ്ഡ്‌ത്ത് പോയി കുക്കാസിര്‌ന്താര്. 3പത്ത്‌റോസ്‌മ് ഓഗന്നാന്‌മ് സാമികൂരേക്ക് പോരാദ്‌ണ കണ്ട് അയാള് അവാര്‌ണ കയ്യി ഇരാന്താ്. 4പത്ത്‌റോസ്‌മ് ഓഗന്നാന്‌മ് അയാള്‌ണ സൊക്കാന ണോഡി, <<എമാണ ണോഡു>> എന്ത് പത്ത്‌റോസ് സൊന്നാ്. 5അവാ് അവാര് എന്താറ്റ് തരുവാര്‌ങ്കൊ എന്ത് ണെനേത്ത് അവാര്‌ണ സൊക്കാന ണോഡിനാ്.
6ആന പത്ത്‌റോസ് അവാന്‌ക്ക് സൊന്നാ്: <<ണിനാക്ക് തര്യ എന്നോഡെ പൊന്നൊ ബെ്ള്ള്യൊ ഒന്റുമ് ഇല്ലെ. ആനാല്‌മ് എനാക്ക് ഇര്‌ക്കാദ്‌ണ ണിനാക്ക് തരെ. ണസറത്ത് ഊര്‌ക്കാറാ് ഏസു ക്‌റ്‌സ്‌ത്ത്‌ദ് പേരിലി ണാന് ണിനാക്ക് സൊല്ലുറെ എ്ന്ത് ണഡ!>> 7പത്ത്‌റോസ് അയാള്‌ണ ഏ്ത്തി ണില്ലിസ്യ അയാള്‌ദ് ബല കയ്യിന പ്‌ഡിത്താ്. അപ്പ്‌താനെ അയാള്‌ദ് പാദക്കാല്‌ക്ക്‌മ് കണെക്കാക്ക്‌മ് ഒറേപ്പ് കെ്ഡേത്ത്‌ദ്. 8അയാള് ബുഗ്‍റ്‌ക്കന എ്ന്ത് ണിന്റാദ്‌മ് സുറ്റുമ് ണഡാക്ക്യ പ്‌ഡിത്താ്. അയാള് ജാഡികൊണ്ട്‌മ് സാമിന ഒഗെ ഇക്കികൊണ്ട്‌മ് അവാര്‌ദൊപ്പ സാമികൂരെക്കുളെള പുക്കിനാ്. 9അവാ് ണഡാക്കാദ്‌ണാമ് സാമിന ഒഗെ ഇക്ക്‌റാദ്‌ണാമ് ആള്‌ഗ കണ്ടാര്. 10ഇവാ് അലങ്കാര എങ്ക സാമികൂരെ ബാസാത്തിലി പിച്ചെ എ്ഡ്‌ത്തിര്‌ന്തവാ് എന്ത് അവാര്‌ക്ക് തെരിന്ത്‌ദ്. അയാള്‌ക്ക് ഇച്ചെല്ല ണഡാന്താദ്‌ണ കണ്ട് അവാര് അദിസ്യപട്ട് ബെഗേത്തെക്കിനാര്.
പത്ത്‌റോസ് സാമികൂരേലിര്‌ന്ത് സൊല്ലുറാ്
11സാമികൂരേലി സലോമോന്‌ദ് എങ്ക ഒരു മണ്ടഗ ഇര്‌ന്ത്‌ദ്. അദിലി ണോയി തെ്ളിന്തവാ് പത്ത്‌റോസോഡേമ് ഓഗന്നാനോഡേമ് ഒപ്പ എ്ണേന്ത് ഇര്‌ന്താ്. അയാള് ഇവാരോഡെ ഇര്‌ക്കാദ്‌ണ കണ്ട് ആള്‌ഗ അന്തബ്‌ട്ടെക്കി അദ്‌ക്കെ ഓഡി എജ്ജിനാര്. 12അയ്യി ആള്‌ഗണ കണ്ട് പത്ത്‌റോസ് അവാര്‌ക്കെ സൊന്നാ്: <<എന്ന് ഇസ്‌റേല്‌ക്കാറാരെ, ണിമ്മ എന്ത്‌ക്ക് ഇദ്‌ണ കണ്ട് അന്തബ്‌ട്ടിര്‌ക്കാദ്? ണിമ്മ എന്ത്‌ക്ക് എമാണ സൊക്കാന ണോഡിര്‌ക്കാദ്? എമാക്ക് ബെല്ല്യ സക്‌ദിര്‌ക്കണാലെഗൊ സാമി മുന്തുക്ക് എമ്മ ണല്ലവാര് ആനാദ്‌ണാലേഗൊ ഇയാള്‌ണ ണഡാക്ക്യ ബെത്തേര് എന്ത് ണിമ്മ ണെനേക്ക ബേ്ഡ. 13മുദ കാലാത്തില്യ അവുറഗാമ്‌ദ്‌മ് ഇസാക്ക്‌ദ്‌മ് ആക്കോവുദ്‌മ് സാമിത്തെ ണമ്മ് പാട്ടലാദ് സാമി. അയ്യി സാമി താന് സൊല്ലുറാദ്‌ണ അദേപാസെ സെയ്‌ര ഏസുണ ബെല്ല്യവാനാക്കി ഉജാത്തി ബെത്തിര്‌ക്കാ്. അയ്യി ഏസുണ ണിമ്മ എഗുദാര്‌ദ് അദിഗാരിഗാക്ക് പ്‌ഡിത്ത് കൊഡുത്തേര്. പീലത്തോസ് ഏസുണ ബെ്റ്‌ദെ ബ്‌ഡുഡൊ എന്ത് മുഡിവെ്ഡ്‌ത്ത് ഗൂഡി, ണിമ്മ അയാള്‌ണ എമാക്ക് ബേ്ഡ എന്ത് പീലത്തോസ്‌ക്ക് സൊന്നേര്. 14സാമിക്ക് ബേ്ണ്ടി തനാണാഗെ ഒപ്പഡിത്ത് ബെത്തിര്‌ക്കവാന്‌മ്, സാമി സൊന്ന സട്ടണ മുച്ചുഡാമ് അദേപാസെ സെയ്‌രവാന്‌മ് ആയിര്‌ന്തവാ്ത്തെ ഏസു. അയ്യി ഏസുണ ണിമ്മ എമാക്ക് ബേ്ഡ എന്ത് സൊല്ലി ഒരു കൊലെക്കാറാന ബ്‌ട്ട് തരുഡോമെ എന്ത് പീലത്തോസ്‌ണ കേ്ട്ടേര്. 15ഉജുറു തരവാന ണിമ്മ കൊന്റെക്കിനേര്. ആന അയാള്‌ണ സാമി സത്തവാര് പട്ടിലിര്‌ന്ത് ഉജുറു ഏ്ത്തിനാ്. ഏസു ഉജുറെ്ന്താദ്‌ണ കണ്ട എമ്മ അദ്‌ണാത്തെ സൊല്ലാമ് സെയ്‌രേര്. 16ഏസുദ് പേര്‌ക്കിര്‌ക്ക പവുറുത്തെ ഈ മൊണ്ടി കാലന ണഡാക്ക്യ ബെത്താദ്. ണിമ്മ ഈ കണ്ടാദ്‌മ് കേ്ട്ടാദ്‌മ് ണഡാന്താദ് ഏസുണ ണമ്പിനാദ്‌ണാലെത്തെ. ഏസുണ ണമ്പിനാദ്‌ണാലെത്തെ ഇവാ് സവ്വി ആനാദ്‌ണ ണിമാക്ക് കാണ്യ മുഡിന്ത്‌ദ്.
17അണ്ണലാഗെ തമ്പിലാഗെ, ണിമാക്ക്‌മ് ണിമ്മ് തലെവലാക്ക്‌മ് ഏസു ആരെന്ത് തെര്യ. അദ്‌ണാലെത്തെ ണിമ്മ ഏസുണ അച്ചെല്ല സെയ്‌ദാദ് എന്ത് എനാക്ക് തെര്യു. 18തന്ന് ക്‌റ്‌സ്‌ത്ത് കങ്കേഞ്ചിപഡുവാ് എന്ത് സാമി തന്ന് ദാസ്‌ഗാക്കെ സൊല്ലിര്‌ക്കാ്. അയ്യി സാമിദാസ്‌ഗ അദ്‌ണ മുന്തുക്കേത്ത കാലാത്തിലി സൊല്ലിര്‌ക്കാര്. അദ് ഇപ്പ് ഈ ദിന്‌സിലി സാമി ണഡാത്താമ് സെയ്‌ദാ്. 19അദ്‌ണാലെ ണിമ്മ സെയ്‌രാദ് തെറ്റ് എന്ത് തെരിന്ത് അദ്‌ണ തള്ള്യെക്കി ഇനി അദ്‌ണ സെയ്യാദെ ഇര്‌ക്കുഡൊ. പ്‌റ സാമി സാരി ബരുഡൊ. അപ്പ് സാമി ണിമ്മ്‌ദ് പാവഗണ പൊറുക്കുവാ്. ണിമ്മ അച്ചെ സെയ്‌ദ, 20സാമിക്ക് ബേ്ണ്ടി ണല്ല ജുഡിപോഡെ പെ്ളേത്ത് പോരക്കുള്ള കാല ആണ്ടവാ് ണിമാക്ക് തരുവാ്. അദ്‌ക്ക് ഒപ്പ ക്‌റ്‌സ്‌ത്ത് ആയി സാമി തെരിന്തെ്ഡ്‌ത്ത ഏസുണാമ് ണിമാക്ക് ബേ്ണ്ടി അന്‌പ്പി ബ്‌ഡുവാ്. 21എല്ലാദ്‌ണാമ് സൊക്കാന ആക്ക്‌റമാട്ട്‌ക്ക് ഏസു മോലോഗാത്തിലി താനെ ഇര്‌ക്കുഡൊ എന്ത് മുദ കാലാത്തിലി സാമി തന്ന്‌ദ് ദാസ്‌ഗാക്കെ സൊല്ലി ഇര്‌ന്താ്. അദ്‌ണ അവാര് ആള്‌ഗാക്ക് സൊല്ലിര്‌ന്താര്. 22മോസെ ഇച്ചെ സൊന്നാ്: <ആണ്ടവാനായിര്‌ക്ക ണിമ്മ് സാമി എനാണ സൊല്ലിബ്‌ട്ട പാസെ ഒരു സാമിദാസ്‌ണ ണിമാക്ക് സൊല്ലിബ്‌ഡുവാ്. അയാള് ണിമ്മ്‌ദ് സൊന്ത കൂട്ടാത്തിലി പട്ട ഒരുത്താ് ആയിര്‌ക്കുവാ്. അയാള് ണിമാക്കെ സെയ്യ സൊല്ലുറാദ് എന്താനാല്‌മ് ണിമ്മ സെയ്യുഡൊ. 23അയ്യി സാമിദാസ്‌ദ് പേസ് കേ്ക്കാദെ ഇര്‌ക്കവാര്‌ണെല്ല സാമിന കുമ്മുഡ്‌റവാര്‌ക്കെ എജേക്കാമ് മാട്ടാര്, അളിത്തെക്കാമ് സെയ്യുവാര്.>#മറ്‌ദെ സൊല്ലുറ സട്ട 18:15,18,19
24സാമൂവേല്‌മ് അദ്‌ക്ക് പ്‌റാഗെ ബന്ത സാമിദാസ്‌ഗാമ് ഈ കാലാത്തിലി ണഡാക്കാദ്‌ണ പറ്റി സൊല്ലിര്‌ക്കാര്. 25സാമി തന്ന്‌ദ് ദാസ്‌ഗ മേലെ ണിമാക്ക് ബാക്ക്‌വരഗ തന്താ്. സാമിമ് ണിമ്മ് പാട്ടലാമ് തമ്മ ആങ്കീങ്ക് ഒപ്പ്‌കെ്ട്ട് ബെത്തിര്‌ന്താര്. അദ്‌ക്കെല്ല ണിമ്മാത്തെ ഉരിമെക്കാറാര്. സാമി അവുറഗാമ്‌ക്ക് സൊന്നാ്: <ണിന്ന് കാല്‌കെ്ളെഗ മേലെ ഉലഗാത്തിലിര്‌ക്ക മുച്ചുഡ ആള്‌ഗാക്ക്‌മ് ണല്ലാദ് കെ്ഡേക്കു.>#ഉറുപത്തി 22:18; ഉറുപത്തി 26:4 26സാമി തന്ന് ബേലെക്കാറാന തെരിന്തെ്ഡ്‌ത്ത് മുദതാനെ ണിമ്മ് പട്ട്‌ക്ക് അന്‌പ്പിനാ്. അദ് ണിമ്മ ഒരൊരു ആള് സെയ്‌ര കെ്ട്ട കാര്യാത്തിലിര്‌ന്ത് ണിമാണ ബ്‌ഡ്‌സി ണിമാക്ക് ബര തന്ത് ണല്ലാദാക്ക്യാത്തെ.>>
Currently Selected:
അപ്പൊസലല 3: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
