ഓഗന്നാ് 12
12
മറിയ ഏസു കാല്‌ക്കെ ബാഡെ എ്ണ്ണെ പൂസ്‌റ
1സത്തവാര് പട്ടിലിര്‌ന്ത് ഏസു ഉജുറേ്ത്തിന ലാസാറ് പെ്ളേക്ക ബെദനി ഊര്‌ക്കെ പെസഗെ ണോമ്പിക്ക് ആറ് ണാള് മുദതാനെ ഏസു ബന്ത് എജ്ജിനാ്. 2അദിലി അവാര് ഏസുക്ക് സാപാഡ് ഒരിക്കിനാര്. മാറ്‌ത്തെത്തെ ബന്തവാര്‌ക്ക് അട്ട്‌സുട്ട് കൊഡുത്താദ്. ഏസുദ് ഒപ്പ പന്തിലി കുക്കാന്തവാര് കൂട്ടാത്തിലി ഒരുത്താ്ത്തെ ലാസാറ്. 3അക്കുളെ മറിയ അരെ പഡി ണല്ല ബെലെപെറ്റ ണാറ്‌ദി എങ്ക ബാഡെ എ്ണ്ണെന എ്ഡ്‌ത്ത് ബന്ത് ഏസുദ് കാല്‌ക്കെ ഊറ്റി തന്ന് തലെമൂര്‌ക്കെ അയാള് കാല്‌ണ തെനേത്ത. അയ്യി എ്ണ്ണേദ് ബാഡെ അയ്യി കൂരെ മുച്ചുഡ തുമ്പിറ്റ്.
4ആന ഏസുദ് സൊല്ലുപഡി ണഡാക്കവാരിദിലി ഒരുത്താന്‌മ് ഏസുണ കാട്ടി കൊഡുക്കവാന്‌മാന കര്യോത്ത്‌ക്കാറാ് ജൂദാ് എങ്കവാ്: 5<<ഈ ബാഡെ എ്ണ്ണെന മുന്നൂറ് ദിനാറ്‌ക്ക് ബിറ്റ് കെ്ഡേക്ക പണാണ ഏ്ളെഗാക്ക് കൊഡുക്കാത്താദ് എന്ത്‌ക്ക്?>> എന്ത് സൊന്നാ്. 6അവാ് ഇച്ചെ സൊന്നാദ് ഏ്ളെഗളോഡെ കറ്‌മ്മ പ്‌ഡിക്കാദ്‌ണാലെ അല്ല, അവാ് ത്‌റ്‌ട്ടാ് ആനാദ്‌ണാലെത്തെ. പണപയ്യി അവാന്‌ദ് കയ്യിലി ഇര്‌ന്താദ്‌ണാലെ അദിലിര്‌ന്ത പണണ എ്ഡേക്കെ്ഡേക്ക് എ്ഡ്‌ത്തിര്‌ന്താ്.
7ആന ഏസു: <<അവാണ അര്‌സാദി. എന്ന് സാവുണ പൊദേക്ക ണാള്‌ക്ക് ബേ്ണ്ടി അവ ഇദ്‌ണ പേ്ണ്‌സി ബെത്തിര്‌ന്ത എന്ത് ണെനേരി. 8ഏ്ളെഗ എപ്പ്‌മ് ണിമ്മ് പട്ടിലി ഇര്‌ക്കാരല്ല, ആന ണാന് എപ്പ്‌മ് ണിമ്മ് പട്ടിലി ഇര്‌ക്കമാട്ടെ>> എന്ത് സൊന്നാ്.
ലാസാറ്‌ണ കൊല്ല്യ സട്ടകെ്ട്ട്‌റാര്
9ഏസു അദിലിര്‌ക്കാ് എന്ത് തെരിന്ത് ബെല്ല്യൊരു കൂട്ട എഗുദാര് അദ്‌ക്കെ ബന്താര്. അവാര് ഏസുണ താനേമല്ല, ഏസു ഉജുറേ്ത്തിന ലാസാറ്‌ണ ഗൂഡി കാണുഡൊ എന്ത്‌ത്തെ ബന്താദ്. 10അദ്‌ണാലെ എഗുദ പൂസാരി തലെവല ലാസാറ്‌ണാമ് കൊല്ലുഡൊ എന്ത് സട്ടകെ്ട്ടിനാര്. 11എന്ത്‌ക്കെന്റ ലാസാറ് ഉജുറോഡെ ഇര്‌ക്കാദ്‌ണാലെ എത്തിന്യൊ എഗുദാര്‌ഗ ഇവാര്‌ണ തള്ളി ഏസുണ ണമ്പിനാര്.
ഏസു എര്‌സലേമ്‌ക്കെ മേ്ള്‌സത്തോഡെ ബരാ്
12ണോമ്പിക്ക് ബന്ത ബെല്ല്യ ഒരു കൂട്ട ആള്‌ഗ ഏസു എര്‌സലേമ്‌ക്കെ ബര സേദി മറ് ണാള് കേ്ട്ടാര്, 13അവാര് പേരീസ് ഓലെന എ്ഡ്‌ത്ത് ബന്ത് ഏസുണ ബരവളിക്ക്യ പോയി:
<<ഓസാന!
<ആണ്ടവാന്‌ദ് പേരിലി ബരവാ് ബാഗ്യക്കാറാ്!>#സാമി പാട്ട് ബുക്ക് 118:25,26
ഇസ്‌റേല്‌ദ് റാജാവു ബാഗ്യക്കാറാ്>>
എന്ത് ആലാത്താലാത്ത് സൊല്ലികൊണ്ടിര്‌ന്താര്. 14ഏസു ഒരു കള്‌ദെ കുട്ടിന കണ്ട് അദ്‌ക്കുദ്ദാക്ക് ഏ്റി കുക്കാന്താ്.
15<<സീയോന് പട്ടണക്കാറാരെ, അഞ്ചാദി,
ഇദാ ണോഡി, ണിന്ന് റാജാവു കള്‌ദെ കുട്ടി കുദ്ദാക്ക് ഏ്റി ബരാ്>>#സെക്കര്യാവു 9:9
എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക പാസെത്തെ.
16ഏസുദ് സൊല്ലുപഡി ണഡാക്കവാര്‌ക്ക് ഈ ണഡാന്ത കാര്യഗ എന്തായെന്റ് മുദ തെര്യാലെ. ആന ഏസുക്ക് മദ്‌പ്പ് കെ്ഡേത്ത പ്‌റ അവാന പറ്റി ഇച്ചെ എ്ള്‌ദിര്‌ക്കാദ്‌ണാമ് തമ്മ അവാന്‌ക്ക് ഇച്ചെ സെയ്‌ദാദ്‌ണാമ് അവാര്‌ക്ക് ണെനേവു ബന്ത്‌ദ്.
17ഏസു ലാസാറ്‌ണ കല്ലളേലിര്‌ന്ത് ഒളേത്ത് സത്തവാര് പട്ടിലിര്‌ന്ത് ഉജുറേ്ത്ത്‌ഗാട്ടി അവാന്‌ദ് ഒപ്പ ഇര്‌ന്തവാര് ഇദ്‌ണ പറ്റി ബേ്റെ ആള്‌ഗാക്ക് സൊല്ലികൊണ്ടിര്‌ന്താര്‌ഗ. 18ഏസു ഈ അദിസ്യമാന അഡ്യാള സെയ്‌ദാ് എന്ത് കേ്ട്ടാദ്‌ണാലെ എത്തിന്യൊ ആള്‌ഗ ഏസുണ ബരവളിക്ക്യ പോനാര്. 19ഇദ്‌ണ കണ്ട് പരിസല തമ്മ തമ്മ: <<ണോഡി, ണമ്മ സെയ്യ ഓരാഡ്‌റ കാര്യഗ ഒന്റുമ് ണഡാക്കാദില്ലെ, ആള്‌ഗ മുച്ചുഡ അവാന്‌ദ് പിന്ന്‌മേലെ പോരാര്>> എന്ത് സൊന്നാര്.
ഏസു താന് സായ പോരാദ്‌ണ പറ്റി സൊല്ലുറാ്
20ണോമ്പിക്ക് സാമിന കുമ്മുഡ്യ ബന്ത ആള്‌ഗാദിലി ലേസ ഗ്‌റീക്ക്‌ക്കാറാര്‌മ് ഇര്‌ന്തിര്‌ന്താര്. 21ഇവാര് ഗെലീലെ ണാഡില്യ ബേദ്‌സെയ്‌ദെക്കാറാ് പീലിപ്പോസ് പട്ട്‌ക്കെ പോയി: <<പണ്ണാഡ്യെ, എമ്മ ഏസുണ കാണുഡൊ എന്ത് ആസെപഡ്‌റേര്>> എന്ത് ബേ്ണ്ടിനാര്. 22അക്കുളെ പീലിപ്പോസ് പോയി അന്ത്‌റോസ്‌ക്കെ സൊന്നാ്. പ്‌റ ഇവാര് റണ്ട് ആള്‌മ് പോയി ഈ കാര്യണ ഏസുക്കെ സൊന്നാര്.
23അക്കുളെ ഏസു അവാര്‌ക്കെ ഇച്ചെ സൊന്നാ്: <<മന്‌സാനായി പ്‌റാന്തവാന്‌ക്ക് മദ്‌പ്പ് കെ്ഡേക്ക ണേര ബന്തിര്‌ക്ക്‌ദ്. 24ണേര്‌മായിമ് ണാന് ണിമാക്കെ സൊല്ലുറെ, ഗോദിമ്പെ ബെദെ മണ്ണ്‌ക്കെ അലേക്കാദേമ് സാഗാദേമ് പോന#12:24 സാഗാദേമ് പോന ഇദ് ബെദെ സത്ത് തള്ള്‌റാദ്‌ണ പറ്റി അല്ല സൊല്ലുറാദ്, അയ്യി ബെദെ ഇല്ലാദെ ആയി തള്ള്‌റാദ്‌ണ പറ്റിത്തെ സൊല്ലിര്‌ക്കാദ്. ഇദ് അര്‌ത്ത ആക്ക്‌റാദ് സൊന്ത ആസെഗണ ഇല്ലാദെ ആക്ക്‌റാദ്‌ണ പറ്റിത്തെ. അദ് അച്ചെതാനെ ഇര്‌ക്കു. ആന അദ് സത്താലൊ മൊത്തന ബെദെ കെ്ഡേക്കു. 25തന്ന് ഉജുറുണ സീവാ് ബ്‌ഡ്‌റവാ് അദ്‌ണ കെ്ഡേസമാട്ടാ്. ആന ഈ ഉലഗാത്തിലി തന്ന് ഉജുറുണ സീവാ് ബ്‌ഡാത്തവാ് എപ്പേക്ക്‌മ് ഇര്‌ക്ക പെ്ളേപ്പ്‌ക്ക് ബേ്ണ്ടി തന്ന് ഉജുറുണ സൂസാരിത്ത് ബെക്കാ്. 26എനാക്ക് ബേ്ണ്ടി ബേലെ സെയ്യ ആസെ ഇര്‌ക്കവാ് എന്ന് പിന്ന്‌മേലെ ണഡാക്കുഡൊ. അച്ചെ എനാക്ക് ബേ്ണ്ടി ബേലെ സെയ്‌രവാ് ണാന് ഇര്‌ക്ക പട്ടിലി ഇര്‌ക്കുവാ്. എനാക്ക് ബേ്ണ്ടി ബേലെ സെയ്‌രവാന അപ്പനാന സാമി മദിക്കുവാ്.
27ഇപ്പ് എന്ന് മനേസ്സ് ബെന്ത്‌ഡിദ് ണാന് എന്തണ സൊല്ല്യ? <അപ്പ, ഈ ഗള്യേലിര്‌ന്ത് എനാണ കാപാറ്റുഡോമെ> എന്ത് ണാന് കേ്ക്കുവേന? ഇല്ലെ, ഇദ്‌ക്ക് ബേ്ണ്ടിത്തെ ണാന് ഈ ഗള്യേക്ക് എജ്ജിര്‌ക്കാദ്. 28അപ്പ, ണിന്ന് പേര്‌ക്കുള്ള മദ്‌പ്പ്‌ണ കാട്ടുഡോമെ.>>
അക്കുളെ മേലോഗാത്തിലിര്‌ന്ത്: <<ണാന് എന്ന് പേര്‌ക്കുള്ള മദ്‌പ്പ്‌ണ കാട്ടിര്‌ക്കെ, ഇന്നിമ് അയ്യി മദ്‌പ്പ്‌ണ കാട്ടുവെ>> എന്ത് ഒരു ജദ്ദ ബന്ത്‌ദ്. 29ഈ ജദ്ദണ കേ്ട്ട് ഏസു അര്‌ഗെ ണിന്റിര്‌ന്ത ആള്‌ഗ: <<അവ്വൊ ഇ്ഡി ഗുഡിഗിറ്റ്>> എന്ത് സൊന്നാര്. ബേ്റെ ലേസ ആള്‌ഗ: <<ഇല്ലെ ഒരു സാമിദൂദാ് അവാനോഡെ ണായ പേസിനാ്>> എന്ത് സൊന്നാര്.
30അദ്‌ക്ക് ഏസു: <<ഈ ജദ്ദ ബന്താദ് എനാക്ക് ബേ്ണ്ട്യല്ല ണിമാക്ക് ബേ്ണ്ടിത്തെ. 31ഈ ഉലഗാത്തില്യ ആള്‌ഗണ സാമി ബിദിക്ക ഗള്യെ ഇപ്പ്‌ത്തെ. ഈ ഉലഗണ ആള്‌റവാന സാമി ഇപ്പ് മുഡിക്കി ബ്‌ഡുവാ്. 32എനാണ ബൂമിലിര്‌ന്ത് ഉജാത്ത്‌ഗാട്ടി എല്ല ആള്‌ഗണാമ് എന്ന് സാരി ബര്‌സുവെ>> എന്ത് സൊന്നാ്. 33താന് ഏദ് ദിന്‌സിലി സാവാ് എന്ത് കാട്ടി കൊഡുക്ക്യ ബേ്ണ്ടിത്തെ ഏസു അവാര്‌ക്കെ ഇച്ചെ സൊന്നാദ്.
34അക്കുളെ ആള്‌ഗ: <<ക്‌റ്‌സ്‌ത്ത് എപ്പ്‌മ് ഉജുറോഡെ ഇര്‌ക്കുവാ് എന്ത് മോസെ ബെത്ത സാമി സട്ടാത്തിലി പഡിത്ത് കാട്ടിര്‌ക്കാദ്‌ണ എമ്മ കേ്ട്ടിര്‌ക്കേര്. പിന്നെ എച്ചെ <മന്‌സാനായി പ്‌റാന്തവാന ഉജാത്തുഡൊ> എന്ത് ണിനാക്ക് സൊല്ല്യ മുഡ്യു? മന്‌സാനായി പ്‌റാന്തവാ് ആര്?>> എന്ത് കേ്ട്ടാര്.
35അക്കുളെ ഏസു: <<ഇനി ലേസ ണേരാത്തെ ബെ്ള്‌സ ണിമ്മ് പട്ടിലി ഇര്‌ക്കു. അദ്‌ണാലെ ഇ്റ്‌ട്ട്‌ക്ക് ണിമ്മ ആളാഗാദെ ഇര്‌ക്ക്യ ബേ്ണ്ടി ബെ്ള്‌സ ഇര്‌ക്കമാട്ട് ണിമ്മ ബെ്ള്‌സാത്തിലി താനെ ണഡായിരി, എന്ത്‌ക്കെന്റ ഇ്റ്‌ട്ടിലി ണഡാക്കവാന്‌ക്ക് താന് ഏങ്ക് പോരെ എന്ത് തെരിരാദില്ലെ. 36അദ്‌ണാലെ ണിമ്മ ബെ്ള്‌സാദ് പ്‌ള്ളെഗ ആയ ബേ്ണ്ടി ബെ്ള്‌സ ഇര്‌ക്കമാട്ട്‌മ് ബെ്ള്‌സണ ണമ്പിരി>> എന്ത് സൊന്നാ്.
ണമ്പാത്ത ആള്‌ഗ
ഇച്ചെ സൊല്ലി തീന്ത പ്‌റ ഏസു അവാര്‌ണ ബ്‌ട്ട് പോയി മറേന്താ്. 37അവാര്‌ദ് മുന്തുക്ക് അത്തിനി അദിസ്യമാന അഡ്യാളഗ സെയ്‌ദ് ഗൂഡി അവാര് ഏസുലി ണമ്പിക്കെ ബെക്കാലെ.
38<<ആണ്ടവാനെ, എമ്മ സൊന്ന സേദിന ആര് ണമ്പിനാര്?
ആണ്ടവാന്‌ദ് സക്‌ദി ആര്‌ക്ക് ബെ്ളിപട്ട്‌ദ്?>>#എസയ്യാ് 53:1
എന്ത് എസയ്യാ് സാമിദാസ് സൊന്നാദ് അദേപാസെ ണഡാക്ക്യ ബേ്ണ്ടി ഇച്ചെല്ല ണഡാന്ത്‌ദ്.
39ഇച്ചെ അവാര് ണമ്പാദെ ഇര്‌ക്കാദ് എന്ത്‌ക്ക് എങ്കാദ്‌ണ പറ്റി ബേ്റൊരു പട്ടിലിമ് എസയ്യാ് സാമിദാസ് ഇച്ചെ സൊല്ലിര്‌ക്കാ്:
40<<അവാര് കണ്ണാറ കാണാദെ ഇര്‌ക്ക്യ ബേ്ണ്ടി
ണാന് അവാര് കണ്ണ്‌ണ കുറുഡ് ബീ്ത്തിര്‌ക്കെ,
മനേസ്സ്‌ക്ക് ഒന്റുമ് ണെപ്പ്‌കെ്ഡേസാദെ ഇര്‌ക്ക്യ ബേ്ണ്ടി
ണാന് അവാര് ണെഞ്ച്‌ണ കല്ല് ണെഞ്ച് ആക്കിര്‌ക്കെ,
അദ്‌ണാലെ അവാര് പാവ സെയ്‌രാദ്‌ണ തള്ളി എന്ന് സാരി തില്‌മ്പാമ് മാട്ടാര്,
ണാന് അവാര്‌ണ തെ്ള്‌സാമ് മാട്ടെ.>>#എസയ്യാ് 6:10
41എസയ്യാ് സാമിദാസ് ഏസുക്ക് ഇര്‌ക്ക മദ്‌പ്പ്‌ണ കണ്ട് അവാന പറ്റി ണായ പേസിനാദ്‌ണാലെത്തെ ഇച്ചെ സൊന്നാദ്.
42എന്ത്‌ട്ട് ഗൂഡി എഗുദാര് തലെവലാദിലി എത്തിന്യൊ ആള്‌ഗ ഏസുലി ണമ്പിക്കെ ബെത്താര്. ആന പരിസല തമാണ എഗുദാര് പരേസ്‌റ കൂരേക്കെ സേത്താദെ മുഡിക്കി ബ്‌ഡുവാര് എന്ത് ണെനേത്ത് ഏസുലി ണമ്പിക്കെ ബെക്കേര് എന്ത് അവാര് എദ്‌ക്ക സൊല്ലാലെ. 43സാമ്യോഡെ ഇര്‌ന്ത് കെ്ഡേക്ക പേര്‌പെരമേന ബ്‌ഡ മന്‌സാരോഡെ ഇര്‌ന്ത് കെ്ഡേക്ക പേര്‌പെര്‌മെത്തെ അവാര്‌ക്ക് ബെല്ല്യാദ് എന്ത് ണെനേത്താര്.
ണായ ബിദിക്ക ഏസുദ് ബാക്ക്‌ഗ
44ഏസു ബെല്ല്യാദ്‌ക്ക് സൊന്നാ്: <<എന്നോഡെ ണമ്പിക്കെ ബെത്തിര്‌ക്കവാ് എനാണ താനെ അല്ല എനാണ സൊല്ലിബ്‌ട്ടവാനോഡേമ് ണമ്പിക്കെ ബെത്തിര്‌ക്കാ്. 45എനാണ കാണ്‌റവാ് എനാണ സൊല്ലിബ്‌ട്ടവാന കാണ്‌റാ്. 46എന്നോഡെ ണമ്പിക്കെ ബെത്തിര്‌ക്ക ഏവാനാമ് ഇ്റ്‌ട്ടിലി ഇര്‌ക്കാദെ ഇര്‌ക്ക്യ ബേ്ണ്ടി ണാന് ബെ്ള്‌സായി ഉലഗാക്കെ ബന്തിര്‌ക്കെ.
47എന്ന് ണായണ കേ്ട്ട് അദേപഡി ണഡാക്കാത്തവാന ണാന് ബിദിക്കമാട്ടെ. എന്ത്‌ക്കെന്റ ണാന് ബന്താദ് ഉലഗാത്തില്യ ആള്‌ഗണ ദെങ്ക്‌സ്യ ബേ്ണ്ടിത്തെ. അല്ലാദെ ബിദിക്ക്യാല്ല. 48എന്ന് ണായണ കേ്ക്ക്യ മനേസ്സില്ലാദെ എനാണ തള്ളി എക്കിനവാന ബിദിക്കവാ് ഇര്‌ക്കാ്. ണാന് സൊല്ലുറ ണായഗ താനെത്തെ അവാന കഡേസി ണാള് ബിദിക്കു. 49എന്ത്‌ക്കെന്റ, ണാന് സൊന്ന ണായഗ എന്ന് അദിഗാരത്തിലി സൊന്നാദല്ല, ണാന് എന്ത സൊല്ലുഡൊ എന്ത്‌മ് എച്ചെ സൊല്ലുഡൊ എന്ത്‌മ് എനാണ സൊല്ലിബ്‌ട്ട അപ്പനാന സാമി കല്‌പനെ തന്തിര്‌ക്കാ്. 50സാമി തന്തിര്‌ക്ക കല്‌പനെഗ എപ്പേക്ക്‌മ് ഇര്‌ക്ക പെ്ളേപ്പ്‌ണ തര്‌ദ് എന്ത് എനാക്ക് തെരിദ്. അദ്‌ണാലെ ണാന് എന്തണ സൊല്ലുഡൊ എന്ത് അപ്പനാന സാമി സൊല്ലിര്‌ക്കാനൊ അദ്‌ണ താനെത്തെ ണാന് സൊല്ലുറാദ്.>>
Currently Selected:
ഓഗന്നാ് 12: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
