ഓഗന്നാ് 2
2
കാനാവില്യ കല്ല്യാണ
1ഇദ് കളിന്ത് മൂണാവദ് ണാള് ഗെലീലെ ണാഡില്യ കാനാവു എങ്ക പട്ടണാത്തിലി ഒരു കല്ല്യാണ ണഡാന്ത്‌ദ്. അദിലി ഏസുദ് അവ്വാസിമ് ഇര്‌ന്ത. 2അയ്യി കല്ല്യാണാക്ക് ഏസുണാമ് ഏസുദ് സൊല്ലുപഡി ണഡാക്കവാര്‌ണാമ് ഒളേത്തിര്‌ന്താര്. 3ബരവാര്‌ക്ക് കൊഡുക്ക്യ ഊറിന മുന്തിരി സാര തീര്‌ഗാട്ടി ഏസുദ് അവ്വാസി ഏസുക്കെ: <<അവാര്‌ദ് ഊറിന മുന്തിരി സാര തീന്തെക്കിറ്റ്>> എന്ത് സൊന്ന.
4ഏസു അവാള്‌ക്കെ: <<ഇദാ പൊമ്പുളെഗെ, ണാന് എന്ത സെയ്‌ഡൊ എന്ത് ണീ എനാക്ക് സൊല്ല ബേ്ഡ? അദ് സെയ്‌രാദ്‌ക്കുള്ള ണേര എനാക്ക് ബരാലെ>> എന്ത് സൊന്നാ്.
5അദ്‌ക്ക് പ്‌റ ഏസുദ് അവ്വാസി ബേലെക്കാറാര്‌ക്കെ: <<അവാ് ണിമാക്കെ എന്താറ്റ് സെയ്യ സൊല്ലുറദാനാക്കി സെയ്‌രി>> എന്ത് സൊന്ന.
6എഗുദാര്‌ദ് സട്ട്‌മെ്ട്ട്‌പഡി സുത്താപ്പായ ബേ്ണ്ടി തണ്ണി പ്‌ഡിത്ത് ബെക്ക്യ കല്ലിലി ഉണ്ടാക്കിന ആറ് അണ്ടാവുഗ അദിലിര്‌ന്ത്‌ദ്. ഈ അണ്ടാവുഗാക്ക് എമ്പാദ് പഡിലിര്‌ന്ത് ണൂറ്റി ഇരുവദ് പഡിമാട്ട്‌ക്ക് തണ്ണി പ്‌ഡിക്കു.
7ഏസു അയ്യി ബേലെക്കാറാര്‌ക്കെ: <<ഈ കല്ല് അണ്ടാവുക്ക് തണ്ണി തുമ്പിസിരി>> എന്ത് സൊന്നാ്. അവാര് അദ്‌ഗാദ് ബക്ക് മാട്ട് തണ്ണിന തുമ്പിസിനാര്.
8അക്കുളെ ഏസു അയ്യി ബേലെക്കാറാര്‌ക്കെ: <<ഇനി മുക്കി എ്ഡ്‌ത്ത് പോയി കല്ല്യാണ കാര്യ ണോഡി ണഡാത്ത്‌റവാന്‌ക്ക് കൊഡിരി>> എന്ത് സൊന്നാ്.
അവാര് അദ്‌ണ എ്ഡ്‌ത്ത് പോയി അവാന്‌ക്ക് കൊഡുത്താര്. 9ഊറിന മുന്തിരി സാര ആയി തീന്ത ഈ തണ്ണിന കല്ല്യാണ കാര്യ ണോഡി ണഡാത്ത്‌റവാ് കുഡിത്ത് ണോഡിനാ്. ഇദ് ഏദിലിര്‌ന്ത് കെ്ഡേത്ത്‌ദ് എന്തുള്ള കാര്യ തണ്ണി മറിഗിനവാര്‌ക്ക് അല്ലാദെ കല്ല്യാണ കാര്യ ണോഡി ണഡാത്ത്‌റവാന്‌ക്ക് തെര്യാലെ. അക്കുളെ കല്ല്യാണ കാര്യ ണോഡി ണഡാത്ത്‌റവാ് മാപ്പ്‌ളേന ഒളേത്ത്: 10<<എല്ല ആള്‌ഗാമ് മുദ ഊറിന ണല്ല മുന്തിരി സാരണാത്തെ കൊഡുക്കാദ്. അദ്‌ണ കുഡിത്ത് മപ്പാന പ്‌റാത്തെ അത്തറ ണല്ലാദല്ലാത്ത ഊറിന മുന്തിരി സാരണ കൊഡുക്കാദ്. ആന ണീ ഊറിന ണല്ല മുന്തിരി സാരണ ഇന്നാരമാട്ട്‌ക്ക്‌മ് ഈ്ട്ടി ബെത്തിര്‌ന്തേനല്ല?>> എന്ത് സൊന്നാ്.
11ഇദ്‌ത്തെ ഏസു മുദ സെയ്‌ദ അദിസ്യമാന അഡ്യാള. ഇദ്‌ണ ഗെലീലെ ണാഡില്യ കാനാവു പട്ടണാത്തിലി ബെത്ത് സെയ്‌ദ് തന്ന് മദ്‌പ്പ്‌ണ ഏസു കാട്ടി കൊഡുത്താ്. ഇദ്‌ണ കണ്ട് ഏസുദ് സൊല്ലുപഡി ണഡാക്കവാര് അവാന ണമ്പിനാര്. 12അദ്‌ക്ക് പ്‌റ ഏസുമ് തന്ന് അവ്വേമ് തമ്പിലാമ് തന്ന് സൊല്ലുപഡി ണഡാക്കവാര്‌മ് കവറ്‌ണഗൂമ് പട്ടണാക്കെ പോനാര്. ആന അദിലി അദിഗ ണാള് ഇര്‌ക്കാലെ.
ഏസു സാമികൂരേന സുത്താപ്പാക്ക്‌റ
13എഗുദാര്‌ദ് പെസഗെ ണോമ്പി അഡ്‌ത്തിര്‌ന്താദ്‌ണാലെ ഏസു എര്‌സലേമ്‌ക്കെ പോനാ്. 14അച്ചെ പോയി ണോഡുഗാട്ടി സാമികൂരേലി ആള്‌ഗ ഓരിമാഡ്‌ഗണാമ് കൊറ്യാഡ്‌ഗണാമ് സോറെ പക്കിഗണെല്ല ബിക്കാദ്‌ണാമ് പണ കയ്യിമാറ്‌റവാര് കുക്കാന്തിര്‌ക്കാദ്‌ണാമ് ഏസു കണ്ടാ്. 15അക്കുളെ ഏസു കണ്ണിലി ഒരു സാട്ടെബാറ് ഉണ്ടാക്കി കൊറ്യാഡ്‌ഗാദ്‌മ് ഓരിമാഡ്‌ഗാദ്‌മ് ഒപ്പ എല്ലാര്‌ണാമ് സാമികൂരേലിര്‌ന്ത് ബെ്ള്യെ മുഡിക്കി ബ്‌ട്ടാ്. പണ കയ്യിമാറ്‌റവാര്‌ദ് പണഗണ ഇലാസി എക്കി അവാര്‌ദ് മേസെഗണെല്ല ഉന്തി മറ്‌ത്തെക്കിനാ്. 16സോറെ പക്കിഗണ ഏവാര സെയ്‌രവാര്‌ക്കെ: <<ഇദ്‌ഗണെല്ല ഇദിലിര്‌ന്ത് എ്ഡ്‌ത്ത് പോയി. എന്ന് അപ്പാന്‌ദ് കൂരേന ഏവാര സെയ്‌ര സന്തെ ആക്കാദി>> എന്ത് സൊന്നാ്.
17അക്കുളെ ഏസുദ് സൊല്ലുപഡി ണഡാക്കവാര്‌ക്കെ: <<ണിന്ന് കൂരേന പറ്റി എനാക്ക് ഇര്‌ക്ക എ്ണ്ണ എന്ന് മനേസ്സിലി ബെന്തുരുഗ്‌ദ്>>#സാമി പാട്ട് ബുക്ക് 69:9 എന്ത് സാമി ബുക്കിലി എ്ള്‌ദിര്‌ക്കാദ് ണെനേവു ബന്ത്‌ദ്.
18അക്കുളെ എഗുദാര് ഏസുണ: <<ണിനാക്ക് ഇച്ചെല്ല സെയ്യുള്ള അദിഗാര ഇര്‌ക്ക്‌ദ് എന്ത് കാട്ട്യ ബേ്ണ്ടി ണീ എന്ത അദിസ്യമാന അഡ്യാള സെയ്‌ദ് കാട്ടുവെ?>> എന്ത് കേ്ട്ടാര്.
19ഏസു അവാര്‌ക്കെ: <<ഈ സാമികൂരേന പിദാരിന്തെക്കിരി. അദ്‌ണ ണാന് മൂണ് ണാള്‌ക്കുള്ളുക്ക് കെ്ട്ടി മുഡിക്കുവെ>> എന്ത് ബദ്‌ള് സൊന്നാ്.
20അക്കുളെ എഗുദാര്: <<ഈ സാമികൂരേന കെ്ട്ടി മുഡിക്ക്യ ണാപ്പത്താറ് ബര്‌സ പ്‌ഡിത്ത്‌ദ്. ണീ മൂണ് ണാള്‌ക്കുള്ളുക്ക് കെ്ട്ടി മുഡിക്കുവേന?>> എന്ത് കേ്ട്ടാര്. 21ആന തന്ന് സരിഗല ആന സാമികൂരേന പറ്റിത്തെ ഏസു സൊന്നാദ്. 22ഏസു ഇച്ചെ സൊന്നാദ്‌ണ അവാ് സത്തവാര് പട്ടിലിര്‌ന്ത് ഉജുറെ്ന്ത പ്‌റാത്തെ തന്ന് സൊല്ലുപഡി ണഡാക്കവാര്‌ക്ക് ണെനേവു ബന്ത്‌ദ്. അച്ചെ ഇദ്‌ണ പറ്റി സാമി ബുക്കിലി എ്ള്‌ദിര്‌ക്കാദ്‌ണാമ് ഏസു സൊന്ന കാര്യണാമ് അവാര് ണമ്പിനാര്.
മന്‌സാന്‌ദ് പളാക്കണ പറ്റി ഏസുക്ക് ഇര്‌ക്ക അറുവു
23പെസഗെ ണോമ്പി ഗള്യേലി ഏസു എര്‌സലേമിലി ഇര്‌ക്കാട്ടി സെയ്‌ദ അദിസ്യമാന അഡ്യാളഗണ കണ്ട് എ്ളേസ് ആള്‌ഗല്ല ഏസുണ ണമ്പിനാദ്. 24ആന എല്ല മന്‌സാര്‌ദ് പളാക്കഗണാമ് ഏസുക്ക് തെരിരാദ്‌ണാലെ അവാര്‌ണ ണമ്പി ഏസു തനാണ പറ്റി അവാര്‌ക്ക് ബെ്ളിപഡ്‌സാലെ. 25മന്‌സാന്‌ദ് മനേസ്സിലിര്‌ക്കാദ് എന്തായെന്റ് തെരിന്തിര്‌ക്കാദ്‌ണാലെ ആള്‌ഗണ പറ്റി ആര്‌മ് ഏസുക്ക് സൊല്ലികൊഡുക്കുഡൊ എന്ത് തേവില്ലെ.
Currently Selected:
ഓഗന്നാ് 2: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
