ഓഗന്നാ് 9
9
ഏസു ഒരു കുറുഡാന്‌ക്ക് പാര്‌വെ കൊഡുക്കാ്
1അച്ചെ ഏസു പോഗാട്ടി പ്‌റാക്കാട്ട്യെ കുറുഡാനായി പ്‌റാന്ത ഒരുത്താന കണ്ടാ്. 2ഏസുദ് സൊല്ലുപഡി ണഡാക്കവാര് ഏസുണ: <<ഗുരുവെ, ആര് സെയ്‌ദ പാവണാലെ ഇവാ് കുറുഡനായി പ്‌റാന്താദ്? ഇവാ് സെയ്‌ദ പാവണാലെഗൊ ഇല്ലെ ഇവാന്‌ദ് അവ്വപ്പല സെയ്‌ദ പാവണാലെഗൊ>> എന്ത് കേ്ട്ടാര്.
3അദ്‌ക്ക് ഏസു: <<ഇവാനൊ ഇവാന്‌ദ് അവ്വപ്പലാഗൊ സെയ്‌ദ പാവണാലെ അല്ല ഇവാ് കുറുഡനായി പ്‌റാന്താദ്. അവാന്‌ക്ക് പാര്‌വെ കൊഡുക്കാട്ടി സാമിദ് സക്‌ദിന ആള്‌ഗ കാണ്യ ബേ്ണ്ടിത്തെ. 4ആര്‌ക്ക്‌മ് ബേലെ സെയ്യ മുഡ്യാത്ത പഡ്യുള്ള ജാമ ബര്യ പോദ്. അദ്‌ണാലെ പഗാല് ഇര്‌ക്കമാട്ട് എനാണ സൊല്ലിബ്‌ട്ടിര്‌ക്കവാ് സെയ്യ തന്തിര്‌ക്ക ബേലെന ണമ്മ സെയ്‌ഡൊ. 5ണാന് ഉലഗാത്തിലിര്‌ക്കാട്ടി, ണാന്‌ത്തെ ഉലഗാക്ക് ബെ്ള്‌സ>> എന്ത് സൊന്നാ്.
6ഇച്ചെ സൊല്ലിര്‌ന്ത് ഏസു മണ്ണ്‌ക്കെ തുപ്പി അയ്യി തുപ്പാത്തി താനെ സേ്റ് ഉണ്ടാക്കി അയ്യി കുറുഡാന്‌ദ് കണ്ണ്‌ഗാക്ക് പൂസിനാ്. 7ഇച്ചെ സെയ്‌ദ പ്‌റ <<ണീ സീലോഗ് കുളാക്കെ പോയി കച്ച്യെക്ക്>> എന്ത് ഏസു സൊന്നാ്. സീലോഗ് എങ്കാദ് സൊല്ലിബ്‌ട്ടവാ് എന്ത്‌ത്തെ അര്‌ത്ത. അവാ് അദ്‌ക്കെ പോയി കണ്ണ്‌ഗണ കച്ചി പാര്‌വെ കെ്ഡേത്തവാനായി തിലിമ്പി ബന്താ്.
8അവാന്‌ദ് അര്‌ഗെ കൂരെക്കാറാര്‌മ് അവാ് ണേരാത്തി പിച്ചെ എ്ഡ്‌ത്തിര്‌ന്താദ്‌ണ കണ്ടവാര്‌മ്: <<ഇവാത്തേഗൊ അദിലി കുക്കാന്ത് പിച്ചെ എ്ഡ്‌ത്തിര്‌ന്തവാ്?>> എന്ത് കേ്ട്ടാര്. 9അവാര്‌ദിലി ലേസ ആള്‌ഗ: <<അവാനെത്തെ>> എന്ത് സൊന്നാര്.
ബേ്റെ ലേസ ആള്‌ഗ: <<അല്ല അവാന പാസെ ഇര്‌ക്കവാ്ത്തെ>> എന്ത് സൊന്നാര്.
ആന അവാ്: <<അദ് ണാനെത്തെ>> എന്ത് സൊന്നാ്.
10അവാര് അവാന: <<ണിനാക്ക് കണ്ണ് പാര്‌വെ എച്ചെ കെ്ഡേത്ത്‌ദ്?>> എന്ത് കേ്ട്ടാര്.
11അക്കുളെ അവാ്: <<ഏസു എന്ത് പേര് സൊല്ലുറ ഒരുത്താ് മണ്ണിലി സേ്റ് ഉണ്ടാക്കി എന്ന് കണ്ണ്‌ക്കെ പൂസിനാ്. പ്‌റ ണീ പോയി സീലോഗ് കുളാക്കെ കച്ച് എന്ത് സൊല്ലിബ്‌ട്ടാ്. ണാന് പോയി കച്ചിനെ. അക്കുളെ എന്ന് കണ്ണ്‌ക്ക് പാര്‌വെ കെ്ഡേത്ത്‌ദ്>> എന്ത് സൊന്നാ്.
12അക്കുളെ അവാര്: <<അവാ് ഏദിലി?>> എന്ത് കേ്ട്ടാര്.
അക്കുളെ അവാ്: <<കാണ്യൊ, എനാക്ക് തെര്യ>> എന്ത് സൊന്നാ്.
പരിസല കുറുഡാന കേ്ള്‌വി കേ്ക്കാര്
13അവാര് അയ്യി കണ്ണ് പാര്‌വെ കെ്ഡേത്തവാന പരിസല പട്ട്‌ക്ക് കൂട്ടി പോനാര്. 14ഏസു സേ്റ് ഉണ്ടാക്കി അവാന്‌ദ് കണ്ണ്‌ക്ക് പാര്‌വെ കൊഡുത്താദ് ഒയിവു ണാള് ആയിര്‌ന്ത്‌ദ്. 15അക്കുളെ പരിസല അവാന: <<ണിന്ന് കണ്ണ്‌ക്ക് എച്ചെ പാര്‌വെ കെ്ഡേത്ത്‌ദ്?>> എന്ത് കേ്ട്ടാര്. അക്കുളെ പാര്‌വെ കെ്ഡേത്തവാ്: <<അവാ് എന്ന് കണ്ണ്‌ക്ക് സേ്റ്‌ണ പൂസിനാ്. ണാന് പോയി കച്ചിനെ. അക്കുളെ എനാക്ക് പാര്‌വെ കെ്ഡേത്ത്‌ദ്>> എന്ത് അവാര്‌ക്കെ സൊന്നാ്.
16പരിസലാദിലി പഗ്‌ദി ആള്‌ഗ: <<ഒയിവു ണാള് സെയ്യ പാങ്കില്ലാത്താദ്‌ണ ഇവാ് സെയ്‌ദാദ്‌ണാലെ സാമി പട്ടിലിര്‌ന്ത് ബന്തവാനല്ല>> എന്ത് സൊന്നാര്.
ആന ബേ്റെ പഗ്‌ദി ആള്‌ഗ: <<പാവ സെയ്‌ര ഒരു മന്‌സാന്‌ക്ക് ഇച്ച്‌ള അദിസ്യമാന അഡ്യാളഗ എച്ചെ സെയ്യ മുഡ്യു?>> എന്ത് സൊന്നാര്. അച്ചെ അവാര് ഒരൊരു കച്ചിഗ ആനാര്.
17അവാര് പിന്നേമ് കുറുഡാനായിര്‌ന്തവാന കേ്ട്ടാര്: <<ണിന്ന് കണ്ണ്‌ക്ക് പാര്‌വെ കെ്ഡേത്താദ്‌ണാലെ ണീ അവാന ആരെന്ത് സൊല്ലുറെ?>>
അക്കുളെ അവാ്: <<അയാള് ഒരു സാമിദാസ്‌ത്തെ>> എന്ത് സൊന്നാ്.
18കുറുഡാനായിര്‌ന്തവാന്‌ദ് അവ്വപ്പലണ ഒളേത്ത് കേ്ക്കമാട്ട്‌ക്ക് ഇവാ് കുറുഡാനായിര്‌ന്താ് എന്ത്‌മ്, ഇപ്പ് കണ്ണ്‌ക്ക് പാര്‌വെ കെ്ഡേത്തിര്‌ക്ക്‌ദ് എന്ത്‌മ് എഗുദല ണമ്പാലെ. 19അവാര് അയ്യി കുറുഡാനായിര്‌ന്തവാന്‌ദ് അവ്വപ്പലണ: <<പ്‌റാപ്പിലെ കുറുഡാനായിര്‌ന്തവാ് എന്ത് ണിമ്മ സൊല്ലുറ ണിമ്മ്‌ദ് മഗാ് ഇവാ്ത്തേഗ? ആന ഇവാന്‌ദ് കണ്ണ്‌ക്ക് ഇപ്പ് പാര്‌വെ കെ്ഡേത്താദ് എച്ചെ?>> എന്ത് കേ്ട്ടാര്.
20അദ്‌ക്ക് പാര്‌വെ കെ്ഡേത്തവാന്‌ദ് അവ്വപ്പല: <<ഇവാ് എമ്മ്‌ദ് മഗാ്ത്തെ എന്ത്‌മ് കുറുഡാനായിത്തെ പ്‌റാന്താ് എന്ത്‌മ് എമാക്ക് തെര്യു. 21ആന അവാന്‌ക്ക് പാര്‌വെ കെ്ഡേത്താദ് എച്ചെ എന്തൊ, അവാന്‌ദ് കണ്ണ്‌ണ തെ്ള്‌സിനാദ് ആരെന്തൊ എമാക്ക് തെര്യ. അദ്‌ണാലെ അവാന താനെ ണിമ്മ കേ്ളിരി. അവാ് അറ്യാത്ത പ്‌ള്ളെ ഒന്റു അല്ലതാനെ. അവാ് താനെ സൊല്ലുവാ്>> എന്ത് സൊന്നാര്. 22എഗുദാര്‌ണ അഞ്ചിത്തെ അവാന്‌ദ് അവ്വപ്പല ഇച്ചെ സൊന്നാദ്. എന്ത്‌ക്കെന്റ ഏസുണ ക്‌റ്‌സ്‌ത്ത് എന്ത് സൊല്ലുറവാര്‌ണെല്ല എഗുദാര് പരേസ്‌റ കൂരെക്ക്‌റാഗ സേത്ത ബേ്ഡ എന്ത് അവാര് ണേരാത്ത്യെ സട്ടകെ്ട്ടിര്‌ന്താര്. 23അദ്‌ണാലെത്തെ: <<അവാ് അറ്യാത്ത പ്‌ള്ളെ അല്ലല്ല. അവാന താനെ കേ്ളിരി>> എന്ത് അവാര് സൊന്നാദ്.
24പാര്‌വെ കെ്ഡേത്തവാന അവാര് റണ്ടാവദ്‌മ് ഒളേത്ത്: <<ണീ സത്ത്യ സൊല്ലി സാമിക്ക് മദ്‌പ്പ് കൊഡു. അവാ് പാവ സെയ്‌രവാ്ത്തെ എന്ത് എമാക്ക് തെര്യു>> എന്ത് സൊന്നാര്.
25അക്കുളെ അവാ്: <<അവാ് പാവ സെയ്‌രവാനൊ പാവ സെയ്യാത്തവാനൊ എന്ത് എനാക്ക് തെര്യ. ആന എനാക്ക് ഒരു കാര്യ തെര്യു. ണാന് കുറുഡാനായിര്‌ന്തെ. ഇപ്പ് എന്ന് കണ്ണ് കാട്ട്‌ദ്>> എന്ത് സൊന്നാ്.
26അവാര് അവാന പിന്നേമ് കേ്ട്ടാര്: <<അവാ് ണിനാക്ക് എന്ത സെയ്‌ദാ്? ണിനാക്ക് എച്ചെ പാര്‌വെ കെ്ഡേത്ത്‌ദ്?>>
27അദ്‌ക്ക് അവാ്: <<അയ്യി കാര്യണ ണാന് ണേരാത്ത്യെ ണിമാക്ക് സൊന്നേനല്ല. അദ്‌ണ ണിമ്മ കേ്ക്കാലെ. പിന്നേമ് അദ്‌ണ കേ്ക്ക്യ ണിമ്മ ആസെപഡ്‌റാദ് എന്ത്‌ക്ക്? ണിമാക്ക്‌മ് അവാന്‌ദ് സൊല്ലുപഡി ണഡാക്കവാരായ ആസെ ഇര്‌ക്ക്‌ദ?>> എന്ത് ബദ്‌ള് സൊന്നാ്.
28അക്കുളെ അവാര് അവാന സണ്ടെ കൊഡുത്ത്‌കൊണ്ട്: <<ണീലാമെ അവാന്‌ദ് സൊല്ലുപഡി ണഡാക്കവാ്. എമ്മളാമെ മോസെ സൊല്ലുപഡി ണഡാക്കവാര്. 29മോസോഡെ സാമി ണായ പേസിര്‌ക്കാ് എന്ത് എമാക്ക് തെര്യു. ആന ഇവാനൊ, ഇവാ് ഏദിലിര്‌ന്ത് ബന്താ് എന്ത് എമാക്ക് തെര്യ>> എന്ത് സൊന്നാര്.
30അക്കുളെ അവാ്: <<അവാ് എനാക്ക് പാര്‌വെ തന്ത്‌ട്ട്‌മ് ഏദിലിര്‌ന്ത് ബന്തവാ് എന്ത് ണിമാക്ക് തെര്യാദെ ഇര്‌ക്കാദ് അദിസ്യാത്തെ. 31പാവ സെയ്‌രവാര്‌ദ് പരേസണ സാമി കേ്ക്കാദില്ല എന്ത്‌മ്, സാമിന കുമ്മുഡി സാമി ആസെപഡ്‌റ കാര്യഗണ സെയ്‌രവാര് പരേസണ സാമി കേ്ക്കാ് എന്ത്‌മ് ണമാക്ക് തെര്യു. 32പ്‌റാന്താദിലിര്‌ന്തെ കുറുഡനായിര്‌ക്കവാന്‌ക്ക് ആരാറ്റ്‌ഗ കണ്ണ് പാര്‌വെ കൊഡുത്താരെന്ത് ഉലഗ ഉണ്ടാനാദിലിര്‌ന്ത് ഇന്നാരമാട്ട്‌ക്ക്‌മ് ആര്‌മ് കേ്ക്കാലെ. 33അവാ് സാമി പട്ടിലിര്‌ന്ത് ബന്തവാനല്ലാദെ പോന അവാന്‌ക്ക് ഒന്റുമ് സെയ്യ മുഡ്യമാട്ട>> എന്ത് സൊന്നാ്.
34അക്കുളെ അവാര്: <<ണീ പ്‌റാക്കാട്ടിര്‌ന്തെ ഒരേപെ്ട്ട് പാവ ഉള്ളവാ്ത്തെ. അച്ചെ പ്‌റാന്ത ണീ എമാക്ക് ബുദ്ദി സൊല്ലുറേന?>> എന്ത് സൊല്ലി അവാന എഗുദാര് പരേസ്‌റ കൂരേക്ക് സേത്താദെ മുഡിക്കി ബ്‌ട്ടാര്.
പാര്‌വെ കെ്ഡേത്തവാനോഡെ ഏസു പേസ്‌റാ്
35അയ്യി കണ്ണ് പാര്‌വെ കെ്ഡേത്തവാന എഗുദാര് പരേസ്‌റ കൂരേക്ക് അണ്ട്‌സാദെ മുഡിക്കി ബ്‌ട്ട സേദിന ഏസു കേ്ട്ടാ്. അദ്‌ക്ക് പ്‌റ ഏസു അവാന കാണ്‌ഗാട്ടി: <<മന്‌സാനായി പ്‌റാന്തവാനിലി ണീ ണമ്പിക്കെ ബെക്കേന?>> എന്ത് അവാന കേ്ട്ടാ്.
36അക്കുളെ അവാ് <<പണ്ണാഡ്യെ, അവാ് ആരെന്ത് സൊല്ലിത്താ. അപ്പ്‌ത്തെ എനാക്ക് അവാനിലി ണമ്പിക്കെ ബെക്ക്യ മുഡ്യു>> എന്ത് സൊന്നാ്.
37അക്കുളെ ഏസു അവാന്‌ക്കെ: <<ണീ അവാന കണ്ടിര്‌ക്കെ. ഇപ്പ് ണിന്നോഡെ ണായ പേസി കൊണ്ടിര്‌ക്ക അവാ്ത്തെ അദ്>> എന്ത് സൊന്നാ്.
38അക്കുളെ അവാ്: <<ആണ്ടവാനെ, ണാന് ണമ്പ്‌റെ>> എന്ത് സൊല്ലികൊണ്ട് ഏസുണ കുമ്മുഡിനാ്.
39<<ണാന് ഈ ഉലഗാക്ക് ബന്തിര്‌ക്കാദ് മന്‌സാര്‌ണ ബിദിക്ക്യ#9:39 ബിദിക്ക്യ മന്‌സാര് സെയ്‌ര പാവാക്ക് കെ്ഡേക്ക ദണ്ടണേലിര്‌ന്ത് മന്‌സാര്‌ണ കാപാറ്റ്യാത്തെ ഏസു ഉലഗാക്കെ ബന്താദ്. (ഓഗന്നാ് 3:16–17) ആന ലേസ ആള്‌ഗ ഏസുണ ണമ്പാദെ തള്ളുവാര്. അദ്‌ണാലെ അച്ച്‌ള ആള്‌ഗണ സാമി ഏസുണ ബെത്ത് ദണ്ടിക്കുവാ്. ബേ്ണ്ടിത്തെ. അച്ചെ കുറുഡാര്‌ക്ക് കണ്ണ് പാര്‌വെ കെ്ഡേക്കു. കണ്ണ് കാട്ട്‌ദ് എന്ത് ണെനേക്കവാര്‌ക്ക് കണ്ണ് കുറുഡുമ് ബീ്വു>> എന്ത് ഏസു സൊന്നാ്.
40ഇദ്‌ണ കേ്ട്ട് കൊണ്ട് അവാ് അര്‌ഗെ ഇര്‌ന്ത ലേസ പരിസല: <<എമ്മാമ് കുറുഡാര?>> എന്ത് ഏസുണ കേ്ട്ടാര്.
41അക്കുളെ ഏസു: <<ണിമ്മ കുറുഡാര് ആയിര്‌ന്തിര്‌ന്ത ണിമ്മ പാവ ഇല്ലാത്തവാര് ആയിര്‌ക്കുവേര്. ആന ണിമ്മ് കണ്ണ് കാട്ട്‌ദ് എന്ത് സൊല്ലുറാദ്‌ണാലെ ണിമ്മ്‌ദ് പാവാക്ക് പൊറിമെ കെ്ഡേക്കാദെ ഇര്‌ക്കു>> എന്ത് സൊന്നാ്.
Currently Selected:
ഓഗന്നാ് 9: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
