ലൂക്കോസ് 13
13
പാവ സെയ്‌രാദ്‌ണ തള്ളി സാമി സാരി തിലിമ്പിരി
1അയ്യി ഗള്യെ അദിലിര്‌ന്ത ലേസ ആള്‌ഗ ഏസുക്ക്: <<ഗെലീലെക്കാറാരിലി ലേസ ആള്‌ഗ സാമിക്ക് പലി കൊഡുത്ത്‌കൊണ്ട് ഇര്‌ക്കാട്ടി, പീലത്തോസ് അവാര്‌ണ അദിലി ബെത്ത് താനെ കൊന്റാ്>> എന്ത് സൊന്നാര്. 2ഏസു അവാര്‌ക്കെ: <<അയ്യി ഗെലീലെക്കാറാര്‌ക്ക് ഇച്ചെ സാവു ബന്താദ്‌ണാലെ അവാര് എല്ല ഗെലീലെക്കാറാര്‌ണ ബ്‌ഡ റമ്പ പാവ സെയ്‌ദവാര് എന്ത് ണിമ്മ ണെനേക്കേര?>> എന്ത് കേ്ട്ടാ്. 3<<ഇല്ലെ, പാവ സെയ്‌രാദ്‌ണ തള്ളി സാമി സാരി തില്‌മ്പാദെ പോന ണിമ്മാമ് അദേപാസെ കെ്ട്ട് തള്ളുവേര് എന്ത് ണാന് ണിമാക്കെ സൊല്ലുറെ. 4അല്ല, സീലോഗ് മണ്ടഗ ഇ്ഡിന്ത്‌ബ്‌ന്ത് സത്ത് പോന പദിണെ്ട്ടാള്‌ഗാമ് എര്‌സലേമിലിര്‌ക്ക എല്ല ആള്‌ഗാദിലി ബെത്ത് കുറ്റക്കാറാര് എന്ത് ണിമ്മ ണെനേക്കേര? 5ഇല്ലെ, പാവ സെയ്‌രാദ്‌ണ തള്ളി സാമി സാരി തില്‌മ്പാദെ പോന ണിമ്മാമ് അദേപാസെ കെ്ട്ട് തള്ളുവേര് എന്ത് ണാന് ണിമാക്കെ സൊല്ലുറെ>> എന്ത് സൊന്നാ്.
6ഏസു അവാര്‌ക്കെ ഒരു കദെ ബ്‌ട്ടാ്: <<ഒരുത്താ് തന്ന് മുന്തിരി ദോട്ടാക്കെ ഒരു അത്തി മര ണഡ്‌ത്ത് ബെത്തിര്‌ന്താ്. അദിലി കായി പ്‌ഡിത്തിര്‌ക്ക്‌ദ എന്ത് ണോഡി ണഡാന്തിര്‌ന്താ്. ആന അദിലി കായി പ്‌ഡിക്കാദെ ഇല്ലെ. 7അയ്യി കാഡ്‌ക്കാറാ് തന്ന് കാവക്കാറാന്‌ക്കെ: <ഈ അത്തി മര കായിക്കു എന്ത് ണാന് മൂണ് ബര്‌സ ണോഡി ണഡാക്കെ. ആന കായി പ്‌ഡിക്കാദെ ഇല്ലെ. അദ്‌ണാലെ ഈ മരാണ ബെ്ട്ട്യെക്ക്, ബെ്റ്‌ദെ എന്ത്‌ക്ക് മണ്ണിലി ബെത്തിര്‌ക്കാദ്> എന്ത് സൊന്നാ്.
8അദ്‌ക്ക് കാവക്കാറാ്: <പണ്ണാഡ്യെ ണാന് അയ്യി മര മ്‌ണ്ടേക്ക് സുറ്റുമ് കൊത്തി ബളാണ ഇക്കി ണോഡുറെ. അദ്‌ണാലെ ഈ ബര്‌സ ഗൂഡി ഇര്‌ക്കുഡൊ. 9മേലേക്ക്‌മ് കായിക്കാദെ പോന ബെ്ട്ടിയെക്കില> എന്ത് സൊന്നാ്.>>
ഗൂന് ബ്‌ന്ത ഒരുത്തിന ഏസു തെ്ള്‌സ്‌റാ്
10എഗുദാര് ബെത്തിര്‌ക്ക ഒരു ഒയിവു ണാള് ഏസു അവാര്‌ദ് പരേസ്‌റ കൂരേലി പഡിസികൊണ്ടിര്‌ന്താ്. 11കെ്ട്ടജാദി തട്ടി പദിണെ്ട്ട് ബര്‌സ ഗൂന് ബ്‌ന്ത് ണേരെ ണില്ല്യ മുഡ്യാത്ത ഒരുത്തി അദിലിര്‌ന്ത. 12ഏസു അവാണ കണ്ട് അര്‌ഗെ ഒളേത്ത്: <<അമ്മെ, ണിനാക്ക് തട്ടിര്‌ക്ക ണോയി ബ്‌ട്ട് പോറ്റു>> എന്ത് സൊന്നാ്. 13അദ്‌ക്ക് പ്‌റ അവാക്ക് മേലെ ഏസു കയ്യി ബെത്താ്. അപ്പ്‌താനെ അവ ണേരെ ണിന്റ് സാമി ബെല്ല്യവാ് എന്ത് സൊല്ലി ഒഗെ ഇക്കിന.
14ഏസു അവാണ ഒയിവു ണാള് തെ്ള്‌സ്‌റാദ്‌ണാലെ എഗുദാര് പരേസ്‌റ കൂരേദ് അദിഗാരിക്ക് മൊനെ ബന്ത്: <<ബേലെ സെയ്യ ആറ് ണാള് ഇര്‌ക്ക്‌ദല്ല, അയ്യി ഗള്യേക്ക് ബന്ത് തെ്ള്‌സിരി. ഒയിവു ണാള് ബേ്ഡ>> എന്ത് ആള്‌ഗാക്കെ സൊന്നാ്.
15ആണ്ടവാ് അവാന്‌ക്കെ: <<ബക്‌ദിക്കാറാരായി ണഡിക്കവാരെ, ണിമ്മ ഒരൊരു ആള്‌ഗാമ് ഒയിവു ണാള് ണിമ്മ്‌ദ് ഓരിമാഡ്‌ണാഗൊ, കള്‌ദെനാഗൊ പട്ടിലിര്‌ന്ത് ഉക്ക്യെ്ഡ്‌ത്ത് പോയി തണ്ണി ഊട്ട്‌സ്‌റാദില്ലേഗ? 16ആന സെയിത്ത്യാ് പദിണെ്ട്ട് ബര്‌സായി ണോയി ബീ്ത്തി ബെത്തിര്‌ന്ത ഈ അവുറഗാമ്‌ദ് മഗാണ ഈ ഒയിവു ണാള് തെ്ള്‌സി ബ്‌ഡ്‌റാദ് കുറ്റഗ?>> എന്ത് സൊന്നാ്.
17ഏസു ഈ കാര്യണ സൊല്ലുഗാട്ടി അയാളോഡെ ഏദ് ബെത്തിര്‌ന്തവാരൊട്ടുക്ക് ണാണഗെ്ട്ട് പോനാര്. ആന ആള്‌ഗെല്ല ഈ അദിസ്യപഡ്‌റ കാര്യ ഏസു സെയ്‌ദാദ്‌ണ കണ്ട് പിര്യപൊങ്കിനാര്.
കഡ്‌ഗ് ബെദേദ്‌മ് പുളി മാവുദ്‌മ് കദെ
18അദ്‌ക്ക് പ്‌റ ഏസു ഇച്ചെ സൊന്നാ്: <<സാമി ആള്‌റാദ്‌ണ ണാന് ഏദ്‌ക്ക് സമ ആക്കി സൊല്ലുവെ? അദ്‌ണ ഏദ്‌ക്ക് എജേത്ത് സൊല്ലി തരുവെ? 19അദ്, ഒരു കാഡ്‌ക്കാറാ് ബിത്തിന കഡ്‌ഗ് ബെദേക്ക് സമ. അദ് ബളാന്ത് ബെല്ല്യൊരു കഡ്‌ഗ് മ്‌ണ്ടായി താറ്‌തലേപ്പ് ബ്‌ട്ട് പക്കിഗ ബന്ത് അദ്‌ക്ക് ഗൂഡ് എ്ഡ്‌ത്തിര്‌ക്ക്‌ദ്.>>
20ഏസു പിന്നേമ് അവാര്‌ക്കെ ഇച്ചെ സൊന്നാ്: <<സാമി ആള്‌റാദ്‌ണ ണാന് ഏദ്‌ക്ക് എ്ണേത്ത് സൊല്ലുവെ? 21സാമി ആള്‌റാദ് എങ്കാദ് ഒരുത്തി മൊത്തന മാവുണ എ്ഡ്‌ത്ത് കലേസി അദ്‌ക്ക് ലേസ പുളിത്ത മാവുണ സേത്തി അദ് മുച്ചുഡ പുളിത്ത് ബരമാട്ട്‌ക്ക് ബെക്ക പാസെത്തെ.>>
ഇ്ണ്‌ക്ക് ബാസ
22ഏസു എര്‌സലേമ്‌ക്കെ പോഗാട്ടി, അയ്യി ബയ്യിക്ക്‌റാഗ ഇര്‌ക്ക എല്ല പട്ടണാക്ക്‌റാഗാമ്, ഊര്‌ക്ക്‌റാഗാമ് പോയി ആള്‌ഗാക്ക് ബുദ്ദിണായ സൊല്ലികൊഡുത്താ്. 23അക്കുളെ ഒരുത്താ് ഏസുണ: <<ആണ്ടവാനെ, ദെങ്കി കഡക്കവാര് ലേസ ആള്‌ഗാത്തേഗ?>> എന്ത് കേ്ട്ടാ്.
അക്കുളെ ഏസു അവാര്‌ക്കെ ഇച്ചെ സൊന്നാ്: 24<<ഇ്ണ്‌ക്ക് ബാസമേലെ കഡാക്ക്യ ഓരാഡി ണോഡിരി. എന്ത്‌ക്കെന്റ അദ്‌മേലെ കഡാക്ക്യ എത്തിന്യൊ ആള്‌ഗ ഓരാഡി ണോഡുവാര്. ആന അവാര്‌ക്ക് അദ് മുഡ്യമാട്ട എന്ത് ണാന് ണിമാക്കെ സൊല്ലുറെ. 25കൂരെക്കാറാ് എ്ന്ത് പോയി ബാസണ അഡേത്ത പ്‌റ, ബെ്ള്യെ ണിന്റ്: <പണ്ണാഡ്യെ, ബാസണ സെറ്റെ തുറാക്കുഡോമെ> എന്ത് സൊല്ലി ണിമ്മ ബാസണ കൊട്ടുവേര്.
ആന അയാള്: <ണിമ്മ ആര് എന്തൊ, ഏദില്യവാര് എന്തൊ എനാക്ക് തെര്യ?> എന്ത് സൊല്ലുവാ്.
26അക്കുളെ ണിമ്മ: <ണിന്ന്‌ദൊപ്പ എമ്മ തിന്ത്‌കുഡിത്ത് ഇര്‌ക്കേരല്ല. എമ്മ് തെരുവുക്ക്‌റാഗ ണീ എമാണ പഡിസിമ് ഇര്‌ക്കേനല്ല> എന്ത് സൊല്ല്യ പ്‌ഡിക്കുവാര്.
27ആന അയാള്: <ണിമ്മ ആര് എന്ത് എനാക്ക് തെര്യ? ണിമ്മ ഏദില്യവാര് എന്ത്‌മ് എനാക്ക് തെര്യ? കേ്ഡ്‌ഗെ്ട്ട് ണഡാക്കവാരെ, എന്ന് പട്ടിലിര്‌ന്ത് കഡാന്ത് പോയി> എന്ത് ണിമാക്ക് സൊല്ലുവാ്.
28അവുറഗാമ്, ഇസാക്ക്, ആക്കോവു അച്ചെ എല്ല സാമിദാസ്‌ഗാമ് സാമി ആള്‌റ റാജ്യാത്തിലി പന്തിക്കിര്‌ക്കാദ്‌ണ ണിമ്മ കാണ്‌ഗാട്ടി അഗ്‌ദ്‌കൊണ്ട് പല്ല്‌ണ കെ്റ്‌സ്‌കെ്റ്‌സ കഡിക്കുവേര്. അയ്യി ഗള്യേക്ക് ണിമാണ ബെ്ള്യെ മുഡിക്കി ബ്‌ഡുവാ്. 29അക്കുളെ ക്‌ളാക്കിര്‌ന്ത്‌മ് മേക്കിര്‌ന്ത്‌മ് തെക്കിര്‌ന്ത്‌മ് ബഡാക്കിര്‌ന്ത്‌മ് സാമി ആള്‌റ റാജ്യാക്കെ എത്തിന്യൊ ആള്‌ഗ ബന്ത് പന്തിക്ക് കുക്കാക്കുവാര്. 30ഉജാന്തവാര് താന്തവാര്‌മ് ആവാര്. താന്തവാര് ഉജാന്തവാര്‌മ് ആവാര്.>>
ഏസുക്ക് എര്‌സലേമ് പട്ടണോഡിര്‌ക്ക സീവാ്
31അയ്യി ഗള്യേലിതാനെ ലേസ പരിസല ഏസുദ് പട്ട്‌ക്കെ ബന്ത്: <<ണീ ഇദിലിര്‌ന്ത് പോ. എരോദാ് ണിനാണ കൊല്ല്യ ണോഡുറാ്>> എന്ത് സൊന്നാര്.
32അക്കുളെ ഏസു ഇച്ചെ സൊന്നാ്: <<ണിമ്മ പോയി അയ്യി കുള്ളാനരിന പാസെ ഇര്‌ക്കവാന്‌ക്ക് സൊല്ലിരി, ഇന്റ്‌മ് ണാളേമ് ണാന് ണോയിക്കാറാര്‌ണ തെ്ള്‌സുവെ. ആള്‌ഗോഡെ തട്ടിര്‌ക്ക കെ്ട്ടജാദിഗണ ഒയിപ്പ്‌സുവെ. അച്ചെ മൂണാവദ് ണാള് എന്ന് ബേലെന മുഡിക്കുവെ. 33എന്താല്‌മ് ഇന്റ്‌മ്, ണാളേമ്, അയ്യി മറ് ണാള്‌മ് എനാക്ക് പോയ ഇര്‌ക്ക പട്ട്‌ക്കെല്ല ണാന് പോഡൊ. എന്ത്‌ക്കെന്റ എര്‌സലേമിലി ബെത്ത്‌ത്തെ സാമിദാസ്‌ഗണ കൊന്റിര്‌ക്കാദ്.
34എര്‌സലേമെ, എര്‌സലേമെ, ണീ സാമിദാസ്‌ഗണ കൊന്റവാമ് ണിന്ന് പട്ട്‌ക്ക് സൊല്ലിബ്‌ട്ടവാര്‌ണ കല്ല് എ്റിന്ത് കൊന്റവാമ്‌ത്തെ. കോയി തന്ന് കുഞ്ചിഗണ ഇ്റാക്കെക്കുള്ളുക്കെ ബെക്ക പാസെ ണിനാണ എന്ന് പട്ട്‌ക്കെ സേത്തി ബെക്ക്യ എത്തിന്യൊ ജമ്പ് എനാക്ക് മനേസ്സിര്‌ന്ത്‌ദ്. ആന ണിനാക്കൊ അദ് പ്‌ഡിക്കാലെ. 35അദ്‌ണാലെ ഇദാ, ണിന്ന് കൂരെ ബ്‌ട്ടകൂരെ ആയി ഒന്റുമ് ഇല്ലാദായെക്കു. <ആണ്ടവാന്‌ദ് പേരിലി ബരവാ് ബാഗ്യക്കാറാ്>#സാമി പാട്ട് ബുക്ക് 118:26 എന്ത് ണീ സൊല്ലുറമാട്ട് എനാണ ണീ കാണമാട്ടെ എന്ത് ണാന് ണിമാക്കെ സൊല്ലുറെ.>>
Currently Selected:
ലൂക്കോസ് 13: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
