ലൂക്കോസ് 19
19
ഏസുമ് സക്കായിമ്
1ഏസു എരിഗോവു പട്ടണാക്കെ എജ്ജി, അദ്‌മേലെ പോയി കൊണ്ടിര്‌ക്കാട്ടി, 2ണ്‌ഗ്‌ദി പിരിക്കവാര്‌ദ് തലെവാന്‌മ് പണക്കാറാന്‌മാന സക്കായി എങ്ക ഒരുത്താ് അദിലിര്‌ന്താ്. 3ഏസു എച്ച്‌ളവാ് എന്ത് കാണ്യ ബേ്ണ്ടി അവാ് ഓരാഡി ണോഡിനാ്. ആന അവാ് കൂളെ ആനാദ്‌ണാലേമ് ആള്‌കൂട്ടണാലേമ് ഏസുണ കാണ്യ മുഡ്യാലെ. 4അദ്‌ണാലെ അവാ് മുന്തുക്ക് ഓഡി പോയി ഒരു അത്തി മരാക്കെ ഏ്റി ഇര്‌ന്താ്. ഏസു അയ്യി ബയ്യിമേലെത്തെ ബന്ത്‌കൊണ്ടിര്‌ന്താദ്.
5ഏസു അയ്യി മര പട്ട്‌ക്കെ ബന്താദ്‌മ് അണ്ണാന്ത് ണോഡി: <<സക്കായെ, പൊത്തന ഇ്റാങ്കി ബാ. ണാന് ഇന്റ് ണിന്ന് കൂരേലിത്തെ തങ്ക്‌റാദ്>> എന്ത് സക്കായിക്ക് സൊന്നാ്. 6അക്കുളെ സക്കായി ആഗബേഗ ഇ്റാങ്കി പിര്യാപിര്യാത്ത് ഏസുണ ഏറ്റ്‌കൊണ്ടാ്.
7ഇദ്‌ണ കണ്ട് ആള്‌ഗൊട്ടുക്ക് <<ഇയാള് പാവ സെയ്‌ദ് ണഡാക്കവാന്‌ദ് കൂരേക്കെ തങ്ക്യ പോയിര്‌ക്കാനെ>> എന്ത് സൊല്ലി എല്ലാര്‌മ് ങ്കൊറുങ്കൊറുത്താര്.
8ആന സക്കായി എ്ന്ത് ണിന്റ് ആണ്ടവാന്‌ക്കെ: <<ആണ്ടവാനെ, എന്ന് സൊത്തിലി പഗ്‌ദി ണാന് ഏ്ളെഗാക്ക് കൊഡുക്കുവെ. ഏദാറ്റ് ഒരു ദിന്‌സിലി ആരാറ്റോഡെ എന്താറ്റ് ഏമാത്തി ബാങ്കിര്‌ന്ത, ഒന്റുക്ക് ബഡ്ഡി ണാല് എ്ണ്ണ തിലിപ്പി കൊഡുക്കുവെ>> എന്ത് സൊന്നാ്.
9അദ്‌ക്ക് ഏസു: <<ഇവാന്‌മ് അവുറഗാമ്‌ദ് കാല്‌കെ്ളേക്ക് പഡ്‌റാദ്‌ണാലെ, ഇന്റ് ഈ കൂരേല്യ ആള്‌ഗ ദെങ്കിനാര്. 10കാണാദായെക്കിനവാര്‌ണ പരാന്ത്‌പറ്റി ദെങ്ക്‌സ്യാത്തെ മന്‌സാനായി പ്‌റാന്ത ണാന് ബന്താദ്>> എന്ത് സൊന്നാ്.
പൊന്നു പണാണ പറ്റ്യുള്ള കദെ
11ഏസു സൊല്ലുറാദ്‌ണ അവാര് കേ്ട്ട്‌കൊണ്ടിര്‌ന്താര്. ഏസു എര്‌സലേമ്‌ക്കെ എജ്ജ്യ അഡ്‌ത്താദ്‌ണാലേമ്, സാമി ആള്യ പോരാദ് സട്ടന ബര്യ പോദ് എന്ത് അവാര്‌ക്ക് ണെനേവു ബന്താദ്‌ണാലേമ് ഏസു അവാര്‌ക്കെ ഒരു കദെ സൊല്ല്യ പ്‌ഡിത്താ്: 12<<പേര്‌കേ്ട്ട ബങ്കേസാത്തിലി പട്ട ഒരു ആള് റാജപട്ട കെ്ഡേസി തിലിമ്പി ബര്യ ബേ്ണ്ടി എമ്മാട്ടൊ ദൂര ണാഡ്‌ക്ക് പോയ ണെനേത്താ്. 13പോരാദ്‌ക്ക് മുദ അയാള് തന്ന്‌ദ് പത്ത് ബേലെക്കാറാര്‌ണ ഒളേത്ത് അവാര്‌ക്ക് ഒരൊരു ആള്‌ക്ക് ഒരൊരു പൊന്നു പണ ബെത്ത് കൊഡുത്ത്: <ണാന് തിലിമ്പി ബരമാട്ട് ണിമ്മ ഇദ്‌ണ ബെത്ത് ഏവാര സെയ്‌രി> എന്ത് സൊന്നാ്.
14ആന അയാള് ണാഡില്യ ലേസ ആള്‌ഗ അയാളോഡെ ഏദ് ബെത്ത് തമ്മ് സേദിക്കാറാര്‌ണ ബ്‌ട്ട്: <അയാള് എമാക്ക് റാജാവായിര്‌ക്ക ബേ്ഡ> എന്ത് സൊല്ലിസിനാര്.
15ആന അയാള് റാജപട്ട കെ്ഡേസി തിലിമ്പി ബന്ത പ്‌റ, താന് കൊഡുത്ത പണാണ ബെത്ത് എന്ത സമ്പാരിത്തേര് എന്ത് കേ്ക്ക്യ ബേ്ണ്ടി തന്ന് പത്ത് ബേലെക്കാറാര്‌ണ ഒളേത്ത് ബര്‌സിനാ്.
16അക്കുളെ മുദാത്തില്യവാ് ബന്ത്: <പണ്ണാഡ്യെ, ണീ തന്ത പൊന്നു പണാണ ബെത്ത് ണാന് ബേ്റെ പത്ത് പൊന്നു പണ ഗൂഡി കെ്ഡേസിര്‌ക്കെ> എന്ത് സൊന്നാ്.
17പണ്ണാഡി അവാന്‌ക്കെ: <ഹഅ, ണല്ല ബേലെക്കാറാനെ ണീ ണലമായി സെയ്‌ദിര്‌ക്കെ. ണീ സിന്നൊരു കാര്യാത്തിലി ഗൂഡി ണമ്പ്യമുഡിന്തവാ് ആനാദ്‌ണാലെ ണീ പത്ത് പട്ടണാക്ക് തലെവാ് ആയിര്> എന്ത് സൊന്നാ്.
18റണ്ടാവദ് ആള് ബന്ത്: <പണ്ണാഡ്യെ, ണീ തന്ത പൊന്നു പണാണ ബെത്ത് ണാന് ബേ്റെ അഞ്ച് പൊന്നു പണ ഗൂഡി കെ്ഡേസിര്‌ക്കെ> എന്ത് സൊന്നാ്.
19അക്കുളെ അയ്യി പണ്ണാഡി: <അപ്പ് ണീ അഞ്ച് പട്ടണാക്ക് തലെവാ് ആയിര്> എന്ത് അയ്യി ബേലെക്കാറാന്‌ക്ക് സൊന്നാ്.
20പിന്നെ ഒരുത്താ് ബന്ത്: <പണ്ണാഡ്യെ, ണീ എനാക്ക് തന്ത പൊന്നു പണ ഇദാ. അദ്‌ണ ണാന് സീലെ കൊത്തുക്കെ മുഡിന്ത് സൊക്കാന ബെത്തിര്‌ക്കെ. 21ണീ ണിന്ന്‌ദ് അല്ലാത്താദ്‌ണ എ്ഡ്‌ക്കവാന്‌മ് ണീ ബെ്ളേക്കാത്താദ്‌ണ അറ്‌ത്തെ്ഡ്‌ക്കവാന്‌മ് ആയിര്‌ക്ക കല്ല് ണെഞ്ച്‌ക്കാറാ് എന്ത് തെരിന്ത് ണാന് ണിനാണ കോവെപട്ടെ> എന്ത് സൊന്നാ്.
22അക്കുളെ അയ്യി പണ്ണാഡി ബേലെക്കാറാന്‌ക്കെ ഇച്ചെ സൊന്നാ്: <കേ്ഡ്‌ഗെ്ട്ട ബേലെക്കാറാനെ, ണിന്ന് ബായിലി ബര ണായാത്തിലി താനെ ണാന് ണിനാണ ബിദിക്കുവെ. ണാന് എന്ന്‌ദ് അല്ലാത്താദ്‌ണ എ്ഡ്‌ക്കവാന്‌മ് ണാന് ബെ്ളേക്കാത്താദ്‌ണ അറ്‌ത്തെ്ഡ്‌ക്കവാന്‌മ് ആയിര്‌ക്ക കല്ല് ണെഞ്ച്‌ക്കാറാ് എന്ത് ണിനാക്ക് തെരിന്തിര്‌ന്ത്‌ദല്ല. 23പിന്നെ എന്ത്‌ക്ക് എന്ന് പൊന്നു പണാണ ണീ ബേങ്ക്‌ക്ക് അഡേക്കാത്തദ്? അച്ചെ അഡേത്തിര്‌ന്ത ണാന് ബന്ത് ബട്ടി പണോഡെ അയ്യി പണാണ തിലിപ്പി ബാങ്കിര്‌ക്കുവേനല്ല?>
24പ്‌റ അയ്യി പണ്ണാഡി തന്ന് അര്‌ഗെ ണിന്റിര്‌ന്തവാര്‌ക്കെ: <അയ്യി പൊന്നു പണാണ അയാളോഡെ ഇര്‌ന്ത് ബാങ്കി പത്ത് പൊന്നു പണ സമ്പാരിത്തവാന്‌ക്കെ കൊഡിരി> എന്ത് സൊന്നാ്.
25അദ്‌ക്ക് അവാര്: <പണ്ണാഡ്യെ, അയാള്‌ക്ക് പത്ത് പൊന്നു പണ ഇര്‌ക്ക്‌ദല്ല> എന്ത് സൊന്നാര്.
26ആന അയ്യി പണ്ണാഡി അവാര്‌ക്കെ: <ഇര്‌ക്ക എല്ലാര്‌ക്ക്‌മ് എക്കസക്ക കൊഡുക്കുവാ്. ലേസ ഇര്‌ക്കവാന്‌ക്ക് ഇര്‌ക്ക ലേസണ ഗൂഡി എ്ഡ്‌ത്തെക്കുവാ് എന്ത് ണാന് സൊല്ലുറെ. 27ആന ണാന് റാജാവു ആയിര്‌ക്കാദ് പ്‌ഡിക്കാദിര്‌ക്ക എന്ന് ഏ്ദ്‌ക്കാറാര്‌ണ എ്ഡ്‌ത്ത് ബന്ത് എന്ന് മുന്നുക്ക് കൊല്ലിരി> എന്ത് സൊന്നാ്.>>
ഏസു റാജാവുണ പാസെ എര്‌സലേമ് പട്ടണാക്കെ പുക്ക്‌റാ്
28ഇദ്‌ണെല്ല സൊല്ലി തീന്ത പ്‌റ ഏസു അവാര്‌ദ് മുന്തുക്ക് എര്‌സലേമ്‌ക്കെ പോനാ്. 29ഒലിവ് മലെ അര്‌ഗെ ഇര്‌ക്ക ബെദനി ഊര്‌ക്ക്‌മ് ബേദ്‌പാഗെ ഊര്‌ക്ക്‌മ് അര്‌ഗെ ഏസു എജ്ജിനാ്. അക്കുളെ ഏസു തന്ന് സൊല്ലുപഡി ണഡാക്കവാരിലി റണ്ട് ആള്‌ക്കെ ഇച്ചെ സൊല്ലിബ്‌ട്ടാ്: 30<<അദാ, അയ്യി മുന്തുക്ക് കാട്ട്‌റ ഊര്‌ക്കെ പോയിരി; ണിമ്മ ഊര്‌ക്കെ പോഗാട്ടി ഇന്നാരമാട്ട്‌ക്ക്‌മ് ആര്‌മ് ഏ്റാത്ത ഒരു കള്‌ദെ കുട്ടിന കെ്ട്ടി ബെത്തിര്‌ക്കാദ്‌ണ ണിമ്മ കാണുവേര്. അദ്‌ണ ഉക്കി എ്ഡ്‌ത്ത് ബായിരി. 31എന്ത്‌ക്ക് ഇദ്‌ണ ഉക്കുറേര് എന്ത് ആരാറ്റ് ണിമാണ കേ്ട്ടാക്കി ആണ്ടവാന്‌ക്ക് ഇദ്‌ണ ബേ്ഡു എന്ത് സൊല്ലിരി>> എന്ത് സൊന്നാ്.
32അവാര് പോയി ണോഡുഗാട്ടി ഏസു അവാര്‌ക്കെ സൊന്ന പാസെതാനെ കണ്ടാര്.
33അവാര് കള്‌ദെ കുട്ടിന ഉക്കുറാദ്‌ണ കണ്ട് കള്‌ദെക്കാറാ് <<ണിമ്മ എന്ത്‌ക്ക് കള്‌ദെ കുട്ടിന ഉക്കുറേര്?>> എന്ത് കേ്ട്ടാ്.
34അക്കുളെ അവാര്: <<ആണ്ടവാന്‌ക്ക് ഇദ്‌ണ ബേ്ഡു>> എന്ത് സൊന്നാര്.
35അച്ചെ അവാര് കള്‌ദെ കുട്ടിന ഏസു പട്ട്‌ക്ക് എ്ഡ്‌ത്ത് ബന്താര്. പ്‌റ അവാര് തമ്മ ഉഡുപ്പുക്കുദ്ദാക്ക് പൊദേക്കാദ്‌ണ കള്‌ദെ കുട്ടിക്കുദ്ദാക്ക് സൂഡ്‌സി അദ്‌ക്ക് മേലെ ഏസുണ കുക്കാസിനാര്. 36അച്ചെ ഏസു കള്‌ദെ കുട്ടിക്കുദ്ദാക്ക് ഏ്റി പോഗാട്ടി ആള്‌ഗ തമ്മ പൊദേത്തിര്‌ന്ത സീലെഗണ ബയ്യിക്കെ ബിരിസിനാര്.
37ഏസു ഒലിവ് മലെ ഇ്റക്കാക്ക് എജ്ജ്‌ഗാട്ടി പിന്ന്‌മേലെ ണഡാന്ത് ബന്ത കൂട്ട ബിച്ചന തമ്മ കണ്ട അദിസ്യഗണ പറ്റി പിര്യപൊങ്കികൊണ്ട് സാമി ബെല്ല്യവാ്ത്തെ എന്ത് ഒഗെ ഇക്കികൊണ്ട് ആലാത്ത് ക്‌ളാമ്പിനാര്.
38<<ആണ്ടവാന്‌ദ് പേരിലി ബര റാജാവു ബാഗ്യക്കാറാ്.>>#സാമി പാട്ട് ബുക്ക് 118:26
<<മോലോഗാത്തിലി സാമിദൊപ്പ ണിമ്മദിര്‌ക്ക്‌ദ്. മോലോഗാത്തിലി സാമിക്ക് മദ്‌പ്പുണ്ടാഡൊ.>>
39ആള്‌കൂട്ടാത്തിലിര്‌ന്ത ലേസ പരിസല: <<ഗുരുവെ, ണിന്ന് സൊല്ലുപഡി ണഡാക്കവാര്‌ണ മ്‌ണ്ടാദിര്‌ക്ക്യ സൊല്ലു>> എന്ത് സൊന്നാര്.
40അക്കുളെ ഏസു അവാര്‌ക്ക്: <<ഇവാര് മ്‌ണ്ടാദാനാക്കി ഈ കല്ല്‌ഗ ആലാത്ത്‌ക്‌ളാമ്പു എന്ത് ണാന് ണിമാക്കെ സൊല്ലുറെ>> എന്ത് സൊന്നാ്.
ഏസു എര്‌സലേമ്‌ണ ണെനേത്ത് അഗ്‌റാ്
41ഏസു എര്‌സലേമ് പട്ടണാദ് അര്‌ഗെ എജ്ജ്‌ഗാട്ടി, അയ്യി പട്ടണണ ണോഡികൊണ്ട് ഇച്ചെ സൊല്ലി അഗ്‌ദാ്: 42<<ണിനാക്ക് ണിമ്മദി തരാദ് എന്തായെന്റ് ണീ ഇന്റ് തെരിന്തിര്‌ന്താക്കി സെരിയായിര്‌ന്ത്‌ദ്. ആന ഇപ്പ് ണിനാക്ക് ണെപ്പ്‌കെ്ഡേസ്യ മുഡ്യാദെ ണിന്ന് കണ്ണ്‌ക്ക് മറേന്തിര്‌ക്ക്‌ദ്. 43ണിന്ന് പോട്ടിക്കാറാര് ണിനാക്ക് സുറ്റുമ് ദ്‌ണ്ട് കെ്ട്ടി ഉള്ളുക്ക്‌മ് ബെ്ള്യേമ് പോയ ബ്‌ഡാദെ സുറ്റുവാരത്തിലിര്‌ന്ത്‌മ് ണിനാണ ജുദ്ദ സെയ്‌ര ണാള് ബരു. 44ഈ ത്‌‌ണ്ട്‌ക്കുള്ളുക്ക് ബെത്ത് താനെ ണിനാണാമ് ണിന്ന് പ്‌ള്ളെഗണാമ് മണ്ണ്‌ക്കിക്കി മെ്ട്ടി പെജേന്ത് എക്കുവാര്. ണിന്ന് പട്ടണാത്തില്യ എല്ല ത്‌ണ്ട്‌ഗണാമ് എല്ല ഗോഡെഗണാമ് തവുഡുപൊഡി ആക്കി എക്കുവാര്. എന്ത്‌ക്കെന്റ സാമി ണിനാണ കാപാറ്റ്യ ബന്താദ് ണിനാക്ക് ണെപ്പ്‌കെ്ഡേക്കാലെ.>>
ഏസു സാമികൂരേക്ക് പോരാ്
45പിന്നെ ഏസു സാമികൂരേക്കെ പോയി അദിലി ഏവാര സെയ്‌രവാര്‌ണ ബെ്ള്യെ മുഡിക്കി ബ്‌ഡ്യ പ്‌ഡിത്ത്‌കൊണ്ട് ഏസു: 46<< <എന്ന് കൂരേന പരേസ്‌റ കൂരെ എന്ത് സൊല്ലുവാര്>#എസയ്യാ് 56:7 എന്ത് എ്ള്‌ദിര്‌ക്ക്‌ദ്. ആന ണിമ്മ അദ്‌ണ <ത്‌റ്‌ട്ടാര് തങ്ക്‌റ അളെ>#ഇരെമ്യാ് 7:11 ആക്കി ബെത്തിര്‌ക്കേര്>> എന്ത് അവാര്‌ക്കെ സൊന്നാ്.
47ഏസു സാമികൂരേലി ണാള്‌ക്ക്‌മ് പഡിസി ബന്താ്. ആന എഗുദ പൂസാരി തലെവലാമ് ബേദ ബാത്ത്യലാമ് എഗുദ മൂപ്പലാമ് ഏസുണ എച്ചാറ്റ് കൊല്ല്യ ഓരാഡി കൊണ്ടേയിര്‌ന്താര്. 48ആനാല്‌മ് ഏസു സൊല്ലുറ ണായഗണ ആള്‌ഗ മദിമറാന്ത് കേ്ട്ടിര്‌ന്താദ്‌ണാലെ അവാര്‌ക്ക് ഒന്റുമ് സൊല്ല്യ മുഡ്യാദെ പോറ്റു.
Currently Selected:
ലൂക്കോസ് 19: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
