ലൂക്കോസ് 8
8
1അദ്‌ക്ക് പ്‌റ ഏസു ഒരൊരു പട്ടണാക്ക്‌റാഗാമ് ഒരൊരു ഊര്‌ക്ക്‌റാഗാമ് പോയി സാമി ആള്‌റാദ്‌ണ പറ്റി സൊല്ലുറ ണല്ല സേദിന സൊന്നാ്. ഒപ്പ തന്ന് സൊല്ലുപഡി ണഡാക്ക പന്നന്റ് ആള്‌ഗാമ് ഇര്‌ന്താര്. 2അദല്ലാദെ ണോയിലിര്‌ന്ത്‌മ് കെ്ട്ടജാദി തട്ടിര്‌ക്കാദിലിര്‌ന്ത്‌മ് സവ്വ്യാന ലേസ പെ്ണ്ണ്‌മക്കഗാമ് അവാരോഡെ ഇര്‌ന്താര്. അവാര് ആരാര്‌ഗ എന്ത, ഏ്ള് കെ്ട്ടജാദി തട്ടിര്‌ന്താദിലിര്‌ന്ത് സവ്വ്യാന മദ്ദള പട്ടണക്കാറിസി മറിയാമ് 3ണാഡ് തലെവാ് എരോദാന്‌ദ് കാര്യഗണ ണോഡി ണഡാത്ത്‌റ കൂസ് എങ്കവാന്‌ദ് പെ്ണ്ട് ഓഗന്നീമ്, സൂസന്നെ എങ്കവാമ്, ബേ്റെ ലേസ പെ്ണ്ണ്‌മക്കഗാമ്‌ത്തെ. ഈ പെ്ണ്ണ്‌മക്കഗ തമാക്കിര്‌ക്ക പണാത്തിലിര്‌ന്ത് ഏസുക്ക്‌മ് ഏസുദ് സൊല്ലുപഡി ണഡാക്കവാര്‌ക്ക്‌മ് കൊഡുത്ത് കയ്യിതാങ്കിര്‌ന്താര്.
ബെദെക്കാറാ് കദെ
4എത്തിന്യൊ പട്ടണാത്തിലിര്‌ന്ത് ഏസു പട്ട്‌ക്ക് ആള്‌ഗ ബന്ത് ബെല്ല്യൊരു കൂട്ട ആഗാട്ടി, അവാര്‌ക്കെ കദെ ദിന്‌സിലി ഏസു ഇച്ചെ സൊന്നാ്: 5<<കാഡ്‌ക്കാറാ് ഒരു ണാള് ബെദേക്ക്യ കാഡ്‌ക്കെ പോനാ്. അവാ് ബെദേത്ത് കൊണ്ടിര്‌ക്കാട്ടി ലേസ ബെദെ ബയ്യിക്കെ ബ്‌ന്ത്‌ദ്. അദ്‌ണ ആള്‌ഗാമ് മെ്ട്ടി തൊഗേത്തെക്കിനാര്, പക്കിഗാമ് ബന്ത് കൊത്തി തിന്തെക്കിറ്റ്. 6അദിലി ലേസ ബെദെ അറെക്കുദ്ദാക്കിര്‌ക്ക മണ്ണ്‌ക്കെ ബ്‌ന്ത്‌ദ്. അദ് കൊഡിത്ത് ബളാന്ത്‌ദ്. ആന പദ ഇല്ലാത്താദ്‌ണാലെ ബെക്കെ തട്ട്‌ഗാട്ടി ഉണാന്തെക്കിറ്റ്. 7ലേസ ബെദെ മുള്ളു സെ്ഡി പട്ട്‌ക്കെ ബ്‌ന്ത്‌ദ്. പയിര്‌മ് ബളാന്ത്‌ദ്. മുള്ളു സെ്ഡി ബളാന്ത് അദ്‌ണ സീര് ബീ്ത്ത്യെക്കിറ്റ്. 8ലേസ ബെദെ ണല്ല മണ്ണ്‌ക്കെ ബ്‌ന്ത്‌ദ്. അദ് കൊഡിത്ത് ബളാന്ത് ണൂറ് സലാഗെ അന്ന കെ്ഡേക്ക ദിന്‌സിലി ബെ്ളേന്ത്‌ദ്.>>
ഇദെല്ല സൊല്ലി തീന്ത പ്‌റ ഏസു ബെല്ല്യാദ്‌ക്ക് ആലാത്ത് സൊന്നാ്: <<ണാന് സൊല്ലുറാദ്‌ണ കേ്ക്ക്യ മനേസ്സിര്‌ക്കവാ് കേ്ക്കുഡൊ.>>
9ഏസുദ് സൊല്ലുപഡി ണഡാക്കവാര് ഏസുണ: <<ഈ കദേദ് പൊറുള് എച്ചെ?>> എന്ത് കേ്ട്ടാര്. 10അക്കുളെ ഏസു: <<സാമി ആള്‌റാദ്‌ണ പറ്റി മറേന്തിര്‌ക്ക പൊറുള് ണിമാക്ക്‌ത്തെ ബെ്ളിപട്ട് കെ്ഡേത്തിര്‌ക്ക്‌ദ്. ആന ണാന് ഇദ്‌ണ ബേ്റെ ആള്‌ഗാക്ക് കദെ ദിന്‌സിലിത്തെ സൊല്ലികൊഡുക്കെ. അദ്‌ണാലെ,
<അവാര്‌ക്ക് ണോഡിനാല്‌മ് കാണ്യ മുഡിരാദില്ലെ
കേ്ട്ടാല്‌മ് ണെപ്പ്‌കെ്ഡേസ്യ മുഡിരാദില്ലെ>#എസയ്യാ് 6:9 >>
എന്ത് സൊന്നാ്.
കദേദ് പൊറുള്
11<<ഈ കദേദ് പൊറുള് എച്ചെന്ത: ബെദെ എങ്കാദ് സാമി സൊല്ലുസുലാക്ക. 12ബയ്യിക്കെ ബ്‌ന്ത ബെദെ എങ്കാദ് ഒരുത്താ് സാമി സൊല്ലുസുലാക്കണ കേ്ക്കാദ്‌ത്തെ. ആന സെയിത്ത്യാ് ബന്ത് അയാള് കേ്ട്ടാദ്‌ണ മറാന്ത് തള്ള്യ ബെക്കാ്. അദ്‌ണാലെ അവാര്‌ക്ക് ണമ്പ്യമുഡ്യാദെ ദെങ്കി കഡാക്ക്യ പറ്റാദായെക്ക്‌ദ്. 13അറേല്യ മണ്ണ്‌ക്ക് ബ്‌ന്ത ബെദെ എങ്കാദ്, സാമി സൊല്ലുസുലാക്കണ കേ്ട്ട് പിര്യപിര്യാത്ത് തങ്കാരിക്കവാര്‌ത്തെ. ആന ബേര് ഇ്റാങ്ക്യ മണ്ണ് ഇല്ലാത്താദ്‌ണാലെ അവാര് ഒരു ലേസ ണാള് ണമ്പിക്കോഡെ ഇര്‌ക്കാര്. സോദണെ ബര്‌ഗാട്ടി ണമ്പിക്കേന തള്ള്യെക്കാമ് സെയ്‌രാര്. 14മുള്ളു സെ്ഡി പട്ട്‌ക്കെ ബ്‌ന്ത ബെദെ എങ്കാദ്, സാമി സൊല്ലുസുലാക്കണ കേ്ട്ട് ണഡാക്കവാര്‌ത്തെ. അച്ചെ കേ്ട്ട് ണഡാക്കവാര് ആനാല്‌മ് അവാര് മനേസ്സിലി അര്‌ക്കഗാമ് ണല്ല സുഗത്തോഡെ പെ്ളേക്ക്യുള്ള ആസെഗാമ് അവാര്‌ണ സാമി സൊല്ലുസുലാക്ക പഡി ണഡാക്ക്യ ബ്‌ഡാദെ ആക്ക്യെക്ക്‌ദ്. 15ആന ണല്ല മണ്ണ്‌ക്കെ ബ്‌ന്ത ബെദെ എങ്കാദൊ, സാമി സൊല്ലുസുലാക്കണ കേ്ട്ട് ണല്ല മനേസ്സോഡെ അദേപഡി ണഡാക്കവാര്‌മ് എന്ത ബന്താല്‌മ് പൊറിമോഡെ ഇര്‌ക്കവാര്‌മ്‌ത്തെ.>>
പട്ടഡെക്കുദ്ദാക്ക് ബെത്തിര്‌ക്ക ബ്‌ളാക്ക്
16<<ബ്‌ളാക്ക്‌ണ കത്തിസി ആര്‌മ് തെക്ക്‌ണ കമ്‌സ്യൊ, ഇല്ലെ പട്ടഡെക്കഡ്യോ ബെക്കാദില്ലെ. അദ് കൂരേക്കെ ബര എല്ലാര്‌ക്ക്‌മ് ബെ്ള്‌സ കാട്ട്‌റ പാസെ മദ്‌ള്‌ക്കുദാക്ക്‌ത്തെ ബെക്കാദ്. 17ബെ്ള്യെ കഡാക്കാദെ മറേന്തിര്‌ക്കാദ് ഒന്റുമില്ലെ. മുച്ചി ബെത്തിര്‌ക്കാദെല്ല ആള്‌ഗാക്ക് തെര്യാദേമ് ബെ്ള്യെ ബരാദേമ് ഇര്‌ക്കമാട്ട. 18അദ്‌ണാലെ ണാന് സൊല്ലുറ ഈ കാര്യഗ എന്തായെന്റ് ണിമ്മ ണെനേത്ത് ണോഡിരി. ഇര്‌ക്കവാന്‌ക്ക് ഇര്‌ക്കാദ്‌ണ ബ്‌ഡ എക്കസക്ക കൊഡുക്കുവാ്. ഇല്ലാത്തവാന്‌ക്ക് ലേസ ഇര്‌ക്ക്‌ദ് എന്ത് അയാള് ണെനേക്കാദ്‌ണ ഗൂഡി എ്ഡ്‌ത്തെക്കുവാ്.>>
ഏസുദ് അവ്വേമ് തമ്പിലാമ്
19ഏസുദ് അവ്വേമ് തമ്പിലാമ് ഏസുണ ണോഡ്യ ബന്താര്. ആന ബെല്ല്യൊരു ആള്‌കൂട്ട ഇര്‌ന്താദ്‌ണാലെ ഏസു പട്ട്‌ക്ക് അവാര്‌ക്ക് പോയ മുഡ്യാലെ. 20അക്കുളെ ഒരുത്താ് ബന്ത്: <<ണിന്ന് അവ്വേമ്, തമ്പിലാമ് ണിനാണ കാണ്യ ബെ്ള്യെ ബന്ത് കാത്തിര്‌ക്കാര്>> എന്ത് സൊന്നാ്.
21അക്കുളെ ഏസു അവാര്‌ക്ക്: <<സാമി സൊല്ലുസുലാക്ക കേ്ട്ട് അദേപാസെ പെ്ളേക്കവാര്‌ത്തെ എന്ന് അവ്വേമ് തമ്പിലാമ്>> എന്ത് സൊന്നാ്.
ഏസു ബെല്ല്യ കാറ്റ്‌ണ അഡാക്ക്‌റാ്
22ഏസു ഒരു ണാള് തന്ന് സൊല്ലുപഡി ണഡാക്കവാര്‌ക്കെ: <<ണമ്മ അയ്യേ്ട്ടി പോഗായി>> എന്ത് സൊന്നാ്. അച്ചെ തോണിക്കെ ഏ്റി പോനാര്. 23അച്ചെ അവാര് തോണിലി പോയി കൊണ്ടിര്‌ക്കാട്ടി തോണിലി ഏസു ഉറാങ്കി എക്കിനാ്. അക്കുളെ ബെല്ല്യ ഒരു കാറ്റ് അഡിത്ത്‌ദ്. തണ്ണി തോണിക്കെ തുമ്പി തോണി മുങ്ക്യെക്ക്യ ആറ്റ്. അച്ചെ അവാര് ബെല്ല്യ ഒരു അവങ്കേ്ഡ്‌ക്ക് സിക്കിനാര്.
24ഏസുദ് സൊല്ലുപഡി ണഡാക്കവാര്: <<പണ്ണാഡ്യെ, പണ്ണാഡ്യെ, എമ്മ തണ്ണിക്ക് മുങ്ക്യെക്ക്യ പോരേര്>> എന്ത് സൊല്ലി ഏസുണ ഒളേത്ത് ഏ്ത്തിനാര്.
അക്കുളെ ഉറാങ്കിര്‌ന്ത ഏസു എ്ന്താ്. പ്‌റ കാറ്റ്‌ണാമ് തെരെനാമ് <<അഡാങ്ക്>> എന്ത് കെഞ്ച്യെ്ഡ്‌ത്ത് ബ്‌ട്ടാ്. അക്കുളെ സപ്പെന്താറ്റ്. 25ഏസു തന്ന് സൊല്ലുപഡി ണഡാക്കവാര്‌ണ കേ്ട്ടാ്: <<ണിമ്മ്‌ദ് ണമ്പിക്കെ ഏദിലി?>>
അക്കുളെ അവാര് കോവെ പ്‌ഡിത്ത് അദിസ്യത്തോഡെ: <<ഇയാള് എപ്പോറ് പട്ട ആള്? കാറ്റ്‌ണാമ് തെരെനാമ് <അഡാങ്ക്> എന്ത് സൊല്ലുറാ്. അദ് അദേപാസെ കേ്ക്ക്‌ദ്>> എന്ത് തമാക്ക് തമാക്ക് സൊന്നാര്.
കെ്ട്ടജാദി തട്ടിര്‌ക്കവാന ഏസു തെ്ള്‌സ്‌റാ്
26അച്ചെ അവാര് ഗെലീലെ കഡാല്‌ക്ക് അയ്യേ്ട്ടിര്‌ക്ക ഗരെസേനെ ണാഡ്‌ക്ക് എജ്ജിനാര്. 27ഏസു ഏ്ട്ടിക്കെ ഏ്റിനാദ്‌മ് പട്ടണാത്തിലിര്‌ന്ത് ബര കെ്ട്ടജാദി തട്ടിര്‌ക്ക ഒരുത്താന കണ്ടാ്. അയാള് എത്തിന്യൊ ണാള് കൂരെക്ക്‌റാഗ അണ്ടാദേമ് സീലെസിലാപ്പ് ഒന്റുമ് കെ്ട്ടാദേമ് സുഡാലെക്ക്‌റാഗ ഇര്‌ന്ത് ബന്താ്. 28ഇയാള് ഏസുണ കണ്ടാദ്‌മ് അഗാറികൊണ്ട് കാല്‌ക്ക് സഡാങ്ക ബ്‌ന്ത്: <<ഏസുവെ, എല്ലാദ്‌ണാമ് ബ്‌ഡ മ്‌ഗ്‌ന്ത സാമിമഗാനെ, എനാക്ക്‌മ് ണിനാക്ക്‌മ് എന്ത കാര്യ? എനാണ സെറ്റെ ദണ്ടിക്കാഗെ ബേ്ഡ>> എന്ത് ബെല്ല്യാദ്‌ക്ക് സൊന്നാ്. 29അയാളിലി ഇര്‌ന്ത് ബെ്ള്യെ കഡാന്ത് പോ എന്ത് ഏസു സൊന്നാദ്‌ക്ക്‌ത്തെ ഈ ജാദി ഇച്ചെ സൊന്നാദ്. ഇവാന അയ്യി ജാദി എപ്പ്‌മ് തനാക്ക് പ്‌ഡിത്ത പാസെ സെയ്‌സിര്‌ന്ത്‌ദ്. ഇയാള്‌ദ് കയ്യികാല്‌ണ കയ്യികുട്ടേക്ക്‌മ് സങ്കിളിക്കേമ് ആള്‌ഗ കെ്ട്ടി ബെത്ത്‌ട്ട് ഗൂഡി അദ്‌ണെല്ല പറ്‌ത്തെക്കി ആര്‌മ് ഇല്ലാത്ത പട്ട്‌ക്കെ അയ്യി ജാദി അവാന കൂട്ടി പോയിര്‌ന്ത്‌ദ്.
30ഏസു അവാന കേ്ട്ടാ്: <<ണിന്ന്‌ദ് പേര് എച്ചെ?>>
മൊത്തന കെ്ട്ടജാദിഗ ഇര്‌ന്താദ്‌ണാലെ <<ലെഗ്യോന്>> എന്ത് അയാള് സൊന്നാ്. 31<<എമാണ സെറ്റെ മൂട്ടില്ലാത്ത കുയ്യിക്കെ ബ്‌ഡ ബേ്ഡാമെ>> എന്ത് കെ്ട്ടജാദിഗ ഏസുക്കെ സൊല്ലിറ്റ്.
32അയ്യി മലെ പത്തേലി ഒരു കൂട്ട പന്റി മേന്തിര്‌ന്ത്‌ദ് <<എമ്മ അയ്യി പന്റി കൂട്ടാക്ക് പോയാഗ?>> എന്ത് ഏസുണ കേ്ട്ട്‌ദ്. അക്കുളെ ഏസു അദ്‌ക്ക് അന്‌മദി കൊഡുത്താ്. 33കെ്ട്ടജാദിഗ അയാള്‌ണ ബ്‌ട്ട് പന്റിക്കെ പോയി പുക്കിറ്റ്. അച്ചെ പന്റിഗ മലെ ഉച്ചിക്കെ ഓഡി പോയി അദിലിര്‌ന്ത് കഡാല്‌ക്കെ ബ്‌ന്ത് സത്ത്‌ദ്.
34പന്റി മേസിര്‌ന്തവാര് ഇദ്‌ണ കണ്ടാദ്‌മ് ഓഡി പോയി പട്ടണാക്കേമ് അര്‌ഗെ സുറ്റിര്‌ക്ക ഊര്‌ക്ക്‌റാഗാമ് ഈ സേദിന സൊന്നാര്. 35അക്കുളെ ആള്‌ഗ എന്ത ണഡാന്ത്‌ദ് എന്ത് തെര്യ ബേ്ണ്ടി അദ്‌ക്കെ ബന്ത് കൂഡിനാര്. അവാര്‌ഗ ഏസു പട്ട്‌ക്ക് ബന്ത് ണോഡുഗാട്ടി കെ്ട്ടജാദി തട്ടിര്‌ന്തവാ് ബുദ്ദി തെ്ളിന്ത് സീലെസിലാപ്പ് കെ്ട്ടി ഏസുദ് കാലര്‌ഗെ കുക്കാന്തിര്‌ക്കാദ്‌ണ കണ്ട് കോവെപട്ടാര്. 36കെ്ട്ടജാദി തട്ടിര്‌ക്കവാ് എച്ചെ തെ്ളിന്താ് എന്ത് ഇദ്‌ണ കണ്ടിര്‌ന്തവാര് ബന്ത് എജ്ജിനവാര്‌ക്ക് സൊല്ലികൊഡുത്താര്. 37അദ്‌ക്കെ ബന്ത് കൂഡിന ഗരെസേനെ ണാഡില്യ ആള്‌ഗ: <<ഇദ്‌ണ ബ്‌ട്ട് സെറ്റെ പോഡോമെ>> എന്ത് ഏസുക്ക് സൊന്നാര്. എന്ത്‌ക്കെന്റ അവാര് എല്ലാര്‌ക്ക്‌മ് കോവെപ്‌ഡിത്തിര്‌ന്ത്‌ദ്. അച്ചെ ഏസു തോണിക്ക് ഏ്റി പോനാ്.
38അക്കുളെ കെ്ട്ടജാദി ബ്‌ട്ട് തെ്ളിന്തവാ്: <<ണാന്‌മ് ണിന്ന്‌ദ് ഒപ്പ ബരെ>> എന്ത് ഏസുണ കേ്ട്ടാ്. 39അക്കുളെ ഏസു: <<ണീ ണിന്ന്‌ദ് കൂരേക്കെ പോയി സാമി ണിനാക്ക് സെയ്‌ദാദ്‌ണെല്ല എല്ലാര്‌ക്ക്‌മ് സൊല്ലു>> എന്ത് സൊന്നാ്. അച്ചെ അയാള് പോയി ഏസു തനാക്ക് സെയ്‌ദാദ്‌ണെല്ല പട്ടണാത്തില്യവാര്‌ക്ക് ഒട്ടുക്ക് സൊന്നാ്.
ആയിറോസ് മഗാമ് ഒരു ണോയിക്കാറ്‌സിമ്
40ഏസു തിലിമ്പി എജ്ജ്‌ഗാട്ടി അയാള്‌ക്ക് ബേ്ണ്ടി കാത്തിര്‌ന്ത എല്ല ആള്‌ഗാമ് അയാള്‌ണ പിര്യപിര്യാത്ത് തങ്കാരിത്താര്. 41അയ്യി ഗള്യേലിതാനെ എഗുദാര് പരേസ്‌റ കൂരേല്യ അദിഗാരി ആയിര്‌ക്ക ആയിറോസ് ഏസു കാല്‌ക്കെ ബ്‌ന്ത് കുമ്മുഡി: <<എന്ന് കൂരേക്കെ സെറ്റെ ബരുഡോമെ>> എന്ത് സൊന്നാ്. 42എന്ത്‌ക്കെന്റ അയാള്‌ദ് പന്നന്റ് ബയ്യിസുള്ള ഒരേ ഒരു മഗ സായ ആയിര്‌ന്ത.
അച്ചെ ഏസു ആങ്കെ പോയി കൊണ്ടിര്‌ക്കാട്ടി ആള്‌ഗ അവാന ണെഗ്‌സി കൊണ്ടിര്‌ന്താര്. 43പന്നന്റ് ബര്‌സ കാല പൊലെ ബെ്ട്ട്‌റ ണോയിക്കാറ്‌സി ആയിര്‌ന്ത ഒരുത്തി അയ്യി കൂട്ടാത്തിലിര്‌ന്ത. അവ തന്ന്‌ദ് സൊത്തുമുദാല്‌ഗണെല്ല സിലാവളിത്ത്‌മ് അവാണ ആര്‌ക്ക്‌മ് ണോയി തെ്ള്‌സ്യ മുഡ്യാലെ. 44അവ ഏസു പിന്ന് സാരി പോയി അയാള് ജൊഗേദ് താനെന അണ്ണിന. അപ്പ്‌താനെ അവാള്‌ദ് പൊലെ ബെ്ട്ട്‌റാദ് ണിന്റ്‌ദ്.
45അക്കുളെ ഏസു: <<എനാണ അണ്ണിനാദ് ആര്?>> എന്ത് കേ്ട്ടാ്.
അവാരൊട്ടുക്ക് <<ണാനല്ല ണാനല്ല>> എന്ത് സൊന്നാര്.
അക്കുളെ പത്ത്‌റോസ്: <<പണ്ണാഡ്യെ, ണിനാണ ആള്‌ഗ ണെഗ്‌സി കൊണ്ടിര്‌ക്കാരല്ല?>>
46അദ്‌ക്ക് ഏസു: <<ആരൊ എനാണ അണ്ണിനാര്. എന്നോഡിര്‌ന്ത് സക്‌ദി പോറ്റു എന്ത് എനാക്ക് തെരിന്ത്‌ദ്>> എന്ത് സൊന്നാ്.
47അക്കുളെ ഇനി ഒളിന്തിര്‌ക്ക്യ മുഡ്യമാട്ട എന്ത് തെരിന്താദ്‌ണാലെ അവ സദ്‌റബെ്ട്ടി കൊണ്ട് ഏസുദ് കാല്‌ക്ക് സഡാങ്ക ബ്‌ന്ത. പ്‌റ ഏസുണ താന് എന്ത്‌ക്ക് അണ്ണിനാദ് എന്ത്‌മ് അണ്ണ്‌ഗാട്ടി എച്ചെ ണോയി തെ്ളിന്ത്‌ദ് എന്ത്‌മ് എല്ല ആള്‌ഗ മുന്നുക്ക് തുറാന്ത് സൊന്ന. 48അക്കുളെ ഏസു അവാക്കെ: <<അമ്മെ പൊന്നി, ണിന്ന് ണമ്പിക്കെ ണിന്ന് ണോയിന തെ്ള്‌സിറ്റ്. ണീ ണിമ്മദ്യോഡെ പോ>> എന്ത് സൊന്നാ്.
49ഏസു ഇച്ചെ പേസികൊണ്ടിര്‌ക്കാട്ടി എഗുദാര് പരേസ്‌റ കൂരേദ് അദിഗാരി ആയിറോസ്‌ദ് കൂരേലിര്‌ന്ത് ഒരുത്താ് ബന്ത്: <<ണിന്ന് മഗ ജീവാ് പോറ്റു. ഇനി ഗുരുവുണ തൊന്തറെ പഡ്‌സ ബേ്ഡ>> എന്ത് സൊന്നാ്.
50ഇദ്‌ണ കേ്ട്ട് ഏസു: <<അഞ്ചാദെ, ണമ്പിന മദി. അവ ഉജുറേ്വ>> എന്ത് സൊന്നാ്.
51ഏസു ആയിറോസ്‌ദ് കൂരേക്കെ എജ്ജിന പ്‌റ, കൂരെക്കുള്ളുക്ക് പോഗാട്ടി പത്ത്‌റോസ്‌ണാമ്, ഓഗന്നാനാമ്, ആക്കോവുണാമ് പിന്നെ അയ്യി പ്‌ള്ളേദ് അവ്വപ്പലണാമ്‌ത്തെ കൂട്ടി പോനാദ്. ഇവാര്‌ണ അല്ലാദെ ബേ്റെ ആര്‌ണാമ് കൂട്ടി പോഗാലെ. 52അക്കുളെ ആള്‌ഗ അഗ്‌ദ് ബ്‌ന്ത് ഗിജ്‌റ് ബെ്ട്ടികൊണ്ടിര്‌ന്താര്. അദ്‌ക്ക് ഏസു: <<ണിമ്മ അഗാദി, പ്‌ള്ളെ സാഗാലെ ഉറാങ്ക്‌റ>> എന്ത് സൊന്നാ്.
53പ്‌ള്ളെ സത്ത്‌ദ് എന്ത് അവാര്‌ക്ക് തെരിന്താദ്‌ണാലെ അവാന ണാണഗെ്ഡ്‌സികൊണ്ട് ണീ്ത്താര്. 54ആന ഏസു അയ്യി പ്‌ള്ളേദ് കയ്യിന പ്‌ഡിത്ത്: <<അമ്മെ, എ്ന്ത്>> എന്ത് ബെല്ല്യാദ്‌ക്ക് സൊന്നാ്. 55അപ്പ്‌താനെ പ്‌ള്ളേക്ക് ഉജുറു ബന്ത്‌ദ്. അവ എ്ന്ത പ്‌റ ഏസു അവാര്‌ക്ക്: <<അവാള്‌ക്ക് തിന്ന്യ എന്താറ്റ് കൊഡിരി>> എന്ത് സൊന്നാ്. 56അയ്യി പ്‌ള്ളേദ് അവ്വപ്പല ഇദ്‌ണ കണ്ട് അദിസ്യപട്ടാര്. ആന ഏസു അവാര്‌ക്ക് ഈ ണഡാന്ത കാര്യണ കണ്ടിപ്പായി ആര്‌ക്ക്‌മ് ണിമ്മ സൊല്ല ബേ്ഡ എന്ത് സൊന്നാ്.
Currently Selected:
ലൂക്കോസ് 8: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
