മത്തായി 17
17
ഏസുദ് ഉരുവു മാറ്‌ദ്
1ആറ് ണാള് പോന പ്‌റ ഏസു പത്ത്‌റോസ്‌ണാമ് ആക്കോവുണാമ് അയാള്‌ദ് തമ്പി ഓഗന്നാനാമ് കൂട്ടി, ഒച്ചാരി ഒരു ഉജാന്ത മലേക്കെ പോനാ്. 2അവാര് ണോഡിര്‌ക്ക ഇര്‌ക്ക ഏസുദ് ഉരുവ മാറിറ്റ്. അവാന്‌ദ് മൂഞ്ചി ണേരണ പാസെ ബെ്ഡിന്ത് തള്ളിറ്റ്. അദേപാസെ തന്ന് ഉഡുപ്പുമ് പാല് പാസെ ബെ്ഡിന്തെക്കിറ്റ്. 3അപ്പ്‌താനെ മോസേമ് ഏല്യാവുമ് ബെ്ളിപട്ട്, ഏസോഡെ ണായ പേസ്‌റാദ്‌ണ അവാര് കണ്ടാര്.
4അക്കുളെ പത്ത്‌റോസ് ഏസുക്കെ: <<ആണ്ടവാനെ, ണമ്മ ഇദിലി ഇര്‌ക്കാദ് എത്തറാഗൊ ണല്ലാദാറ്റ്. ണിനാക്ക് പിര്യ ഇര്‌ന്ത ണാന് മൂണ് സാളെ ബെത്ത് തരെ. ഒന്റു ണിനാക്ക്‌മ്, ഒന്റു മോസേക്ക്‌മ്, ഒന്റു ഏല്യാവുക്ക്‌മ്>> എന്ത് സൊന്നാ്.
5പത്ത്‌റോസ് ഇച്ചെ സൊല്ലികൊണ്ടിര്‌ക്കാട്ടി താനെ ബെ്ഡിന്തെക്കിന ഒരു മഞ്ച് ബന്ത് അവാര്‌ണ മുച്ചി അദിലിര്‌ന്ത്: <<ഇവാ്ത്തെ എനാക്ക് മെച്ച്‌പ്‌ഡിത്ത മഗാ്. ഇവാനാലെ എന്ന് മനേസ്സ് തെ്ളിന്ത്‌ദ്. ഇവാന്‌ദ് ണായണ കേ്ളിരി>> എന്ത് ഒരു ജദ്ദ ബന്ത്‌ദ്.
6ഏസുദ് സൊല്ലുപഡി ണഡാക്കവാര് ഇദ്‌ണ കേ്ട്ട് ഒരേപെ്ട്ട് അഞ്ചി അദ്‌ക്കെ താനെ കവുക്കണ്ണി ബ്‌ന്താര്. 7ഏസു അവാര്‌ദ് അര്‌ഗെ പോയി അവാര്‌ണ അണ്ണി: <<അഞ്ചാദി, എ്ന്തി>> എന്ത് സൊന്നാ്. 8അവാര് അണ്ണാന്ത് ണോഡുഗാട്ടി ഏസുണ അല്ലാദെ ബേ്റെ ആര്‌ണാമ് കാണാലെ.
9അവാര് മലേലിര്‌ന്ത് ഇ്റാങ്കി ബര്‌ഗാട്ടി ഏസു അവാര്‌ക്കെ: <<മന്‌സാനായി പ്‌റാന്തവാ് സത്തവാര് പട്ടിലിര്‌ന്ത് ഉജുറെ്ന്ത് ബരമാട്ട്‌ക്ക് ണിമ്മ ഇപ്പ് കണ്ടാദ്‌ണ കണ്ടിപ്പായി ആര്‌ക്ക്‌മ് സൊല്ല ബേ്ഡ>> എന്ത് കല്‌പനെ കൊഡുത്താ്.
10അക്കുളെ തന്ന് സൊല്ലുപഡി ണഡാക്കവാര്: <<ആന, മുദ ഏല്യാവു ബരുഡൊ എന്ത് ബേദ ബാത്ത്യല സൊല്ലുറാദ് എന്ത്‌ക്ക്?>> എന്ത് കേ്ട്ടാര്.
11അദ്‌ക്ക് ഏസു: <<കണ്ടിപ്പായിമ് മുദ ഏല്യാവു ബന്ത് എല്ല കാര്യഗണാമ് മറ്‌ദെ ണലമായി സെയ്‌ദ് മുഡിക്കുവാ്. 12ആന ണാന് ണിമാക്കെ സൊല്ലുറെ, ഏല്യാവു ബന്ത് മുഡിന്ത്‌ദ്. എന്താല്‌മ് അയാള്‌ണ ആരെന്ത് തെര്യാദെ അവാര് തമാക്ക് ണെനേത്ത പാസെ അയാള്‌ണ സെയ്‌ദാര്. അദ്‌ണ പാസെത്തെ മന്‌സാനായി പ്‌റാന്തവാന്‌മ് അവാര് കയ്യാലെ കജട്ടപഡ്യ പോരാ്>> എന്ത് സൊന്നാ്. 13അക്കുളെ സൊല്ലുപഡി ണഡാക്കവാര്‌ക്ക് ഈ സൊന്നാദ് തണ്ണിക്ക് മുളുഗ്‌സ്‌റ ഓഗന്നാന പറ്റിത്തെ എന്ത് ണെപ്പ്‌കെ്ഡേത്ത്‌ദ്.
കെ്ട്ടജാദി ണമ്പിന ഒരു മ്‌ഗാണ തെ്ള്‌സ്‌റാ്
14ഏസുമ് തന്ന് സൊല്ലുപഡി ണഡാക്കവാര്‌മ് മലേലിര്‌ന്ത് ബന്ത് ആള്‌കൂട്ടാക്കെ എജ്ജിനാദ്‌മ് ഒരുത്താ് ഏസുദ് മുന്തുക്ക് ബന്ത് സന്ത് ഊന്റി ഇച്ചെ സൊന്നാ്: 15<<ആണ്ടവാനെ, എന്ന് മഗാനോഡെ സെറ്റെ ബേ്റ്‌വേഡോമെ. അവാന്‌ക്ക് പക്കിമെ്ട്ട് ണോയി ബന്ത് എ്ഡേക്കെ്ഡേക്ക് തീക്കേമ് തണ്ണിക്കേമ് ബീ്ത്ത്‌ദ്. അച്ചെ അവാ് റമ്പ കജട്ടപഡ്‌റാ്. 16ണാന് അവാന ണിന്ന് സൊല്ലുപഡി ണഡാക്കവാര് പട്ട്‌ക്കെ എ്ഡ്‌ത്ത് ബന്തെ. ആന അവാര്‌ക്ക് അവാന സവ്വ്യാക്ക്യ മുഡ്യാലെ.>>
17അദ്‌ക്ക് ഏസു: <<ണമ്പിക്കില്ലാത്തവാര്‌മ് ണേരെമൊറെ പെ്ളേക്കാത്തവാര്‌മാന ഇപ്പേത്ത കാലാത്തില്യ ആള്‌ഗാളെ, ണിമ്മോഡെ ണാന് എത്തിനി ണാള് ഇര്‌ക്കുവെ? എത്തിനി എന്ത് ണിമ്മ് ണമ്പിക്കെ കൊറേന ണാന് താങ്കുവെ? അവാന ഈങ്ക് എ്ഡ്‌ത്ത് ബാ>> എന്ത് സൊന്നാ്. 18പ്‌റ ഏസു കെ്ട്ടജാദിന കെഞ്ചി എ്ഡ്‌ത്ത് ബ്‌ട്ടാ്. അക്കുളെ അയ്യി ജാദി അയ്യി മ്‌ഗാണ ബ്‌ട്ട് പോറ്റു. അപ്പ്‌താനെ മ്‌ഗ സവ്വ്യാനാ്.
19തന്ന് സൊല്ലുപഡി ണഡാക്കവാര് തമ്മ താനെ ഇര്‌ക്കാട്ടി ഏസുണ കേ്ട്ടാര്: <<എമാക്ക് എന്ത്‌ക്ക് അയ്യി കെ്ട്ടജാദിന ഒയിപ്പിസ്യ മുഡ്യാലെ?>>
20അദ്‌ക്ക് ഏസു: <<ണിമ്മ് അരെഗൊര്യ ണമ്പിക്കെണാലെത്തെ. ണേര്‌മായിമ് ണാന് ണിമാക്കെ സൊല്ലുറെ, ണിമാക്ക് സിന്ന കഡ്‌ഗ് ബെദേക്ക് സമ സാമ്യോഡെ ണമ്പിക്കെ ഇര്‌ന്താക്കി ഈ മലേന: <ഇദിലിര്‌ന്ത് അക്കോസ പോ> എന്ത് സൊന്ന അദ് പോവു. ണിമാക്ക് മുഡ്യാത്താദായി ഒന്റുമില്ലെ. 21(ആന പരേസണാലേമ്, തീനി തിന്നാത്ത പരേസണാലേമ് അല്ലാദെ ഈ ജാദി ഒയിന്ത് പോഗമാട്ട#17:21ആന പരേസണാലേമ്, തീനി തിന്നാത്ത പരേസണാലേമ് അല്ലാദെ ഈ ജാദി ഒയിന്ത് പോഗമാട്ട ഈ സുലാക്ക മുദ ഇര്‌ന്ത കായിദണ ണോഡി എ്ള്‌ദിന പഗ്‌ദി കായിദാത്തിലി ഇല്ലെ. ) എന്ത് ണേര്‌മായിമ് ണാന് ണിമാക്കെ സൊല്ലുറെ>> എന്ത് സൊന്നാ്.
സാരാദ്‌ണ പറ്റി പിന്നേമ് സൊല്ലുറാ്
22അവാര് ഗെലീലേലി ഒന്റായി കൂഡിന പ്‌റ ഏസു അവാര്‌ക്കെ: <<മന്‌സാനായി പ്‌റാന്തവാന മന്‌സാര് കയ്യിക്ക് ഒപ്പഡിക്ക്യ പക്കാറ്റ്. 23അവാര് അവാന കൊല്ലാമ് സെയ്‌വാര്, സാമി അവാന മൂണാവദ് ണാള് എങ്കാട്ടി ഉജുറേ്ത്താമ് സെയ്‌വാ്>> എന്ത് സൊന്നാ്. അക്കുളെ ഏസുദ് സൊല്ലുപഡി ണഡാക്കവാര് അദ്‌ണ കേ്ട്ട് റമ്പ ദുക്കപട്ടാര്.
ഏസു സാമികൂരെക്കുള്ള ണ്‌ഗ്‌ദി പണ കെ്ട്ട്‌റാ്
24അവാര് കവറ്‌ണഗൂമുക്കെ എജ്ജ്‌ഗാട്ടി സാമികൂരേക്ക് ബേ്ണ്ടി ണ്‌ഗ്‌ദി പിരിക്കവാര് പത്ത്‌റോസ്‌ണ: <<ണിമ്മ്‌ദ് ഗുരു സാമികൂരെക്കുള്ള ണ്‌ഗ്‌ദി പണ അഡേക്കാദുണ്ട?>> എന്ത് കേ്ട്ടാര്.
25അക്കുളെ അവാ്: <<അഡേക്കാദുണ്ടു>> എന്ത് സൊന്നാ്.
പ്‌റ പത്ത്‌റോസ് കൂരേക്കെ ബന്ത് എജ്ജിനാദ്‌മ്, മുദ ഏസു അവാന കേ്ട്ടാ്: <<സീമോനെ ണീ എന്ത ണെനേക്കെ? ഉലഗാത്തില്യ റാജാവുഗ എല്ല ദിന്‌സ് ണ്‌ഗ്‌ദിഗാമ് പിരിക്കാദ് മഗനാരോഡെഗൊ ഇല്ലെ ഒച്ചാരില്യവാരോഡെഗൊ?>> എന്ത് കേ്ട്ടാ്.
26അക്കുളെ പത്ത്‌റോസ്: <<ഒച്ചാരില്യവാരോഡെ ഇര്‌ന്ത്>> എന്ത് സൊന്നാ്.
ഏസു അവാന്‌ക്കെ: <<ആന മഗനാര് അദ് കൊഡുക്ക ബേ്ഡല്ല. 27എന്താല്‌മ് അവാര് ണമാണ മൊനെപഡാദിര്‌ക്ക്യ ബേ്ണ്ടി ണീ കഡാല്‌ക്ക് പോയി തൂണ്ടബ്‌ട്ട് മുദ കെ്ഡേക്ക മീന്‌ണ എ്ഡ്, അദ്‌ദ് ബായിലി ഒരു പണ ഇര്‌ക്കു. അദ്‌ണ എ്ഡ്‌ത്ത് ബന്ത് എനാക്ക്‌മ് ണിനാക്ക്‌മ് ബേ്ണ്ടി ണ്‌ഗ്‌ദി അഡെ>> എന്ത് സൊന്നാ്.
Currently Selected:
മത്തായി 17: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
