Wïlöölö 14
14
Kanya Ö Abrammi Na Duu Løøt Kanya Maai Ri Leny
1'Ba ki yïth nïra bëët Amrapëlli na nyeny Cinaar, ki Aryök nyeny Elacar, ki Kedör-Laömer nyeny Ilam, ki Tidal nyeny Göyim, da gïn mo otägö. 2Nyeye moøgø aci baŋ leny ki Bera nyeny Cødam, ki Birca nyeny Gømöra, ki Cenaap nyeny Adama, ki Cëmëber nyeny Dheböym ki nyeny Bëla paana cwøl ni Dhöär. 3Nyeye moøgø na abïïc yøø dëëtge adwalge na aciel kiper leny yi Gool mar Cidim na tïmö na Naam Acäbö. 4Kiper gena kwøŋ bëëdö tier nyeya ma Kedör-Laömer ki cwiiri apaar kurriiø. 'Ba na tïme na ri cwiiri apaar kurdäk gena gëëmö ki gø.
5'Ba kanya tïme na ri cwiiri apaar kurŋween, Kedör-Laömer ki nyeye moa en ree, gena cøø ni dïïmge jø Rapayim yi Actharöth-Karnayim, ni dïïmge jø Dhudhim yi Kaam ki jø Ëmim yi Caawe-Kiryatayim, 6ni dïïmge jø Öör poge ma Cëër na näk po kïte, këël mana këët El-Paran na en deŋ paap. 7Køøre dëëtge aløkge ni cige ya Ayn-Micpath na näk Kadëc, ni dïïmge mïëri bëët mo jø Amalëk, ni dïïmge jø Amör thuwø ni wø bëëdö yi Acëcön-Tamar.
8Kanyøgøøni nyeny Cødam, ki nyeny Gømöra, ki nyeny Adama, ki nyeny Dheböym, ki nyeny Bëla na näk Dhöär, gena ö wøk ni jiiŋge dëëtge kiper leny yi gool mar Cidim; 9nee këëtge ki Kedör-Laömer nyeny Ilam, ki Tidal nyeny Göyim, ka Amrapël nyeny Cinaar ki Aryök nyeny Elacar, ni nyeye aŋween këëdi ka nyeye abïïc. 10'Ba yi gool mar Cidim da aguule mo thööth mo päŋ ko odhöönh mo nwaaŋ. Kanya ö nyeny Cødam ki nyeny Gømöra na bwøkge, gena reeŋø ni päthge yïth aguule. 'Ba moa bøth areeŋø ni pïïcge bäät kïte. 11Køøre nyeye moa näk aŋween jap jø Cødam bëët ki jap jø Gømöra ki caammi moge bëët alwørge ni aacge. 12Ni makge Løøt thuwø o cöök Abrammi, ni lwørge jammi moe ni aacge. Kiper Løøt kar kaaca bëëdö Cødam.
13'Ba ŋat mør mo obøth aöö ni caan gø jï Abram na näk nyï Ibaru. Kar kaaca Abram bëëdö buut jera døøŋŋø mo Mamrë nyï Amör na näk cöök Ëcköl ka Anër. Jøøgø gena dwätö ka Abram ni tïmge ni ge ena løøe. 14'Ba kanya wïnynyi Abrammi ni o coki amak ri leny, jiye ma dïpe adäk ka apaar ka abära moa nywøl paare na näk opwönynyö abwødhe kiper leny; ni aacge ni ge määnyö këël mana këëtge Daan. 15Ni ö Abrammi ni pääŋ jiye ki dï wäär, ni ö eni ki jiye ni tukge jøøkeeni, ni böötge geni ni riemge geni këël mana këëtge Ööba na en ŋää Damacka. 16Køøre jammi bëët aduue, ni lwør o coki ma Løøt ki jape ki mään ki jiy, ni duu geni bëët.
Kanya Ö Melkidhedeki na Gwïëth Abram
17Kanya duu Abrammi ki kuna dïïm Kedör-Laömer ki nyeye moa en ree, nyeny jø Cødam aci wøk baŋ gø kuna jøl gø yi gool mar Caawe na näk gool mar nyeya.
18Ni ö Melkidhedeki nyeny Calem ni känne ki dääpe ki køøŋø. Melkidhedek beeye kwääy lam thuwø mar Jwøa Dwøŋ ni en Maal. 19Eni Abram agwïëdhe, ni kööe,
ni «Gwïëth oen bäät Abram na näk dhaanh Jwøa Dwøŋ ni en Maal,
Jwøa en maalli cere ki piny;
20ni ö pwøci ni en jï Jwøa Dwøŋ ni en Maal,
Jwøa cïp nyïïmän moï cerï.»
Køøre Abram acïpö jï Melkidhedek ki paac wïth jammi bëët.
21Ni kö nyeny Cødam jï Abram, ni «Mëëk a jiya keerge, ni lwørï jammi na moï.» 22'Ba Abram aköö jï nyeny Cødam, ni «Aano nø kööŋ ŋëët Wuuö Jwøk, Jwøa Dwøŋ ni en Maal, Jwøa en maalli cere ki piny, 23ni aani a ba doo løny ki man käda ki gïn mo thiinh, këël waarø wala thøør warø wala nyi gïn mør jaak ma marï; kiper kanymør ï köö jaak, na ‹Abram tïïya aani na kwäärö ki jammi.› 24Aani bäŋ gïn mo lwøra, 'ba beeye gïïa cam jiya keerge. 'Ba kiper kur jøøa aay ki aani, na näk Anër ki Ëcköl ki Mamrë, beerra man lwørge kurge.»
Currently Selected:
Wïlöölö 14: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
