Wïlöölö 16
16
Kanya Ö Abrammi Na Joot Icmiel Ki Eegar Laŋ Caray
1'Ba Caray na näk cï Abram bäŋ obwöre mo ege nywølø ka Abram. 'Ba jïre da laŋŋø ma nyi jø Ijep mo nyeŋŋe cwøl ni Eegar. 2Ni kö Caray jï Abram, ni «Ennø, Wuuö Jwøk aana mäne ki man nyööda ko obwöre. Beerra man ciï baŋ dhaaŋŋa näk laŋŋø mara; kanymør aano jïti ko obwöre ki køøre.» Køøre Abram dwør cïïe ma Caray aleŋe.
3Ni ö Caray cï Abram ni lwør Eegar nyi jø Ijep na näk laŋŋø mare, ni cïp gø jï cwøre ma Abram nee tïme na cïïe. Ni gïnögø tägi ka køør cwiiri apaar moa beet Abrammi yi ŋööm Keenan. 4Ni ö Abrammi ni ci baŋ Eegar, ni jït yi Eegarri ki dhaanhø. 'Ba kanya ö Eegarri na joot gø ni yie da dhaanhø, ena tägö ki man raŋ Caray na tïnynye ni ee taaø. 5Køøre Caray aköö jï Abram, ni «Bääyö mana baac Eegarri dëëra en, tiere käla baŋï, kiper nyaana näk laŋŋø mara acïba jïrï na cïïï; 'ba kanya joot gø ni yie da dhaanhø, aana raŋŋe naa ee taaø. Beerra man ö Wuuö Jwøki ni ŋøl luubö manøgø yïthakiyø ki ïïni.»
6'Ba Abram aköö jï Caray, ni «Kare møn, laŋŋø manøgø ena cerï; gïna caarï ni beerra eni jaak ki jïrï wär tïïyï dëëre.» Køøre Caray laŋŋøgø aput caannø ki caannø mo leth, ni ö nyaanøgø ni put päär wøk buute.
7Kanyøgøøni Eegar ajoot nyïïatwielli mar Wuuö Jwøk ni ena buut jøøro dï paap, ni jøøro manøgø ena jööra näk cøøa paana cwøl ni Cur. 8Ni kö nyïïatwielli jïre, ni «?Eegar laŋ Caray, ï kälï kaa? ?Ï ciï kaa ŋø?»
Ni dwøk gø jïgø, na «A päny wøk ki baŋ Caray ŋata tïnynya.»
9'Ba nyïïatwiel Wuuö Jwøk aköö jïre, ni «Døø baŋ Caray na tïnynyï, ni cïpï dëërï jïre ni bëëdï niï ena tiere.» 10Ni kö nyïïatwiel Wuuö Jwøki jïre thuwø, ni «Nyïïkwaayï otïïa ni thööth, ni nyaacge këël mano tïmge ni ba løny ki kwaan.»
11Ni cäŋ nyïïatwiel Wuuö Jwøki köö jïre,
ni «Neenï, yiï oløny ni da dhaanhø;
ïïno lwaar ki gø na dïcwøø;
ni cagï nyeŋŋe ni Icmiel,
kiper Wuuö Jwøk gïïa jwørï bëët awïnynye.
12'Ba eno bëëdö na dhaanhø mo caala arëën-paap,
ni bëëde na dhaanhø mo manynya leny ki jiy bëët,
ni tïm jiyi bëët ni manynya leny ki eni thuwø;
'ba eno bëëdö no opääö ki tuuŋge.»
13Køøre Eegar nyeŋ Wuuö Jwøk na cäänö ki eni acaae, ni kööe, ni «Ïïna El-Röi,#16:13 El-Röi ki dhi Ibaru tiere beeye Jwøk man wø rääŋö wala Jwøk mo di raŋø.» ni kööe, na «?Aŋø, ki køør mana jooda Jwøk kany en, a poot bëëdö naa kwøw møn?» 14Kiper manøgø nø, iith mana en kaace aput cwøl ni Bëër-Laay-Röi;#16:14 Bëër-Laay-Röi ki dhi Ibaru tiere beeye iith Jwøa kwøw ni wø raŋ aani. ni iidhøgø ena yaakic Kadëc ki Berët.
15'Ba Eegar alwaar ki dhaanhø ma dïcwøø ni jït Abrammi ki wääde; ni ö Abrammi ni cak nyeŋ wääde na lwaar Eegarri ki gø ni Icmiel. 16Kar kanya ö Abrammi na joot wääde ma Icmiel na lwaar Eegarri ki gø, Abram cwiiye oløny na pïërabära ka abïciel.
Currently Selected:
Wïlöölö 16: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
