Wïlöölö 23
23
Luum Thøw Ceera
1'Ba cwiiri moa beet Ceera bëët beege cwiiri ma dïpa aciel ki pïërariiø ka abïriiø. 2Køøre Ceera athøø Kiriat-Arba na näk Keeprön yi ŋööm Keenan; ni ö Eeberammi ni jwøk cïïe ma Ceera ni kïmme kipere.
3Køøre Eeberam aö maal ki bäät thøø ni ci baŋ jø Këth, ni cääne ki ge, ni kööe, 4ni «Aani a bëëdö buutu kany ni aana wëëllö naa path; cïpu jïra ki ŋøøm buutu kany mo kunynya yie, kiper nee dëër dhaanhø mana thøw ice kana yie, nee ba raŋŋa këët.»
5Køøre aløk jø Këthi jï Eeberam, ni köge, 6ni «Kwäärö, wïny marwa; ïïna dhaanhø mo karï dwøŋ døc buutwa kany; kan dhaanhø mana näk othøw yi kää mana näk ojierø na beerra eni døc røk kääk moa näk mowa; bäŋ dhaanhø aciel dïwa kany mo kää mare mäne mänö ki ïïni ki man kanï dëër dhaanhø mana näk othøw yie.»
7Køøre Eeberam aö maal ni kuul wïïe piny nyïm wëëk ŋøømmi na näk jø Këth. 8Ni cääne ki geni, ni kööe, «Ni näk mo uuno jïëy ki man kana dëër dhaanhø mana näk othøw, nee ba raŋŋa këët, wïnynyu mara; pëënynyu Ëprön wär Dhöar jïra, 9kiper nee kään kïdi mana näk mare, na en cuŋ pwöthe na en Makpila, nee cïbe jïra nyïmmu kany, kiper nee gäte bäre cïba jïre, nee tïme na kany kunynya yie.»
10Kar kanyøgø Ëprön nutö dï jø poge ma jø Këth; ni ö Ëprönni nyï Këth ni dwøk gø jï Eeberam ni wïnyö jï jø Këth bëët, ni beege jøøa näk öö kar acooŋa mar pääny poge, ni kööe, 11ni «Kwäärö, beerra man wïnynyï mara; pwödhö manøgø ki kään kïdi mana en yie acïba jïrï bëët. Acïba jïrï møn nyïm jø powa bëët; kan dëër dhaanhø mana näk othøw yie.»
12Køøre Eeberam wïïe aput kuul piny nyïm wëëk ŋøømmi. 13Ni cääne ki Ëprön ni wïnyö jï wëëk ŋøømmi, ni kööe, ni «Ni näk mo mara wïnynyï wïnynyö nø, doo beer; aani gät pwödhö manøgø cïba cïbö jïrï; jïëyï ki man lwørï gäte baŋa, kiper nee dëër dhaanhø mana näk othøw kana yie kaace.»
14Ni ö Ëprönni ni løk gø jï Eeberam, ni kööe jïgø, 15ni «Kwäärö, wïny mara nø; gät thäk ŋøøm moøgø doo rømø ki gwel ma dïpe aŋween keerge. ?Aŋø, da gïn mo ø doo pïëmö ki ïïni kipere cøøn? Kan dëër dhaanhø mana näk othøw yie.»
16Køøre Eeberam dwør Ëprön aleŋe; ni ö Eeberammi ni put warkey røm nyïm jø Këth kaa mana caani Ëprönni ni wïnyö jïge bëët, ni beege gwel ma dïpe aŋween, ki køør rumi man wø rum jø gathi ki gø.
17Køøre pwöth Ëprön na en Makpila, na näk dïët ki Mamrë, pwöthögø bäre ki kään kïdi mana en yie, ki jenni moa en yie bëët, aci jï Eeberam, 18ni put tïmö na mare nyïm jø Këth, jøøa näk oci kar acooŋa bëët mar päänyögø. 19Køøre nø, Eeberam cïïe ma Ceera akan yi kään kïnna en Makpila na näk dïët ki Mamrë, na näk Keeprön na en yi ŋööm Keenan. 20Ni ö pwöthögø ki kään kïdi mana en yie bëët, ni ci jï Eeberam ni tïme na kany kuny yie buut jø Këth.
Currently Selected:
Wïlöölö 23: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
