Wïlöölö 7
7
Kanya Ö Jwïïö Bäät Piny
1Køøre Wuuö Jwøk aköö jï Nöa, ni «Ïïni ki jø paarï bëët, cou yi jääy, kiper beeye ïïna ŋata jooda keere ni mare beer ri beenhnhø man bäre. 2Beerra man kädï jïrï røk lääy moa beyø ki thwönhi abïriiø ki mädhi abïriiø, ni kädï røk lääy moa ba beyø no oriewi riewi na thwønh ki maath. 3Ni kädï thuwø røk wec maal ki thwönhi abïriiø ki mädhi abïriiø, kiper nee nyïëdi moge bëëtge ni kwøw buutï bäät piny bäre. 4Kiper køør nïne abïriiø aani køth jääŋŋa jääŋŋö bäät piny, ni pädhe ki cääŋŋe ma pïëraŋween ki wärre ma pïëraŋween; ni ö gïïa cwääa bëët na näk kwøw ni puta geni raanynyø bäät piny.»
5Ni ö Nöa ni tïïc gïnögø ki køør luup bëët moa köömmi ya Wuuö Jwøki ki geni.
6'Ba kar kanya ö jwïïö na mac bäät piny, cwiic Nöa kar kaaca beege cwiiri ma dïpe abïciel. 7Ni ö Nöa ki wääte ki cïïe ki määr wääte ni cige yi jääy na aciel ki eni, kiper nee bøthge ki jwïïö. 8Ni ö teeŋ lääy moa beyø ki teeŋ lääy moa ba beyø ki teeŋ weny ki teeŋ gïï wø muuli bëët bäät piny, 9ni cige yi jääy baŋ Nöa no oriewi riewi na thwønh ki maath, kaawat mana ö Jwøki na kööm Nöa. 10'Ba na tïme na køør nïne abïriiø moa wäŋ Jwøki, jwïïö aput ö bäät piny.
11Kanya tïm cwiic Nöa na dïpe abïciel, ni nïr dwääy mo riet dwäde apaar ka abïriiø, dïcäŋöca piny bäre aput mudö ki jwïïö, ni ö maalli ni put dhee jap, 12ni ö køthi mo päl døc ni pädhe bäät piny bäre ki cääŋŋe ma pïëraŋween ki wärre ma pïëraŋween.
13Ni ö Nöa ki cïïe, ki wääte na näk Cëm ki Kaam ki Jaapeth, ki määr wääte dääi ni putge ci yi jääy dïcäŋöca kiree, 14ni beege geni ki teeŋ wïth lääc paap bëët, ki teeŋ wïth lääc paac bëët, ki teeŋ wïth gïï wø muuli bëët bäät piny, ki teeŋ wïth weny bëët. 15Ni ö gïïögø na näk dëëtge da jwïëy bëët ni cige yi jääy baŋ Nöa no oriewi riewi, 16na thwønh ki maath, kaawat mana ö Jwøki na kööm Nöa. Ni ö Wuuö Jwøki ni cïëk jääy bäät Nöa.
17Ni ö jwïïö ni put nyaay bäät piny ki nïne ma pïëraŋween, ni ö pïïyi ni meetge rege, ni tïïcge jääy ni thäärö, ni tïme ni kare bäär ki piny. 18Ni ö pïïyi ni kathge døc, ni meetge rege ni thaar bäät piny bäre, ni tïm jääyi ni thäärö bäät pïï. 19Ni ö pïïyi ni cäŋge kadhø døc bäät piny; ni ö kïte moa bäyö bëët dï piny bäre ni mwønyi ya pïïyi. 20Ni ö pïïyi ni nyänh maal, ni dööŋ kïte piny tiet pïï, kany mo ni rømi jïtö ki rumme ma apaar kurbïïc. 21Køøre gïïa näk kwøw bëët ni wø cäädhi bäät piny athøw; ni beege weny ki lääc paac ki lääc paap ki gïï wø muuli bëët bäät piny, ki jiy bëët. 22Ni ö gïïa kwøw na en bäät piny bëët na näk dëëtge da jwïëy ni thøwge bëët. 23Ni ö Jwøki ni raany gïïa kwøw bëët bäät piny, ki mana täge ri dhaanhø, këël mana këët ri lääy ki gïï wø muuli ki wec maal; gïïögø bëët araanynyi bäät piny. Ni ö Nöa keere ni dööŋe, ki jøøa en buute yi jääy.
24Køøre pïï abëëdö bäät piny ni piny ee maaø ki nïne ma dïpa ki pïërabïïc.
Currently Selected:
Wïlöölö 7: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
