Jøøn 18
18
Kanya Mak Jecu
(Mathiew 26:47-56; Maak 14:43-50; Luk 22:47-53)
1'Ba kanya løny Jecu ki caan luupögøøni ena aay ki bääge, ni ŋøl waŋ Kidaran, ni cige jï løøa näk da pwöth jenni ki bääge. 2'Ba Juudac, ŋata cïp Jecu ceŋ nyïïmän, kaace ŋääe thuwø, kiper Jecu wø cuuŋö yie ki bääge cooth. 3'Ba kanyøgø nø, Juudac akännö ki lwaa jø tøŋ mo jø Röm, ki dïkuye møøk mo Øt Jwøk mo käla baŋ kwääc laam ki jø Paricith, ni cige ni ge käädö ki lambae ka ameethi ki jap leny. 4'Ba Jecu kiper na ŋäc japo pïï dëëre, ena ci nyïm ni kööe jï jøøgø, na «?Aŋa ni cayu?»
5Ni løkge gø jïre, ni «Wa caya Jecu nyï Nadhareth.»
Ni kö Jecu jïge, «Beeye aani en.» 'Ba Juudac na cïp gø ceŋge cuŋŋa dïge. 6'Ba na kööe jïge, ni «Beeye aani en,» gena nyiik ŋäthge ni päthge. 7Ni cäŋ ge pëënynyö, na «?Aŋa ni cayu?»
Ni köge, ni «Wa caya Jecu nyï Nadhareth.»
8Ni løgi ya Jecu, na «A caana jïïu, ni beeye aani en. Ni näk u caya aani, weyu jøøi nee aacge.» 9Manøgø tägi kaper nee luumma kwøŋ Jecu caan thur kare, na kööe, ni «Jøøa cïpï jïra, bäŋ dhaanhø aciel mo yaa rwäänyö rege.»#Jøøn 6:39; 17:12 10Kanyøgø Cayman Piter na näk jïre da opëëllö, opëëllö awöth wøk ki yi køp, ni gøøc laŋ Kwääy Lam Mana Dwøŋ ni cëë ïth cwïï gø wøk. 'Ba nyeŋ laŋŋøgøøni cwøl ni Malka. 11'Ba Jecu aköö ki Piter, ni «Dwøk opëëllö marï yi købe. ?Aŋø, athöönhnha#18:11 Maath athöödhi manøgø nyootha jwør gïï mo leth. cïp Wära jïra ba daa maadhø?»
Kanya Kïth Jecu Nyïm Anna
12'Ba kanyøgø jø tøŋ mo jø Röm ki kwäärö marge ki dïkuye mo jø Juuth, Jecu amakge ni twöcge gø. 13Ni kwøŋge gø kïth baŋ Anna, kiper ena wää cï Keepa na näk Kwääy Lam Mana Dwøŋ cwiinøca. 14Ni beeye Keepa na cïpö ki luubö jï jø Juuth ni doo beer ki man thøw dhaanhe acielli kiper jiy.
Kanya Ö Piterri Na Kwøŋ Ree Mooŋ Ki Jecu
(Mathiew 26:69-70; Maak 14:66-68; Luk 22:55-57)
15'Ba Cayman Piter aläp køør Jecu ki bääŋ mør. 'Ba bääŋ manøgø ŋäc Kwääy Lammi Mana Dwøŋ, ni beeye na døny yi kal mar Kwääy Lam Mana Dwøŋ ki Jecu ciel, 16ni dööŋ Piterri ni cuŋŋö wøk dhi kal. 'Ba bääŋ mana ŋäc Kwääy Lammi Mana Dwøŋ aö wøk ni caan gø jï nyaan wø koor dhi kal, ni käl Piter yi kal.
17'Ba nyaana koor dhi kal aköö jï Piter, na «?Aŋø, ï paa bääŋ mar ŋatøgø thuwø?»
Ni kööe, ni «Jïra bäär.»
18'Ba kanyøgø jø tïïc ki dïkuye mo Øt Jwøk geno äbö ki maac, kiper piny da köö, ni ge cuŋŋö ni ge juŋö ki maac. 'Ba Piter thuwø ena dïge ni cuŋŋö ni juŋö ki maac.
Kanya Ö Kwääy Lammi Na Pëëny Jecu
(Mathiew 26:59-66; Maak 14:55-64; Luk 22:66-71)
19Kanyøgø Kwääy Lam Mana Dwøŋ Jecu apëënynye kiper bääge ki pwöc mare. 20Ni løgi ya Jecu jïre, ni «A wø cäänö ni wïnyö jaak jï jø piny, naa wø pöö cooth yïth uut acook lam ki yi kal mar Øt Jwøk Mana Dwøŋ, kany wø cuŋ jø Juuthi yie bëët, ni bäŋ gïn mo yaa caanø ni yaa mooŋø. 21?Aŋø ni pëënynyï aani en? Pëëny jøøa wïny mara ki gïïa caana jïge. Gïïa caana jïge ŋäcge.»
22'Ba na caan gïnögø dïkuri aciel mo cuŋŋö buute, Jecu adhööŋe, ni kööe, na «?Aŋø, beeye mana diï løø jï Kwääy Lam Mana Dwøŋ enøgø?»
23Ni løgi ya Jecu jïre, ni «?Ni näk luumma caana raac, aŋø ni ba caanï mara na raac na caana? ?'Ba ni näk maa caana gïn mo beer, aŋø ni dhööŋï aani en?» 24Kanyøgø ni eni poot no otwöö, ena wëëk Anna kïth baŋ Keepa na näk Kwääy Lam Mana Dwøŋ.
Kanya Ö Piterri Na Cäŋ Ree Mooŋŋø Ki Jecu
(Mathiew 26:71-75; Maak 14:69-72; Luk 22:58-62)
25'Ba kanyøgø ni Cayman Piter poot cuŋŋö ni juŋö ki maac, ena pëënynyi, na «?Aŋø, ï paa bääŋ ŋatøgø thuwø?»
Ni mooŋ ree ni kööe, ni «Jïra bäär.»
26'Ba ŋat tïïc aciel mar Kwääy Lam Mana Dwøŋ ma tuuŋ ki ŋata ïthe ceec Piterri, apëëö, na «?Aŋø, ï kära joodø yi pwöth jenni ki eni?» 27'Ba Piter ree acäŋ mooŋŋø. Ni put gwienø köö.
Kanya Kïth Jecu Nyïm Paylat
(Mathiew 27:1-2, 11-14; Maak 15:1-5; Luk 23:1-5)
28Kanyøgø jø Juuth Jecu akälge wøk ki yi øt Keepa ni kïthge gø øt bura mar kwäärö ma Paylat,#18:28 Paylat beeye ŋat Röm mana cïp akwöm Römmi bäät jø Juuth. ni piny poot cøl. 'Ba geni ki dëëtge ge kär døny yi ødøgø, kiper nee ba tïmge ni ge ba waany, kiper nee cam Ajwöma Mar Cäŋa Pööth Thøøe Yie camge. 29Kanyøgø Paylat aö wøk baŋge ni kööe, na «?Agïnaŋø na baac nyeni?»
30Ni köge jïre, «Onää nyenøgø paa ŋat raay, ba dewa käl baŋï.»
31'Ba Paylat aköö jïge, «Källu ki dëëtu ni ŋølu luumme piny ki køør ciik pou.»
'Ba jø Juuth aköö jïre, ni «Bäŋ teek jïwa ki man 'näkwa dhaanhø.» 32Manøgø tägi kaper nee luubö mana kwøŋ Jecu caan thur kare, ni nyootha thøø mano thøøe ki gøøni.
33'Ba Paylat acäŋ døny yi øt bura ni cwøl Jecu ni pëëny gø, ni «?Bee ïïni na nyeny jø Juuth?»
34Ni løgi ya Jecu, «?Luummögøøni caanï ka wïïï keerï, wala caana jø møøki jïrï?»
35Ni løgi ya Paylati, «?Aŋø, aana nyï Juuth? Bee jø pou ki dëëtge, ki kwääc laam na käl ïïni baŋa. ?Agïnaŋø na tïïyï?»
36Ni løgi ya Jecu, «Buya ba en pinyi. Onää buya ena pinyi, jiya doo këëdö, kiper naa ba cïp ceŋ jø Juuth. 'Ba buya ba en pinyi.»
37Ni kö Paylati jïre, «?Aŋø, ïïna nyeya nø?»
Ni løgi ya Jecu jïre, na «Acaanï na kare ni aana nyeya. Ni beeye na nywöl a kipere, ni beeye gïna ööa piny kipere, naa køpa gïr adïëri. 'Ba jiy bëët mo wø en ra adïëri, dwøra wø leŋge leŋø.»
38'Ba Paylat aköö jïre, na «?Adïëri agïnaŋø?»
Luubö Mana Ŋøl Paylati Piny
(Mathiew 27:15-31; Maak 15:6-20; Luk 23:13-25)
'Ba Paylat na nø caan gïïögø, acäŋ døø wøk baŋ jø Juuth ni caan gø jïge, ni kööe, ni «Bäŋ gïn mo obøth mo yaa joodø baŋe. 39'Ba jïïu da kööŋŋö mo dhaanhø aciel wø päda pädö jïïu, kany wø näk ra ajwöm-cam mar Cäŋa Pööth Thøøe Yie. ?Yïthu ba met nø, ki man päda nyeny jø Juuth jïïu?»
40'Ba gena cäŋ rëëdö døc, ni köge, ni «Patha ŋatøgøøni, 'ba beeye Baraba.» 'Ba Baraba beeye nyen ma ŋat ageem.
Currently Selected:
Jøøn 18: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
