Luk 15
15
Pwöc Mana Caan Na Leer Ki Ri Diel Mana Rwäänyö
(Mathiew 18:12-14)
1Kanyøgø jø ajwäk ki jø raay bëët gena tïmö ni ge nyïïnhnha buut Jecu kuna wïnyge dwøre. 2'Ba jø Paricith ki dïpööye mo ciik Jwøk gena ŋurö, ni köge, ni «Nyeni jïëy ki jø raay ni cämö ki ge.»
3Kanyøgø luummi na keda leer acaane jïge, ni kööe, 4na «?Aŋa dïïu ni jïre da dïëk ma dïpa, ni näk ma aciel orwäänyö dïge, ni ba wii pïërabïŋween ka abïŋween dï paap ni ci køør mana rwäänyö këël mano joot gø? 5'Ba noo joot gø, tïŋe ŋute ni yie met. 6'Ba kanyo ö paac, nyïïawääte bëët cwøle cwølø, ki jø wø en buut paare, ni kööe jïge, ni ‹Yïthu mïnge ki aani na aciel, kiper diera mana rwäänyö, ajooda.› 7'Ba a cäänna uuni, ni da met ec mo päl maal ma enønø kiper ŋat raay aciel mo cwïnye ee løø, ni kaala met ec mana di eci mïnnö kiper jiy ma pïërabïŋween ka abïŋween mo beyø mo bäŋ løk cwïny mo manyge.
Pwöc Mana Caan Na Leer Ki Ri Gwella Rwäänyö
8«?A dhaaŋŋe mane ni jïre da gwel apaar, ni näk ma aciel orwäänyö dëëre, ni ba nyep lamba ni jwiec øtø ni cac gø døøc, këël mano joot gø? 9'Ba kanyo joot gø, nyïïawääte cwøle cwølø bëët ki jø wø en buut paare, ni kööe, ni ‹Yïthu mïnge ki aani na aciel, kiper gwella rwäänyö dëëra, ajooda.› 10'Ba a cäänna uuni, ni da met ec ma enønø nyïm nyïïatwiet maal mo Jwøk kiper ŋat raay aciel mo cwïnye ee løø.»
Pwöc Mana Caan Na Leer Ki Ri Nyilaara Rwäänyö
11Ni kö Jecu, ni «Da ŋat mør mo jïre da wääte ariiø. 12'Ba mana thiinh dïge aköö jï wänni, na ‹Awuuö, mëëk a thääŋ jammi moa näk kura.› Ni pääŋ jape ki dïge. 13'Ba na tïme na køør nïne mo nøk, wäädö mana thiinh jape bëët alwøre ni tïŋŋe ni aa paac mør mo bäär, ni raany jape kaace ki bëëtö mo raac. 14'Ba na nø raany jammi bëët, meel mo dwøŋ apïï paanøca, ni tïme ni can døc. 15Kanyøgønø, ena ci buut nyen mør ma nyï paanøca, ni ö ŋatøgø ni wëëk gø ciin yi kar kwaath kuna caam othuri. 16'Ba eni yie doo met ki mana dee cämö ki caap othuri. 'Ba bäŋ dhaanhø mo mooc gø ki cam. 17'Ba na caar wïïe ni pëëny dëëre keere, ena köö, na ‹?A jø tïïc adïï ni en jï wära ni jïge da cam mo päl mo dhäthö, ni thøøa ki käc kany en? 18Aani, a aay ni cøøa baŋ wära, ni caana gø jïre, na «Awuuö, aana bääyö nyïm Jwøk ki nyïmï. 19A ba rømi ki man cwøl aani ni aana wäädï këët. 'Ba tïïc a ni aana ŋat tïïï jaak.» › 20Ni ö maal ni tïŋŋe ni ci baŋ wänni. 'Ba kanya poode ni kare bäär, ena joot wänni, ni päth cwïnye ki gïr gø, ni reŋe ni gääm gø, ni nuum dhi gø. 21'Ba wäädö aput köö jïgø, na ‹Awuuö, aana bääyö nyïm Jwøk ki nyïmï. A ba rømi ki man cwøl aani ni aana wäädï këët.› 22'Ba ŋata näk wuuö laaŋe moe aluumme, ni ‹Laaru kännö ka abïï ma wøp døc, ni kïthu gø dëëre, ni kïthu cere ko ogut, ni kïthu tiete ki war. 23Ni kälu rwaadha näk olør, ni 'nägu gø, nee ø cämø ni mïn yïthø. 24Kiper wääda man en athøw, 'ba acäŋ kwøwø. Ni rwäänye, ni cäŋi jootø.› Ni mïn yïthge.
25«'Ba kanyøgø wäädö mana riek ena yi pwödhö. 'Ba na ööe ni tïm kare ni cään ki øtø, dwør thoom ki meeŋ awïnynye. 26Ni cwöte ki laŋŋø aciel røk laaŋe, ni pëëny gø, ni ‹?Manøgø tiere aŋø?› 27Ni dwøk gø jïgø, ni ‹Coku aöö, ni ö wäru ni 'näk rwaadha näk olør, kiper na joot gø ni dëëre jööt.› 28'Ba wäädö manøgø agootø ni kweere ki ciin øtø. Ni ö wänni wøk baŋe ni kwaac gø. 29'Ba adwøge jï wänni, ni ‹Neenï, cwiiyi ni thööth ii a bëëdö naa tïnynya ïïni, ni dwørï kära dhalø dïcäŋ aciel bäre bäre. 'Ba bäŋ dïcäŋ aciel maa iï mooø ki nyidiel nee yia mïnne ki nyïïawääta. 30'Ba wäädï enøgø na raany japï ki kääpe na ööe, rwaadha näk olør anääŋŋï eni.› 31Ni dwøk gø jïgø, ni ‹Wääda, cooth ï wø ena buuta, ni japøgø bëët na 'moa yøø beege moï. 32'Ba beeye gïn ma wøp ki man kwäägø ni mïn yïthø, kiper coku man en athøw, 'ba acäŋ kwøwø. Ni rwäänye, ni cäŋi jootø.› »
Currently Selected:
Luk 15: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
