Luk 9
9
Kanya Ö Jecu Na Jääŋ Bääge Wøk
(Mathiew 10:5-15; Maak 6:7-13)
1Ni ö Jecu ni cwøl bääge na näk apaar kurriiø ni mooc ge ki teek bäät anäge bëët, ki teek man køny jø täwe. 2Ni jääŋ geni wøk kuna køpge luum buc Jwøk ni ge kunyö ki jø täwe. 3Ni kööm geni, ni «Kär dee gïn kääru kiper wääthu, teeŋ ka alaŋkaace, wala opïri, wala muunni, wala gwel. Ni bäŋe ŋat käädö ka abïïe ariiø. 4'Ba øtø mano wäru dønynyu yie, wäru wø putu bëëte kaaca, këël mano tïŋŋu. 5'Ba kanyo ba pänh uuni yie, kanyo tïŋŋu paanøca, wär tør tietu teeŋu yie, nee tïme na nyuudhi dëëtge.» 6Ni tïŋge ni caathge dï mïëri ni ge køpa luumma nyään na met, ni ge kunyö ki jø täwe yïth kwörögø bëët.
Kanya Ö Wï Eerati Na Kier Ree
(Mathiew 14:1-12; Maak 6:14-29)
7'Ba Eerat na bëën paaci, gïïa tägö bëët awïnynye, ni ö wïïe ni kier ree, kiper na kö jø møøki ni Jøøn atïŋ maal ki yi thøø, 8ni kö jø møøki ni ööa Ilaaja, ni kö møga, ni beeye dhaanhø aciel røk nyïïkuk Jwøk moa cääŋŋe no oduu wøk enø ki yi thøø. 9'Ba Eerat aköö, ni «?Jøøn, wïïe aŋula wøk, 'ba man a ŋa, ni poot tïïc teeŋ gïï ni wïnynya ii?» Ni ö eni ni cac man neen gø.
Kanya Ö Jecu Na Caam Jiy Ma Kume Abïïc
(Mathiew 14:13-21; Maak 6:30-44; Jøøn 6:1-14)
10'Ba na duu nyïïatwietøgø, gïïa tïïcge bëët acaange jï Jecu. Ni ö Jecu ni käl geni, ni daa paac mør mo cwøl ni Betheeda. 11'Ba na wïnynyi ya lwaae, gena läp køøre. Ni pänh geni, ni caan luum buc Jwøk jïge, ni køny jø täwe moa many køny. 12'Ba kanyøgø cäŋ atïmö ni thiinh. Ni ö bääge baŋe, ge na näk apaar kurriiø, ni köge jïre, ni «Wëëk lwaaøgø wääth, nee cige yïth mïëri ki mïëyø thenh thenh ni en ŋää paac yøø, nee butge yïthge, nee jïtge ki caammi. Kiper ø ena paap.»
13'Ba Jecu aköö jïge, ni «Mooyu geni ki gïn camge.»
Ni köge, ni «Jïwa da muunni abïïc ki rec ariiø keerge, 'ba tiirra man ciwa, nee wa ŋëëwa ki caammi jï jøøgø bëët.» 14Kiper jøøka jïtö ki jiy ma kume abïïc ma cwøw.
Ni kö Jecu jï bääge, «Cïïmmu geni na akääŋi, na akaaŋ man nø jïte ki pïërabïïc.» 15Ni tïïcge gø, ni wëëkge ge pïïn piny bëët. 16Ni lwør muuga näk abïïc ki reya näk ariiø, ni neen maal ni gwïëth ge, ni pøt ge, ni mëëk ge bääŋi, nee cïïmge nyïm jøøgø. 17Ni cämge bëët ni jäŋge, ni ö bääge ni kwaanyge thäŋi moa dhäthö, ni jïtge ki yïth gupe apaar kurriiø mo päŋ.
Luumma Caan Piterri Kiper Jecu
(Mathiew 16:13-19; Maak 8:27-29)
18'Ba dïcäŋ aciel ni Jecu lämö na eni keere, ni bääŋi ena buute, bääŋi apëënynye, ni kööe, ni «?Jiy wø köge ni aana ŋa?»
19Ni løkge gø, ni «Ge wø köö ni ïïna Jøøn na näk dïlööy na nyuudhi, ni kö møøki, ni ïïna Ilaaja. 'Ba møøk wø köö, ni beeye nyikugö aciel dëët nyïïkuk Jwøk moa cääŋŋe no oduu wøk enø.»
20Ni kööe jïge, «?A uuni, u wø kööu ni aana ŋa?»
Ni løgi ya Piterri, ni «Ïïna Krictø na öö ki baŋ Jwøk.»
Kanya Ö Jecu Na Caan Luum Thøø Mare Jï Bääge
(Mathiew 16:20-28; Maak 8:30—9:1)
21Ni ö Jecu ni kööm geni, ni cem ge døøc, nee bäŋe ŋat mo caange luummögø jïgø. 22Ni kööe, ni «Wär Dhaanhø gïï mo leth mo thööth ojwøre, ni kwieri ya jaae, ki kwääc laam, ki dïpööye mo ciik Jwøk, ni nääi, ni cäŋi tïŋ maal ri dää nïne.»
23Ni caan gø jï jiy bëët, ni kööe, ni «Nee da dhaanhø mo manynya man ö køøra, eni dëëre wär taae, ni käär jaadhe na näk odëëdö cooth, ni caath køøra. 24Kiper ŋato wäro many man gwøk jwïëye, nyääga gø, 'ba ŋato wäro nyääk jwïëye kiper nyeŋŋa, gwøga gø. 25?Kiper agïnaŋø ni beer noo duui jï dhaanhø, ni näk mo piny bäre oci jïre, ni raany ree wala nyääga ree? 26'Ba ŋato wäro wïïe laay ki nyeŋŋa ki luupa, Wär Dhaanhø wïïe olaay ki gø kanyo ööe ka ajieme, ka ajiem Wuuö Jwøk, ka ajiem mar nyïïatwiet maal moa en kur keerge. 27'Ba adïëri møn, a cäänna uuni, ni da jø møøk mo cuŋŋö kany, mo thøø ba jootge ni buc Jwøk poot kärge neenø.»
Kanya Røc Dëër Jecu
(Mathiew 17:1-8; Maak 9:2-8)
28'Ba kanyøgø na tïm nïne ni jïtö ki kar abära køør luupögø, Jecu Piter, ki Jøøn, ki Jeemeth akäle, ni ci bäät kïdi kuna läme. 29'Ba na läme, täärnyïme ree awiile, ni tïm abïïe moe ni ŋwaŋŋi ni tar døc. 30Kanyøgø jiy ariiø ajootge ni cäänö ki eni, ni beeye Modhe ge ki Ilaaja, 31ni ge ööi ka ajiem, ni caange luum thøø mare mano thøøe yi Jerucalem, ni thööra tïïc mare. 32'Ba kanyøgø Piter ki jøøa en buute, nyeŋge da niine mo thööth, 'ba kanya päcge, ajieme ajootge ni jootge jøøa näk ariiø na cuŋŋö buute. 33'Ba kanya tïme ni jøøgø aay buute, Piter aköö jï Jecu, ni «Dïpööy, beer døc kiree na enø kany. Beerra man tïïwa ka abïle adäk, aciel kiperï, na aciel kiper Modhe, ni maya kiper Ilaaja.» 'Ba gïna caane tier gø kuue.
34'Ba kanya poode ni caana gïnögø, pöölö aöö, ni neejïïm bäätge. 'Ba kanya ö pööle bäätge, gena lwäyö. 35Ni ö dwølli ki yi pööllögø, ni kööe, ni «Man beeye Wääda na näk yaa jierø. Wïnynyu luumme.» 36'Ba kanya løny dwølli ki cäänö, Jecu ajoot ni dööŋŋa eni keere. 'Ba yïth nïrögøøni, gena bëëdö ni ge lïŋö ni bäŋ gïn mo ege caanø jï dhaanhø mør røk gïïa jootge.
Kanya Ö Jecu Na Køny Nyilaal
(Mathiew 17:4-18; Maak 9:14-27)
37'Ba na tïme na aruunnø man, ni geno nø ö piny ki bäät kïdi, lwaak mo päl aö baŋ Jecu. 38'Ba dï lwaaøgø dhaanhø mør acwötö ki dwøl mo päl, ni «Dïpööy, a kwaya ïïni nee wääda neenï, kiper beeye nyey keere jïra. 39'Ba eni wø mak jwøki mo raac maa ni put rëëdö, ni meec gø, këël mano ö bööyö wøk ki dhee, ni mooc gø ki ŋwiili, ni ba maar wec. 40Ni kwaaa bäägï nee riemge wøk, 'ba kär løny jïge.»
41Ni løgi ya Jecu, ni «?U na beenhnhø mo bäŋ ŋäädhe jïïu en ni wïthu teek, a këël kany mo nyïëdi nø noo beeda ki uuni, noo maa cwïnya ki uuni? Käl wäädï kany.» 42'Ba kanya poode ni cäänhnhö, ena gøø anäge piny, ni meec gø. 'Ba Jecu jwøøgø ni raac enø ajooe, ni køny nyilaarøgø, ni mëëk gø wää gø. 43'Ba jiy bëët yïthge athäŋŋö ki teek Jwøk.
Kanya Ö Jecu Na Cäŋ Thøø Mare Caannø Jï Bääge
(Mathiew 17:22-23; Maak 9:30-32)
'Ba kanya pootge ni yïthge othäŋŋö ki gïïa tïïe bëët, ena köö jï bääge, 44«Uuni, cegu ïthu ki luum caana en, kiper Wär Dhaanhø ocïp ceŋ jiy.» 45'Ba tier luummögøøni kär ci cwïnyge. 'Ba tiere atïmö no okanø ki geni, nee ba ŋäcge. 'Ba gena lwäyö ki man pëënyge eni ki tier luummögøøni.
Luum Pïëm Kiper Dööŋ Kar
(Mathiew 18:1-5; Maak 9:33-37)
46Ni jït yïthakic bääge ki pïëm, ni ge pïëmö, na aŋa ni dwøŋŋa kare dïge. 47'Ba mana en cwïnyge na ŋäyi ya Jecu, ena lwötö ki nyilaal mo thiinh ni cïp gø dïër, 48ni kööe jïge, ni «Ŋato wäro jïëc nyilaari ki nyeŋŋa, jïëya aani. Ni ŋato wäro jïëc aani, jïëya ŋata jääŋ aani. Kiper ŋato wäro kare thiinhnha eni dïïu bëët, beeye ŋato kare dwøŋŋa eni.»
Ŋat Wø Ba Män Ki Uuni, Ena Kuru
(Maak 9:38-40)
49'Ba Jøøn aluupö, ni «Dïpööy, waana jïtö ki ŋat mør mo rëëmma wøk ka anäge ki nyeŋŋï, ni mänwa gø, kiper eni bäŋ wø cäädhi ki øøni.»
50'Ba Jecu aköö jïre, ni «Kär mänu. Kiper ŋat wø ba män ki uuni, ena kuru.»
Kanya Ö Jø Cameria Na Kwierge Jecu
51'Ba Jecu, kanya cään kar nïne moe ki man dwøgi maal, cwïnye atïmö ni lääŋŋa ciin yi Jerucalem. 52Ni jääk nyïme ki jiy. Ni cige paac mør dï mïëc jø Cameria, nee kare jiiŋge. 53'Ba eni kär jïëc jøøgø, kiper mana tïme ni eni pöötha yi Jerucalem. 54'Ba kanya ö Jeemeth ki Jøøn na näk bääge, na jootge gïnögø, gena köö jïgø, ni «?Kwäärö, ï manynya waani man cwötwa ki maac ki maal nee wïthge dïtge bëët?» 55'Ba ena luk baŋge, ni jook geni. 56Ni pööthge paac mør.
Kanya Ö Jecu Na Pääny Jøøa Doo Cäädhö Køøre
(Mathiew 8:19-22)
57'Ba kanya cääthge øtjöö, ŋat mør aköö jï Jecu, na «A cäädhö køørï, këël ï doo cøøa kaa.»
58'Ba Jecu aköö jïgø, no «Othööe jïge da buri, ni weny jïge da uudi, 'ba Wär Dhaanhø, bäŋ kany mo nyaaŋ thääŋŋe yi gø.»
59'Ba Jecu nyen mør aköömme, ni «Cäädhï køøra.»
Ni kö ŋatøgø, ni «Kwäärö, wec a dïciel, naa cøøa kuna koonya wära.»
60'Ba Jecu aköö jïgø, ni «Wec jøøa näk othøw nee dëëtge koonyge keerge. 'Ba ïïni, ciï ni køpï gïr buc Jwøk.»
61Ni kö mørri, na «A cäädhö køørï, Kwäärö. 'Ba wec a dïciel, naa cøøa kuna määdha jø paara.»
62'Ba Jecu aköö jïgø, ni «Bäŋ dhaanhø mo këël cere ri puur ni lwïthe ŋääe mo rømø ki buc Jwøk.»
Currently Selected:
Luk 9: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
Luk 9
9
Kanya Ö Jecu Na Jääŋ Bääge Wøk
(Mathiew 10:5-15; Maak 6:7-13)
1Ni ö Jecu ni cwøl bääge na näk apaar kurriiø ni mooc ge ki teek bäät anäge bëët, ki teek man køny jø täwe. 2Ni jääŋ geni wøk kuna køpge luum buc Jwøk ni ge kunyö ki jø täwe. 3Ni kööm geni, ni «Kär dee gïn kääru kiper wääthu, teeŋ ka alaŋkaace, wala opïri, wala muunni, wala gwel. Ni bäŋe ŋat käädö ka abïïe ariiø. 4'Ba øtø mano wäru dønynyu yie, wäru wø putu bëëte kaaca, këël mano tïŋŋu. 5'Ba kanyo ba pänh uuni yie, kanyo tïŋŋu paanøca, wär tør tietu teeŋu yie, nee tïme na nyuudhi dëëtge.» 6Ni tïŋge ni caathge dï mïëri ni ge køpa luumma nyään na met, ni ge kunyö ki jø täwe yïth kwörögø bëët.
Kanya Ö Wï Eerati Na Kier Ree
(Mathiew 14:1-12; Maak 6:14-29)
7'Ba Eerat na bëën paaci, gïïa tägö bëët awïnynye, ni ö wïïe ni kier ree, kiper na kö jø møøki ni Jøøn atïŋ maal ki yi thøø, 8ni kö jø møøki ni ööa Ilaaja, ni kö møga, ni beeye dhaanhø aciel røk nyïïkuk Jwøk moa cääŋŋe no oduu wøk enø ki yi thøø. 9'Ba Eerat aköö, ni «?Jøøn, wïïe aŋula wøk, 'ba man a ŋa, ni poot tïïc teeŋ gïï ni wïnynya ii?» Ni ö eni ni cac man neen gø.
Kanya Ö Jecu Na Caam Jiy Ma Kume Abïïc
(Mathiew 14:13-21; Maak 6:30-44; Jøøn 6:1-14)
10'Ba na duu nyïïatwietøgø, gïïa tïïcge bëët acaange jï Jecu. Ni ö Jecu ni käl geni, ni daa paac mør mo cwøl ni Betheeda. 11'Ba na wïnynyi ya lwaae, gena läp køøre. Ni pänh geni, ni caan luum buc Jwøk jïge, ni køny jø täwe moa many køny. 12'Ba kanyøgø cäŋ atïmö ni thiinh. Ni ö bääge baŋe, ge na näk apaar kurriiø, ni köge jïre, ni «Wëëk lwaaøgø wääth, nee cige yïth mïëri ki mïëyø thenh thenh ni en ŋää paac yøø, nee butge yïthge, nee jïtge ki caammi. Kiper ø ena paap.»
13'Ba Jecu aköö jïge, ni «Mooyu geni ki gïn camge.»
Ni köge, ni «Jïwa da muunni abïïc ki rec ariiø keerge, 'ba tiirra man ciwa, nee wa ŋëëwa ki caammi jï jøøgø bëët.» 14Kiper jøøka jïtö ki jiy ma kume abïïc ma cwøw.
Ni kö Jecu jï bääge, «Cïïmmu geni na akääŋi, na akaaŋ man nø jïte ki pïërabïïc.» 15Ni tïïcge gø, ni wëëkge ge pïïn piny bëët. 16Ni lwør muuga näk abïïc ki reya näk ariiø, ni neen maal ni gwïëth ge, ni pøt ge, ni mëëk ge bääŋi, nee cïïmge nyïm jøøgø. 17Ni cämge bëët ni jäŋge, ni ö bääge ni kwaanyge thäŋi moa dhäthö, ni jïtge ki yïth gupe apaar kurriiø mo päŋ.
Luumma Caan Piterri Kiper Jecu
(Mathiew 16:13-19; Maak 8:27-29)
18'Ba dïcäŋ aciel ni Jecu lämö na eni keere, ni bääŋi ena buute, bääŋi apëënynye, ni kööe, ni «?Jiy wø köge ni aana ŋa?»
19Ni løkge gø, ni «Ge wø köö ni ïïna Jøøn na näk dïlööy na nyuudhi, ni kö møøki, ni ïïna Ilaaja. 'Ba møøk wø köö, ni beeye nyikugö aciel dëët nyïïkuk Jwøk moa cääŋŋe no oduu wøk enø.»
20Ni kööe jïge, «?A uuni, u wø kööu ni aana ŋa?»
Ni løgi ya Piterri, ni «Ïïna Krictø na öö ki baŋ Jwøk.»
Kanya Ö Jecu Na Caan Luum Thøø Mare Jï Bääge
(Mathiew 16:20-28; Maak 8:30—9:1)
21Ni ö Jecu ni kööm geni, ni cem ge døøc, nee bäŋe ŋat mo caange luummögø jïgø. 22Ni kööe, ni «Wär Dhaanhø gïï mo leth mo thööth ojwøre, ni kwieri ya jaae, ki kwääc laam, ki dïpööye mo ciik Jwøk, ni nääi, ni cäŋi tïŋ maal ri dää nïne.»
23Ni caan gø jï jiy bëët, ni kööe, ni «Nee da dhaanhø mo manynya man ö køøra, eni dëëre wär taae, ni käär jaadhe na näk odëëdö cooth, ni caath køøra. 24Kiper ŋato wäro many man gwøk jwïëye, nyääga gø, 'ba ŋato wäro nyääk jwïëye kiper nyeŋŋa, gwøga gø. 25?Kiper agïnaŋø ni beer noo duui jï dhaanhø, ni näk mo piny bäre oci jïre, ni raany ree wala nyääga ree? 26'Ba ŋato wäro wïïe laay ki nyeŋŋa ki luupa, Wär Dhaanhø wïïe olaay ki gø kanyo ööe ka ajieme, ka ajiem Wuuö Jwøk, ka ajiem mar nyïïatwiet maal moa en kur keerge. 27'Ba adïëri møn, a cäänna uuni, ni da jø møøk mo cuŋŋö kany, mo thøø ba jootge ni buc Jwøk poot kärge neenø.»
Kanya Røc Dëër Jecu
(Mathiew 17:1-8; Maak 9:2-8)
28'Ba kanyøgø na tïm nïne ni jïtö ki kar abära køør luupögø, Jecu Piter, ki Jøøn, ki Jeemeth akäle, ni ci bäät kïdi kuna läme. 29'Ba na läme, täärnyïme ree awiile, ni tïm abïïe moe ni ŋwaŋŋi ni tar døc. 30Kanyøgø jiy ariiø ajootge ni cäänö ki eni, ni beeye Modhe ge ki Ilaaja, 31ni ge ööi ka ajiem, ni caange luum thøø mare mano thøøe yi Jerucalem, ni thööra tïïc mare. 32'Ba kanyøgø Piter ki jøøa en buute, nyeŋge da niine mo thööth, 'ba kanya päcge, ajieme ajootge ni jootge jøøa näk ariiø na cuŋŋö buute. 33'Ba kanya tïme ni jøøgø aay buute, Piter aköö jï Jecu, ni «Dïpööy, beer døc kiree na enø kany. Beerra man tïïwa ka abïle adäk, aciel kiperï, na aciel kiper Modhe, ni maya kiper Ilaaja.» 'Ba gïna caane tier gø kuue.
34'Ba kanya poode ni caana gïnögø, pöölö aöö, ni neejïïm bäätge. 'Ba kanya ö pööle bäätge, gena lwäyö. 35Ni ö dwølli ki yi pööllögø, ni kööe, ni «Man beeye Wääda na näk yaa jierø. Wïnynyu luumme.» 36'Ba kanya løny dwølli ki cäänö, Jecu ajoot ni dööŋŋa eni keere. 'Ba yïth nïrögøøni, gena bëëdö ni ge lïŋö ni bäŋ gïn mo ege caanø jï dhaanhø mør røk gïïa jootge.
Kanya Ö Jecu Na Køny Nyilaal
(Mathiew 17:4-18; Maak 9:14-27)
37'Ba na tïme na aruunnø man, ni geno nø ö piny ki bäät kïdi, lwaak mo päl aö baŋ Jecu. 38'Ba dï lwaaøgø dhaanhø mør acwötö ki dwøl mo päl, ni «Dïpööy, a kwaya ïïni nee wääda neenï, kiper beeye nyey keere jïra. 39'Ba eni wø mak jwøki mo raac maa ni put rëëdö, ni meec gø, këël mano ö bööyö wøk ki dhee, ni mooc gø ki ŋwiili, ni ba maar wec. 40Ni kwaaa bäägï nee riemge wøk, 'ba kär løny jïge.»
41Ni løgi ya Jecu, ni «?U na beenhnhø mo bäŋ ŋäädhe jïïu en ni wïthu teek, a këël kany mo nyïëdi nø noo beeda ki uuni, noo maa cwïnya ki uuni? Käl wäädï kany.» 42'Ba kanya poode ni cäänhnhö, ena gøø anäge piny, ni meec gø. 'Ba Jecu jwøøgø ni raac enø ajooe, ni køny nyilaarøgø, ni mëëk gø wää gø. 43'Ba jiy bëët yïthge athäŋŋö ki teek Jwøk.
Kanya Ö Jecu Na Cäŋ Thøø Mare Caannø Jï Bääge
(Mathiew 17:22-23; Maak 9:30-32)
'Ba kanya pootge ni yïthge othäŋŋö ki gïïa tïïe bëët, ena köö jï bääge, 44«Uuni, cegu ïthu ki luum caana en, kiper Wär Dhaanhø ocïp ceŋ jiy.» 45'Ba tier luummögøøni kär ci cwïnyge. 'Ba tiere atïmö no okanø ki geni, nee ba ŋäcge. 'Ba gena lwäyö ki man pëënyge eni ki tier luummögøøni.
Luum Pïëm Kiper Dööŋ Kar
(Mathiew 18:1-5; Maak 9:33-37)
46Ni jït yïthakic bääge ki pïëm, ni ge pïëmö, na aŋa ni dwøŋŋa kare dïge. 47'Ba mana en cwïnyge na ŋäyi ya Jecu, ena lwötö ki nyilaal mo thiinh ni cïp gø dïër, 48ni kööe jïge, ni «Ŋato wäro jïëc nyilaari ki nyeŋŋa, jïëya aani. Ni ŋato wäro jïëc aani, jïëya ŋata jääŋ aani. Kiper ŋato wäro kare thiinhnha eni dïïu bëët, beeye ŋato kare dwøŋŋa eni.»
Ŋat Wø Ba Män Ki Uuni, Ena Kuru
(Maak 9:38-40)
49'Ba Jøøn aluupö, ni «Dïpööy, waana jïtö ki ŋat mør mo rëëmma wøk ka anäge ki nyeŋŋï, ni mänwa gø, kiper eni bäŋ wø cäädhi ki øøni.»
50'Ba Jecu aköö jïre, ni «Kär mänu. Kiper ŋat wø ba män ki uuni, ena kuru.»
Kanya Ö Jø Cameria Na Kwierge Jecu
51'Ba Jecu, kanya cään kar nïne moe ki man dwøgi maal, cwïnye atïmö ni lääŋŋa ciin yi Jerucalem. 52Ni jääk nyïme ki jiy. Ni cige paac mør dï mïëc jø Cameria, nee kare jiiŋge. 53'Ba eni kär jïëc jøøgø, kiper mana tïme ni eni pöötha yi Jerucalem. 54'Ba kanya ö Jeemeth ki Jøøn na näk bääge, na jootge gïnögø, gena köö jïgø, ni «?Kwäärö, ï manynya waani man cwötwa ki maac ki maal nee wïthge dïtge bëët?» 55'Ba ena luk baŋge, ni jook geni. 56Ni pööthge paac mør.
Kanya Ö Jecu Na Pääny Jøøa Doo Cäädhö Køøre
(Mathiew 8:19-22)
57'Ba kanya cääthge øtjöö, ŋat mør aköö jï Jecu, na «A cäädhö køørï, këël ï doo cøøa kaa.»
58'Ba Jecu aköö jïgø, no «Othööe jïge da buri, ni weny jïge da uudi, 'ba Wär Dhaanhø, bäŋ kany mo nyaaŋ thääŋŋe yi gø.»
59'Ba Jecu nyen mør aköömme, ni «Cäädhï køøra.»
Ni kö ŋatøgø, ni «Kwäärö, wec a dïciel, naa cøøa kuna koonya wära.»
60'Ba Jecu aköö jïgø, ni «Wec jøøa näk othøw nee dëëtge koonyge keerge. 'Ba ïïni, ciï ni køpï gïr buc Jwøk.»
61Ni kö mørri, na «A cäädhö køørï, Kwäärö. 'Ba wec a dïciel, naa cøøa kuna määdha jø paara.»
62'Ba Jecu aköö jïgø, ni «Bäŋ dhaanhø mo këël cere ri puur ni lwïthe ŋääe mo rømø ki buc Jwøk.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia