YOHAANNISI 2

YESUUSI WAA WOYINETE XAJJERA SOORRI

1Sayikki barra Galiilaho Qaana yinanni katamira adhatenna adhamate jili no. Yesuusi amano hakkiicho no. 2Yesuusanna rosaanosino hakko jilira woshshinoonni. 3Jilaho worroonniti woyinete xajje gooffeenna Yesuusi ama Yesuusira, «Wodhitinoti woyinete xajje gooffinonsawe» yitu.

4Yesuusino, «Ama! Asseemmore ati kulattae? Xaara yanna'ya di"iillitino» yiise. 5Yesuusi ama soqqantanni noore woshshite, «Isi yaanno'nere baala asse!» yitu. 6Ayihudootaho keeraa'mate seeri noonsa daafira, hakkiicho lee kinchu googidda no; mitte mittenti lame woy sase gambayicho amaddannote. 7Yesuusino soqqantannore, «Googiddate waa wonshe!» yii. Insano waa afuu geeshsha wonshitu. 8Yesuusino soqqantannore, «Hinkiiltine jilu murrichira uuyye!» yii. Insano yiinonsa gede assitu. 9Jilu murrichino woyinete xajjera soorramino waa huuwe lai; ikkollana maminni dagginotero diafino; hinkiilte uyituri kayinni affino. Kunnira jilu murrichi seenne adhannoha woshshe, 10«Jila ji'lannohu baalu umo asse dancha woyinete xajje shiqishanno. Woshshinoonni manni age duuwihu gedensaanni, anfi gedeeta shiqishanno. Ati kayinni tenne dancha xajje xaa geeshsha mayira gedensiisitto?» yii. 11Yesuusi tenne umi maalale loosinohu Galiilu gobbara Qaana Katamiraati. Kunni garinni ayirrinyesi leellishi; rosaanosino ammantusi.

12Hakkunni gedensaanni Yesuusinna amasi, roduuwisinna rosaanosi mitteenni Qifirinahoomi Katama hadhe, hakko shiima barra keeshshitu.

YESUUSI QULLAAWA MINE DADDA'LITANNORE SHORRI

(Mat 21:12-13; Maq 11:15-17; Luq 19:45-46)

13Ayihudennihu Agure Sa"ate Ayyaani iillino daafira, Yesuusi Yerusaalame ha'ri. 14Hakkiicho Qullaawa Mine lalo, ge'reewonna lemboola hirtannorenna ofolte woxe soorritanni noore afi. 15Siiwote liche seekke lalonna ge'reewo baala Qullaawu Mininni fushshi. Soorridhanni nooriha woxensano finci; barcimmansano tuge gombisi. 16Lemboola hirtannoreno, «Kore kawiichinni hoolle; anni'ya mine daddalunniha assitinoonte!» yiinsa. 17Hatte yannara rosaanosi, «Minikki laala giirate gede ittue» yine borreessinoonniha qaaggu. 18Kunnira Ayihudete gashshaano, «Konne assate roorre afi'roottota, ma maalale loosse leellishattonke?» yitu. 19Yesuusino, «Konne Qullaawa Mine diiggineenna, ani sasu barri giddo qole mineemmona» yiinsa. 20Ayihudete gashshaano qolte, «Konne Qullaawa Mine 46 dirinni minne gundoonni. Ati sasu barrinni hiitto assite minatto?» yitu. 21Yesuusi Kayinni Qullaawu Mini gede asse coyi'rinoti mannimmasiiti. 22Rosaanosi Yesuusi reyotenni kai yannara, balaxe coyi'rinore qaaggino. Hakkunni daafira, Qullaawa Borro giddo borreessinoonnirenna Yesuusi coyi'rino qaale ammantu.

YESUUSI MANNU BAALU WODANITA EGENNINO

23Agure Sa"ate Ayyaani yannara Yesuusi Yerusaalamete assino maalale lae lowo manni ammanisi. 24Yesuusi kayinni mannu baalunku wodanita egennino daafira, diammaninonsa. 25Isi mannu wodanire baala egennino daafira, mannunnire ayino kulasira dihasiisinosi.

Currently Selected:

YOHAANNISI 2: QulMax

Highlight

Copy