လူႉၵႃႇ 2

လွင်ႈၸဝ်ႈယေႇသူႉၵိူတ်ႇလဵင်ႉ

(တူၺ်း၊ မၢတ်ႈ 1:18-25)

1ၶိင်ႇမိူဝ်ႈၼၼ်ႉ ၶုၼ်ႁေႃၶမ်းၵေႇသႃႇဢေႃးၵုတ်ႉတူႉမီးဢမိင်ႉႁႂ်ႈလႆႈဢဝ်ၸရၢင်းတင်းဝၢၼ်ႈတင်းမိူင်းဢေႃႈ။- 2ၼႂ်းမိူဝ်ႈဢၼ်ၵူႉရေႇၼေႇ ပဵၼ်ၶုၼ်ၵႃႈၼႂ်းမိူင်းသူႉရီႉယူႇၼၼ်ႉၸိုင်၊ ပဵၼ်တၢင်းဢၼ်ဢဝ်ၸရၢင်းပထမႃႉၼႆႉဢေႃႈ။- 3ၵူၼ်းတင်းသဵင်ႈတင်းလူင်ၵႂႃႇၵႃႈတီႈဝၢၼ်ႈဝဵင်းတူဝ်ၸဝ်ႈၵဝ်ႇႁင်းၽႂ်ႁင်းမၼ်း ႁႂ်ႈလႆႈၶဝ်ႈပႃးၼႂ်းၸရၢင်းၼၼ်ႉဢေႃႈ။- 4ယူဝ်းသႅပ်ႈၵေႃႈ လုၵ်ႉသေၵႃႈတီႈမိူင်းၵႃႇလီႉလႄး ဝဵင်းၼႃႇၸရႅတ်ႈလႄႈ ၵႂႃႇၵႃႈတီႈမိူင်းယူႉတႃႉ ဝဵင်းတႃႇဝိတ်ႈ ဢၼ်ႁွင်ႉႁဵၵ်ႈၸိုဝ်ႈပႅတ်ႉလႁႅမ်ႇ။- 5ႁႂ်ႈလႆႈၶဝ်ႈပႃးၼႂ်းၸရၢင်းလူၺ်ႈၵၼ်တင်းမေးမၼ်းမႃႇရီႉ ဢၼ်မၢႆၵၼ်ဝႆႉယဝ်ႉၼၼ်ႉဢေႃႈ။ မိူဝ်ႈၼၼ်ႉ မႃႇရီႉမီးပတိၵ်ႉသၼ်ႇထေႇဢၼ်ၵႄႇထူၼ်ႈယဝ်ႉဢေႃႈ။- 6ၼႂ်းမိူဝ်ႈဢၼ်မၼ်းမီးယူႇၵႃႈၼႂ်းဝဵင်းၼၼ်ႉၸိုင်၊ ၶိင်ႇဢၼ်မၼ်းတၵ်းလႆႈၵိူတ်ႇလဵင်ႉလုၵ်ႈထိုင်မႃးဢေႃႈ။- 7မၼ်းၵိူတ်ႇလဵင်ႉလုၵ်ႈၸၢႆးမႃးလႄႈ ဢဝ်တင်းၶူဝ်းလဵင်းပူၵ်ႉႁေႃႇဝႆႉယဝ်ႉၸင်ႇ၊ ပိူဝ်ႈဢၼ်ၵႃႈတီႈၼႂ်းႁိူၼ်းၶႅၵ်ႇၼၼ်ႉတီႈယူႇဢမ်ႇမီးလႄႈ ဢဝ်ၶျႃးသႂ်ႇဝႆႉၵႃႈၼႂ်းၵွၵ်းဝူဝ်းၵိၼ်ဢေႃႈ။

ၵူၼ်းလဵင်ႉသူဝ်းဢိၵ်ႇတင်းတမၢၼ်ႇၵၢင်ႁၢဝ်

8ၼႂ်းမိူင်းၼၼ်ႉ မီးၵူၼ်းၸိူဝ်းဢၼ်လဵင်ႉထိင်းသူဝ်းဢၼ်မီးယူႇၵႃႈၼႂ်းထိူၼ်ႇလႄႈ ပႂ်ႉၽုင်သူဝ်းတူဝ်ၸဝ်ႈၵဝ်ႇယူႇၶိင်ႇၵၢင်ၶိုၼ်းဢေႃႈ။- 9ၵမ်းၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈၶဝ်ၼၼ်ႉသေလႄႈ မုၼ်ၽုင်းထႃႇဝရႃႉၽြႃးၵေႃႈႁိူဝ်ႈလႅင်း ၵႃႈတီႈႁိမ်းႁွမ်းၶဝ်ၼၼ်ႉလႄႈ ၶဝ်ၵူဝ်ႁႄၼႃႇလူင်လၢင်ဢေႃႈ။- 10တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊ ယႃႇပေၵူဝ်ပေႁႄ၊ ၵဝ်မွၵ်ႇလၢတ်ႈသတၢင်းသဵင်ၶၢဝ်ႇ ဢၼ်ၵူၼ်းတင်းသဵင်ႈတင်းလူင်တၵ်းသိူဝ်းၸူမ်းမူၼ်ႈပျေႃႇၼႃႇလူင်လၢင်ၼၼ်ႉတီႈသူဢေႃႈ။- 11ဝၼ်းမိူဝ်ႈၼႆႉ ၸဝ်ႈဢၼ်ၵႄႇၶျွတ်ႈဢၼ်ဝႃႈၸဝ်ႈၶရိၸ်ႈၼၼ်ႉ လႆႈၶၢမ်ႇတၢင်းဢၼ်ၵိူတ်ႇလဵင်ႉမႃးပုၼ်ႈသူ ၵႃႈၼႂ်းဝဵင်းတႃႇဝိတ်ႈၼၼ်ႉယဝ်ႉ။- 12ဢၼ်တၵ်းပဵၼ်ၼီႉမိၵ်ႈလၢၵ်ႈၶၼႃႇတီႈသူၸမ်ႉ၊ သူတၵ်းထူပ်းႁၼ်လုၵ်ႈဢွၼ်ႇၼၼ်ႉပူၵ်ႉႁေႃႇတင်းၶူဝ်းလဵင်းသေလႄႈ ၶျႃးဝႆႉမီးယူႇၼႂ်းၵွၵ်းဝူဝ်းၵိၼ်ဢေႃႈ၊ ဝႃႈၼင်ႇၼႆသေယဝ်ႉ၊- 13တပ်ႉၵၢင်ႁၢဝ်ၼမ်ၼႃႇပေႃႇမႃးၵမ်းလဵဝ်လူၺ်ႈၵၼ်တင်း တမၢၼ်ႇၵၢင်ႁၢဝ်ၼၼ်ႉလႄႈ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊- 14ၵႃႈၼိူဝ်ပၢႆၸိၵ်းၸွမ်ၵၢင်ႁၢဝ်ပုၼ်ႉ ႁႂ်ႈမုၼ်ၽုင်းၽြႃးပဵၼ်ၸဝ်ႈယႂ်ႇၼႃႇသေၵမ်းလူၺ်ႈ။ ၵႃႈၼိူဝ်လိၼ်မိူင်းၼႆႉၵေႃႈ ႁႂ်ႈတၢင်းၼိမ်မီးၵႃႈတီႈၼႂ်းၵူၼ်းၸိူဝ်းဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်တင်းလၢႆၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။

15တမၢၼ်ႇၵၢင်ႁၢဝ်ၸိူဝ်းၼၼ်ႉ ၶိုၼ်းမိူဝ်းၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉယဝ်ႉၸင်ႇ၊ၵူၼ်းၸိူဝ်းဢၼ်လဵင်ႉထိင်းသူဝ်းတင်းလၢႆၼၼ်ႉၵေႃႈ ၵေႃႉၼိုင်ႈလႄႈၵေႃႉၼိုင်ႈလၢတ်ႈၸႃၵၼ်လႄႈဝႃႈ၊ၵႂႃႇၵႃႈတီႈဝဵင်းပႅတ်ႉလႁႅမ်ႇပုၼ်ႉတႃႉႁဝ်း၊တူၺ်းလွင်ႈတၢင်းဢၼ်ပဵၼ်မႃးယဝ်ႉလႄႈ ထႃႇဝရႃႉၽြႃးလၢတ်ႈၼႄတီႈႁဝ်းၼႆႉၼၼ်ႉတႃႉႁဝ်း၊ဝႃႈၼင်ႇၼႆသေယဝ်ႉ၊- 16ၶဝ်ၼၼ်ႉဢွၼ်ၵၼ်ၵႂႃႇၶၼ်ၶၼ်ၽႂ်းၽႂ်းလႄႈ ထူပ်းႁၼ်မႃႇရီႉတင်းယူဝ်းသႅပ်ႈ တင်းလုၵ်ႈဢွၼ်ႇ ဢၼ်ၼွၼ်းယူႇၵႃႈၼႂ်း ၵွၵ်းဝူဝ်းၵိၼ်ၼၼ်ႉဢေႃႈ။- 17ၶဝ်ထူပ်းႁၼ်သေယဝ်ႉ၊လၢတ်ႈၵႂၢမ်းဢၼ်ၶဝ်လႆႈငိၼ်းလွင်ႈလုၵ်ႈဢွၼ်ႇၼၼ်ႉၸွတ်ႇၸႅတ်ႇၵူႈတီႈၵူႈလႅၼ်ဢေႃႈ။- 18ၶဝ်ၸိူဝ်းဢၼ်လႆႈငိၼ်းၵႃႈမီးတင်းသဵင်ႈတင်းလူင် ဢၢမ်းလွင်ႈၵႂၢမ်းဢၼ်ၵူၼ်းၸိူဝ်းဢၼ်လဵင်ႉထိင်းသူဝ်းတင်းလၢႆလၢတ်ႈတီႈၶဝ်ၼၼ်ႉဢေႃႈ။- 19မႃႇရီႉမၢတ်ႈတွင်းဝႆႉ လွင်ႈတၢင်းတင်းသဵင်ႈတင်းလူင်ၸိူဝ်းၼႆႉလႄႈ ၶႆႈၸႂ်ဝူၼ်ႉၸႂ်ယူႇဢေႃႈ။- 20ၵူၼ်းၸိူဝ်းဢၼ်လဵင်ႉထိင်းသူဝ်းတင်းလၢႆၼၼ်ႉၵေႃႈ ၵွပ်ႈပိူဝ်ႈလွင်ႈတၢင်းဢၼ်လႆႈငိၼ်းလႆႈႁၼ်ၵႃႈမီးတင်းသဵင်ႈတင်းလူင် မႅၼ်ႈၸွမ်းၼင်ႇၵႃႈဢၼ်လၢတ်ႈဝႆႉတီႈတူဝ်ၸဝ်ႈၵဝ်ႇၼၼ်ႉလႄႈ ဢွၼ်ၵၼ်ယွင်ႈယေႃး ဢဝ်ၵျေးၸူးၽြႃးပဵၼ်ၸဝ်ႈတၢင်ႇသေလႄႈ ၶိုၼ်းမိူဝ်းၵႂႃႇဢေႃႈ။

ပၼ်ၸိုဝ်ႈသဵင်တီႈၸဝ်ႈယေႇသူႉ

21မိူဝ်ႈဢၼ် ထိုင်ႁွတ်ႈပႅတ်ႇဝၼ်းဢၼ်ဝႃႈၶိင်ႇဢၼ်တၵ်းလႆႈပၼ်တၢင်းဢၼ်ထိူဝ်ႁိမ်းတီႈလုၵ်ႈဢွၼ်ႇၼၼ်ႉၸိုင်၊ လႆႈႁွင်ႉႁဵၵ်ႈၸိုဝ်ႈယေႇသူႉဢၼ်တမၢၼ်ႇၵၢင်ႁၢဝ်ႁွင်ႉႁဵၵ်ႈ ၸဵမ်မိူဝ်ႈၸူဝ်ႈဢၼ်မၼ်းၸဝ်ႈဢမ်ႇပႆႇတႄႇပတိၵ်ႉသၼ်ႇထေႇၼၼ်ႉဢေႃႈ။

ဢဝ်ၸဝ်ႈယေႇသူႉသၢၵ်ႈၵၢပ်ႈၼႂ်းၵျွင်းပိၵ်ႈမၢၼ်ႇၸဝ်ႈ

22လိုၼ်းၼၼ်ႉ မိူဝ်ႈဢၼ်ဝၼ်းဢၼ်တၵ်းလႆႈႁဵတ်းတၢင်းဢၼ်မူတ်းသႂ် ၸွမ်းၼင်ႇပိင်းၺၢပ်ႈတြႃး မူဝ်းသေႇၼၼ်ႉၸေးသဵင်ႈယဝ်ႉၸိုင်၊ ပေႃႈမႄႈဢဝ်လုၵ်ႈဢွၼ်ႇၼၼ်ႉၵႂႃႇၵႃႈတီႈဝဵင်းယေႇရူႉသလႅမ်ႇလႄႈ၊- 23ဢဝ်သၢၵ်ႈၵၢပ်ႈၵႃႈတီႈထႃႇဝရႃႉၽြႃး ၸွမ်းၵႃႈၼင်ႇဢၼ်ၵျၢမ်းပိင်းၺၢပ်ႈတီႉ ထႃႇဝရႃႉၽြႃးမႃးလႄႈဝႃႈ၊ လုၵ်ႈတူၼ်ႈၵူၼ်းၸၢႆးတင်းသဵင်ႈတင်းလူင်တၵ်းလႆႈမူတ်းၸၢင်ႇ ပုၼ်ႈထႃႇဝရႃႉၽြႃးဢေႃႈ၊ ဝႃႈၼင်ႇၼႆၼၼ်ႉယဝ်ႉၸင်ႇ၊- 24ပုၵ်ႈၸေႃႇၵႃႈၼင်ႇဢၼ်မႃးၼႂ်းၵျၢမ်းပိင်းၺၢပ်ႈတီႉထႃႇဝရႃႉၽြႃးလႄႈဝႃႈ၊ တၵ်းလႆႈပုၵ်ႈၸေႃႇၵႃၵႄသွင်တူဝ်၊ဢမ်ႇၼၼ်ၵေႃႈ ၼူၵ်ႉတူႈသွင်တူဝ်ဢေႃႈ၊ ဝႃႈၼင်ႇၼႆၼၼ်ႉဢေႃႈ။

25မိူဝ်ႈၼၼ်ႉ ၼႂ်းဝဵင်းယေႇရူႉသလႅမ်ႇ မီးၵူၼ်းဢၼ်လႆႈၸိုဝ်ႈသူႉမွင်ႇ ၵေႃႉၼိုင်ႈဢေႃႈ။ မၼ်းၼၼ်ႉပဵၼ်ၵေႃႉဢၼ်သိုဝ်ႈတေႃႇ၊ ၵေႃႉဢၼ်ရူဝ်ႇသေႇၵူဝ်ယမ်တြႃး၊ ၵေႃႉဢၼ်မုင်ႈထႃႈမွင်းထႃႈ လွင်ႈတၢင်းဢၼ်သၢၵ်ႈသႃႇ ၸိူဝ်ႉၶိူဝ်းဢီႉသရေႇလႃႉလႄႈ ၵႃႈၼိူဝ်မၼ်းၵေႃႈ ဝီႉၺိၺ်ႇဢၼ်မူတ်းၸၢင်ႇၸဝ်ႈတႄႇယူႇဢေႃႈ။

26ၸူဝ်ႈဢၼ်မၼ်းဢမ်ႇပႆႇႁၼ်ၸဝ်ႈၶရိၸ်ႈထႃႇဝရႃႉၽြႃးၸိုင် မၼ်းဢမ်ႇလႆႈတၢႆဝႃႈၼႆ မၼ်းလႆႈပျႃႇတိၵ်ႈၵႃႈတီႈဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။- 27မိူဝ်ႈၼၼ်ႉ မၼ်းၼၼ်ႉၵႂႃႇၵႃႈတီႈပိၵ်ႈမၢၼ်ႇၸဝ်ႈၵွပ်ႈပိူဝ်ႈဝီႉၺိၺ်ႇၸဝ်ႈလႄႈ မိူဝ်ႈဢၼ်ပေႃႈမႄႈၸဝ်ႈယင်းတိုၵ်ႉဢဝ်လုၵ်ႈဢွၼ်ႇ ယေႇသူႉၶဝ်ႈၵႂႃႇ ႁႂ်ႈလႆႈႁဵတ်းၸွမ်းၼင်ႇထုင်းၸၢမ်ႇတြႃးယူႇၼၼ်ႉၸိုင်၊- 28သူႉမွင်ႇဢဝ်တင်းမိုဝ်းမၼ်းဢုမ်ႈႁွပ်ႇယေႇသူႉသေလႄႈ ယွင်ႈယေႃးၵျေးၸူးၽြႃးပဵၼ်ၸဝ်ႈလႄႈဝႃႈ၊- 29ၸဝ်ႈဢၼ်ဢုပ်ႉပိူင်ႇတီႈၶႃႈ၊ ၵႃႈၼင်ႇဢၼ်ပျႃႇတိၵ်ႈၸဝ်ႈႁဝ်းမီးၼၼ်ႉ၊တေႃႈလဵဝ်ၼႆႉၸဝ်ႈႁဝ်းပၼ်ဢၶႂၢင်ႉ ဢၼ်ၶႃႈၸဝ်ႈႁဝ်းတၵ်းလႆႈတၢႆၼိမ်ၼိမ်တီႈၶႃႈဢေႃႈ။- 30လွင်ႈမၼ်းၸမ်ႉ ၶႃႈၸဝ်ႈၼႆႉဢဝ်တင်းမၢၵ်ႇတႃတူဝ်ၸဝ်ႈၵဝ်ႇ လႆႈႁၼ်တၢင်းဢၼ်ၵႄႇၶျွတ်ႈၸဝ်ႈႁဝ်း၊- 31ဢၼ်ၸဝ်ႈႁဝ်းမႄးႁႅၼ်းဝႆႉသိုဝ်ႈၼႃႈတႂ်ႈတႃၵူၼ်းမဵဝ်းတင်းသဵင်ႈတင်းလူင်၊- 32ဢၼ်ဝႃႈဢၼ်လႅင်းဢၼ်တၵ်းႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႅင်းၼၼ်ႉလႄႈ ယုၵ်ႉယွင်ႈၸိူဝ်ႉၶိူဝ်း ဢီႉသရေႇလႃႉ ၵူၼ်းၸဝ်ႈႁဝ်းတင်းလၢႆတီႈၶႃႈဢေႃႈ၊ ဝႃႈၼင်ႇၼႆဢေႃႈ။

33ပေႃႈမႄႈၸဝ်ႈၼၼ်ႉ ဢၢမ်းလွင်ႈတၢင်းဢၼ်လၢတ်ႈလွင်ႈမၼ်းၸဝ်ႈၸိူဝ်းၼၼ်ႉဢေႃႈ။- 34သူႉမွင်ႇၵေႃႈ ပၼ်တၢင်းလီတီႈၶဝ်လႄႈလၢတ်ႈတီႈမႄႈၸဝ်ႈမႃႇရီႉလႄႈဝႃႈ၊ လုၵ်ႈဢွၼ်ႇၼႆႉၸမ်ႉ၊ လွင်ႈၼင်ႇႁိုဝ်ၵူၼ်းဢီႉသရေႇလႃႉၼမ်ၼႃႇတၵ်းလူမ်ႉ ဢိၵ်ႇတင်းလွင်ႈၼင်ႇႁိုဝ်ၵူၼ်းၼမ်ၼႃႇတၵ်းလုၵ်ႉ တင်းလွင်ႈၼင်ႇႁိုဝ်တၵ်းပဵၼ်ၼီႉမိၵ်ႈဢၼ်ပိူၼ်ႈတၵ်းတွပ်ႇထဵင်လႄႈ ႁႂ်ႈတၢင်းၵျၢမ်ႇတၢင်းပွင်ၵူၼ်းၼမ်ၼႃႇထၢင်ႇသႃးၸိုင် ပဵၼ်ၵေႃႉဢၼ်ၶၢၼ်းဝႆႉဢေႃႈ။- 35လိူဝ်သေၼၼ်ႉဢမ်ႇၵႃး၊လၢပ်ႇလႅဝ်းတၵ်းတႅင်းႁူဝ်ၸႂ်မႂ်းဢေႃႈ၊ဝႃႈၼင်ႇၼႆဢေႃႈ။- 36ၵမ်းၼၼ်ႉ မီးမႄႈယိင်းပရေႃးၽႅတ်ႈဢၼ်လႆႈၸိုဝ်ႈဢႃႇၼႃႉ လုၵ်ႈယိင်းၽၼူၺ်ႇလႃႉ ဢၼ်ပဵၼ်မဵဝ်းဢႃႇသႃႇ ၵေႃႉၼိုင်ႈဢေႃႈ။ မၼ်းၼၼ်ႉ ၸႃႉၸဵမ်မိူဝ်ႈပဵၼ်သၢဝ်လႄႈ ယူႇႁူမ်ႈၵၼ်တင်းၽူဝ်ၸဵတ်းပီႊၵူၺ်းသေယဝ်ႉ၊- 37ပဵၼ်မႄႈမူၵ်းမႄႈမၢႆႈဢၼ်ဢသၢၵ်ႈလႆႈပႅတ်ႇသိပ်းပၢႆသီႇပီႊၸမ်ၸမ်လႄႈ ဢဝ်တင်းတၢင်းဢၼ်သူးတွင်းဢိၵ်ႇတင်းတၢင်းဢၼ်ၵမ်တၢင်းၵိၼ် ႁဵတ်းဝၢတ်ႈၽြႃးပဵၼ်ၸဝ်ႈတင်းဝၼ်းတင်းၶိုၼ်းတႃႇသေႇဢမ်ႇထၢတ်ႇယူႇလႄႈ ယင်းဢမ်ႇၽၢတ်ႇဢမ်ႇယၢၼ်ပိၵ်ႈမၢၼ်ႇၸဝ်ႈလႄႈယူႇဢေႃႈ။- 38မၼ်းၵေႃႈ ၶဝ်ႈၵႂႃႇမိူဝ်ႈၼၼ်ႉၵမ်းလဵဝ်လႄႈယွင်ႈယေႃးၵျေးၸူးထႃႇဝရႃႉၽြႃးသေလႄႈ လၢတ်ႈလွင်ႈလုၵ်ႈဢွၼ်ႇၼၼ်ႉတီႈၶဝ်ၸိူဝ်းဢၼ်မုင်ႈထႃႈမွင်းထႃႈလွင်ႈတၢင်းဢၼ်ထုတ်ႇဢဝ်ဝဵင်းယေႇရူႉသလႅမ်ႇတင်းသဵင်ႈတင်းလူင်ၼၼ်ႉဢေႃႈ။

ပွၵ်ႈၶိုၼ်းတီႈဝဵင်းၼႃႇၸရႅတ်ႈ

39ပေႃႈမႄႈၸဝ်ႈၼၼ်ႉႁဵတ်းၵႃႈဢၼ်တၵ်းလႆႈႁဵတ်းၸွမ်းၼင်ႇပိင်းၺၢပ်ႈတြႃးၼၼ်ႉတင်းသဵင်ႈတင်းလူင်ယဝ်ႉၸင်ႇ၊ၶိုၼ်းမိူဝ်းၵႂႃႇၵႃႈတီႈမိူင်းၵႃႇလီႉလႄးၸူးၵႃႈတီႈဝဵင်းတူဝ်ၸဝ်ႈၵဝ်ႇဢၼ်လႆႈၸိုဝ်ႈ ဝဵင်းၼႃႇၸရႅတ်ႈၼၼ်ႉသေဢေႃႈ။- 40လုၵ်ႈဢွၼ်ႇၼၼ်ႉၵေႃႈယႂ်ႇမႃးလႄႈ တၢင်းႁူႉတၢင်းႁၼ်ၽႄႈၵႂၢင်ႈၼမ်မႃးယူႇသေလႄႈ ပျေႉၸုမ်ႇတင်းၺၢၼ်ႇပိင်ႇၺႃႇဢေႃႈ။ ၵျေးၸူးၽြႃးပဵၼ်ၸဝ်ႈၵေႃႈတႄႇယူႇၵႃႈၼိူဝ်မၼ်းဢေႃႈ။

ၸဝ်ႈယေႇသူႉဢုပ်ႇၵုမ်ၼႂ်းပိၵ်ႈမၢၼ်ႇၸဝ်ႈ

41ၶိင်ႇပွႆးပႃႉသၶႃႇၸိုင် ပေႃႈမႄႈၸဝ်ႈၼၼ်ႉၵႂႃႇၵႃႈတီႈဝဵင်းယေႇရူႉသလႅမ်ႇ ၵူႈပီႊၵူႈပီႊဢေႃႈ။- 42မိူဝ်ႈဢၼ်ယေႇသူႉလႆႈသိပ်းသွင်ပီႊၼၼ်ႉၸိုင်၊ၸွမ်းၼင်ႇထုင်းၸၢမ်ႇ ပွႆးပႃႉသၶႃႇၼၼ်ႉ ၶဝ်ၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇလႄႈ၊- 43ဝၼ်းပွႆးၼၼ်ႉပူၼ်ႉယဝ်ႉၸင်ႇ၊မိူဝ်ႈဢၼ်ၶိုၼ်းမိူဝ်းၸိုင် လုၵ်ႈဢွၼ်ႇဢၼ်ဝႃႈ ယေႇသူႉၼၼ်ႉ ၵိုတ်းယူႇၵႃႈတီႈဝဵင်းယေႇရူႉသလႅမ်ႇဢေႃႈ၊ပေႃႈမႄႈၸဝ်ႈဢမ်ႇႁူႉလွင်ႈတီႈႁဵင်းၼၼ်ႉလႄႈ၊- 44ထၢင်ႇမၼ်းၸဝ်ႈပႃးမႃးၼႂ်းမူႇၼႂ်းၽုင်ၵေႃႉသေႈတင်းလၢႆယူႇ၊ဝႃႈၼင်ႇၼႆလႄႈ ၵႂႃႇၶၢဝ်းတၢင်းလႆႈဝၼ်းၼိုင်ႈယဝ်ႉၸင်ႇ၊ႁႃမၼ်းၸဝ်ႈၵႃႈၼႂ်းၸိူဝ်ႉၶိူဝ်းပီႈၼွင်ႉတင်းၵူၼ်းႁူႉၸၵ်းတင်းလၢႆလႄႈ၊- 45မိူဝ်ႈဢၼ်ဢမ်ႇထူပ်းဢမ်ႇႁၼ်ၸိုင် ၶိုၼ်းမိူဝ်းၵႂႃႇၵႃႈတီႈဝဵင်းယေႇရူႉသလႅမ်ႇလႄႈ ႁႃဢေႃႈ။- 46မိူဝ်ႈဢၼ်ပူၼ်ႉသၢမ်ဝၼ်းၸိုင်၊ ၶဝ်ထူပ်းႁၼ်လုၵ်ႈဢွၼ်ႇၼၼ်ႉၼင်ႈယူႇၵႃႈၼႂ်းၵၢင်သြႃႇတင်းလၢႆသေလႄႈ တိူင်ႇပၢင်ႇတွင်ႈထၢမ်လၢတ်ႈၸႃၵၼ်တင်းၶဝ်ၵႃႈတီႈၼႂ်းပိၵ်ႈမၢၼ်ႇၸဝ်ႈယူႇဢေႃႈ။- 47ၶဝ်ၸိူဝ်းဢၼ်ငိၼ်းၵႂၢမ်းမၼ်းၸဝ်ႈတင်းသဵင်ႈတင်းလူင်ၼၼ်ႉ ဢၢမ်းလွင်ႈပိင်ႇၺႃႇမၼ်းၸဝ်ႈဢိၵ်ႇတင်းၵႂၢမ်းဢၼ်မၼ်းၸဝ်ႈ ၶိုၼ်းလၢတ်ႈၼၼ်ႉၼႃႇလူင်လၢင်ဢေႃႈ။- 48ပေႃႈမႄႈၸဝ်ႈၼၼ်ႉ မိူဝ်ႈဢၼ်ႁၼ်မၼ်းၸဝ်ႈၸိုင် ၵႂင်ၸႂ်ယုင်ႈၸႂ်လႄႈ မႄႈၸဝ်ႈၵေႃႈလၢတ်ႈလႄႈဝႃႈ၊လုၵ်ႈၵဝ်ဢိူၺ်း၊ ႁဵတ်းႁိုဝ်လႄႈႁဵတ်းၸိူဝ်ႉၼင်ႇၼႆတီႈႁဝ်းၼင်ႇႁိုဝ်။ တူၺ်းလူး၊ ပေႃႈမႂ်းတင်းၵဝ်မီးတၢင်းဢၼ်မႆႈၸႂ်ၶီၸႂ်သေလႄႈ ႁႃမႂ်းယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 49ယေႇသူႉၵေႃႈလၢတ်ႈလႄႈဝႃႈ၊သူၸဝ်ႈႁဵတ်းသင်လႄႈလႆႈႁႃၵဝ်ၶႃႈၸိူဝ်ႉၼင်ႇႁိုဝ်ၶႃႈ။ လွင်ႈဢၼ်ၵဝ်ၶႃႈတၵ်းလႆႈယူႇၼႂ်းႁိူၼ်းပေႃႈၵဝ်ၶႃႈၸိုင် ဢမ်ႇႁူႉၶႃႈႁိုဝ်။ ဝႃႈၼင်ႇၼႆယဝ်ႉၸင်ႇ၊- 50ၶဝ်ဢမ်ႇႁူႉၵႂၢမ်းဢၼ်မၼ်းၸဝ်ႈလၢတ်ႈတီႈၶဝ်ၼၼ်ႉလႄႈယူႇဢေႃႈ။- 51လိုၼ်းၼၼ်ႉ မၼ်းၸဝ်ႈၵႂႃႇလူၺ်ႈၵၼ်တင်းၶဝ်သေယဝ်ႉ၊ ႁွတ်ႈထိုင်ဝဵင်းၼႃႇၸရႅတ်ႈလႄႈ ထွမ်ႇဢဝ်ၵႂၢမ်းၶဝ်ယူႇဢေႃႈ။ လွင်ႈတၢင်းၸိူဝ်းၼၼ်ႉတင်းသဵင်ႈတင်းလူင်ၸိုင် မႄႈၸဝ်ႈမၢတ်ႈတွင်းဝႆႉၵႃႈၼႂ်းႁူဝ်ၸႂ်ယူႇဢေႃႈ။- 52ယေႇသူႉၵေႃႈယႂ်ႇမႃးလႄႈ ပိင်ႇၺႃႇၼမ်မႃးၵိုၼ်းမႃးယူႇသေလႄႈ လႆႈၼႃႈလႆႈတႃၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။

Currently Selected:

လူႉၵႃႇ 2: CBMS

Highlight

Copy