Genesis 11
11
Вавилон башня эԓты пŏтәр
1Мўв ԓŏватән иса туп и йасәӈ, и пŏтәр ус.
2Хӑԓэвәт пеләк эԓты касәԓман, Сеннаар мўвән хӑр мўв ԓыв уйәтсәт пӑ щита уԓты питсәт.
3Пӑ ԓыв кўтэԓән йастатсәт: «Кирпищәт верԓув пӑ тўтән такапԓәԓув». Кев йўкана кирпищ питәс, пӑ мўв ух вŏщләх йўкана питәс.
4Ԓыв йастатсәт: «Мўв ԓŏвата лакки мӑнтэв йэԓпийән, мўӈева ун вош пӑ турма хойты пӑԓ хот омәсԓув, нэмԓув такан щащты урәӈән».
5Хŏйатәт опсәм вош пӑ пӑԓ хот ватты урәӈән Турәм Куща мўва иԓ ŏхԓәс.
6Щӑԓта Турәм Куща йастәс: «Тӑм, и мир, йасӈеԓ па ит; ванты, тӑм мўй ԓыв верты питсәт, пӑ ин мўй нŏмәс ўԓәт, щит тӑԓаӈа вертэԓ унты, ӑт вŏԓыԓәт;
7щишән, иԓ ŏхәԓԓув пӑ ԓыв йасӈеԓ щиты ԓыԓәтԓэв пӑ ԓыв кўтԓаԓән йасәӈ ӑт ат мŏштыԓәт».
8Щиты Турәм Куща ԓывиԓаԓ щиԓта мўв ԓŏвата лакки китсәԓы; вош омәсты ԓыв нŏх вŏԓысәт.
9Щишән, щи вош Вавилон#11:9 Вавилон – щи вош нэм «ԓыԓәтты» йасәӈ хŏрпи; нэмән пŏтса: щита Турәм Куща мўв ԓŏватән уԓты йасәӈ ԓыԓәтсәԓы, пӑ щиԓта Турәм Куща ԓывиԓаԓ мўв ԓŏвата лакки китсәԓы.
Сим эԓты Аврам унты уԓәм тыхәԓ тэԓ
10Тӑта щи Сим тыхәԓ тэԓ: Сим сот тӑԓ ԓŏватән, ун йик йўпийән кӑт тӑԓ хӑщәман, Арфаксад пŏх тӑйәс;
11Арфаксад сэма питәм йўпийән Сим ветсот тӑԓ ус, пӑ эвет пӑ пŏхәт тӑйәс.
12Арфаксад хŏԉмаӈ вет тӑԓ ԓŏватән Сала пŏх тӑйәс.
13Сала сэма питәм йўпийән Арфаксад ԋӑԓсот хуԓәм тӑԓ ус, пӑ эвет пӑ пŏхәт тӑйәс.
14Сала хŏԉмаӈ тӑԓ ус пӑ Евер пŏх тӑйәс.
15Евер сэма питәм йўпийән Сала ԋӑԓсот хуԓәм тӑԓ ус, пӑ эвет пӑ пŏхәт тӑйәс.
16Евер хŏԉмаӈ ԋӑԓ тӑԓ ус, пӑ Фалек пŏх тӑйәс.
17Фалек сэма питәм йўпийән Евер ԋӑԓсот хŏԉмаӈ тӑԓ ус, пӑ эвет пӑ пŏхәт тӑйәс.
18Фалек хŏԉмаӈ тӑԓ ус пӑ Рагав пŏх тӑйәс.
19Рагав сэма питәм йўпийән, Фалек кӑтсот йӑрәтйаӈ тӑԓ ус, пӑ эвет пӑ пŏхәт тӑйәс.
20Рагав нуптәԓ хŏԉмаӈ кӑт тӑԓ ус, пӑ Серух пŏх тӑйәс.
21Серух сэма питәм йўпийән, Рагав кӑтсот ԓапәт тӑԓ ус, пӑ эвет пӑ пŏхәт тӑйәс.
22Серух хŏԉмаӈ тӑԓ ус, пӑ Нахор пŏх тӑйәс.
23Нахор сэма питәм йўпийән, Серух кӑтсот тӑԓ ус, пӑ эвет пӑ пŏхәт тӑйәс.
24Нахор нуптәԓ хус йӑрәтйаӈ тӑԓ ус, пӑ Фарра пŏх тӑйәс.
25Фарра сэма питәм йўпийән, Нахор сот йӑрхус тӑԓ ус, пӑ эвет пӑ пŏхәт тӑйәс.
26Фарра ԓапәтйаӈ тӑԓ ус, пӑ Аврам, Нахор пӑ Аран пŏхәт тӑйәс.
Фарра тыхәԓ тэԓ пӑ ԓўв касԓәм верәԓ Халдея мўв эԓты Харран унты
27Тӑми Фарра тыхәԓ тэԓ: Фарра Аврам, Нахор пӑ Аран пŏхәт тӑйәс. Аран Лот нэмпи пŏх тӑйәс.
28Аран, Фарра ащеԓ уԓман, ԓўв сэма питәм мўвәԓән, Халдея мўвән Ур нэмпи тӑха хŏща пӑрәс.
29Аврам пӑ Нахор нэ тустән; Аврам ими нэм Сара; Нахор ими нэм Милка, ԓўв Аран эви, Аран – щит Милка пӑ Иска ащи.
30Сара ӑт ԓавәртәмәса, ԋаврэм ӑт тӑйәс.
31Щӑԓта Фарра Аврам пŏхәԓ ўсԓы, пӑ Аран пŏх, Лот хиԓэԓ, пӑ Сара меԋәԓ, Аврам пŏхәԓ ими, пӑ ԓыв пиԓэԓән Халдея мўв Ур нэмпи тӑха эԓты Ханаан мўв пеԓа мӑнәс, туп Харран унты йŏхәтмеԓән, щита хӑщсәт.
32Фарра кӑтсот вет тӑԓ ус, пӑ Харран мўвән Фарра пӑрәс.
Currently Selected:
Genesis 11: ХБ
Highlight
Share
Copy
Want to have your highlights saved across all your devices? Sign up or sign in
Institute for Bible Translation, Finland
