Hechos 1
1
Jesusba Dachi Akõre Jauri deai jarad̶a
1Teófilo, mʉʉba chi nabena kartad̶e b̶ʉsii Jesusba wau b̶uad̶a ʉ̃rʉbena maud̶e ichiba jaradea b̶uad̶a ʉ̃rʉbena, 2ab̶a Dachi Akõreba bajãad̶aa adoeruud̶aa. Bajãad̶aa wãi naed̶e Dachi Akõre Jaurid̶eeba Jesusba chi ichiba bʉid̶arãmaa jaradeasii kãare waud̶ai panuu. Maarã ichiba jʉrʉ adaud̶a basii.
3Jesús biusiid̶e ãchimaa ara ichi b̶es ãrea unubiasii kuitaad̶amera ichi biawãra chokae jiradusii. Maud̶e ãchimaa jaradeabachii ichid̶eeba, Dachi Akõreba ichid̶irã ichi juad̶e ua b̶uu ʉ̃rʉbena. Cuarenta ewari maka wausii. 4Ewari ab̶ad̶e Jesús ãchi baara komaa b̶uasiid̶e naka jarasii:
—Jerusalén puurud̶ebena ãyaa wãrã́sturu. Nama esed̶áusturu ab̶a Dachi Akõreba ichi Jauri deai jarad̶a dearuud̶aa.#Lucas 24:49; Juan 14:26-27; Isaías 32:14-15; Joel 2:28-32. Mau ʉ̃rʉbena mʉʉba machimaa naed̶e jarasii. 5Biawãra Juanba baniaba ẽbẽrarã boro easii, maamina kãꞌãabariwãed̶e Dachi Akõreba ichi Jauri machimaa deai.#1:5 Ichi Jauri machimaa deai. Griego bed̶ead̶e naka b̶ʉ kub̶uu: Dachi Akõreba machi ichi Jauriba boro eai.
6Maabae chi Jesús baara ãbua panad̶aba ichimaa id̶isid̶au:
—Dai Mechiu, ¿anakʉd̶e bichiba dachi Israel puuru chi aude mechiu b̶uabiika, chi naa b̶uad̶a kĩra?
7Jesusba panausii:
—Makai ewari machiba kuitaad̶aabai panuu. Ab̶aburu mʉ Chacháburu kuitaa b̶uu mau ewari b̶usiid̶eeba. 8Maamina Dachi Akõre Jauri machi baara b̶uad̶e neeruud̶e machiba ichi poyaabarii adaud̶ai. Mauba machiba Jerusalend̶e, joma Judea druad̶e, Samaria druad̶e maud̶e drua kaitawẽ nureed̶e mʉ ʉ̃rʉbena berread̶ai.
9Jesusba maka jarasiid̶e Dachi Akõreba ʉtaa adoesii. Ãchiba ichia panuud̶e mau jʉ̃rʉara tãed̶e wãsii maabae makaa unud̶aabasii. 10Wabid̶a Jesús ʉtaa wãd̶amaa ichia panuud̶e, ãchi kaita ẽbẽra ome neesid̶au. Maarã paru jʉ̃ panuu torroa ãrea b̶uasii. 11Mau ẽbẽraba naka jarasid̶au:
—Machi Galilead̶ebena, ¿sakãe bajãad̶aa ichia panuma? Jesús machi baara b̶uad̶a bajãad̶aa wãd̶a waya neei ichi bajãad̶aa wãd̶a kĩra.#Apocalipsis 1:7.
Matías jʉrʉ adauped̶aad̶a
12Maabae Olivo ead̶ebena Jerusalend̶aa waya wãsid̶au. Mau ea Jerusalend̶ebena kilómetro ab̶a b̶uu.#1:12 Kilómetro ab̶a. Griego bed̶ead̶e naka b̶ʉ kub̶uu: Jerusalén kaita b̶uu, judiorã bari panabadau ewarid̶e nibabadau kĩra. 13Jerusalend̶e need̶aped̶a de jã ʉtʉbenad̶e ãchi panabadaumaa wãsid̶au. Ãchi naarã basii: Pedro, Juan, Santiago, Andrés, Felipe, Tomás, Bartolomé, Mateo, Alfeo warr Santiago, Simón Celote maud̶e Santiago warr Judas.#1:13 Santiago warr. Griego bed̶ead̶e chi b̶ee kartad̶e b̶ʉ kub̶uu: Santiago ãba. 14Joma maarã Jesús ãbarã baara, ichi nawe María maud̶e waabena wẽrarã baara ãbua duanabachid̶au Dachi Akõremaa ʉtaa id̶id̶ai baita.
15Maka panuud̶e ewari ab̶ad̶e Pedro chi ãbarã 120 ẽsa ʉkʉ nub̶eesii. Maud̶e jarasii: 16«Ãbarã, nabẽraed̶e Dachi Akõre Jauriba Judasba waui ʉ̃rʉbena Davidmaa b̶ʉbisii.#Salmos 41:9. Dachi Akõre bed̶ead̶e b̶ʉ kub̶uu kĩra biawãra makai b̶uasiid̶eeba Judasba ẽbẽrarã uad̶osii Jesús jidaud̶amera. 17Judas dachid̶ebena basii maud̶e dachiba waubadau ichia bid̶a wau b̶uabachii».
18(Judasba kachirua waud̶a bare chi nejarra paaped̶aad̶aba, drua nedosii. Maabae aria boroare b̶aesii maabae chi jĩsi chesii. 19Joma Jerusalend̶ebenarãba mau kuitaasid̶aud̶e chi drua trʉ̃ jarasid̶au Acéldama. Mau trʉ̃ ãchi bed̶ead̶e jara b̶uu «Oa Drua»).#Mateo 27:3-10. 20Maud̶e Pedroba jarasii: «Judas makasii Salmos kartad̶e b̶ʉ kub̶uu kĩra:
“Ichi de dedumadu b̶eei. Ab̶a bid̶a aria panad̶aabai”.#Salmos 69:25.
Maud̶e jara b̶uu:
“Ichiba wau b̶uad̶a junebenaba wau b̶eei”.#Salmos 109:8.
21-22»Maud̶eeba ichi kakua machid̶ebena ab̶a dai ome b̶eei b̶uu ẽbẽrarãmaa jarai baita Jesús biawãra chokae jiradusii. Mau ẽbẽra dachi ome b̶uai b̶uu Juanba Dachi Mechiu Jesús boro easiid̶eed̶ebena ab̶a Dachi Akõreba Jesús bajãad̶aa adoed̶a ewarid̶aa».
23Maud̶e mau ẽbẽra omed̶ebena ab̶a jʉrʉsid̶au, ãchid̶ebena ab̶a adoed̶ai baita. Ab̶a José basii. Ichi Barsabás maebʉrã Justo abadau. Maud̶e chi ab̶a Matías basii. 24-25Maabae jomaurãba Dachi Akõremaa naka ʉtaa id̶isid̶au:
—Dai Mechiu, Judas bichiba bʉid̶a b̶aesii. Ichiba waui b̶uu ida b̶usii ichi b̶uai b̶uumaa wãi baita. Jomaurãba sõd̶e kʉ̃risia panuu bichiba mau kuitaa b̶uu. Maud̶eeba daimaa kuitaabiáse nau ẽbẽra omed̶ebena sãu jʉrʉ adauruu bichiba bʉid̶aba waubadau waumera.
26Maabae ne jemenesid̶au kai b̶eei kuitaa. Maud̶e Matías b̶eesii. Ara makʉd̶e ichi Jesusba bʉid̶arã 11 panuu baara ãbua b̶eesii.
Currently Selected:
Hechos 1: cmi
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
