Hechos 3
3
Pedroba ẽbẽra jʉ̃rʉ bʉʉ nii aribiabid̶a
1Ewari ab̶a ãsa ʉ̃rʉ õbea baaruud̶e, judiorãba Dachi Akõremaa ʉtaa id̶ibadau horad̶e, Pedro maud̶e Juan Dachi Akõre de mechiud̶aa wãsid̶au. 2Aria Dachi Akõre de mechiud̶e ed̶a wãbadau Mipitaa ãrea b̶uu abadaud̶e, ẽbẽra chi naweba adaud̶ad̶eed̶ebena jʉ̃rʉ bʉʉ nii b̶uasii. Ẽbẽrarãba ichi ewaricha araa adoebachid̶au chi nejarra id̶ikamera chi aria wãaduurãmaa. 3Pedro maud̶e Juan ed̶a wãaduu unusiid̶e chi nejarra id̶isii. 4Pedroba maud̶e Juanba maumaa ichiasid̶au. Maud̶e Pedroba jarasii:
—Daimaa ichiáse.
5Ichimaa chi nejarra dead̶ai kʉ̃risiasiid̶eeba maarãmaa ichiasii. 6Pedroba jarasii:
—Mʉ chi nejarra maud̶e nee wãꞌãe, maamina chi mʉʉba uru b̶uu bichimaa dearuu: ¡Jesucristo Nazaretd̶ebena trʉ̃d̶eeba jiraduped̶a nibad̶ease!
7Maud̶e Pedroba chi ẽbẽra jua biare jidauped̶a jiradubisii. Jiraduuruud̶e chi ẽbẽra b̶akara maud̶e chi jʉ̃rʉ kõkõrãa aribiasii. 8Ara makʉd̶e ʉtʉ jĩidruped̶a nibad̶easii. Kĩrajʉʉd̶eeba jĩidruped̶a Dachi Akõremaa biꞌia berreaped̶a ãchi baara Dachi Akõre de mechiud̶e ed̶a wãsii. 9Jomaurãba ichi Dachi Akõremaa biꞌia berrea b̶uu unusid̶aud̶e, 10kuitaasid̶au jãu ewaricha Dachi Akõre de mechiud̶e ed̶a wãbadau Mipitaa b̶uu abadaud̶e chi nejarra id̶iiruu akʉ b̶uabachii. Mau unusid̶aud̶e, kãare kʉ̃risiad̶ai adua basii.
Pedroba chi Dachi Akõre ded̶e duanuumaa jarad̶a
11Chi ẽbẽra jʉ̃rʉ bʉʉ nibad̶a Pedro maud̶e Juan jãkaabena wãabasii. Ãchi Dachi Akõre de ãbudare Salomón abadaud̶e panasid̶au. Jomaurãba kuitaa kʉ̃risiad̶aabasiid̶eeba ãchimaa pira wãsid̶au. 12Pedroba mau unusiid̶e jarasii: «Machi Israeld̶ebena, ¿sakãe machi kʉ̃risia baraa panuma? ¿Sakãe daimaa ichia panuma? ¿Kʉ̃risia panuka ara daid̶eeba maebʉrã dai Dachi Akõre daad̶e jipa panuud̶eeba nau ẽbẽra aribiabisid̶au? ¡Makawãema! 13Dachi Akõre dachi nabẽraed̶ebena Abraham ome, Isaac ome maud̶e Jacob baara b̶uad̶aba ichi baita bari trajabarii Jesús chi Mechiu b̶usii.#3:13 Ichi baita bari trajabarii. Mau bed̶ea nau sid̶a jara b̶uu «chi Warr». Ara mau Jesús machiba Pilatomaa jidau deasid̶au beamera. Pilatoba mau karibai kʉ̃ria b̶uasmina machiba ichi daad̶e mau kʉ̃riad̶awẽe asid̶au. 14Machiba Dachi Akõre baita bari trajabarii Jipa nii ida b̶ud̶aped̶a id̶i panasid̶au Pilatoba mia beabarii Barrabás ida bʉimera.#Marcos 15:6-15. 15Maka machiba chi dachi Chokae Nibabiabarii beasid̶au. Maamina Dachi Akõreba ichi biui b̶uad̶a chokae jiradubisii. Mau chokae jiradud̶a unusid̶au. 16Ara mau Jesús poyaabariiba nau ẽbẽra machiba unubadau aribiasii. Daiba ijãa panuu Jesusba chi ẽpermo nuree aribiabiabarii. Maka ijãa panuud̶eeba nau ẽbẽra biawãra aribiasii. Mau machiba arakʉd̶e unu panuu.
17»Mʉ ãbarã judiorã, mʉʉba kuitaa b̶uu machiba maud̶e machi karrarãba Jesús beabisid̶au ichi Dachi Akõreba deai jarad̶a dachi karibabarii adua panasiid̶eeba. 18Maamina maud̶eeba Dachi Akõreba naed̶e jarad̶a joma makabisii. Ichi baita berreabadaurãd̶eeba jarasii ichiba Dachi Karibabarii deai jarad̶a ãrea puꞌuaped̶aad̶ad̶ebena dauchia jãadua b̶uaped̶a biui b̶uasii.#3:18 Dachi Karibabarii deai jarad̶a. Griego bed̶ead̶e naka b̶ʉ kub̶uu: Cristo. Salmos 22:7-8; 69:17-21; Zacarías 12:10; Isaías 52:13—53:12. 19Machiba chi kachirua ida b̶ud̶aped̶a Dachi Akõremaa nésturu. Maka wauduubʉrã machiba kachirua wauped̶aad̶a Dachi Mechiuba perdonaped̶a sõbiabiai, 20ichiba chi Dachi Karibabarii deai jarad̶a bʉi naed̶e machimaa jara b̶uad̶a kĩra. Mau Jesusbʉ. 21Ʉ̃raud̶aa Jesucristo bajãad̶e b̶uu ab̶a Dachi Akõreba joma waya biꞌia chiwid̶i wauruud̶aa, chi Dachi Akõre baita berreabadaurãba nabẽraed̶e berreabachid̶au kĩra.
22»Moisesba dachi nabẽraed̶ebenarãmaa naka jarasii: “Dachi Akõre Mechiuba mʉ bʉid̶a kĩra ichi baita berreabarii ab̶a machimaa bʉii. Mau ẽbẽra ara machi puurud̶ebena bai. Mauba jaraaruu joma ijã́sturu. 23Mauba jara b̶uu ab̶auba ijãawẽebʉrã, mau ẽbẽra ichi puurud̶ebena awara biui b̶uu”.#Deuteronomio 18:15-19. 24Mau awara Samuel ewarid̶ebena joma chi Dachi Akõre baita berreabadaurãba nau ʉ̃rʉbena berreasid̶au. 25Chi ãchiba berreaped̶aad̶a id̶i biawãra unu panuu.
»Mau awara Dachi Akõreba machi nabẽraed̶ebenarãba ome bed̶ea deasii. Ichiba Abrahammaa naka jarasii: “Mʉʉba chi bichid̶ebena neeruud̶eeba nau iujãad̶ebena ded̶ebenarã joma biꞌia duanubiai”.#Génesis 22:18; 26:4. Mau bed̶ea dead̶a machiba id̶ibae uru panuu. 26Dachi Akõreba chi ichi baita bari trajabarii Jesús chokae jiradubiped̶a naa machimaa bʉisii karibamera. Machicha aid̶a b̶uu machiba kachirua waubadau ida b̶ud̶amera».
Currently Selected:
Hechos 3: cmi
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
