Matthew 14

Tuqullgha John‑em Paaptaayestem

1Tamaani pilleghmi Herod‑em, igleghutistengan Galilee‑m, nagaquqaa Jesus‑em apeghseghuumallgha. 2Herod‑em qepghaghteni pikii, “Ipa una John‑nguuq Paaptaayesta, unguvaamaaq. Esghaghhuqun aghtughyaghqaanghillelek allaaghlluwhaghtilleghmun.”

3-5Qavnganghhaq Herod‑em tuqutestekaqegkanga John Paaptaayesta, qayughllak John‑em ungipaatkaqegkanga, “Qaatkunneghituten Liilightuusamnnun tugulleghpegun Herodias, anglegutegpek nulighha.” (Herodias‑em ugiksaqanga Philip, Herod‑em uyughaa.) John‑em ungipaatellgha apalluqluku Herod‑em tugusqegkaa John, asighqelluku anusimingllaghvigmun kanaghtesqelluku. Herod‑em tuqutesuguyaqanga John, naqam alikegkii Jews‑et seghleliighqiinayukata qayughllak ugpeqeqkangat John uuknaliqestenguniluku.

6Taagken Herod‑em allgeghvigan aghneghani, Herodias‑em paniga tukalegaqaq Herod‑emllu aqelqatlu sivungitni. Elngaatall Herod efqughyugllakaq, 7repall akeqegkaa, “Ipapestaaq sameng alngunak tungsiquvek tuunelleqamken.”

8Naami kayagtellghatun pikaa, “Whaa maaten tagivaghhu qayuutaghraagkun lliluku naasqwa John‑em Paaptaayestem.”

9Umiilek qivghukaq iwernga akeqikaatmineng aqelqami sivungitni piyukellgha kayagutkaa. 10Enkaam Herod‑em anusimingllaghvigmi John‑em naasqwa kepestekaa. 11Naasquq qayuutaghraagkun lliluku tuunegkaat aghnaghaghmun, enkaam naaminun aglaatkaa. 12John‑em maligsaaghtengi tagiluteng yugusii lliveghyaghtuqaat. Taagken Jesus ungipaasaghtuqaat.

Jesus‑em Neghestillgha 5,000‑neng Siipngalghiineng Yugneng

13Jesus‑em nagaqughyamigu ungipaq, angyamun uuglluni aghulaqegkaq paaghqillghanun ellnginaghhaanaluni. Iwernga yulghutet nagaqughyamegteggu nemeggneng maligtekaat piyugmeng. 14Jesus quutmun uuglluni esghaghluki yulghuteghllaget nangllegyaguteghllakii, enkaam naallghuquqii qinuyugtengit.

15Whanikuyagu maligsaaghtengita takuluku pikaat, “Whanikwaa, maana paaghqituq; aglaghtuutesqiki nenun ellngitneng neqengesqelluki.”

16Jesus‑em pikii, “Maanllit. Elpesi neghyaghqaliteki.”

17Pikaat, “Whaa legan tallimaggaagut neqekrangllat, iqalluggaaklu.”

18Jesus‑em pikii, “Tagiteki whavek.” 19Taagken yulghutet aqumuutesqegkii vegaaghqun. Tuguluki tallimat neqekrangllat, iqalluggaaklu, sivuglluni qilagmun Kiyaghneq iqamsiqayugvikegkaa. Iiggmineng aavgughluki neqekrangllat, maligsaaghteminun tuunegkii uyegtesqelluki yulghutnun. 20Qamaglluni neghuutkaq kepsuulluni. Taagken maligsaaghtet tugukiit qula maalghuk siipneqluku pasketet esleqngalghiit kagimleghitneng neqekrangllat siipneghet. 21Entaqun 5,000‑nguut yuget neghuutkat, aghnatlu taghnughhaatlu kesutkegpenaki.

Jesus Piyulghii Meghqun

22Taagken Jesus‑em maligsaaghteni kayagtekii angyakun aghviqestiisqelluki naayvam inglunganun, ellngan aglaghtuutesimaluki yulghuteghllaget. 23Yulghuteghllaget aglaghtuutesamiki ellnginaghmi naayghamun mayuqaq yughaghnaluni. Tawani ighivgaghmi Jesus ellnginaamaluku, 24angyat unꞌga naayvami awavaghluteng, elngaatall imaghlliiqat qayughllak aygughnaghuskangi. 25Akulegkeni three‑kellaagenkuk, six‑eklaagenkuk unaanguluku Jesus‑em takukii maligsaaghteni meghem qaayngakun piyugmeng. 26Maligsaaghtet esghaghluku meghqun piyulghii kakavniiqat. Enkaam akilghuukat, “Taghneghaaguq.”

27Tawaninginaq Jesus‑em pikii, “Alingegpenasi, Whanganguunga!”

28Taagken Peter‑em pikaa, “Ataneq, ipa elpengukuvek tagsighnga elpenun aglaghlanga meghem qaayngakun.”

29Jesus‑em pikaa, “Tagi.” Enkaam Peter ateghluni angyameng, meghem qaayngakun piyugmeng aglaqaq Jesus‑mun. 30Iwernga anuqa elpeksamigu alingegkaq, kalevutkelluku akilghuukaq, “Ataneq, yugulinga!”

31Tawaninginaq Jesus‑em akuqaghluku pikaa, “Ugpeqilleghqestaapiguuten! Sangavek malghuklizin?”

32Angyamun uugtaquklu ellmaaragtekaq. 33Enkaam angyamelnguut maniguqaat Jesus. Pikaat, “Ipapestaaq Kiyaghneghem Ighneqaaten!”

Jesus‑em Naallghuskangi Qinuyuget Gennesaret‑mi

34Taagken naayvaq aghvighluku tamlakat Gennesaret‑kun. 35Tamaakumiit liisuqsamegteggu Jesus, ungipaasaghtiisqegkiit village‑enilnguut qinuyugtiighit tagitesqelluki Jesus‑mun. 36Maniguututkiit qinuyulghiit waran saaftesqelluku keniikun enkaam qamaglluteng tamaakut saaftilghiit naallghutellengegkat.

Currently Selected:

Matthew 14: ess

Highlight

Copy