Matthew 17
17
Jesus‑em Allangughllegha
1Aghvinlek aghneq atughluku, Jesus‑em kelqegkii Peter, James‑enkuklu, John‑enkuk, anglegutkullghiik, mayuutkii uusqalghiimun naayghamun ellnginiita. 2Iiyngitneng taagken Jesus allangughtekaq: gginaa kuukgutkaq siqineghtun, aatkiillu qateghrakguughtekat nighugestun. 3Taagken maligsaaghtet esghaqagket Moses‑enkuk Elijah‑nkuk aliighlutek aleghquqangak Jesus. 4Enkaam Peter‑em pikaa Jesus, “Ataneq, itagnapigtuq whaantelleghput! Piyukelqegkuvgu nekeflangi pingayut azigutat, elpenunllu, Moses‑munllu, Elijah‑munllu.”
5Salin akuzimaluku, qilagwaaghem nighugrakegtam saapegkii, enkaam qilawaaghmeng mem pikii, “Una Ighneqaqa, piniqepigtaqa, efquqepigtaqa, nagataqiteggu!”
6Maligsaaghtet nagalluku ma, alingruughem angtalanganeng niinghutkat nunamun. 7Taagken Jesus‑em takuluki saafluki, pikii, “Nekevitek, alingegpenasi!” 8Sivugsalghiimeng Jesus‑nginaghhaq esghaqaat.
9Ukigutkelluku naayghameng Jesus‑em ineghtengngwaaqii, “Kitumun alngunak apeghyaqunaan esghaghwaalleq pinakesi kenlanga Ighnegha Yugem unguvaghtekan tuqulleghmeng.”
10Taagken maligsaaghtet aaptekaat Jesus, “Sangan apeghtughistengita Liilightuusat piiqatgu Elijah sivukluni tagipestaaghyaghqaaniluku?”
11Jesus‑em kiimsiqii, “Ipa Elijah tagipestaaghyaghqaaguq, enkaam sangwaa qamagtengngwaaghluku nallghusanqiglleqaa. 12Iwernga ungipaatamsi Elijah tagingwaaqaaguq, iwernga yuget kinangutanga nallukegkaqaat, piyukelleghmegestunllu pikaqaat. Tawateghpigaq Ighnegha Yugem ikfiqesleqaat.”
13Taagken maligsaaghtet liigikegkaat John Paaptaayesta akuzitkaqeftaa.
Jesus‑em Naallghuskanga Mekelghiiq Tughneghaam Iitqaa
14Yulghuteghllagnun uteghnighyata, yugem takuluku Jesus, aga segesqughtengnginaamaghmi manungakun pikaq. 15Pikaa, “Ataneq, ighneqa nangllegyagutaghtigu! Sayugpagtalguuq, elngaatall ikfiqnguuq. Awen kenghegnun uullghaghtaquq nalighmeng meghquutaquq. 16Maligsaagtegpenun tagisaghaqa, iwernga naallghutepagningitkaat.”
17Jesus‑em pikii, “Elpesi yugni, ugpeqillghitusillu, seghleghwaaghuusillu! Naten tagkaan elpesininnaqsinga ugpeqesqellunga? Mekelghiiq whavek tagiteggu!” 18Jesus‑em aghyuuqaa tughneghaq, taagken aanegkaq mekelghiighmeng enkaam tawaninginaq naallghutkaq mekelghiiq.
19Taagken Jesus ellnginaaghsan maligsaagtengita takuluku aaptekaat, “Sangan whangkuta aanesneghmeng aghtughesteggu tughneghaq?”
20Jesus‑em kiimsiqii, “Qayughllak ugpeqilleghqestaaghhaalghiisi. Ipa ungipaatamsi, ugpeqillelguyaqufsi mustard‑em piitutesqughhan angtalngatun, una naayghaq pikufsigu, ‘Ingavek nuugten!’ nuuggnayaghtuq. Enkaam sangwaa alngunak aghtughnayanghitaghsi!” 21Iwernga tawatelnguq tughneghaq yughaghhiinaghqunllu, fast‑elleghqunllu aanesaghqaqaghsi.
Jesus‑em Akuzitkenqigtekanga Tuqulleghqani
22Maligsaaghtet qerngughusata Galilee‑mi Jesus‑em pikii, “Ighnegha Yugem tuguluku tuunelleqaat yugnun, 23enkaam tuqulleqaat. Iwernga pingayiitangani aghneghem unguvaghtesaghqaaguq.”
Taagken maligsaaghtet qivghughllakat.
Jesus‑enkuk Peter‑enkuk Llivikegkangak Temple‑em Tax‑nga
24Taagken Jesus‑enkut maligsaaghtekullghiit Capernaum‑emun tagiyata, Temple‑em tax‑meng qerngughtistengita takuluku Peter aaptekaat, “Apeghtughistezi Temple‑em tax‑nganeng llivikiiqaa?”
25Peter‑em kiimsiqii, “Aa‑a, piiquq.” Peter iteghyan mangteghamun Jesus‑em aleghqughyuwhaaqaa, “Simon, nateta elpek sumeghpeni? Kinkungwaaqat nunat umiilgita llivikistaqegkangit allaaghhiinaghmeng tax‑emeng? Nunalgutmeggneng piiqaat nalighmeng nakumiineng?”
26Peter‑em kiimsiqaa, “Nakumiineng.”
Jesus‑em pikaa, “Enkaam umiilget yugit llivikinaanghitut. 27Iwernga seghleghyugsunghitapung tax‑meng qerngughtistet. Enkaam nulughyaa naayvamun iqallugtaqsuggaaghpek qaanghani naalkelleqan mani. Tuguluku llivikusaghtughnakefkung.”
Currently Selected:
Matthew 17: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
