Hecho 2
2
Tachi Ak'õre Jaore cheda
1Mãɨya nak'ari Pentecosté ewari paside, chi Jesude ĩjãapataɨrã ãarea ará tuanasidama.#2:1 Ãyocha chi judiorãpa mãɨ ewari oopachidama chi trigo tau baadada k'orea. Naa chi Egitodepa wãnana k'ɨ̃risiapataɨ ewari oopachidama. Maapae, ewari 50 pa bɨde, ãchia mãɨ Pentecosté arapaapataɨ ewari oopachidama. Levítico 23:15-21. 2Mãɨya p'anɨne ɨt'aripa pedea jĩk'ua ũrisidama nãu minachia p'õat'ɨ cheru jĩra. Chi tede p'anɨrãpa mãɨ ãarea ũrisidama. 3Mãɨne t'ɨpɨ tau jĩra ãchi ɨ̃rɨ cherut'a unusidama. Mãɨ ãchicha ãchi ɨ̃rɨ urua nɨbeesima. 4Mãɨne Tachi Ak'õre Jaore jitadak'ari, pedea awara pedea para beesima, Tachi Ak'õre Jaorepa ãchi pedeapi badadepa.#Hecho 1:8.
5Pentecosté ewari pẽra judiorã tuachadepema Tachi Ak'õre wap'ea berã Jerusalene p'anasidama. 6Mãɨ jĩk'ua pedea ũrisidaɨde ak'ɨde wãsidama. Mãɨne chi Jesude ĩjãapataɨrãpa ara ãchi k'ak'awá ãchi pedeade pedea p'anɨt'a ũrisidama. Mãɨpuru k'awa k'ɨ̃risiadaé pasima. 7Mãɨya ãchi ak'ɨɨtua para nɨbeeside, nãɨya jarasidama: «¿Nãɨ ãarea p'anɨ Galileapidarãwẽk'ãra? 8¿Sãmaasã́ tachia ara tachi pedeade pedea p'anɨt'a ũri p'anɨma? 9Tachi t'ãena Partiadepema, Mediadepema, Elanepema, Mesopotamianepema, Judeadepema, Capadociadepema, Pontodepema, Asiadepema, 10P'rigiadepema, Panp'iliadepema, Egitodepema, Libia tuade Cirene p'uuru k'ait'adepema mãɨnepa Romanepema nãma p'anɨma. Tachi judiorã mãɨnepa judiorã padada nãma p'anɨma. 11Mãɨnepa ẽpẽerã Creta ĩjũa p'ɨrra bɨdepema mãɨnepa Arabiadepema nãma p'anɨma. ¡Ãareaɨrãpa ara tachi pedeade chi Tachi Ak'õrepa nepia ooda k'orea pedea p'anɨt'a ũri p'anɨma!»
12K'awa k'ɨ̃risiadaé pasi pẽra nãɨya jara tuaneesidama: «¿Nãɨt'a k'ãre jara k'ɨ̃ria bɨma?»
13Mãɨne chi eda waapẽarãpa oo uru p'anɨpa jarasidama:
—Ãchi it'uapa piu p'anɨma.
Pedropa Jerusalene jarateada
14Mãɨne Pedro chi waapẽarã once p'anɨ ome bai nɨbeek'ari ɨbɨa pedeasima:
«Judiorã mãɨnepa Jerusalene p'anɨrã nãɨ k'awat'ɨ; mɨa jararut'a jĩrak'aua ũrit'ɨ. 15Mãrapa k'ɨ̃risia p'anɨma tai it'uapa piu p'anɨt'a maamina mãɨyawẽma. ¡Wapida tap'ededa bɨma!#2:15 Tap'ededa bɨma. Griego pedeade nãɨya bɨ bɨma: ãst'á hora ũpea bɨade a bɨma. 16Mãɨpari chi taipa mãɨya pedea p'anɨ k'orea Tachi Ak'õre pari pedeaparí Joelpa nãɨya bɨ basima:
17“Tachi Ak'õrepa nãɨya jara bɨma:
K'aadeapema ewaride mɨ Jaore ãarea ẽpẽerã́ teaipɨ.
Mãɨya mãra warrarã mãɨnepa mãra k'aurã mɨnepa pedeadaipɨ.
Mɨa k'ũtãrã́ k'ãmok'araa jĩra ne unupiipɨ. Chõarã́ pida k'ãmok'araade ne unupiipɨ.
18Mãɨ ewaride mɨ Jaore chi mɨ pae pari mimiapataɨrã́ teaipɨ, wẽrá mãɨnepa ɨmɨk'ĩrá. Mãɨne ãchi mɨnepa pedeadaipɨ.
19Mãɨ ewaride ẽpẽerãpa ne p'ue oodak'apɨ́ pajãne mãɨnepa ĩjũane unupik'oaipɨ.
Oa, t'ɨpɨ mãɨnepa nãri unupik'oaipɨ.
20Tachi Chiparipa ɨtɨai ewari pai naena ɨmata k'iipɨ. Jedek'o sida oa paipɨ. Mãɨ ewari minajasia baipɨ.
21Maamina chi Tachi Chiparia chichupuria ɨt'aa idiutat'a ichia ãarea k'aripaipɨ”.#Joel 2:28-32.
22»Israeldepemarã, nãɨ pedea ũrit'ɨ: Tachi Ak'õrepa Jesú Nazaredepemá ẽpẽerãpa ne p'ue oodak'apɨɨrã mãra t'ãena oopik'oasima. Mãɨya oo bɨdepa Jesupa k'awapisima Tachi Ak'õre ichi ome bɨt'a, ara mãrapa pia k'awa p'anɨ jĩra. 23Tachi Ak'õrepa naena k'ɨ̃risia bada jĩra abaɨa itu Jesú mãra juade teapisima. Maapae mãrapa ẽpẽerã k'achiarã́ k'urusude barijira bɨk'ari peapisidama. Tachi Ak'õrepa k'awa basima mãɨ ãarea mãɨyait'a. 24Jesú minachia mĩak'ari piusima. Maamina Tachi Ak'õrepa ichi chok'ae p'irabaripida pẽra chi piudapa ichi p'ue uru baiwẽa basima.
25»Davipa ichi k'orea nãɨya jarasima:
“Mɨa unusima Tachi Chipari ewaricha mɨ ome bɨt'a.
Ichi mɨ juaraari bɨ pẽra ne wap'eawẽa bɨma.
26Mãɨ k'orea mɨ sõ arapá bɨma; mɨ minachia arapá k'ari bɨma.
Mɨa k'awa bɨma mɨ piui bɨmina mɨ ne k'ɨ̃risiawẽa baipɨ.
27Mɨa k'awa bɨma pɨa mɨ piudaadarã p'anapataɨmá#2:27 Piudaadarã p'anapataɨmá. Griego pedeade nãɨya bɨ bɨma: Hades. ameeiwẽt'a.
Chi pɨ pae pari mimiaparí chi jĩp'a bɨt'a itu beraapiiwẽma.
28Pɨa mɨá chi tachi chok'ae bapiparí ot'a k'awapisima, mãɨnepa mɨ ome bɨ pẽra mɨ minachia sõ arapaapiipɨ”.#Salmo 16:8-11.
29»Mɨ ũpẽarã judiorã, mɨa piarã jararuma: tachi chõarãenapema Daví piuk'ari ichi t'ɨbarisidama mãɨnepa ichi jãɨrã te uria tachia wapida unupatama. 30Maamina Daví Tachi Ak'õre pari pedeaparí pasima. Mãɨpuru k'awa basima Tachi Ak'õrepa piarãnepa jara basima chi aba ichidiidepema chei badat'a ichi k'ak'ua pari israel ĩjũanepemarã poro jũra jɨ̃parí jɨ̃ bɨ bɨit'a.#2 Samuel 7:12-13; Salmo 89:3-4; Salmo 132:11-12. 31Mãɨyai k'awa bada pẽra ichia pedeasima Tachi Ak'õrepa Tachi K'aripaparí teai jarada chok'ae p'irabarii k'orea.#2:31 Tachi Ak'õrepa Tachi K'aripaparí teai jarada. Mãɨpa jara bɨma: Cristo wa Mesías. Ichia jarasima Tachi Ak'õrepa mãɨ chi piudaadarã p'anapataɨmá ameeiwẽt'a mãɨnepa ichi k'ak'ua beraapiiwẽt'a.
32»Davipa jarada jĩra Tachi Ak'õrepa Jesú piu bada chok'ae p'irabaripisima. Taipa ãarea mãɨ unusidama. 33Tachi Ak'õrepa ichi juaraari Jesú chi atepe bɨ bɨsima. Maapae ichi Jaore teai jarada Jesua teasima, ichiaba ichidirã́ teamẽrá. Jesupa mãɨ Jaore piarã taiyá teasima. Chi mãrapa unu p'anɨt'a mãɨnepa ũri p'anɨt'a ichi Jaorepa mãɨya oopi bɨma. 34Daví pajãnea wãé pasima, Jesú wãna jĩra. Mãɨpari ichia nãɨya jarasima:
“Tachi Chiparipa jarasima Mɨ Chiparia:
Mɨ juaraari suak'abari beese,
35aba mɨa pɨchi nek'ĩramá pɨchi juade bɨrudea”.#Salmo 110:1; Luca 20:41-44.
36»Mãɨ k'orea ãarea israel ĩjũanepemarã, piarã k'awat'ɨ: Jesú, chi mãrapa k'urusude barijira bɨpidada, Tachi Ak'õrepa mãɨ chi ãareaɨrã Chipari mãɨnepa Tachi K'aripaparí teai jarada bɨsima».
37Mãɨ ũrisidaɨde ãareaɨrã minachia k'ɨ̃risia pará p'aneesidama. Mãɨpuru ãchia Pedroa mãɨnepa chi waapẽarã Jesupa peedaɨrã́ idisidama:
—Ũpẽarã, ¿k'ãre oodai p'anɨma?
38Mãɨne Pedropa p'anoosima:
—Machi nemietá oo p'anana itu bɨdak'ari Tachi Ak'õremá chet'ɨ. Jesucristo t'ɨ̃nepa porochoat'ɨ. Mãɨne mãrapa nemietá oo p'anana Tachi Ak'õrepa k'ɨ̃risia atuak'ari ichi Jaore mãrá teaipɨ. 39Tachi Ak'õre Chiparipa ichi Jaore teai jarada mãra pae bɨma, mãra warrarã pae bɨma mãɨnepa ẽpẽerã t'ɨmɨa p'anapataɨrã pae bɨma.#Ezequiel 36:23-28. Ãarea chi Tachi Ak'õre Chiparipa t'ɨ̃ bɨ ẽpẽerã pae pida bɨma.
40Pedro minachia pedeasima ãchia ĩjãanamẽrá. Nãɨya jara basima:
—¡Chi nãɨ ẽpẽerã idiapaepemarã nemietá oopataɨdepemarã ãyá wãt'ɨ!#2:40 Nemietá oopataɨdepemarã ãyá wãt'ɨ. Jara k'ɨ̃ria bɨma chi Tachi Ak'õrepa ãchi ɨtɨait'a. Ezequiel 11:19-21; 18:30-32.
41Minachia ẽpẽerãpa ichi pedea ĩjãanak'ari porochoasidama. Mãɨ ewaride chi Jesude ĩjãanana tres mil p'anasidama.
42Chi Jesupa peedaɨrãpa jaratea p'anɨt'a ãchia minachia ũripachidama. Ará tuanapachidama, nek'opachidama#2:42 Nek'opachidama. Griego pedeade nãɨya bɨ bɨma: p'ana t'oet'aadak'ari k'opachidama. Chi eda waapẽarãmá mãɨya jara bɨma chi Jesú k'orea k'ɨ̃risiadai k'orea nek'opataɨ oopachidama. Luca 22:19-20; Hecho 20:7; 1 Corintio 11:23-26. mãɨnepa Tachi Ak'õrea ɨt'aa chiidi p'anapachidama.
Chi Jesude ĩjãapataɨrãpa oo p'anana
43Chi Jesupa peedaɨrãpa ẽpẽerãpa ne p'ue oodak'apɨ́ minachia oopachidama. Mãɨ k'orea ãareaɨrãpa Tachi Ak'õre minachia wap'easidama. 44-45Ãarea chi Jesude ĩjãapataɨrã ará pia tuanapachidama. Chi eda waapẽarãpa ãchi ĩjũa mãɨnepa neet'á netodak'ari mãɨ ãarea teapachidama ara ãchi ne newẽa p'anɨ jĩra. Mãɨya ãchia uru bedeepa ara ãchi paara k'aripapachidama. 46Ewaricha Tachi Ak'õre te eda ará p'anapachidama mãɨnepa ũpẽarã techa sõpiadepa arapá nek'opachidama. 47Ãchia Tachi Ak'õrea pia pedeapachidama. Mãɨnepa waapẽarãpa ãchi pia unupachidama. Mãɨne Tachi Chiparipa ewaricha ẽpẽerã k'aripapachima. Mãɨya Tachi Ak'õrenepa ãchi eapapodosidama.
Currently Selected:
Hecho 2: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
