Luca 11

Tachi Ak'õrea ɨt'aa chiididai k'orea

Mateo 6:9-15; 7:7-11

1Ewariaba Jesupa Tachi Ak'õrea ɨt'aa chiidi basima. Mãɨya bak'ari ichi ome p'ɨrrɨaparí abaɨpa nãɨya idisima:

—Tai Chipari, jaratease taipa ɨt'aa chiidi k'awadamẽrá, Juanpa ichi ome p'ɨrrɨapataɨrã́ jarateada jĩra.

2Jesupa jarasima:

—Mãrapa Tachi Ak'õrea ɨt'aa chiidiutade nãɨya chiidit'ɨ:

“Tai Ak'õre pajãne bɨ,#11:2 Pajãne bɨ. Griego pedeade chi eda waapẽarã k'art'ade mãɨ newẽma. pɨ t'ɨ̃ waapẽarã t'ɨ̃ k'aepẽra piipará bɨma.#11:2 Pɨ t'ɨ̃ waapẽarã t'ɨ̃ k'aepẽra piipará bɨma. Mãɨ jara k'ɨ̃ria bɨma: «Pɨ waapẽarã k'aepẽra atepe piipará bɨma».

Taipa k'ɨ̃ria p'anɨma tãaraawẽa bɨde pɨa pɨchidirã pɨ juade ua bait'a. [Ichiaba k'ɨ̃ria p'anɨma pɨa k'ɨ̃ria bɨ nãɨ ĩjũanepemarãpa oodait'a, pajãnepemarãpa oopata jĩra.]#11:2 Griego pedeade chi eda waapẽarã k'art'ade pedea corchetede bɨ newẽma.

3Taiyá chik'o tease ewaricha k'odamẽrá.

4Taipa nemietá oodada k'ɨ̃risia atuase, waapẽarãpa nemietá oodada mãɨ taipa k'ɨ̃risia atuapataɨ jĩra.

Tai nemietaade baepirãse, mãɨpari k'achiadepema k'aripase”.#11:4 Mãɨpari k'achiadepema k'aripase. Griego pedeade chi eda waapẽarã k'art'ade mãɨ newẽma.

5Ichiaba Jesupa nãɨya jarasima:

—Jaraideepara, mãranepemapa estarik'a teamasi k'õp'ãeromá wãrune nãɨya jaraipɨ: “K'õp'ãero, mɨá p'ana ũpea teadose. 6Nãɨ teamasi k'õp'ãero aba arat'ea mɨ tede chesima maamina nek'opii k'orea newẽma”. 7Mãɨne chi eda bɨpa nãɨya p'anooipɨ: “K'õp'ãero, mɨ itu bɨse. Mɨ tede eda wãpataɨ jõat'ɨ nɨbɨma. Mɨ warrarã mɨ ome nãma k'ɨdade p'anɨma. Mãɨpuru mɨ p'irabarii p'uewẽma, pɨá ne teayá”. 8Mɨa jararuma: ichi p'irabariiwẽma p'ana teai k'orea pɨchi k'õp'ãeropẽra, maamina p'irabariipɨ pɨa minachia idiparipẽra. Teaipɨ pɨa ne ãareawẽa bɨ.

9»Mɨa jararuma: Ara mãɨ jĩra mãra newẽa p'anɨ Tachi Ak'õrea ɨt'aa chiidi p'anat'ɨ; mãɨne ichia mãrá teaipɨ. Jɨrɨ p'anat'ɨ; ichia unupiipɨ. Tede eda wãpataɨde t'ɨ̃t'ɨ; mãɨne chi eda wãpataɨ ewai jĩra, ichia teaipɨ. 10Chi ɨt'aa chiidi bɨpa jitaipɨ. Chi jɨrɨ bɨpa unuipɨ. Chi t'ɨ̃ bɨ pae tede eda wãpataɨ ewaipɨ ne teai k'orea.

11»Warrapa p'ana idirude ¿chi ak'õrepa mawara teaik'ãra?#11:11 P'ana idirude ¿chi ak'õrepa mawara teaik'ãra? Griego pedeade chi eda waapẽarã k'art'ade mãɨ newẽma. Warrapa beta idirude ¿taama teaik'ãra? 12Warrapa ne ɨmɨ idirude ¿chi ak'õrepa tusõre teaik'ãra? 13Mãra chi k'achia berãpa mãra warrarã́ nepia tea k'awa p'anɨpɨra, ¿mãra Ak'õre pajãne bɨpa chi idi p'anɨa ichi Jaore teaiwẽk'ãra?

Jesua k'achia pedeadada

Mateo 12:22-30; Marco 3:20-27

14Ewariaba Jesupa jaore mietá ãyá jeret'aasima. Mãɨ jaore mietapa ẽpẽra k'ĩrame t'urrá uru basima. Jaore mietá wãk'ari chi ẽpẽra pedeasima. Mãɨ unusidaɨde ẽpẽrarãpa k'awa k'ɨ̃risiadawẽa p'aneesidama. 15Maamina waapẽarãpa jarasidama: «Jãɨ Jesupa jaore mietá ãyá jeret'aaparima, jaore mietaarã chi atepe bɨ Beelzebupa mãɨ jua chaarea teada pẽra».

16Mãɨne Jesú Tachi Ak'õrenepa che bɨ k'awadayá waapẽarãpa ichiá idisidama ẽpẽrarãpa ne p'ue oodak'apɨ́ oomẽrá. 17Maamina ãchi k'ɨ̃risia p'anɨ Jesupa k'awada pẽra nãɨya jarasima: «Tua abarik'a berã ãstu k'ĩruupik'adaipɨra, chi jõnaipɨ. Ara mãɨ jĩra te abarik'a berã ãstu k'ĩruupik'adaipɨra, tãaraa p'ananaiwẽma. 18Mãrapa jara p'anɨma mɨa jaore mietá Beelzebú jua chaareadepa ãyá jeret'aaparí. Mãɨ k'orea mɨa mãrá idiruma: Tiorepa ara ichi jaore mietaarã ome k'ĩruu baipɨra ¿sãmaasã́ ãchi ará p'ananaima?

19»Mãramá mɨa Beelzebú jua chaareadepa jaore mietaarã ãyá jeret'aaparima. Mãɨyara mãra paara p'ɨrrɨapataɨrãpa ¿k'aidepa jaore mietá ãyá jeret'aapatama? Ãchia k'awapidaipɨ mãrapa pia k'ɨ̃risiadawẽa p'anɨt'a. 20Maamina Tachi Ak'õre jua chaareadepa mɨa jaore mietaarã ãyá jeret'aa bɨpɨra, Tachi Ak'õrepa mãrá unupi bɨma ichi chesit'a mãra ichi juade ua bai k'orea.

21»Ẽpẽra jua chaarea bɨpa k'ĩruuparí nek'opa ichi te pia ak'ɨ bɨpɨra, ichia uru bɨ abaɨ pida p'ue chɨadaiwẽma. 22Maamina ichi k'aepẽra ẽpẽra atepe chaarea bɨ chek'ari ichi p'ueipɨra, ichi k'ĩruuparí nek'o ẽemariipɨ. Maapae ãarea ichia uru bada ẽemarik'ari chi k'õp'ãerorã ome jedak'oaipɨ.

23»Chi mɨ lawari bɨwẽ mɨ ome chi nek'ĩramaapɨ. Chi mɨ ome ẽpẽrarã k'aripa jɨrɨp'ewẽa bɨpa chi jɨrɨp'eda ãyá peepiparima.

Jaore mietá jĩitea cheda

Mateo 12:43-45

24»Ẽpẽra k'ak'uadepema wãk'ari jaore mietá ĩjũa pania newẽa bɨde jɨrɨ baparima ɨ̃apaai k'orea. Mãɨ unuwẽ pẽra ichi tuaba nãɨya jaraparima: “Mɨchi badamá jĩitea wãipɨ”. 25Mãɨ cherude k'ɨda pia nejarra newẽa k'obɨ mãɨnepa ãarea pia nɨbɨ jĩra unuparima. 26Maapae siete jaore mietá ichi k'aepẽra k'achia berã mãɨ ẽpẽramá enemeek'ari chi ẽpẽra sõne p'aneene eda wãpatama. Mãɨpuru chi ẽpẽra ichi naa bada k'aepẽra atepe piawẽa beeparima».

¿K'airã chi piarã pia p'anɨrã?

27Jesupa mãɨya jara bɨde wẽra ẽpẽrarã t'ãena bɨpa jĩk'ua jarasima:

—¡Pɨ t'õna mãɨnepa jutopida wẽra, jãɨ minachia pia bɨma!

28Maamina Jesupa jarasima:

—Mãɨ k'aepẽra chi Tachi Ak'õre pedea ũrinak'ari oopataɨrã pia p'anɨma.

Jesupa Joná k'orea jarada

Mateo 12:38-42; Marco 8:12

29Ẽpẽrarã chok'ará ichimá cheuta unuside Jesupa jarasima: «Chi idiapaepemarã ẽpẽerã k'achia p'anɨma. Mãrapa mɨ pajãnepa che bɨ k'awadai k'orea k'ɨ̃ria p'anɨma mɨa ẽpẽrarãpa ne p'ue oodak'apɨ́ ooit'a. Maamina mɨa ẽpẽrarãpa ne p'ue oodak'apɨ́ ooiwẽma. Mãrapa abapuru Tachi Ak'õre pari pedeaparí Joná mãɨ jĩra ununaipɨ. 30Joná mãɨya bada Nínive p'uurudepema ẽpẽrarã́ k'awapisima ichi Tachi Ak'õrenepa che badat'a.#Joná 3:3-4. Mɨ, chi Ẽpẽra Warra piarã mãɨ jĩra mãɨyaipɨ idiapaepemarãpa k'awadamẽrá Tachi Ak'õrenepa che bɨ.

31»Salomón ewaride Sabá tuadepema poro jũra jɨ̃parí jɨ̃ bɨ wẽra basima. Ichi tua t'ɨmɨɨpa chesima Salomonpa ichi k'ɨ̃risiadepa pedea bɨ ũrii k'orea.#1 Reye 10:1-13. Maamina nãɨ ewaride Salomón k'aepẽra chi atepe bɨ nãma bɨmina mãrapa ĩjãanawẽa p'anɨma. Mãɨpuru Tachi Ak'õrepa ɨtɨai ewaride mãɨ wẽrapa p'irabarik'ari mãra nepɨra pará bɨade aipɨ. 32Tachi Ak'õrepa ãareaɨrã ɨtɨai ewaride Nínive p'uurudepemarã sida p'irabaridak'ari chi idiapaepemarã nepɨra pará bɨade adaipɨ.#Joná 3:1-10. Jonapa jarada ũrisidaɨde ãchia nemietá oopataɨ itu bɨdak'ari Tachi Ak'õremá chesidama. Mãɨ Joná k'aepẽra chi atepe bɨ nãma bɨmina mãrapa ĩjãanawẽa p'anɨma.

Tachi tau tachi k'ak'uadepema ĩpira jĩra bɨ k'orea jarateada

Mateo 5:15; 6:22-23

33»Abaɨpa laap'ara uruapidak'ari mẽra bɨdak'ama wa ne yaapataɨ ek'ari bɨdak'ama. Mãɨ k'aepẽra ne ɨtɨa ɨ̃rɨ bɨpatama chi tede eda cheutarãpa ɨnaa ununamẽrá. 34Pɨ tau ĩpira jĩra bɨma. Mãɨpuru pɨ tau pia bɨpɨra, ɨnaane nipaipɨ. Maamina pɨ tau mietá bɨpɨra, p'ãrione nipaipɨ. 35Mãɨ k'orea minachia jĩrak'aua base, pɨa ɨnaa jĩra k'ɨ̃risia bɨ mãɨ p'ãrio baemaapa. 36Maamina pɨ piarã ɨnaane bɨpɨra, p'ãrione mi ãpia pida bɨwẽpɨra, chi pedea piarãt'a k'awaipɨ ĩpirapa minachia ɨnaa uru bɨ jĩra».

Jesupa p'ariseorã́ ɨtɨa pedeada

Mateo 23:1-36; Marco 12:38-40; Luca 20:45-47

37Jesupa mãɨya jarak'ari p'ariseo abaɨpa ichi t'ɨ̃sima ichi ome nek'ode wãmẽrá. Ara mãɨne Jesú mãɨ ẽpẽra tedea wãk'ari nek'oi k'orea suak'abari beesima. 38Maamina Jesú nek'oi naena jua sɨɨwẽa basima ãchia oopataɨ jĩra. Mãɨ unuside p'ariseopa k'awa k'ɨ̃risiaé pasima. 39Mãɨne Tachi Chiparipa ichiá jarasima:

—Mãra p'ariseorãpa pasu mãɨnepa p'arat'u ɨ̃rɨpema pia sɨɨpatama, maamina mãra sõne ne ãarea ara machi pae ata k'ɨ̃riapatama mãɨnepa k'achia k'ɨ̃risiapatama. 40Mãra k'ɨ̃risiawẽa p'anɨ jĩra p'anaparima. ¿Chi ɨ̃rɨpema oodapa tachi sõ sida ooé pasik'ãra? 41Sõpiadepa nenea k'ederã́ mãrapa uru p'anɨnepema teat'ɨ. Mãɨya piarã mãra pia p'aneenaipɨ, tachi k'ak'ua pia sɨɨda jĩra.

42»¡Mãra p'ariseorã chupuri p'anɨma Tachi Ak'õrepa ɨtɨai pẽra! Mãrapa menta k'irú, ruda k'irú mãɨnepa ne uu ĩjũanepema ome Tachi Ak'õrea teapatama, mãɨ diezedepemacha, aba. Maamina chĩara ome jĩp'a oodak'ama mãɨnepa Tachi Ak'õre k'ɨ̃rianak'ama. Mãɨya oodai pia bɨma, machi ne teapata jĩra Tachi Ak'õrea.

43»¡Mãra p'ariseorã chupuri p'anɨma Tachi Ak'õrepa ɨtɨai pẽra! Mãra judiorã ará pedeapataɨ tede ãchi suak'abari p'aneenai k'ɨ̃riapatama minachia k'awa berã suak'abari p'aneepataɨde. Mãɨ awara p'uurude ninane k'ɨ̃riapatama ẽpẽrarãpa ãchiá pia pedeadamẽrá.

44»¡Chupuri p'anɨma Tachi Ak'õrepa mãra ɨtɨai pẽra! Mãra jãɨrã te jĩra p'anɨma.#11:44 Griego pedeade chi eda waapẽarã k'art'ade nãɨ sida bɨ bɨma: P'ariseorã, tachi Moisepa bɨda jarateapataɨrã, mãra chi k'õp'ãero p'anɨma. Chi ẽpẽra piuda t'ɨbarida ɨ̃rɨ wã p'anɨpa atua p'anɨma piuda ɨ̃rɨ t'ɨa p'anɨt'a te chae newẽneepuru. Ara mãɨ jĩra mãrapa oopataɨ ẽpẽrarãpa oopatama maamina ãchia atua p'anɨma mãɨya nemietá oo p'anɨt'a.

45Mãɨne Moisepa bɨda jarateaparí abaɨpa Jesua jarasima:

—Jarateaparí, mãɨya jararude tai k'orea k'achia pedea bɨma.

46Mãɨpuru Jesupa ichiá jarasima:

—¡Moisepa bɨda jarateapataɨrã, mãra chupuri p'anɨma Tachi Ak'õrepa ɨtɨai pẽra! Mãrapa ne p'ue oodawẽa be ẽpẽrarã́ oopipatama. Maamina mãɨ ãchia mi ãpia pida k'aripadak'ama mãɨ oodamẽrá.

47-48»¡Mãra chupuri p'anɨma Tachi Ak'õrepa ɨtɨai pẽra! Mãra chõarãenapemarãpa Tachi Ak'õre pari pedeapataɨrã peasidama. Mãɨya p'ananak'ari mãrapa jãɨrã te ɨ̃rɨ te chae oopatama. Mãɨya oo p'anɨnepa unupipatama mãra chõarãenapemarãpa oodada pia ununait'a.

49Mãɨ k'orea Tachi Ak'õrepa ichi k'ɨ̃risiadepa nãɨya jarasima: “Mɨ pari pedeapataɨrã mãɨnepa mɨa peedarã sida mãra israel ĩjũanepemarãmá wãpiipɨ. Mãɨne chi eda waapẽarã peadaipɨ mãɨnepa chi eda waapẽarã ẽp'ẽnaipɨ”. 50-51Tachi Ak'õrepa idiapaepema ẽpẽrarã ɨtɨaipɨ mãra chõarãenapemarãpa ãarea ichi pari pedeapataɨrã peadada k'orea. Ãjã, mɨa jararuma: nãɨ ĩjũa oodadepa waa idi chi peadaadarã k'orea Tachi Ak'õrepa mãra ɨtɨaipɨ; Abel peadada k'orea, Zak'aria peadada k'orea mãɨnepa ãarea waapẽarã peadada k'orea pida. Mãɨ Zak'aria Tachi Ak'õre te tajataria chi ãnimara paapataɨ k'ait'a peasidama.#11:50-51 Abel. Génesi 4:3-10 Zak'aria. 2 Crónica 24:17-25.

52»¡Moisepa bɨda jarateapataɨrã, mãra chupuri p'anɨma Tachi Ak'õrepa ɨtɨai pẽra! Mãrapa ẽpẽrarã́ Tachi Ak'õre piarã itu k'awapidak'ama. Mãrapa atua p'anɨma Tachi Ak'õre piarã sãmaasã́ bɨ. Mãɨ awara waapẽarãpa k'awa k'ɨ̃ria p'anɨ sida mãrapa itu k'awapidak'ama.

53Jesú wãk'ari p'ariseorãpa mãɨnepa Moisepa bɨda jarateapataɨrãpa Jesua atepe ne chaarea be k'ĩruu idi p'aneesidama. 54Ãchia k'ɨ̃ria p'anasidama Jesupa piawẽa p'anooit'a nepɨra pará bɨade adai k'orea.

Currently Selected:

Luca 11: tdc

Highlight

Copy