Luca 20

¿K'ai t'ɨ̃nepa Jesupa jaratea bɨma?

Mateo 21:23-27; Marco 11:27-33

1Ewariaba Jesupa Tachi Ak'õre te eda ẽpẽrarã́ ichi k'orea pedea pia pedea basima. Mãɨne p'aarerã chi mãɨrã chaarearã, Moisepa bɨda jarateapataɨrã mãɨnepa judiorã chaarearã chesidama. 2Ãchia Jesua nãɨya idisidama:

—Taiyá jarase, pɨa nãma oo bɨ ¿k'aipa oopi bɨma?#20:2 Pɨa nãma oo bɨ. Mãɨpa jara bɨma Jesupa ne netopataɨrã ãyá jerek'oada, k'ak'ua piawẽa berã jɨpa beepida mãɨnepa p'uurudepemarã́ jaratea bɨ.

3Jesupa ãchiá jarasima:

—Mɨa pida mãrá ne idiipɨ. P'anoot'ɨ. 4¿Sãmãɨpa Juan chesima porochoamẽrá? ¿Pajãne Bɨpa ichi peesima, wa nãɨ ĩjũanepemarãpa?

5Mãɨne ara ãstu pedea para beesima: «Pajãne Bɨpa peesiade adaipɨra ichia jaraipɨ: “Mãɨ ¿k'ãre k'orea ĩjãanaé pasima?” 6Maamina ẽpẽrapa peesiade adaipɨra, p'uurudepemarãpa tachi mawarapa bat'a peadaipɨ. P'uurudepemarãmá Juan Tachi Ak'õre pari pedeaparí pasima».

7Mãɨpuru ãchia p'anoosidama atua p'anɨane asidama sãmãɨpa chesit'a.

8Mãɨpuru Jesupa jarasima:

—Mãɨya bɨpɨra mɨa pida mãrá jaraiwẽma k'aipa mɨá jãɨya oopi bɨt'a.

Chĩara ne uu ĩjũa ak'ɨpataɨ k'orea nepɨrɨda

Mateo 21:33-44; Marco 12:1-11

9Mãɨya bak'ari Jesupa ẽpẽrarã́ nepɨrɨ bɨdepa nãɨya jarasima:

«Ẽpẽra basima. Mãɨ ẽpẽrapa uva ichi ĩjũane uusima. Maapae ichi uva k'ãena waapẽarã ẽpẽrarã juade bɨsima. Ãchi ome pedea ausidama chi uva k'ãena chaurude jõmasã́ ichiá teadai p'anɨ. Maapae t'ɨmɨa wãk'ari mãma tãaraasima. 10Uva baapataɨ ewaride pak'ari, ichi pae pari mimiaparí aba peesima chi uva k'ãenane mimiapataɨrãpa mãɨ chi ichipaepema uva tea peedamẽrá. Maamina ne uu ĩjũa ak'ɨ p'anɨpa chi ichi pae pari mimiaparí jok'aedak'ari, mi ãpia pida teadawẽa jĩitea peesidama. 11Mãɨ k'orea mãicha chi ichi pae pari mimiaparí awaraɨ peesima. Maamina mãɨ sida jok'aedak'ari k'achia pedeadak'ari, teadawẽa jĩitea peesidama. 12Mãɨ k'orea mãicha awaraɨ peesima, maamina mãɨ sida minachia jok'aedak'ari ãyá jeret'aa peesidama.

13»Mãɨ k'orea uva k'ãena chiparipa ara ichi tuaba jarasima: “¿Naapae k'ãret'a ooima? Chi mɨa minachia k'ɨ̃ria bɨ warra ãchimá peeipɨ; ichit'a wap'eadai p'anɨék'ãra” asima. 14Maamina ichi uva k'ãena ak'ɨ p'anɨpa chi warra unuutade jarasidama: “Jãɨpa chi ak'õre piuk'ari, ichia ne uru bada ãarea jɨ̃aipɨ. ¡Ichi peadaipɨ! Mãɨya chi ĩjũa tachidí paipɨ”. 15Ara mãɨne chi warra uva k'ãenanepa ateewãnak'ari peasidama.

»Mãramá mãɨ ne uu ĩjũa chiparipa ¿k'ãre ooima? 16Ará wãk'ari ãchi ãarea k'enak'ari ichi uva k'ãena awaraɨrã́ ak'ɨpiipɨ».

Chi arí berãpa mãɨ ũrisidaɨde jarasidama:

—Mãɨyawẽane asidama.

17Maamina Jesupa ãchimá ak'ɨk'ari jarasima:

—Mãɨya bɨpɨra ¿k'ãre k'orea Tachi Ak'õre pedeade nãɨya bɨ bɨma?

“Chi te oopataɨrãpa mawara amaanana pada, mãɨ mawara chi atepe piipará beesima”.#Salmo 118:22.

18Ẽpẽra mãɨ mawara ɨ̃rɨ ẽpẽra baesira abaeda ãarea ãriipɨ, mãɨnepa chi mawara abaɨ ɨ̃rɨ baesira mãɨ ẽpẽra perp'et'aipɨ.#Isaía 8:13-15.

19P'aarerã chi mãɨrã chaarearãpa mãɨnepa Moisepa bɨda jarateapataɨrãpa k'awasidama Jesupa mãɨ nepɨrɨdadepa ãchi k'orea pedeada pẽra, Jesú jita k'ɨ̃ria p'anasidama. Maamina p'uurudepemarã wap'ea p'anasidama.

Romanepema minachia k'awa bɨ pae erreara p'aadai k'orea jarateada

Mateo 22:15-22; Marco 12:13-17

20Maapae p'aarerã chi mãɨrã chaarearãpa ẽpẽra jĩp'a be jĩra peesidama Jesú pia ak'ɨdamẽrá. Mãɨrãpa Jesú piawẽa pedearu ũrisidara ara mãɨ jitadak'ari ãchi tuadepema poro chaarea juade teadai k'ɨ̃risia p'anasidama. 21Jesua nãɨya idisidama:

—Jarateaparí, taipa k'awa p'anɨma pɨa piarã jarateaparit'a. Pɨa ẽpẽrarã ãarea abarik'a unuparima, mãɨnepa Tachi Ak'õre o k'orea ãareaɨrã́ piarã jarateaparima. 22Mãɨya bɨpɨra taiyá jarase, Romanepema pae erreara jɨrɨp'epataɨ ¿tachi judiorãpa p'aadai pia bɨk'ãra wa mãɨyawẽ?

23Maamina Jesupa k'awa basima ichi nepɨrade baemẽrá mãɨya p'anɨt'a. Mãɨpuru jarasima:

—¿Mãrapa k'ãre k'orea mɨ piawẽa pedeapii k'ɨ̃ria p'anɨma?#20:23 ¿Mãrapa k'ãre k'orea mɨ piawẽa pedeapii k'ɨ̃ria p'anɨma? Griego pedeade chi eda waapẽarã k'art'ade mãɨ newẽma 24Mɨá erreara tau aba ak'ɨpit'ɨ. ¿K'ai k'ĩra nãɨne bɨ bɨma? ¿K'ai t'ɨ̃ eda bɨ bɨma?

Ãchia p'anoosidama:

—Romanepema chi atepe poro chaarea bɨdé.

25Mãɨpuru Jesupa ãchiá jarasima:

—Mãɨyara chi Romanepema chi atepe poro chaarea bɨdé mãɨ ichidí ichiá teat'ɨ, ichiaba chi Tachi Ak'õrené mãɨ chi Tachi Ak'õrea teat'ɨ.

26Ãchia Jesú jõmãɨrã taade p'ue piawẽa pedeapidaé pasima. Mãɨpari k'ĩup'ea tuaneesidama ichia jarada k'orea k'awa k'ɨ̃risiadaé pasi pẽra.

Chok'ae p'irabaripataɨ k'orea Jesupa jarada

Mateo 22:23-33; Marco 12:18-27

27Mãɨya p'anɨne waapẽarã saduceorã ichimá chesidama. Saduceorãpa ĩjãanak'ama piudada chok'ae p'irabaridait'a. Mãɨpuru Jesua nãɨya idisidama:

28—Jarateaparí, Moisepa tachi pae bɨsima ẽpẽra warra newẽa bɨ piusira, ichi ũpẽapa chi p'ẽtã́ atai pia bɨma chi ũpẽa piuda k'orea warra unui k'orea.#Deuteronomio 25:5-10. 29Ewariaba ũpẽarã siete p'anasidama. Chi ĩwinipa k'ima atasima maamina warra unui naena, piusima. 30Mãɨpuru chi mãɨ ɨ̃aripema ũpẽapa chi p'ẽtã́ atasima maamina ara mãɨ jĩra warra newẽa piusima. 31Mãɨ k'orea chi mãɨ ɨ̃aripema ũpẽapa chi p'ẽtã́ atasima maamina ara mãɨya piusima. Chi ũpẽa ãareaɨrãpa mãɨ wẽra atasidama maamina warra newẽa piusidama. 32Mãɨya bak'ari chi wẽra sida piusima. 33Mãɨ ũpẽarã siete p'anɨpa mãɨ wẽra ata p'anasidama. Mãɨyara chok'ae p'irabaripataɨ ewaride ¿chi sãɨpa ichi uru beeima?

34Mãɨ k'orea Jesupa p'anoosima:

—Nãɨ ewaride ẽpẽrapa k'ima atapatama mãɨnepa k'ima teapatama. 35Maamina ẽpẽrarã Tachi Ak'õrepa pia unu bɨt'a chok'ae p'irabaridaipɨ. Mãɨne ẽpẽrarãpa k'ima waa atadaiwẽma, mãɨyawẽpɨra k'ima teadaiwẽma, mãɨpari Tachi Ak'õrepa ɨt'aripa peedaɨrã jĩra p'ananaipɨ. 36Mãɨya waa piudaiwẽma. Chok'ae p'irabaridai pẽra Tachi Ak'õre warrarãpɨ. 37Mãɨ awara Moisepa pak'uru jeeda urua nɨbɨ k'orea k'art'ade bɨside k'awapisima piudaadarã chok'ae p'irabaridait'a. Ichia Tachi Chipari nãɨya t'ɨ̃ jarasima: “Chi Abrahán Pajãnepema Ak'õre, Isá Pajãnepema Ak'õre mãɨnepa Jacobo Pajãnepema Ak'õre”.#Éxodo 3:2-6. 38Ichi chi piudaadarã Ak'õrewẽma, mãɨpari chi chok'ae berã Pajãnepema Ak'õrepɨ. Tachi Ak'õremá jõmãɨrã chok'ae p'anɨma.

39Mãɨpuru waapẽarã Moisepa bɨda jarateapataɨrãpa Jesua jarasidama:

—Pɨa arí p'anoosima, Jarateaparí.

40Jesupa ãarea pia p'anoona pẽra abaɨ pida Jesua waa ne ididai k'ɨ̃rianaé pasima.

Tachi k'aripaparí teai jarada mãɨ ¿k'ai warrama?

Mateo 22:41-46; Marco 12:35-37

41Maapae Jesupa ãchiá idisima:

—¿K'ãre k'orea ẽpẽrarãpa Tachi Ak'õrepa Tachi K'aripaparí teai jarada Daví warraade a p'anɨma? 42-43Davipa Salmo k'art'ade nãɨya jarasima:

“Tachi Chiparipa jarasima Mɨ Chiparia: mɨ juaraari suak'abari beese, aba mɨa pɨchi nek'ĩramá pɨchi juade bɨrudea”.#Salmo 110:1.

44Tachi Ak'õrepa Tachi K'aripaparí teai jarada Davipa mãɨ mɨ Chipariade a jara bɨpɨra, ¿sãmaasã́ mãɨ Daví warra paima?

Jesupa Moisepa bɨda jarateapataɨrã nepɨra pará bɨade ada

Mateo 23:1-36; Marco 12:38-40; Luca 11:37-54

45Jõmãɨrãpa ũri p'anɨne Jesupa ichi ome p'ɨrrɨapataɨrã́ jarasima:

46«Jĩrak'aua p'anat'ɨ chi Moisepa bɨda jarateapataɨrã k'orea. Ãchia neet'á teesoa anamari jɨ̃patama. Mãɨ awara p'uurude ninane k'ɨ̃riapatama ẽpẽrarãpa ãchiá pia pedeadamẽrá. Judiorã ará pedeapataɨ tede ãchi suak'abari p'aneepatama jõmãɨrã taade, minachia k'awa berã suak'abari p'aneepataɨde; nek'outade ara mãɨ jĩra oopatama. 47P'ẽtãarã neet'á ẽemaripatama mãɨnepa minachia tãaraa ɨt'aa chiidipatama ẽpẽrarãpa mãra pia ununamẽrá. Mãɨ k'orea Tachi Ak'õrepa ãchi atepe ɨtɨaipɨ».

Currently Selected:

Luca 20: tdc

Highlight

Copy