Mateo 13
13
Net'a tau p'oda k'orea nepɨrɨda
Marco 4:1-9; Luca 8:4-8
1Mãɨ ewaride Jesú tedepa wãk'ari senia choma ik'idá suak'abari bade wãsima. 2Mãɨne ẽpẽrarã chok'ará ichimá minachia cheepɨrɨsidama. Mãɨpuru p'ãp'orrode batook'ari suak'abari beesima. Ẽpẽrarã ipude to ik'idá tuaneesidama. 3Maapae Jesupa ne minachia nepɨrɨ bɨdepa nãɨya jarateasima:
«Ẽpẽra ne p'ode wãsima. 4Mãɨya p'o nine chi eda waapẽarã chi net'a tau ode baek'oasima. Mãɨne ĩpana cheepɨrɨdak'ari mik'oasidama. 5Chi eda waapẽarã chi net'a tau ĩjũa mawara idá bɨde baek'oasima. Chi ĩjũa t'at'adá bɨẽra ĩjũa namia basima. Mãɨpuru chi net'a tau isapea t'õnosima. 6Maamina pisia wãsiapa p'urpasima chi k'arra ɨ̃rɨa bada pẽra. 7Ichiaba chi eda waapẽarã net'a tau ĩjũa ɨɨrɨ idá bɨde baek'oasima. Chi mãma baek'oada waridak'ari jɨ̃k'ara ɨɨrɨ pará bɨpa pɨra k'enasima. 8Maamina chi eda waapẽarã net'a tau ĩjũa piade baek'oasidama. Waapẽarã minachia chausidama, mãɨ awara atepe chausidama, mãɨ awara mãɨ atepe pará chausidama.#13:8 Griego pedeade nãɨya bɨ bɨma: Chi eda waapẽarãpa treinta teasima, chi eda waapẽarãpa sesenta teasima, waapẽarãpa cien teasima. 9Chi k'ɨɨrɨ pará bɨpa jĩrak'aua ũrise».
Jesupa nepɨrɨpachima jarateai k'orea
Marco 4:10-12; Luca 8:9-10
10Maapae Jesú ome p'ɨrrɨapataɨrãpa ichi orrobaridak'ari idisidama:
—¿K'ãre k'orea ẽpẽrarã́ nepɨrɨ bɨdepa jarateaparima?
11Jesupa p'anoosima:
—Chi Pajãne Bɨpa ichidirã ichi juade ua bɨ k'orea ãareaɨrã́ k'awapiwẽa bɨmina, mãrá k'awapi bɨma. 12Abaɨpa Tachi Ak'õre k'orea piarã k'awaipɨra, Tachi Ak'õrepa mãɨ atepe k'awapiipɨ. Maamina chi atua bɨpa ne k'awa bɨ k'ɨ̃risiaipɨra, ichia k'ɨ̃risia bɨ sida Tachi Ak'õrepa mãɨ ẽemariipɨ. 13Mãɨ k'orea mɨa ãchiá nepɨrɨparima ne jarateai k'orea. Mɨa oo bɨ ãchia unu p'anɨmina k'awadawẽa p'anɨma, ichiaba mɨa jara bɨ ũri p'anɨmina p'ue ũrinawẽa p'anɨma. 14Tachi Ak'õre pari pedeaparí Isaíapa jarada jĩra oopatama:
Nãɨ ẽpẽrarãpa ũri p'anɨmina k'awadak'ama. Minachia unu p'anɨmina k'awadak'ama.
15Ãchi sõnepa p'ue k'awadak'ama, ũri k'ɨ̃rianak'ama mãɨnepa unu k'ɨ̃rianak'ama.
Mãɨya badaépara ãchia taudepa ununai pasima, k'ɨɨrɨdepa ũrinai pasima mãɨnepa sõnepa k'awadai pasima.
Maapae mɨmá chedak'ari mɨa ãchi jɨpa beepii pasima.#Isaía 6:9-10.
16»Maamina mãra pia p'anɨma, unu p'anɨẽra mãɨnepa ũri p'anɨẽra. 17Mɨa piarã jararuma: Tachi Ak'õre pari pedeapataɨrã minachia p'anɨrãpa, ẽpẽerã jĩp'a be ome unu k'ɨ̃ria p'anasidama mãrapa unu p'anɨt'a. Maamina ununaé pasima. Ichiaba mãrapa ũri p'anɨt'a ũri k'ɨ̃ria p'anasidamina ũrinaé pasima.
Jesupa k'awapida chi net'a tau p'oparí k'orea
Marco 4:13-20; Luca 8:11-15
18»Ũrit'ɨ chi mɨa nepɨrɨda net'a tau p'oparí k'orea k'ãre jara k'ɨ̃ria bɨt'a: 19Chi net'a tau ode p'oda nãɨya jara k'ɨ̃ria bɨma: Pajãne Bɨpa ichidirã ichi juade ua bɨ k'orea abaɨ pida ũrik'ari k'awaepɨra, tiorepa mãɨ pedea ichi sõne cheda k'ɨ̃risia atuapiipɨ. 20Chi net'a tau mawara idá bɨ ĩjũane p'odapa nãɨ jara bɨma: waapẽarã ẽpẽrarãpa Tachi Ak'õre pedea ũrinak'ari sõpia ũripatama. 21Maamina k'arra ɨ̃rɨa p'anɨẽra tãaraa choadak'ama. Nepɨrade baeutade mãɨyawẽpɨra Tachi Ak'õre pedea ĩjãa p'anɨ k'orea ẽpẽrarãpa mĩapiutade ãchia ĩjãa p'anana itu bɨpatama. 22Chi net'a tau ĩjũa ɨɨrɨ idá bɨde p'oda nãɨ jara bɨma: chi eda waapẽarã ẽpẽrarãpa Tachi Ak'õre pedea ũripatama, maamina ãchi sãmaasã́ pia beadai k'orea minachia k'ɨ̃risiapatama. Ne ãarea uru p'ananaipɨra, arapá p'ananai k'ɨ̃risiapatama. Ãarea mãɨ k'ɨ̃risia mietapa ãchia sõne pia ũrinana itu bɨpiparima ne uu warida chauk'á bapari jĩra. 23Maamina chi net'a tau ĩjũa piade p'oda nãɨya jara k'ɨ̃ria bɨma: chi eda waapẽarãpa Tachi Ak'õre pedea pia ũrinak'ari ĩjãapatama. Mãɨrã chi waapẽarãpa nepia ãpia oopatama mãɨnepa chi waapẽarãpa ne wait'apea oopatama, mãɨ awara chi waapẽarãpa ne minachia oopatama.#13:23 Griego pedeade nãɨya bɨ bɨma: Chi eda waapẽarãpa treinta chaupatama, chi eda waapẽarãpa sesenta chaupatama ichiaba waapẽarãpa cien chaupatama.
Trigo ĩjũane ne uu mietá uuda
24Maapae Jesupa mãicha nepɨrɨsima ne jarateai k'orea:
«Pajãne Bɨpa ichidirã ichi juade ua bɨt'a nãɨ jĩra bɨma. Ẽpẽra basima. Mãɨ ẽpẽrapa ichi ĩjũane trigo tau pia uusima. 25Maamina chi ichi pae pari mimiapataɨrã k'ãi p'anasimisa ichi nek'ĩramá chek'ari ne uu mietá trigo uudade uusima. Maapae wãsima. 26Mãɨya bak'ari chi trigo otok'ari chauk'oasima. Ara mãɨne ne uu mietá sida warik'oasima. 27Chi chipari pae pari mimiapataɨrãpa chiparia idide wãsidama: “Tai chipari, pɨ ĩjũane trigo pia uu baside ¿jãɨ ne uu mietá sãmaasã́ warisima?” 28Chiparipa p'anoosima: “Mɨ chi nek'ĩramaapa mãɨya oosima”. Mãɨne chi ichi pae pari mimiapataɨrãpa ichiá idisidama: “Mãɨya bɨpɨra ¿k'ɨ̃ria bɨk'ãra taipa ẽuk'oade wãnait'a?” 29Chiparipa p'anoosima: “Mãɨya oorãt'ɨ. Mãɨya oodaipɨra trigo ne uu mietá ome tausia ẽuk'oadaipɨ. 30Pia bɨma tausia waripidai aba chauutadea. Mãɨ ewaride mɨ mimiapataɨrã́ jaraipɨ jerep'edamẽrá: naa ne uu mietá jɨrɨp'edak'ari k'ãajɨ̃t'ɨ paadai k'orea. Maamina trigo mɨ ne yaaparí tede yaat'ɨ”».
Mostaza tau uuda k'orea nepɨrɨda
Marco 4:30-32; Luca 13:18-19
31Mãicha Jesupa mãicha nepɨrɨsima jarateai k'orea:
—Pajãne Bɨpa ichidirã ichi juade ua bɨt'a nãɨ jĩra bɨma. Ẽpẽrapa mostaza tau ichi ĩjũane uusima. 32Mãɨ mostaza tau ãarea tachia uupataɨ k'aepẽra ãpia k'ɨrɨma. Maamina waapẽarã ne uu awaraɨ k'aepẽra waibɨa wariparima, aba pak'uru minachia nɨbeerudea. Mãɨpuru ĩpana chi pak'uru juat'aede te ook'oade chepatama».
P'ana ooropiparí k'orea nepɨrɨda
Luca 13:20-21
33Ichiaba Jesupa mãicha nepɨrɨsima jarateai k'orea:
«Pajãne Bɨpa ichidirã ichi juade ua bɨt'a p'ana ooropiparí jĩra bɨma. Mãɨ p'ana ooropiparí wẽrapa ãpia atak'ari harina ome p'oerasima. Maapae minachia eapasima ãarea ẽesãarunea».
Jesupa naa nepɨrɨda jarateada
Marco 4:33-34
34Ãarea mãɨ Jesupa ẽpẽrarã́ nepɨrɨdepa jarateasima. Nepɨrɨwẽa jarateak'a pasima. 35Tachi Ak'õre pari pedeaparipa jarada jĩra piarã mãɨyasima:
«Mɨa nepɨrɨdepa pedeaipɨ. Tachi Ak'õrepa nãɨ ĩjũa oodadepa waa idi k'awapiwẽa bada, mɨa jaraipɨ».#Salmo 78:2.
Ne uu mietá ne uu ĩjũane uuda k'orea Jesupa k'awapida
36Maapae Jesú ẽpẽrarã ome bada tedea wãsima. Ichi ome p'ɨrrɨapataɨrã chedak'ari idisidama:
—Ne uu mietá uudada k'orea taiyá k'awapise.
37Jesupa jarasima:
—Chi mãɨ net'a tau pia uuparí jara k'ɨ̃ria bɨma mɨ, chi Ẽpẽra Warra. 38Ne uu ĩjũa jara k'ɨ̃ria bɨma nãɨ ĩjũa ãarea. Chi ne uu tau pia jara k'ɨ̃ria bɨma Pajãne Bɨpa ichidirã ichi juade ua bɨdepema ẽpẽrarã. Chi ne uu jara k'ɨ̃ria bɨma tiore mietaaderã. 39Chi nek'ĩramá, mãɨpa ne uu mietá uuda jara k'ɨ̃ria bɨma tiore mietapɨ. Chi ne uu ĩjũa chaudai ewari jara k'ɨ̃ria bɨma nãɨ jõi ewari. Chi ne uu ĩjũa chauparí ewari mimiapataɨrã jara k'ɨ̃ria bɨma Tachi Ak'õrepa ɨt'aripa peedarã. 40Ne uu mietá ẽut'aak'oadak'ari paapataɨ jĩra nãɨ ewaride ne mãɨyaipɨ. 41Mɨ, chi Ẽpẽra Warrapa mɨ Ak'õrepa ɨt'aripa peedarã peeipɨ nemietá oopataɨrã mãɨnepa nemietá oopipataɨrã Mɨ juade ua bɨdepemarã jɨrɨp'ek'oaipɨ. 42Mãɨrã t'ɨpɨ uruade bat'ak'oadaipɨ. Mãma jẽa p'ananaipɨ mãɨnepa p'uapa k'ida k'ɨterrea p'ananaipɨ. 43Maamina chi jĩp'a berã ãchi Ak'õre juade ɨmata jĩra achiterrea p'ananaipɨ. Chi k'ɨɨrɨ pará bɨpa jĩrak'aua ũrise.
Ĩjũa mãɨnepa perla atada
44Pajãne Bɨpa ichidirã ichi juade ua bɨt'a erreara yoorode mẽra bɨda jĩra bɨma. Mãɨ erreara ẽpẽrapa unuk'ari mẽra bɨsima chi badamá. Maapae arapá wãk'ari jõma ichia uru bɨ netok'ari maapae chi ĩjũa atasima.
45»Mãɨ awara Pajãne Bɨpa ichidirã ichi juade ua bɨt'a nãɨ jĩra bɨma. Ẽpẽra ne ataparí pasima. Mãɨ ẽpẽrapa perla chi neepɨa bɨt'a jɨrɨ bapachima atai k'orea. 46Mãɨya bɨde aba minachia pia k'ɨrɨ chi neepɨa bɨ unusima. Ara mãɨne ichia uru bɨ ãarea netok'ari mãɨ atasima.
T'ɨri k'orea jarateada
47»Pajãne Bɨpa ichidirã ichi juade ua bɨt'a t'ɨri jĩra bɨma. T'ɨri bat'adak'ari, beta wawaria peapatama. 48Beta minachia eda beek'ari ipudea jidibari enemeepatama. Maapae suak'abari p'aneenak'ari beta pia jabaradea jɨrɨp'epatama. Chi beta k'odak'apɨ́ amaak'oapatama. 49Ara mãɨ jĩra nãɨ jõru ewari mãɨyaipɨ. Tachi Ak'õrepa ɨt'aripa peedarã chedak'ari ẽpẽra k'achiarã chi jĩp'a berã t'ãenapema awara bɨdaipɨ. 50Maapae t'ɨpɨ uruade bat'ak'oadaipɨ. Mãma jẽa p'ananaipɨ mãɨnepa p'uapa k'ida k'ɨterrea p'ananaipɨ.
Ne chiwidi mãɨnepa ne sore k'orea nepɨrɨda
51Maapae Jesupa idisima:
—Mɨa jarada ¿mãrapa ãarea k'awasidak'ãra?
Ãchia p'anoosidama:
—Ãjã, tai Chipari.
52Mãɨne Jesupa jarasima:
—Pajãne Bɨpa ichidirã ichi juade ua bɨ k'orea Moisepa bɨda jarateaparipa k'awasira te chipari jĩra bɨma. Ichia yaa uru bɨdepema nepia chiwidi mãɨnepa chi chõarãenapema ak'ɨpiparima.
Jesú Nazaré p'uurudea wãna
Marco 6:1-6; Luca 4:16-30
53Mãɨya nepɨrɨ bɨdepa jarateak'ari Jesú ãyá wãsima. 54Maapae ichi p'uurudea chesima. Ewariaba judiorã ará pedeapataɨ tede jaratea basima. Chi ũri p'anɨpa k'awa k'ɨ̃risiadaé pasi pẽra nãɨya jarasidama:
—Nãɨpa ¿sãmãɨpa jãɨ k'ɨ̃risia k'awa atasima? ¿Sãmaasã́ ẽpẽerãpa ne p'ue oodak'apɨɨrã ichia mãɨ p'ue ooima? 55¿Ichi tachi p'uurudepema pak'urudepa ne ook'oaparí warrawẽk'ãra? Ichi nae ¿Mariawẽk'ãra? Ichi ũpẽarã ¿Santiago, José, Simón mãɨnepa Judawẽk'ãra? 56Ãarea ichi ũpẽawẽrarã sida ¿tachi t'ãena p'anɨwẽk'ãra? Mãɨyapɨra, ¿ichia sãma jãkɨɨ k'awasima?
57Ãchia Jesude ĩjãanai k'ɨ̃rianaé pasima. Mãɨpuru Jesupa jarasima:
—Tachi Ak'õre pari pedeaparí tua awaraɨdepemarãpa wap'eapatama, maamina ara ichi tuadepemarãpa wap'eadak'ama. Ichi tedepemarã pida wap'eadak'ama.
58Ãchia ĩjãanaé pada pẽra Jesupa mãma ẽpẽrarãpa ne p'ue oodak'apɨ́ p'ue minachia ooé pasima.
Currently Selected:
Mateo 13: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
