Mateo 21

Jesú Jerusalenea cheda

Marco 11:1-11; Luca 19:28-40; Juan 12:12-19

1Jerusalén k'ait'a cheutade Betp'aké p'uurude chesidama, Olivo eya k'ait'a. Mãɨne Jesupa ichi ome p'ɨrrɨapataɨrã ume p'uurudea peesima. 2Ãchiá nãɨya jarasima: «Tachi k'ĩrari bɨ p'uurudea wãt'ɨ. Mãma pautade mũra wẽra warra pará bɨ jɨ̃ nɨbɨ ununaipɨ. Ẽranak'ari umea mɨmá enemeet'ɨ.#21:2 Mũra wẽra. Griego pedeade bɨ bɨma: Burra. 3Abaɨpa mãrá k'ãre k'orea mãɨya oo p'anɨane a idiipɨra, nãɨya jarat'ɨ: “Tachi Chiparipa k'ɨ̃ria bɨma. Maamina naane nãɨ mũra tea peeipɨ”».

4Mãɨya basima Tachi Ak'õre pari pedeaparipa jarada jĩra. Nãɨya jarasima:

5«Sión p'uurudepemarã́ nãɨya jarat'ɨ:

“Ak'ɨt'ɨ, mãra chipari mũra ɨ̃rɨ mãramá cheruma.

Chi ẽpẽra minachia k'awa bɨ jĩra chewẽma. Mũra chak'e ɨ̃rɨ cheruma”».#Zak'aria 9:9.

6Ara mãɨne Jesú ome p'ɨrrɨapataɨrã ume p'anɨ wãnak'ari Jesupa jarada jĩra oosidama. 7Mũra wẽra mãɨnepa chi warra Jesumá ateewãnak'ari chi ãchia anamari jɨ̃ p'anana mũra ɨ̃rɨ bɨsidama. Maapae Jesú mãɨ ɨ̃rɨ suak'abari beesima Jerusalén p'uurudea wãi k'orea. 8Ẽpẽrarã ode chi chok'ará nɨbasima. Waapẽarãpa chi ãchia anamari jɨ̃ p'anana ojãne t'õk'oasidama, Jesú mãɨ ɨ̃rɨ wãmẽrá. Waapẽarãpa k'irú t'ɨɨdak'ari, bɨpachidama mãɨ ojãne, ãchi poro jũra jɨ̃parí jɨ̃ bɨ pai bɨade a k'ɨ̃risia p'anana pẽra. 9Jesú naa wãutapa mãɨnepa k'aade cheutapa sõ arapá biapachidama:

¡Minachia pia bɨma Davidepa cheda!

¡Minachia pia bɨma Tachi Chipari t'ɨ̃nepa cheru!#21:9 Minachia pia bɨma. Arameo pedeade Hosanna. Salmo 118:25-26. ¡Minachia pia bɨma chi Pajãne bɨt'a!

10Jesú Jerusalene wãside, p'uurudepemarã ãarea piuk'a nɨbeesima. Nãɨya idipachidama:

—Ichi ¿jãɨt'a k'aima?

11Idiutacha Jesú ome chedaadarãpa p'anoopachidama:

—Jãɨ Jesupɨ, Tachi Ak'õre pari pedeaparipɨ. Ichi Nazaré p'uurudepemama, mãɨnepa Galilea tuadepemama.

Jesupa ne netopataɨrã ãyá jerek'oada

Marco 11:15-19; Luca 19:45-48; Juan 2:13-22

12Mãɨya bak'ari Jesú Tachi Ak'õre te minachia bɨdea wãsima. Mãma tajata ne netopataɨrã mãɨnepa ne atapataɨrã ome unusima.#21:12 Ne netopataɨrã. Tachi Ak'õre te minachia bɨde tajata ne netopachidama, ẽpẽrarãpa ne teadayá Tachi Ak'õre pae. Mãɨya unuk'ari, Jesupa ãchi ãarea ãyá jeret'aak'oasima.#Zak'aria 14:21. Mãma jira bat'ak'oasima ne nek'opataɨ chi erreara tau tua awaraɨdepema k'ãpiapataɨrãné mãɨnepa p'aloma netopataɨrã suak'abari p'aneepataɨ sida.#21:12 Erreara tau tua awaraɨdepema k'ãpiapataɨrãné. Mãɨ ewaride Tachi Ak'õre te minachia bɨde, erreara tau neepɨa netopachidama ẽpẽrarã tua awaraɨdepa cheutá, mãɨ erreara tua awaraɨdepemanepa p'ue p'aadaiwẽ pada pẽra Tachi Ak'õre pae. 13Ãchiá nãɨya jarasima:

—Tachi Ak'õre pedeade nãɨya bɨ bɨma: “Mɨ te ɨt'aa chiidipataɨ teade adaipɨ”. Maamina mãrapa nechɨapataɨ te uria bɨ jĩra papisidama.#21:13 Mɨ te ɨt'aa chiidipataɨ teade adaipɨ. Isaía 56:7 Nechɨapataɨ te uria. Jeremia 7:11.

14Jesú Tachi Ak'õre te eda baside tau p'ãrio berã mãɨnepa bɨɨrɨ sorek'ea berã ichimá cheepɨrɨsidama. Mãɨne ãchi jɨpa beepik'oasima. 15Maamina Jesupa mãma ẽpẽrarãpa ne p'ue oodak'apɨ́ oo bɨt'a ooside, warrarã Tachi Ak'õre te minachia bɨ p'ananapa Jesua nãɨya jĩk'ua biasidama: «¡Minachia pia bɨma Davidepa cheda!» Mãɨ p'aarerã chi mãɨrã chaarearãpa mãɨnepa Moisepa bɨda jarateapataɨrãpa mãɨ unusidaɨde k'ĩruusidama.#21:15 Judiorãpa jarapachidama tau p'ãrio berã mãɨnepa jĩru piawẽa berã Tachi Ak'õre te minachia bɨdea p'ue wãnai piawẽa basima. 2 Samuel 5:8. 16Ãchia Jesua nãɨya jarasidama:

—¿Mãɨyara nãɨ warrarãpa jara p'anɨt'a pɨa ũri bɨk'ãra?

Jesupa p'anoosima:

—Ãjã. ¿Mãrapa nãɨ pedea eda jaradawẽa p'anɨk'ãra?

“Pɨa warrarã mãɨnepa juto k'ede bɨsima pɨá pia pedeadamẽrá”.#Salmo 8:2.

17Maapae Jesupa ãchi ameek'ari Jerusalenepa Betania p'uurudea k'ãine wãsima.

Higojõ bɨɨrɨ p'urpada

Marco 11:12-14; 11:20-26

18Norema tap'ede Jesú mãicha Jerusalenea wãsima. Wãrune jarrapisia nɨbeesima. 19Mãɨne higojõ bɨɨrɨ ok'á nɨbɨ unusima.#21:19 Tachi Ak'õre pedeade mãɨ higojõ bɨɨrɨ Israel p'uuruade a jara k'ɨ̃ria bɨma. Maamina ará wãside chi k'irúawa nɨbɨ unusima.#21:19 Israel tuade higojõ chak'e marzo mãɨnepa abrilde k'odai p'anɨma. Chi higojõ chak'e ununaipɨra k'awapatama junione ãpia chaui ichiaba agostodepa aba octubredea minachia chaui. Maamina Jesupa k'irúawa ununa pẽra k'awasima jõma mãɨ ãyone higo chauiwẽt'a. Mãɨpuru higojõ bɨɨrɨa jarasima:

—¡Pɨ waa chauwẽa baipɨ!

Ara mãɨne higojõ bɨɨrɨ p'urpasima. 20Jesú ome p'ɨrrɨapataɨrãpa mãɨ unusidaɨde idisidama, k'awa k'ɨ̃risiadaé pasi pẽra:

—¿K'ãre k'orea jãɨ higojõ bɨɨrɨ jãɨya p'urpasima?

21Jesupa p'anoosima:

—Mɨa piarã jararuma: piarã Tachi Ak'õrepa mãrapa idi p'anɨ p'ue ooyade a k'ɨ̃risia p'anɨpɨra, mãɨnepa ichia p'ue ooiwẽane a p'anɨwẽpɨra, mɨa jãɨ higojõ bɨɨrɨ ooda k'aepẽra mãrapa atepe oodaipɨ. Mãrapa cha bɨ eyá ãyá wãpade adaipɨra mãɨnepa p'usadea eda baewãpade adaipɨra, ara mãɨya baewãipɨ. 22Mãrapa Tachi Ak'õrea ne ɨt'aa chiididak'ari, mãɨnepa ichia mãɨ piarã teait'a a k'ɨ̃risia p'anɨpɨra, mãɨ ne ãarea jitadaipɨ.

¿K'ai t'ɨ̃ne Jesupa jaratea bɨma?

Marco 11:27-33; Luca 20:1-8

23Jesú mãicha Tachi Ak'õre te minachia bɨ k'ait'a chek'ari jaratea beesima. Mãɨya bɨde p'aarerã chi mãɨrã chaarearã mãɨnepa judiorã chaarearã ichimá chesidama. Ãchia Jesua nãɨya idisidama:

—Pɨa nãma oo bɨ ¿k'aipa oopi bɨma?#21:23 Pɨa nãma oo bɨ. Nãɨ jara k'ɨ̃ria bɨma Jesupa ne netopataɨrã ãyá jerek'oada, wa jara bɨma sãmaasã́ Jesú Jerusalene cheda, wa ichia tau p'ãrio berã mãɨnepa jĩru piawẽa berã Tachi Ak'õre te minachia bɨ k'ait'a jɨpa beepida, wa p'uurude jaratea bɨ.

24Jesupa p'anoosima:

—Mɨa pida mãrá ne idiipɨ. Mãrapa mãɨ p'anoosidara, mɨa pida jaraipɨ k'aipa mɨá mãɨya oopi bɨt'a. 25¿Sãmãɨpa Juan chesima porochoamẽrá? ¿Pajãne Bɨpa ichi peesima, wa nãɨ ĩjũanepemarãpa?#Mateo 3:1-12; Juan 1:6-28.

Mãɨne ara ãstu pedea para beesima: «Pajãne Bɨpa peesiade adaipɨra, ichia jaraipɨ: “Mãɨ ¿k'ãre k'orea ĩjãanaé pasima?” 26Maamina taipa p'ue ẽpẽrapa ichi peesiade adaiwẽma».

Ãchia mãɨya jarasidama chi ẽpẽerã p'uurudepemarã wap'ea p'anɨ pẽra. Chi p'uurudepemarãmá, mãɨ Juan piarã Tachi Ak'õre pari pedeaparí pasima. 27Mãɨpuru Jesua p'anoosidama:

—Taipa atuapɨ.

Mãɨne Jesupa jarasima:

—Mãɨya bɨpɨra mɨa pida mãrá jaraiwẽma k'aipa mɨá jãɨya oopi bɨt'a.

Warra ume p'anɨ k'orea nepɨrɨda

28Mãɨya p'anɨne Jesupa p'aarerã chi mãɨrã chaarearã́ mãɨnepa judiorã chaarearã́ jarasima:

—Mãrapa nãɨ nepɨra k'orea ¿k'ãret'a k'ɨ̃risia p'anɨma? Ẽpẽra basima. Mãɨ ẽpẽrapa warra ume uru basima. Ewariaba chi napemá nãɨya jarasima: “Warra, mimiane wãse mɨ uva k'ãena”. 29Mãɨne chi warrapa p'anoosima: “¡Mɨ wãiwẽma!” Maamina mãɨya bak'ari pia k'ɨ̃risiak'ari mimiane wãsima. 30Maapae chi ak'õrepa chi warra abaɨa abarik'a jarasima. Mãɨne chi abaɨ warrapa p'anoosima: “Pia bɨma, ak'õre, mɨ wãipɨ”. Maamina wãé pasima. 31Mãɨ mãramá ¿chi sãɨ warrapa chi ak'õrepa k'ɨ̃ria bada oosima?

Ãchia p'anoosidama:

—Chi naapemapa.

Mãɨne Jesupa ãchiá jarasima:

—Ãjã. Maamina piarã mɨa jararuma: Romanepema pae erreara jɨrɨp'epataɨrã mãɨnepa wẽra k'achia berã mãra k'aepẽra Tachi Ak'õre ichidirã ichi juade ua baparidea wãnaipɨ.#21:31 Tachi Ak'õre ichidirã ichi juade ua baparidea wãnaipɨ. Griego pedeade nãɨya bɨ bɨma: Tachi Ak'õre ichidirã ichi juade ua baparidea naa wãnaipɨ. 32Juan chi Porochoaparipa jarateade che basima mãra jĩp'a nipadamẽrá, maamina ĩjãanaé pasima. Maamina Romanepema pae erreara jɨrɨp'epataɨrãpa mãɨnepa wẽra k'achia berã pida ĩjãasidama. Mãrapa mãɨ unusidamina, machia nemietá oopataɨ itu bɨdaé pasima ichia jarateada ĩjãanai k'orea.

Jesupa mimiapataɨrã k'achia berã k'orea nepɨrɨda

Marco 12:1-12; Luca 20:9-19

33»Ũrit'ɨ. Mãicha awara nepɨrɨipɨ. Ẽpẽra basima. Ewariaba mãɨ ẽpẽrapa uva uuk'ari#Isaía 5:1-7. ichi ne uu ĩjũa mawarapa adu jũk'asima. Mawara uria waibɨa uya k'orosima uvaba jui k'orea. Ichiaba te ɨt'ɨ oosima mãmãɨpa ãarea ak'ɨi k'orea. Maapae ichi ne uu ĩjũa waapẽarã ẽpẽrarã juade bɨsima. Ãchi ome pedea ausidama uva baautade ichiá jõmasã́ teadait'a. Mãɨya pedeak'ari chi chipari tua awaraɨdea wãsima. 34Maapae uva baapataɨ ewari ará pak'ari, chi chiparipa ichi pae mimiapataɨrã peesima chi uva k'ãenane mimiapataɨrãpa mãɨ chi ichipaepema tea peedamẽrá. 35Mãɨne chi uva k'ãenane mimiapataɨrãpa chi ichi pae mimiapataɨrã jitadak'ari; aba jok'aesidama, aba peasidama mãɨnepa aba mawarapa bat'asidama. 36Mãɨya bak'ari chi chiparipa mãicha waapẽarã mimiapataɨrã peesima. Mãɨrã chi naa wãnana k'aepẽra chi chok'ará wãsidama. Maamina chi uva k'ãenane mimiapataɨrãpa mãɨ naena oodada jĩra oosidama mãɨrã ome.

37»Mãɨ k'aadea chi chiparipa mãicha ichi warra ãchimá peesima. Mãɨ nãɨya k'ɨ̃risiasima: “Mɨ warra wap'eadai p'anɨék'ãra” asima. 38Maamina ãchia mãɨ warra unusidaɨde ara ãchi tuaba pedea para beesima: “Jãɨpa chi ak'õre piuk'ari, ichia ne uru bada ãarea jɨ̃aipɨ. ¡Mãɨpuru ichi peadaipɨ! Mãɨya nãɨ ĩjũa tachi pae beeipɨ”. 39Ara mãɨne chi warra jitadak'ari, chi uva k'ãenanepema ateewãnak'ari peasidama. 40Jãɨ chi chipari cherude ichi uva k'ãenane mimiapataɨrã ome ¿k'ãre ooima?

41Mãɨne p'aarerã chi mãɨrã chaarearãpa mãɨnepa judiorã chaarearã pida nãɨya p'anoosidama:

—Ichia mãɨ ẽpẽerã k'achia berã sõchupuriawẽa peak'ari, waapẽarã ẽpẽrarã ome pedea auipɨ ichi uva k'ãena ak'ɨdamẽrá. Mãɨ ẽpẽrarãpa ichiá uva teadai p'anɨt'a mãɨ chauk'ari teadaipɨ.

42-43Mãɨne Jesupa ãchiá jarasima:

—Ara mãɨya Tachi Ak'õrepa mãra k'aepẽra ẽpẽrarã awaraɨrãt'u ichi juade ua baipɨ. Mãɨrãpuru ichia k'ɨ̃ria bɨ oodaipɨ. Mãrapa ¿Tachi Ak'õre pedea eda jaradawẽk'ãra? Nãɨya jara bɨma:

“Chi te oopataɨrãpa mawara amaanana pada, mãɨ mawara chi atepe piipará beesima.

Nãɨ Tachi Chiparipa mãɨya ooda pẽra tachimá minachia pia beesima”.#Salmo 118:22-23.

44Paritua mãɨ mawara ɨ̃rɨ ẽpẽra baesira abaeda ãarea ãriipɨ, mãɨnepa chi mawara abaɨ ɨ̃rɨ baesira mãɨ ẽpẽra perp'et'aipɨ.#21:44 Griego pedeade chi eda waapẽarã k'art'ade mãɨ versículo newẽma. Mawara. Isaía 8:14-15; Daniel 2:34-35; 2:44-45.

45P'aarerã chi mãɨrã chaarearãpa mãɨnepa p'ariseorã pida mãɨ jarateada ũrisidaɨde k'awasidama Jesupa ara ãchi k'orea pedea basima. 46Mãɨpuru ãchia Jesú jita k'ɨ̃ria p'anasidama. Maamina p'uurudepema ẽpẽrarã wap'ea p'anɨ pẽra itu bɨsidama. P'uurudepemarãpa k'ɨ̃risia p'anasima Jesú Tachi Ak'õre pari pedeaparí.

Currently Selected:

Mateo 21: tdc

Highlight

Copy