Mateo 24

Tachi Ak'õre te minachia bɨ ãrinai pada k'orea Jesupa jarada

Marco 13:1-23; Luca 21:5-24

1Jesú Tachi Ak'õre te minachia bɨ edariipa tajatá wãru pasima. Mãɨne ichi ome p'ɨrrɨapataɨrã ichi orrobari chedak'ari jarasidama:

—Ak'ɨse Tachi Ak'õre te minachia bɨ mãɨnepa te k'ait'a be pi-ia k'edema.

2Mãɨne Jesupa ãchiá jarasima:

—Ãjã, mãrapa unu p'anɨ pia k'edema. Maamina piarã mɨa jararuma: nãɨ mawara p'ãnana pada ãarea ãriipɨ.

3Jesú Olivo eyade suak'abari baside ichi ome p'ɨrrɨapataɨrã ichimá wãnak'ari ãchi tuaba nãɨya idisidama:

—Taiyá jarase, Tachi Ak'õre te minachia bɨ ¿sãapae mãɨ ãriima? ¿K'ãrenepa k'awadaima pɨ cheit'a? Mãɨnepa ¿k'ãrenepa k'awadaima mãɨ jõi ewari k'ait'a parude?

4Jesupa p'anoosima:

—Jĩrak'aua nipat'ɨ abaɨa pida mãra seapiemaapa. 5Chok'araɨrãpa jaradaipɨ: “Mɨ Tachi Ak'õrepa Tachi K'aripaparí teai jara bada”. Mãɨya ẽpẽerã minachia ãarea seadaipɨ.

6P'uuru aba bɨ awaraɨ ome k'ĩruupik'a nɨbɨ mãɨnepa mãɨ k'ĩruupik'a nɨbɨ ũriutade, p'erarãt'ɨ. Mãɨ jõma mãɨyai bɨma. Maamina nãɨ ewari waidi paiwẽma. 7Ĩjũa aba bɨ ĩjũa awaraɨ ome k'ĩruupik'a nɨbaipɨ. Ichiaba tua abaɨdepema poro jũra jɨ̃parí jɨ̃ bɨ tua awaraɨdepema poro jũra jɨ̃parí jɨ̃ bɨ ome k'ĩruupik'a nɨbaipɨ.#24:7 Griego pedeade chi eda waapẽarã k'art'ade ichiaba nãɨya bɨ bɨma: Piawẽa bai wawaria pak'oadaipɨ. Tuacha jarra minachia oodaipɨ mãɨnepa iurumia minachia wãipɨ. 8Maamina mãɨ ãarea chi ɨ̃rapuru ãpia minachia mĩanaidepemapɨ, wẽra warra p'ua bɨ jĩra.

9»Mãɨ ewaride ẽpẽrarãpa mãra jitadak'ari teadaipɨ mĩapidak'ari peadamẽrá. Mɨne ĩjãa p'anɨ k'orea jõmãɨrãpa mãra unuemaanaipɨ. 10Mãɨ k'orea ẽpẽrarã chok'araɨrãpa mɨne ĩjãa p'anɨt'a itu bɨdaipɨ. Mãɨne chi jitapidaipɨ mãɨnepa chi unuemaanaipɨ. 11Tachi Ak'õre pari pedeapataɨ chi piarãwẽa berã chedaipɨ. Mãɨrãpa ẽpẽrarã chok'ará seadaipɨ. 12Mãɨya mãɨ atepe nemietá oodai pẽra, ẽpẽrarã chok'araɨrãpa waapẽarã waa k'ɨ̃ria uru p'ananaiwẽma. 13Maamina chi k'aadepema ewari parudea mɨne wapida ĩjãa p'anɨ itu bɨdaepɨra, Tachi Ak'õrepa mãɨ k'aripaipɨ ichi ome chok'ae p'ananamẽrá. 14Mãɨne chi pedea pia Tachi Ak'õrepa ichidirã ichi juade ua bɨ k'orea jõma nãɨ ĩjũane jaradaipɨ p'uuru becha ũrinamẽrá. Mãɨya bak'aripuru nãɨ ewari jõipɨ.

15-16»Tachi Ak'õre pari pedeaparí Danielpa k'art'ade bɨsima Tachi Ak'õre te minachia bɨde, eda chi pia bɨ tejãne, abaɨpa chi nemietá Tachi Ak'õrepa k'ɨ̃riak'aɨ bɨipɨ.#24:15-16 Griego Antioco Epip'aneopa Tachi Ak'õre te minachia bɨde nemietá bɨsima Jesú t'õnai naena. Maamina Jesupa jarasima mãɨ Antiocopa ooda jĩra mãicha mãɨyait'a. Waapẽarãmá Jesupa jarada piarã mãɨyasima romanepemarãpa Jerusalén p'uuru mãɨnepa Tachi Ak'õre te minachia bɨ ãyo 70de jõma ãrisidaɨde. Waapẽarãmá jara bɨma chi ẽpẽra k'achia bɨpa mãɨya ooit'a. 2 Tesalonicense 2:3-10. Mãɨnepa waapẽarãmá Jesupa jarada k'aadeapema ewaride mãɨyaipɨ. Daniel 9:27; 11:31; 12:11. (Chi k'art'a eda jara bɨpa k'ãre jara bɨt'a k'awai bɨma). Mãrapa mãɨ unuutade Judea tuade berã eyadea mĩruwãnai p'anɨma. 17Mãɨne ẽpẽra ichi te ɨ̃rɨ bɨ ichi tede eda wãiwẽa bɨma ne ateewãi k'orea. 18Chi ne uu ĩjũane bɨpa ichi neet'á ɨ̃rɨ jɨ̃parí jĩitea atade wãiwẽa bɨma. 19Mãɨ ewaride wẽrarã biak'oa berã mãɨnepa warra juto ua berã chupuria p'aneenaipɨ. 20Tachi Ak'õrea ɨt'aa chiidit'ɨ ewari ewãrapiemaapa mãra mĩruwãutade, wa mimianak'apɨ́ ewaride baepiemaapa. 21Mãɨ ewaride ẽpẽrarã minachia chupuria mĩanaipɨ. Tachi Ak'õrepa nãɨ ĩjũa oosiedapema ẽpẽrarã mãɨ jĩra atepe mĩapik'a pasima, ichiaba mãɨya bak'ari waa ara mãɨ jĩra mĩanaiwẽma. 22Tachi Chiparipa mãɨ ewari edá baepiépara mi ãpia pida ẽpẽra baiwẽ pasima. Maamina ichia mãɨ ewari edá baepisima, ichia jɨrɨ atada ẽpẽerã k'orea.

23»Mãɨ ewaride abaɨpa mãrá jaraipɨra: “Ak'ɨt'ɨ, Tachi Ak'õrepa Tachi K'aripaparí teai jarada nãma bɨma”, mãɨ ĩjãarãt'ɨ. Waapẽarãpa “chawa bɨade” aipɨra, mãɨ sida ĩjãarãt'ɨ. 24Mãɨ ewaride waapẽarãpa ara ãchi Tachi Ak'õrepa Tachi K'aripaparí teai jaradaade a jaradaipɨ. Ichiaba waapẽarãpa sea jaradaipɨ ãchi Tachi Ak'õre pari pedeapataɨade adaipɨ. Mãɨrãpa ẽpẽrarãpa ne p'ue oodak'apɨ́ waibɨa be oodaipɨ ẽpẽrarã seadai k'orea. Tachi Ak'õrepa jɨrɨ atadaɨrã sida p'ue seadaipara, ãchi sida seadai pasima. 25Jõma makɨɨ mɨa mãrá jarasima mãɨyai naena.

26»Mãɨpuru abaɨ pida mãrá jaraipɨra: “Ũrit'ɨ, Tachi Ak'õrepa Tachi K'aripaparí teai jarada ĩjũa pania newẽa bɨde bɨma”, jãmá wãrãt'ɨ. Waapẽarãpa jaraipɨra: “Ak'ɨt'ɨ, ichi nãma tede eda bɨma”, mãɨ ĩjãarãt'ɨ. 27Ẽpẽra Warra cheru jõmãɨrãpa pia ununaipɨ, pa p'up'ureaparí ɨmata ochiaparidepa ɨmata waa baewãparidea pia unupata jĩra. 28Ãkosi minachia chepatamá k'ak'ua piuda bari bɨt'a. Ara mãɨ jĩra jõmãɨrãpa k'awadaipɨ.

Ẽpẽra Warra chei bɨ k'orea jarateada

Marco 13:24-37; Luca 21:25-33; 17:26-30; 17:34-36

29»Ẽpẽrarã minachia mĩa p'ananak'ari ara mãɨya ɨmata p'ãrioipɨ. Jedek'o sida waa jẽrat'ĩuiwẽma. K'ãk'ãi pajãnepa baek'oadaipɨ. Ãarea pajãne be orek'oadaipɨ.#Isaía 13:9-10; 34:4; Ezequiel 32:7; Joel 2:10-11; 3:15. 30Mãɨne pajãne ne ununaipɨ. Mãɨ mɨ, chi Ẽpẽra Warra cherudepemapɨ. Mãɨ unuutade jõma nãɨ ĩjũane berã p'uuru jẽanaipɨ chi p'erapa.#Daniel 7:13-14; Zak'aria 12:10. Mɨ jɨ̃arane jua chaareadepa cheru mãɨnepa k'ĩrawãrea achiterrea bɨ ununaipɨ. 31Mãɨne ãnimara k'achu chaarude mɨa Tachi Ak'õrepa ɨt'aripa peedaɨrã tuacha wãpiipɨ Tachi Ak'õrepa jɨrɨ atadaɨrã tausia ará jeredamẽrá.

32»Higo bɨɨrɨ k'orea nepɨrɨda k'awat'ɨ. Chi pak'uru jua t'uk'u nɨbeek'ari k'irú cheparima. Mãɨnepa jõmãɨrãpa k'awa p'anɨma tãaraawẽa bɨde iu p'oait'a. 33Ara mãɨ jĩra mɨa jarada mãɨ ãarea unuutade k'awat'ɨ mɨ chei ewari ará pamaa bɨt'a 34Mɨa mãrá piarã jararuma: nãɨ ewaridepema ẽpẽrarã piudai naena mãɨ ãarea mãɨyaipɨ. 35Pajã mãɨnepa nãɨ ĩjũa jõipɨ, maamina mɨ pedea jõiwẽma.

36»Maamina abaɨ pida mãɨ ewari sãapae mãɨyait'a k'awadawẽma. Tachi Ak'õrepa ɨt'aripa peedaɨrã pida atua p'anɨma. Mɨ, chi Ẽpẽra Warra pida atua bɨma. Abapuru mɨ Ak'õrepuru mãɨ k'awa bɨma.#24:36 Mɨ, chi Ẽpẽra Warra pida atua bɨma. Mãɨ griego pedeade chi eda waapẽarã k'art'ade newẽma. 37Chi Ẽpẽra Warra chei ewari mãɨ Noé ewaride bada jĩra baipɨ.#Génesi 6:5-8. 38To piruii naena ẽpẽrarã nek'opachidama, netoparí topachidama, miak'ãipachidama mãɨnepa chi k'aurã k'ima teak'oapachidama. Mãɨya p'anapachidama aba Noé p'ãp'orro nepalá bɨde batoorudea. 39Ãchia p'ãp'orro chei k'orea k'awadak'a pasima. Maamina piarã cheside ãchi ãarea todepa ãarea piusidama.#Génesi 7:6-24. Chi p'ãp'orro ara mãɨya cheda jĩra mɨ, chi Ẽpẽra Warra mãɨya cheipɨ. 40Mãɨ ewaride ẽpẽra ume ãchi ĩjũane mimia p'anɨne mɨ, chi Ẽpẽra Warrapa aba ateewãipɨ maamina chi abaɨ ameeipɨ. 41Ichiaba wẽra ume k'ũrumane trigo bamaa p'ananaipɨ. Aba ɨt'aa ateewãipɨ; chi abaɨ ameeipɨ.

42»Mãɨpuru tau pará p'anat'ɨ atua p'anɨẽra sãapae chei machi Chipari. 43Nãɨ k'awat'ɨ: te chiparipa nechɨaparí sãapae chei k'awa bɨpara, k'ãiwẽa bai pasima tede eda wãpiemaapa. 44Ara mãɨ jĩra mãra sida tau pará p'anat'ɨ. Mãrapa mɨ, chi Ẽpẽra Warra chei atua p'anɨne cheipɨ.

Mimiapataɨrã ume p'anɨ k'orea jarada

Luca 12:41-48

45»Te chipari pae pari mimiaparí k'ɨ̃risia k'awa bɨpa jĩp'a oopari jĩra beat'ɨ. Ichi chiparipa waapẽarã ichi pae pari mimiapataɨrã ichi juade bɨsima ewari ará parude nek'opi bamẽrá. 46Chi te chipari pae pari mimiaparipa mãɨya oo bɨt'a ichi chiparipa unune cheipɨra, ichi sõpia baipɨ. 47Mɨa piarã jararuma: chi chiparipa ãarea ichia uru bɨt'a mãɨ ichi pae pari mimiaparí juade bɨipɨ. 48Maamina mãɨ mimiaparí sõk'achia baipɨra, ichi sõne “mɨ chipari tãaraayane” aipɨ. 49Mãɨne ichia chi waapẽarã mimiapataɨrã jok'ae baipɨ mãɨnepa piu nipapataɨrã ome nek'o beek'ari it'ua to baipɨ. 50Abaeda ichi chipari chei k'ɨ̃risiawẽa bɨde ara mãɨya bɨde cheipɨ. 51Maapae chi chiparipa minachia ɨtɨak'ari chi pia jĩra berã ome eda jɨ̃a nɨbɨpiipɨ. Mãma ãareaɨrã jẽa p'ananaipɨ mãɨnepa p'uapa k'ida k'ɨterrea p'ananaipɨ.

Currently Selected:

Mateo 24: tdc

Highlight

Copy