Mateo 27

Juda piuda

Hecho 1:18-19

1Tap'ededa ãarea p'aarerã chi mãɨrã chaarearã mãɨnepa judiorã chi mãɨrã chaarearã pedea ausidama Jesú peapidai k'orea. 2Maapae jɨ̃nak'ari, ichi Romanepema ẽpẽra Poncio Pilato apataɨmá ateewãsidama. Mãɨ Pilato Judea tuadepema chi poro chaarea bɨ pasima.#27:2 Pilato. Romanepemarã minachia k'awa bɨ Tiberio apataɨpa Pilato Judea tuadepema minachia k'awa bɨt'a bɨsima ãyo 26—36. Chi judiorã chaarearãpa Jesú Pilatomá ateewãsidama ãchia chi eda jɨ̃a nɨberã p'ue peadaiwẽa p'anasi pẽra. Aba romanepemarãpa mãɨya ɨtɨa p'anapachidama.

3Mãɨne Judapa k'awasima Jesú peadait'a. Ichia jitapi bada pẽra minachia sõp'uasima. Ara mãɨne ichia treinta erreara atada p'aarerã chi mãɨrã chaarearãmá mãɨnepa judiorã chaarearãmá jĩitea teade wãsima. 4Ãchiá jarasima:

—Mɨa ẽpẽra nepɨra newẽa bɨ jitapida pẽra nemietá oosima.

Mãɨne ãchia jarasidama:

—¿Taimá mãɨ sãima? Mãɨ porepɨ.

5Maapae Judapa chi erreara Tachi Ak'õre te minachia bɨde eda bat'a peesima. Maapae mãmãɨpa wãk'ari itu jɨ̃k'aradepa obɨɨrɨ jɨ̃k'ari piusima. 6Juda wãk'ari p'aarerã chi mãɨrã chaarearãpa mãɨ erreara jɨrɨp'edak'ari jarasidama: «Nãɨ erreara Tachi Ak'õrea teadada erreara ome p'ue bɨdaiwẽma, ẽpẽra peapidai k'orea p'aadada pada pẽra».

7Mãɨ k'orea pedea audak'ari mãɨ errearadepa ĩjũa atasidama ẽpẽra tua awaraɨdepema piudak'ari awara t'ɨbaridai k'orea. Mãɨ ĩjũa Chok'o K'aparí Ĩjũa apachidama. 8Maamina mãɨ ewaridepa naa «Oa Ĩjũa» apatama. 9Mãɨ mãɨyasima Tachi Ak'õre pari pedeaparí Jeremiapa jarada jĩra. Nãɨya jarasima:

«Ãchia erreara tau treinta jitasidama. Mãɨ erreara neepɨa bɨt'a israel ĩjũanepemarãpa ichi k'orea bɨ p'anasima.

10Mãɨ errearadepa ãchia chok'o k'aparí ĩjũa atasidama Tachi Chiparipa mɨá jarada jĩra».#Jeremia 18:1-3; 19:1-4; 32:6-7; Zak'aria 11:12-13.

Jesú Pilato k'ĩrari bada

Marco 15:1-5; Luca 23:1-5; Juan 18:28-38

11Mãɨne Jesú Pilato k'ĩrari basima. Pilatopa ichiá idisima:

—¿Pɨ piarã judiorã poro jũra jɨ̃parí jɨ̃ bɨk'ãra?

Jesupa p'anoosima:

—Ãjã, pɨa mãɨya jara bɨma.

12Mãɨne p'aarerã chi mãɨrã chaarearãpa mãɨnepa judiorã chaarearãpa ichia ne minachia k'achia oo bɨade asidama, maamina ichia p'anooé pasima. 13Mãɨpuru Pilatopa Jesua idisima:

—Ãchia ne minachia pedeamaa p'anɨma, pɨ nepɨra pará bɨade adai k'orea. ¿Mãɨ ũriwẽa bɨk'ãra?

14Maamina Jesupa pedea aba pida p'anooé pasima.#27:14 Pedea aba pida p'anooé pasima. Isaía 53:7. Mãɨpuru Pilatopa k'awa k'ɨ̃risiawẽa beesima.

Jesú peadai k'orea jaradada

Marco 15:6-20; Luca 23:13-25; Juan 18:38—19:16

15Ãyocha judiorãpa mãɨ arapaapataɨ ewari oo p'anɨne, Pilatopa ẽpẽra aba eda jɨ̃a nɨbɨ ewa peepachima, mãɨ chi p'uurudepema ẽpẽerãpa idiutat'a. 16Mãɨ ewaride romanepemarãpa aba eda uru jɨ̃a nɨbɨ uru p'anasidama, Barrabá apataɨ. Ẽpẽrarã chok'araɨrãpa mãɨ Barrabá t'ɨ̃ ũri p'anapachidama. 17-18Pilatopa k'awa basima ãchia Jesú jitapi p'anana ichi unuemaa uru p'anananeepuru. Mãɨpuru chi ẽpẽrarã minachia cheepɨrɨ nɨbɨa idisima:

—¿K'ai mãrapa k'ɨ̃ria p'anɨma mɨa k'ẽet'aamẽrá: Barrabá wa Jesú, mãɨ Tachi Ak'õrepa Tachi K'aripaparí teai jaradamanaɨt'a?#27:17-18 Griego pedeade chi eda waapẽarã k'art'ade Barrabá k'aepẽra Jesú Barrabá bɨ bɨma.

19Pilato ẽpẽrarã nepɨra ak'ɨparide suak'abari beeside, chi k'imapa nãɨ pedea ichimá jara peesima: «Jãɨ ẽpẽra jĩp'a bɨ k'ẽet'aase. Idi ichi ome k'ãmok'araada pẽra mɨ minachia wap'ea bɨma».

20Mãɨne p'aarerã chi mãɨrã chaarearãpa mãɨnepa judiorã chaarearãpa chi minachia cheepɨrɨ nɨbɨa idipade asidama Pilatoa Barrabá k'ẽet'aapii mãɨ pari Jesú peadamẽrá. 21Mãɨya p'anɨne Pilatopa chi minachia nɨbɨa idisima:

—Nãɨ umenepema ¿chi sãɨ mɨa k'ẽet'aai k'ɨ̃ria p'anɨma?

Ãchia Barrabá k'ẽet'aapade asidama.

22Pilatopa idisima:

—Mãɨyara mɨa ¿k'ãret'a ooima Jesú ome, chi Tachi Ak'õrepa Tachi K'aripaparí teai jaradamanaɨt'a?

Jõmãɨrãpa jarasidama:

—¡K'urusude barijira bɨk'ari peapise!

23Pilatopa idisima:

—¿K'ãre k'orea mãɨya ooima? Ichia ¿k'ãre nemietá oosima?

Mãɨya pedea bɨde ãchia ara mãɨ wariara ɨbɨa bia para beesima:

—¡K'urusude barijira bɨk'ari peapise!

24Mãɨya p'anɨne Pilatopa k'awasima ẽpẽrarãpa ichi pedea ĩjãanawẽa p'anasit'a. Mãɨ awara unusima ẽpẽrarã minachia piuk'a nɨbɨt'a. Maapae jõmãɨrã k'ĩrari paniapa ichi jua sɨɨk'ari jarasima:

—Nãɨ ẽpẽra jĩp'a bɨ peauta k'orea mɨ nepɨra pará beeiwẽma.#27:24 Jĩp'a bɨ. Mãɨ griego pedeade chi eda waapẽarã k'art'ade newẽma. ¡Mãɨt'u machi nepɨrapɨ!

25Mãɨne ãareaɨrãpa p'anoosidama:

—¡Mãɨyara tai mãɨnepa tai warrarã nepɨra pará p'ananaipɨ ichi piuda k'orea!

26Maapae Pilatopa Barrabá k'ẽet'aasima. Maamina ichi papaká berã́ jarasima Jesú soapa p'edak'ari k'urusude barijira bɨk'ari peadamẽrá.

27Ara mãɨne Pilato papaká berãpa Jesú ãchi te choma Pretorio apataɨdea ateesidama. Mãma waapẽarã papaká berã t'ɨ̃nak'ari ichimá jũranak'ari orrobarisidama. 28Maapae Jesú neet'á wẽanak'ari k'ak'ua ɨ̃rɨ jɨ̃pataɨ p'urea bɨ jɨ̃pisidama. 29Poro jũra jɨ̃parí ɨɨrɨ k'ada ichi porode jɨ̃pisidama ichiaba ichi juaraara pak'uru teasidama poro jũra jɨ̃parí jɨ̃ bɨpa uru bapari jĩra. Maapae ichi k'ĩrari sĩraporode k'op'aneenak'ari, oo uru p'ananak'ari jarasidama: «¡Minachia pia bɨma, chi judiorã poro jũra jɨ̃parí jɨ̃ bɨt'a!»

30Maapae taba idupachidama ichiaba pak'uru ichi juade bɨ ẽemarinak'ari poromá uupachidama.#Isaía 50:6. 31Mãɨya ichi oo uru p'ananak'ari ãchia jɨ̃pidada wẽasidama. Maapae ichia jɨ̃ bada mãicha jɨ̃pidak'ari k'urusude barijira bɨde ateewãsidama peadai k'orea.

Jesú k'urusude barijira bɨdada

Marco 15:21-32; Luca 23:26-43; Juan 19:17-27

32Mãmãɨpa wãsidaɨde papaká berãpa ẽpẽra Simón apataɨ unusidama. Ichi Cirene p'uurudepema pasima. Ãchia mãɨ Simonoa Jesú k'urusu uapisidama. 33Arí pasidama ĩjũa Gólgota apataɨmá. Gólgota jara k'ɨ̃ria bɨma «Tachi Poro Bɨɨrɨ». 34Mãma uvaba asia hiel apataɨdea p'oerada Jesua teasidama mãɨ p'ua choamẽrá, maamina to ajorok'ari k'ɨ̃riaé pasima.#Salmo 69:21.

35Maapae papaká berãpa Jesú k'urusude barijira bɨsidama. Mãɨrãpa ne jemenasidama k'awadai k'orea k'aipa chi neet'á atai. [Mãɨya oosidama Tachi Ak'õre pari pedeaparipa jarada mãɨya baemẽrá. Nãɨya jarasima: «Mɨ neet'á ãchicha jedasidama. Ne jemenasidama k'awadai k'orea k'aipa mɨ neet'á atai».]#27:35 Griego pedeade chi eda waapẽarã k'art'ade pedea corchetede bɨ newẽma. Salmo 22:18. 36Maapae suak'abari p'aneenak'ari ak'ɨ p'aneesidama abaɨ pida Jesú k'aripade chepidaemaapa.

37Pak'uru p'ep'edeade nãɨ pedea bɨdak'ari, mãɨ barijira bɨsidama Jesú poro ɨ̃rɨ k'urusude, k'awapidai k'orea ichi k'ãre k'orea peautat'a: «Nãɨ Jesú, chi judiorã poro jũra jɨ̃parí jɨ̃ bɨpɨ». 38Ichiaba nechɨapataɨ mietá be ume Jesuk'á k'urusude barijira bɨsidama, aba ichi juaraari, aba ichi juawieri. 39Mãɨne waapẽarã ichi k'ait'a wãnak'ari ãchi poro p'ɨp'ɨrɨadak'ari Jesua nãɨya piawẽa pedeapachidama:#Salmo 22:7; 109:25.

40—Pɨa Tachi Ak'õre te minachia bɨ ãrik'ari ewari ũpeaɨde mãicha p'ue ooipɨra, ¡piarã ara pɨchi tuaba k'aripase! Pɨ Tachi Ak'õre Warrapɨra, jãɨ k'urusudepa edá chese.

41Ara mãɨya p'aarerã chi mãɨrã chaarearãpa, Moisepa bɨda jarateapataɨrãpa mãɨnepa judiorã chaarearã pida Jesú oo uru p'anɨpa nãɨya jarapachidama:

42—Ichia waapẽarã k'aripasima, maamina ara ichi tuaba p'ue k'aripawẽma. Ichi Israeldepema poro jũra jɨ̃parí jɨ̃ bɨpɨra, nãɨena jãɨ k'urusudepa edá chese. Mãɨyara ĩjãanaipɨ. 43Ichia k'ɨ̃risia bɨma Tachi Ak'õre ichi ome bɨt'a. ¿Ichi Tachi Ak'õre Warraade aé pasik'ãra? Mãɨya bɨpɨra Tachi Ak'õrepa ichi piarã k'ɨ̃ria bɨpɨra, ara nãɨena k'aripai pia bɨma.#Salmo 22:8.

44Ichiaba chi nechɨapataɨ mietá be ichi k'ait'a k'urusude barijira bɨdada pida ara mãɨ jĩra k'achia pedeasidama.

Jesú k'urusude piuda

Marco 15:33-41; Luca 23:44-49; Juan 19:28-30

45Ɨmat'iip'aɨdepa waa ɨmata baarea ĩjũa ãarea p'ãrio nɨbeesima.#Amó 8:9-10. 46K'ewará hora ũpea pak'ari Jesupa jĩk'ua biasima:

—¿Eli, Eli, lama sabactani?

Mãɨ arameo pedeade jara k'ɨ̃ria bɨma: «Mɨ Ak'õre, mɨ Ak'õre ¿k'ãre k'orea mɨ tuaba ameesima?»#Salmo 22:1.

47Mãɨ pedea ũrisidaɨde chi eda waapẽarã mãma k'ait'a p'anɨpa jarasidama:

—Ichia Elía t'ɨ̃maa bɨma.

48Ara mãɨne ẽpẽra aba p'ira wãk'ari, uvaba jɨjɨyá motá bɨde bek'eak'ari pak'urude ook'ari Jesua teasima tomẽrá.#Salmo 69:21. 49Maamina waapẽarãpa jarasidama:

—Nɨse, ak'ɨdaipɨ Eliapa k'aripade chei k'awadayá.

50Mãɨya bɨde Jesú mãicha jĩk'ua biak'ari k'ĩrawẽasima. 51Ara mãɨne chi Tachi Ak'õre te minachia bɨde eda p'aru eatɨa jira bɨ esa ɨt'ɨpa edá k'õawãsima. Ichiaba iurumia wãsima.#27:51 P'aru eatɨa jira bɨ. Éxodo 26:31-33; Hebreo 9:1-15 Iurumia wãsima. Amó 8:8-10. Mãɨpa mawara nepalá t'oawãk'oasima. 52P'ẽya te uriade piudada pada t'ɨbaridada ewawãk'oasima. Mãɨne Tachi Ak'õrene ĩjãa berã piudada chok'ará chok'ae p'irabarik'oasidama. 53Ãchi beada uriadepa wãk'oasidama. Jesú chok'ae p'irabarik'ari Tachi Ak'õre pae bɨ p'uuru Jerusalenea wãsidama. Mãma chok'araɨrãpa ãchi unusidama.

54Romanepema papaká berã chi mãɨrã chaarea bɨpa, ichi papaká berã pida Jesú ak'ɨ p'anasidama abaɨ pida k'aripapidaemaapa. Maamina iurumiapa mãɨyak'oaru unusidaɨde minachia p'eradak'ari jarasidama:

—Piarã nãɨ ẽpẽra Tachi Ak'õre Warra pasima.

55Mãɨne chok'ará wẽerãpa t'ɨmɨɨpa ak'ɨ tuanasidama. Jesú Galileadepa cheside ichi k'aripadayá nipapachidama. 56Ãchi t'ãena María Magdalena mãɨnepa chi abaɨ María basima. Mãɨ María Santiago, José nae pasima. Ichiaba Zebedeo k'ima pasima.

Jesú t'ɨbaridada

Marco 15:42-47; Luca 23:50-56; Juan 19:38-42

57K'iupodode ẽpẽra erreara minachia uru bɨ José apataɨ chesima. Mãɨ José Arimatea p'uurudepema pasima.#27:57 Arimatea p'uuru. Hebreo pedeade mãɨ p'uuru Ramá wa Ramataim t'ɨ̃ jarapachidama. 1 Samuel 1:1. Ichi sida Jesú ome p'ɨrrɨapachima. 58Ichi Pilatomá wãk'ari Jesú k'ak'ua idisima t'ɨbarii k'orea. Maapae Pilatopa teapisima. 59Ara mãɨne Josepa Jesú k'ak'ua atak'ari poroba t'oorro chiwidipa t'uyasima. 60Maapae p'ẽya uria chiwidi k'orodade eda bɨsima. Chi uria mãɨ Josedé pasima. Maapae mawara waibɨa bɨt'a chi uriadea pɨrabari ateewãk'ari jɨ̃ap'et'a nɨbak'ari wãsima. 61Jesú t'ɨbarisidaɨde María Magdalena, abaɨ María ome arí suak'abari p'anasidama.

Pilatopa papaká berã́ Jesú t'ɨbarida ak'ɨpida

62Norema mimianak'apɨ́ ewari pasima. Mãɨne p'aarerã chi mãɨrã chaarearã mãɨnepa p'ariseorã tausia Pilatomá wãnak'ari jarasidama:

63—Tai chipari, taipa k'ɨ̃risia p'anɨma jãɨ ẽpẽra seayá bɨ wapida chok'ae baside nãɨya jarasima: “Mɨ ewari ũpeaɨde chok'ae p'irabariipɨ”. 64Mãɨpuru ichi t'ɨbarida ewari ũpea minachia ak'ɨpise ichi ome p'ɨrrɨapataɨrãpa teamasi chedak'ari ichi k'ak'ua chɨapidaemaapa. Mãɨya ãchia p'ue jaradaiwẽma p'uurudepemarã́ ichi piu bada chok'ae p'irabarisit'a. Ãchia ichi chok'ae p'irabarisiade adaipɨra, ichia naa sea ooda k'aepẽra mãɨ seadepa wariara atepe seadaipɨ.

65Pilatopa ãchiá jarasima:

—Cha p'anɨ papaká berã ichi t'ɨbaridaadamá ateewãnak'ari pia ot'eapit'ɨ.

66Ara mãɨne papaká berãpa chi p'ẽya te uria wawá jõat'ɨdak'ari, mãɨ mawara ɨ̃rɨ tauchaa bɨsidama abaɨpa ewauta k'awadai k'orea. Maapae ot'ea p'aneesidama.

Currently Selected:

Mateo 27: tdc

Highlight

Copy